Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 102

Tomoraa te arii i Ierusalema na nia i te hoê fanau‘a asini

Tomoraa te arii i Ierusalema na nia i te hoê fanau‘a asini

MATAIO 21:1-11, 14-17 MAREKO 11:1-11 LUKA 19:29-44 IOANE 12:12-19

  • TOMORAA IESU I IERUSALEMA MA TE HANAHANA

  • TOHURAAHIA TE HAAMOURAA O IERUSALEMA

Ananahi a‘e, i te Tapati 9 no Nisana, faarue ihora Iesu e ta ’na mau pǐpǐ i Betania e haere atura i Ierusalema. A piri atu ai ratou i Betephage i nia i te mou‘a Oliveta, na ô atura Iesu i e piti o ta ’na mau pǐpǐ:

“A haere i roto i tera oire iti i mua ia orua, i reira orua e ite ai i te hoê asini tei taamuhia e ta ’na fanau‘a i pihai iho mai. A tatara ïa e a putô mai. Ia parau mai te hoê taata i te tahi mea, a parau atu: ‘Te hinaaro mai ra te Fatu.’ E tuu oioi ïa oia i na animara.”—Mataio 21:2, 3.

Aita te mau pǐpǐ i taa e e parau tohu teie faaueraa a Iesu. I muri a‘e râ e taa ’i ia ratou te tupuraa o ta Zekaria parau tohu. Ua tohu oia e e tomo te Arii fafauhia a te Atua i Ierusalema ma te haehaa “i te parahiraa i nia i te asini, e te pinia, te fanau‘a o te asini.”—Zekaria 9:9.

I te taeraa na pǐpǐ i Betephage e tatararaa i te asini e ta ’na fanau‘a, ui maira te feia i pihai iho mai: “Eaha orua e tatara ’i i tena [fanau‘a] asini?” (Mareko 11:5) I to ratou râ faarooraa e no te Fatu teie na animara, vaiiho atura ratou ia putôhia ia Iesu ra. Tuu a‘era te mau pǐpǐ i to ratou ahu tapo‘i i nia iho i te asini e ta ’na fanau‘a, parahi ihora râ Iesu i nia i te fanau‘a asini.

Rahi noa maira te taata a faahoro noa ’i Iesu i te asini i Ierusalema. Vauvau a‘era e rave rahi i to ratou ahu i nia i te purumu, a tâpû ai te tahi atu i “te mau amaa raau” e a vauvau atu ai i nia i te purumu. Tuô a‘era ratou: “A faaora na ia ’na! Ia haamaitaihia tei haere mai ma te i‘oa o Iehova! Ia haamaitaihia te Faatereraa arii a to matou metua ra o Davida e fatata mai ra!” (Mareko 11:8-10) Aita te mau Pharisea i au i teie parau, na ô maira râ ia Iesu: “Orometua, tama‘i na i ta oe mau pǐpǐ.” Pahono atura Iesu: “Te parau atu nei au: Ia mamû noa ratou, na te ofai ïa e tuô mai.”—Luka 19:39, 40.

A ite ai Iesu ia Ierusalema, ta‘i ihora oia e na ô atura: “Ahiri iho â ïa oe i ite i teie mahana e nafea e noaa ’i te hau. I teie nei râ, ua hunahia te reira i to mata.” E roohia iho â to Ierusalema i te utua no to ratou faaroo ore. Tohu ihora Iesu: “E aua . . . to oe mau enemi ia oe i te pou oeoe, a haaati atu ai ia oe. E haamou u‘ana ’tu ai ratou ia oe e to mau tamarii. E ore te hoê ofai i roto i teie oire e vaiihohia i nia iho i te tahi.” (Luka 19:42-44) Mai ta Iesu i parau, ua haamouhia Ierusalema i 70.

I to Iesu tomoraa i Ierusalema, “te arepurepu ra te oire taatoa e te uiui ra te taata: ‘O vai teie?’” E te parau noa ra te nahoa: “O te peropheta Iesu no Nazareta i Galilea!” (Mataio 21:10, 11) Ua faaite te feia tei ite ia Iesu i te faatiaraa mai ia Lazaro i taua semeio ra. Autâ a‘era te mau Pharisea e aita ratou i manuïa, e na ô a‘era te tahi i te tahi: “Te pee ra to te ao atoa ia ’na.”—Ioane 12:18, 19.

Mai ta ’na i matau i te rave i Ierusalema, haere ihora Iesu i te hiero e haapii i te taata. Faaaraara ihora oia i te mata o te matapo e faaora ihora i te pirioi. Inoino ihora te mau tahu‘a tiaau e papai parau i to ratou iteraa i ta ’na e rave ra e to ratou faarooraa i te mau tamaroa e tuô ra na roto i te hiero: “Te Atua e, te taparu nei matou ia oe ia faaora i te Tamaiti a Davida!” Ui maira ratou ia Iesu: “Te faaroo ra oe i ta ratou parau?” Pahono atura oia: “Aita anei outou i taio: ‘Ua faatupu oe i te arueraa na roto i te vaha o te mau tamarii rii e te mau aiû’?”—Mataio 21:15, 16.

Hi‘o atura Iesu i te mau mea atoa i roto i te hiero. Ua ahiahi ê na. Reva ’tura oia e ta ’na mau aposetolo. Hou te 10 no Nisana, ho‘i atura oia i Betania, i reira to ’na taotoraa i taua Tapati ra.