Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 101

Tamaaraa i te fare o Simona i Betania

Tamaaraa i te fare o Simona i Betania

MATAIO 26:6-13 MAREKO 14:3-9 IOANE 11:55–12:11

  • HO‘IRAA IESU I BETANIA, I PIHAI IHO I IERUSALEMA

  • NINIIRAA MARIA I TE MONO‘I NO‘ANO‘A I NIA I TO IESU UPOO E AVAE

Faarue ihora Iesu i Ieriko no te haere i Betania. E 20 kilometera te atea o teie tere na te hoê vahi haapauma mea fifi ia haere. Te faaea ra Lazaro e to ’na na tuahine i Betania, i te pae hitia o te râ o te mou‘a Oliveta e 3 kilometera ia Ierusalema.

Ua tae ê na e rave rahi ati Iuda i Ierusalema no te Pasa. Ua haere oioi mai ratou “no te tamâ ia ratou ia au i te peu a te ati Iuda.” Peneia‘e ua tapea ratou i te hoê tino pohe aore ra ua rave i te tahi atu mea a viivii atu ai ratou. (Ioane 11:55; Numera 9:6-10) Putuputu a‘era vetahi o tei tae oioi mai i te hiero, a uiui noa ’i e haere mai anei Iesu i te Pasa.—Ioane 11:56.

E aimârôraa rahi te tupu ra no nia ia Iesu. Te hinaaro ra te tahi mau aratai haapaoraa e haru ia ’na no te haapohe atu. Ua faaue hoi ratou e ia ite noa ’tu te tahi taata teihea roa Iesu, ia faaite atu ïa oia “ia haru hoi ratou ia ’na.” (Ioane 11:57) Ua tamata a‘ena teie mau aratai i te haapohe ia Iesu i muri iho i to ’na faatiaraa mai ia Lazaro. (Ioane 11:49-53) No reira vetahi i mana‘o ai eita Iesu e faura mai.

Ua tae Iesu i Betania i te Mahana pae, “e ono mahana hou te Pasa.” (Ioane 12:1) E haamata te hoê mahana apî (Sabati 8 no Nisana) i te toparaa mahana. Ua tae mai ïa o ’na hou te Sabati. Ia au i te ture a te ati Iuda, eita ta ’na e nehenehe e ratere na Ieriko mai i te Sabati, mai te Mahana pae i te toparaa mahana i te Mahana maa i te toparaa mahana. Eita e ore e ua haere Iesu i ǒ Lazaro, mai na mua ’‘e.

Titau maira Simona, e faaea atoa ra i Betania, ia Iesu e to ’na mau hoa, ia Lazaro atoa, no te hoê tamaaraa i te ahiahi Mahana maa. “E lepera [oia] na mua ’‘e,” ta Iesu paha i faaora te ma‘i. No te mea mea rave roa Mareta i te ohipa, o ’na te tuati no te mau manihini, a tâu‘a roa ’i Maria ia Iesu, a tupu atu ai te aimârôraa.

Iriti ihora Maria i te auvaha o te hoê mohina alabata nainai, “afa litera mono‘i no‘ano‘a, e naradi mau” to roto. (Ioane 12:3) Mea moni roa teie mono‘i, e 300 denari, piri ïa i te hoê matahiti ohipa! Ninii ihora Maria i te mono‘i i nia i to Iesu upoo e to ’na avae e tamǎrô atura i to Iesu avae i to ’na rouru. No‘ano‘a a‘era te fare taatoa.

Riri ihora te mau pǐpǐ e ui maira: “Eaha i haamâu‘ahia ’i teie mono‘i no‘ano‘a?” (Mareko 14:4) Tama‘i maira Iuda Isakariota: “No te aha teie mono‘i no‘ano‘a i ore ai i hoohia no e 300 denari, a horoa ’tu ai i te moni na te feia veve?” (Ioane 12:5) Aita Iuda e haapeapea ra no te feia veve. Na ’na e haapao ra i te afata moni e e eiâ noa na oia i te moni i roto.

Turu atura Iesu ia Maria, a na ô ai: “Eaha outou  e haapeapea ’i i teie vahine? E ohipa maitai ta ’na i rave no ’u. E vai noa mai hoi te feia veve i ǒ outou. O vau nei râ, e ore ïa e vai noa mai i ǒ outou. I to teie vahine niniiraa i te mono‘i no‘ano‘a i nia i to ’u tino, no te faaineine ïa ia ’u no to ’u hunaraa. Oia mau ta ’u e parau atu: I te mau vahi atoa e porohia ’i te parau apî oaoa e ati a‘e te ao nei, e faatia-atoa-hia ta teie vahine i rave ei mana‘oraa ia ’na.”—Mataio 26:10-13.

Hau atu i te hoê mahana o Iesu i Betania, e ua atutu te parau e to reira o ’na. Haere maira e rave rahi ati Iuda i ǒ Simona eiaha no te ite ia Iesu noa, ia Lazaro atoa râ ta Iesu i faatia mai te pohe mai. (Ioane 12:9) Opua a‘era te mau tahu‘a tiaau e haapohe ia Iesu e ia Lazaro atoa. No teie mau aratai haapaoraa, no to Lazaro faaho‘iraahia mai i te ora i tiaturi ai e rave rahi ia Iesu. Tera te ino mau!