Eaha to roto?

Tapura tumu parau

 PENE 123

Pureraa Iesu ma te oto rahi

Pureraa Iesu ma te oto rahi

MATAIO 26:30, 36-46 MAREKO 14:26, 32-42 LUKA 22:39-46 IOANE 18:1

  • IESU I TE Ô I GETESEMANE

  • RIRORAA TO ’NA HOU MAI TE TOPATA TOTO

Oti atura ta Iesu pure e ta ’na mau aposetolo haapao maitai. I muri iho i to ratou himeneraa no te arue i te Atua, haere atura ratou i te mou‘a Oliveta. (Mareko 14:26) Ua haere ratou i te pae hitia o te râ i te hoê ô parauhia Getesemane, ua matau Iesu i te haere i ǒ.

I to ratou iho â taeraa i teie ô tumu olive au maitai, vaiiho maira Iesu e va‘u o te mau aposetolo peneia‘e i te tomoraa. Na ô atura oia: “A parahi na outou i ǒ nei, e haere au i ǒ a‘e e pure ai.” Rave atura oia ia Petero, Iakobo e Ioane na muri ia ’na, e haere atura ratou i roto atu â i te ô. Haamata ihora oia i te horuhoru roa e parau atura: “E oto iti rahi to ’u. A parahi na outou i ǒ nei e a ara e o vau atoa.”—Mataio 26:36-38.

Faaatea rii atura Iesu, “topa turi ihora e pure atura i te Atua.” Eaha ta ’na i parau i te Atua i teie taime faufaa? Ua pure oia: “To ’u Metua, e tia ia oe te mau mea atoa, a hopoi ê atu na i teie au‘a. Teie râ, ia tupu to hinaaro eiaha to ’u.” (Mareko 14:35, 36) Te auraa anei e te otohe ra o ’na i te amoraa i ta ’na hopoia e hoo mai i te huitaata? E ere.

Mai te ra‘i mai, ua ite Iesu i te mauiui iti rahi o te feia tei haapohehia e te mau faehau Roma. I te fenua, o ’na te ahoaho ra e te mauiui ra. Aita ïa oia e tiai ru ra i tera huru pohe. Te mea mauiui roa ’‘e no ’na, te faainoraa ïa to ’na pohe mai te hoê taata ohipa ino i te i‘oa o to ’na Metua. I roto tau hora, e patitihia o ’na i nia i te hoê pou mai te hoê taata tei faaino i te Atua.

I muri iho i to ’na pure-maoro-raa, ho‘i maira Iesu i na aposetolo e ite ihora e te taoto ra ratou. Na ô atura oia ia Petero: “Aita iho â ïa i tia ia outou ia ara hoê noa ’‘e hora e o vau atoa? A vai ara e a tamau i te pure ia ore outou ia hema.” Ua taa ia Iesu e te hepohepo atoa ra na aposetolo, e e maororaa po. Na ô faahou atura oia: “E hinaaro iho â te aau, te tino râ, mea paruparu ïa.”—Mataio 26:40, 41.

Haere faahou atura Iesu e pure e ani a‘era i te Atua ia hopoi ê i “teie au‘a.” I to ’na ho‘iraa mai, ite faahou ihora oia e te taoto ra na aposetolo i te hoê taime mea faufaa hoi ia pure ratou ia ore ratou ia hema. I to Iesu paraparauraa ia ratou, aita ratou “i ite eaha te parau atu.” (Mareko 14:40) Haere faahou atura Iesu, te toru ïa o te taime, e tuturi ihora no te pure.

Te haapeapea roa ra Iesu ia faainohia te i‘oa o to ’na Metua i to ’na pohe mai te hoê taata ohipa ino. Te faaroo ra râ Iehova i te mau pure a ta ’na Tamaiti e tono maira i te hoê melahi e faaitoito ia ’na. Aita Iesu i faaea i te taparuparu i to ’na Metua, “tamau noa ’tura [râ] oia i te pure ma te u‘ana ’tu â.” E hepohepo iti rahi to ’na. E hopoia teimaha hoi ta ’na tei taaihia i to ’na iho ora e to te taata atoa e tiaturi i te Atua. Inaha, “riro atura to ’na hou mai te toto e topata ra i raro i te repo.”—Luka 22:44.

I to Iesu ho‘iraa mai i ta ’na na aposetolo i te toru o te taime, te taoto faahou ra ratou. Na ô  atura oia: “I te hoê taime mai teie outou e taoto ai e e haamâha ’i i to outou rohirohi! Inaha, ua fatata hoi te hora e tuuhia ’i te Tamaiti a te taata nei i te rima o te feia rave hara. A tia, mai haere ana‘e. A hi‘o, te fatata mai ra te taata e tuu ia ’u i to ’u mau enemi.”—Mataio 26:45, 46.