Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 106

Piti faahoho‘araa o te faaapu vine

Piti faahoho‘araa o te faaapu vine

MATAIO 21:28-46 MAREKO 12:1-12 LUKA 20:9-19

  • FAAHOHO‘ARAA O NA TAMAITI E PITI

  • FAAHOHO‘ARAA O TE FEIA FAAAPU VINE

I te hiero, aita ’tura i taa faahou i te mau tahu‘a tiaau e aratai ati Iuda e nafea ia pahono ia Iesu, i to ratou faahaparaa i te mana e rave ai oia i te mau mea. Mamû noa ’tura ratou. Horoa ’tura oia i te hoê faahoho‘araa o te faaite maitai i to ratou huru mau:

“E piti tamarii ta te hoê taata, haere atura oia i te matahiapo ra e na ô atura: ‘Ta ’u tamaiti, i teie mahana e haere oe i te faaapu vine e rave i te ohipa.’ Pahono maira te tamaiti: ‘Eita.’ I muri iho râ, tatarahapa ihora oia e haere atura. Tapiri atura te metua tane i te teina, e na reira atoa ’tura i te parau i te teina, o tei pahono mai: ‘E.’ Aita râ oia i haere. O vai o raua tei rave i te hinaaro o to ’na metua tane?” (Mataio 21:28-31) O te tamaiti matahiapo iho â ïa.

Na ô atura Iesu i te feia patoi: “Oia mau ta ’u e parau atu: O te mau titau tute e te mau vahine taiata te na mua ’tu ia outou i te ô i roto i te Faatereraa arii a te Atua.” I te omuaraa aita te mau titau tute e vahine taiata i tavini i te Atua. I muri a‘e râ, mai te tamaiti matahiapo, ua tatarahapa ratou, a tavini atu ai i te Atua. Mai te teina râ te mau aratai haapaoraa, e faahua tavini ra i te Atua. Parau atura Iesu: “Ua haere mai hoi Ioane [Bapetizo] ia outou ra ma te faaite i te e‘a o te parau-tia, aita râ outou i tiaturi ia ’na. Te mau titau tute râ e te mau vahine taiata, oia ïa. Outou râ o tei ite i te reira, aita ïa i tatarahapa a tiaturi atu ai ia ’na.”—Mataio 21:31, 32.

Faatia ’tura Iesu i te tahi atu faahoho‘araa no te faaite ïa e mea ino roa atoa te mau aratai haapaoraa aita e tavini ra i te Atua. Ua parau Iesu: “Ua tanu te hoê taata i te vine, aua ’tura, pao ihora i te hoê apoo taataahiraa vine, faatia a‘era i te hoê pare tiairaa, horoa tarahu atura i ta ’na faaapu i te tahi feia faaapu, e reva ’tura i te ara. I te tau ootiraa vine, tono ihora oia i te hoê tavini i te feia faaapu ia horoa mai ratou i ta ’na tuhaa vine. Haru a‘era te feia faaapu i te tavini, rutu ihora ia ’na e faaho‘i maira ia ’na ma te ore e horoa mai i te vine. Tono faahou atura te fatu i te tahi atu tavini, tupai ihora ratou i te upoo o taua tavini ra e faahaama ’tura ia ’na. Tono atura oia i te tahi â tavini, e taparahi pohe atura ratou i taua tavini ra. Mea rahi â ta ’na i tono atu, ua rutuhia vetahi e ua haapohehia te tahi atu.”—Mareko 12:1-5.

E taa anei i te feia e faaroo ra ta Iesu faahoho‘araa? Ua haamana‘o paha ratou i te parau faahapa a Isaia: “O taua ô vine a Iehova sabaota ra, o te utuafare ïa o Iseraela; e te mau taata no Iuda ra, o tana ïa ohi popou: e ua tiai hoi oia i te parau au, e inaha, o te faafao [aore ra parau-tia ore] tei itea.” (Isaia 5:7) I roto atoa i ta Iesu faahoho‘araa, o Iehova te fatu fenua, o te nunaa Iseraela te faaapu vine tei auahia e tei paruruhia e te ture a te Atua ia Mose. Ua tono Iehova i te mau peropheta no te haapii e no te tauturu i to ’na nunaa ia faatupu i te hotu maitai.

Ua rave ino râ e ua haapohe “te feia faaapu” i te “mau tavini” tei tonohia ’tu. Faataa ’tura Iesu: “E i te hopea, tono atura ïa te fatu vine i ta ’na tamaiti here i te feia faaapu, a na ô ai: ‘E faatura ratou i ta ’u tamaiti.’ Na ô a‘era râ taua feia faaapu ra te tahi i te tahi: ‘Teie te taata o te fatu i teie faaapu, mai haere ana‘e e haapohe ia ’na, a fatu atu ai tatou i teie faaapu.’ Haru a‘era ratou ia ’na, [e] haapohe ihora.”—Mareko 12:6-8.

Ui atura Iesu: “Eaha ta te fatu vine e rave?” (Mareko 12:9) Pahono maira te mau aratai haapaoraa: “No to ratou ino, e haapohe roa ïa oia ia ratou, a horoa tarahu atu ai i te faaapu vine i te tahi atu feia faaapu o te horoa ’tu i ta ’na tuhaa vine i te taime au.”—Mataio 21:41.

Na ratou noa iho â i faautua ia ratou iho, o ratou  atoa hoi “te feia faaapu” o ta Iehova “faaapu vine,” te nunaa Iseraela. Te hotu ta Iehova i tiai ia faatupu teie feia faaapu, o te faaroo atoa ïa i ta ’na Tamaiti, te Mesia. Hi‘o tia ’tura Iesu i te mau aratai haapaoraa e na ô atura: “Aita outou i taio a‘enei i teie parau tei papaihia: ‘Te ofai ta te feia patu fare i faarue, ua riro mai ïa ei ofai tihi. No ǒ mai te reira ia Iehova ra, e mea faahiahia roa no matou’?” (Mareko 12:10, 11) Na ô roa ’tura oia: “No reira vau e parau atu ai: E iritihia te Faatereraa arii a te Atua ia outou e e horoahia i te hoê nunaa o te rave i to te Atua ra hinaaro.”—Mataio 21:43.

Taa ihora i te mau papai parau e tahu‘a tiaau e “no ratou te faahoho‘araa ta [Iesu] i parau.” (Luka 20:19) Rahi roa ’tura to ratou hinaaro e haapohe ia ’na, te taata mau o te fatu i te faaapu. Aita râ ratou i tamata i te haapohe ia ’na i taua taime ra no to ratou mǎta‘u i te nahoa o te tiaturi ra e e peropheta Iesu.