Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 118

Mârôraa te mau aposetolo o vai te mea rahi a‘e

Mârôraa te mau aposetolo o vai te mea rahi a‘e

MATAIO 26:31-35 MAREKO 14:27-31 LUKA 22:24-38 IOANE 13:31-38

  • HOROARAA IESU I TE A‘ORAA NO NIA I TE TIARAA

  • TOHURAAHIA E PARAU PETERO AITA OIA I ITE IA IESU

  • NO TE HERE E ITEHIA ’I TE MAU PǏPǏ A IESU

I te po hopea e ta ’na mau aposetolo, e haapiiraa nehenehe o te haehaa ta Iesu i horoa ’tu ma te horoi i to ratou avae. Mea tano roa, e paruparu hoi to ratou. A haamori ai ratou i te Atua, te haapeapea noa ra ratou i te ite o vai te mea rahi a‘e. (Mareko 9:33, 34; 10:35-37) Faura faahou maira taua paruparu ra.

Tupu atura “te hoê aimârôraa rahi i rotopu ia ratou no te ite o vai te mea rahi a‘e.” (Luka 22:24) Eaha paha Iesu i te peapea a ite ai ia ratou ia tatama‘i faahou! Eaha ta ’na i rave?

Aita Iesu i tama‘i i te mau aposetolo no to ratou haerea, ua haaferuri râ ia ratou ma te faaoromai: “Te faatere ra te mau arii o te mau nunaa i te taata e te haavî atoa ra te feia parauhia Hamani maitai ia ratou. Outou râ, eiaha ïa e na reira. . . . O vai hoi te taata rahi a‘e, te taata e tamaa ra aore ra te taata e tavini ra?” Haamana‘o atura oia ia ratou i te hi‘oraa ta ’na i vaiiho noa na: “O vau nei râ, mai te taata ïa e tavini ra ia outou.”—Luka 22:25-27.

Noa ’tu to ratou huru tia ore, ua pee maite te mau aposetolo ia Iesu, i roto atoa i te fifi. Parau atura ïa Iesu: “E haamau vau i te hoê faufaa e o outou, mai to ’u Metua i haamau i te hoê faufaa e o vau no te hoê faatereraa arii.” (Luka 22:29) E pǐpǐ taiva ore na Iesu teie mau tane. Ua haapapu oia ia ratou na roto i te haamauraa i te hoê faufaa e o ratou, e arii atoa ratou e o ’na i roto i te Faatereraa arii.

Noa ’tu teie tiaturiraa faahiahia o te mau aposetolo, e taata noa â ratou e te hara atoa. Na ô atura Iesu: “Ua ani Satani ia ueue oia ia outou paatoa mai te sitona.” (Luka 22:31) Faaara atoa ’tura oia: “I teie nei po, e faarue mai outou paatoa ia ’u no ta ’u e faaruru, ua papaihia hoi: ‘E tairi au i te tiai mamoe e e purara ê te mau mamoe o te nǎnǎ.’”—Mataio 26:31; Zekaria 13:7.

Haapapu maira Petero: “Noa ’tu e e faarue ratou paatoa ia oe no ta oe e faaruru, eita roa vau e faarue ia oe!” (Mataio 26:33) Parau atura Iesu ia Petero e hou te hoê moa e totereo ai e piti taime i taua po ra, e parau Petero e aita oia i ite ia ’na. Na ô faahou atura Iesu: “Ua pure râ vau no oe ia ore to oe faaroo ia paruparu, e ua tatarahapa ana‘e oe, a faaitoito i to oe mau taeae.” (Luka 22:32) Haapapu faahou maira râ Petero: “Pohe noa ’tu â vau e oe atoa, e ore roa vau e parau e aita vau i ite ia oe.” (Mataio 26:35) Na reira atoa maira te tahi atu mau aposetolo i te parau.

Parau atura Iesu i ta ’na mau pǐpǐ: “E parahi rii mai â vau ia outou ra. E imi outou ia ’u. Mai ta ’u râ i parau i te ati Iuda: ‘I te vahi ta ’u e haere, eita outou e tae,’ o ta ’u atoa ïa e parau atu ia outou.” Na ô atoa ’tura oia: “E faaueraa apî ta ’u e horoa ’tu nei, ia here outou te tahi i te tahi. Mai ia ’u i here ia outou, ia here atoa outou te tahi i te tahi. I te mea e mea here outou te tahi i te tahi, e ite ïa te taata atoa e e pǐpǐ outou na ’u.”—Ioane 13:33-35.

I to Petero faarooraa ia Iesu ia parau e e parahi rii oia ia ratou, ui maira oia: “E te Fatu, e haere oe ihea?” Pahono atura Iesu: “I te vahi ta ’u e haere, eita oe e nehenehe e pee mai ia ’u i teie nei, e pee mai râ oe ia ’u a muri a‘e.” Parau maira Petero tei maere: “E te Fatu, no te aha e ore ai e tia ia ’u ia pee ia oe i teie nei? E horoa vau i to ’u ora no oe.”—Ioane 13:36, 37.

Faahiti atura Iesu i te taime i tono tataipiti ai oia i te mau aposetolo e poro na Galilea ma te ore e rave i te pute moni e te pute maa. (Mataio 10:5, 9, 10) Na ô atura oia: “Aita outou i ere noa ’‘e i te tahi mea, e ere anei?” Parau maira ratou: “Aita!” Eaha râ ta ratou e rave i muri mai? Faaue atura Iesu: “Te taata e pute moni ta ’na,  ia rave ïa, e te hoê pute maa. E te taata aita ta ’na e ‘o‘e, ia hoo atu ïa i to ’na ahu tapo‘i e ia hoo mai i te hoê ‘o‘e. Te parau atu nei hoi au e ia tupu tei papaihia no ’u e tia ’i, oia hoi ‘Ua amuihia oia i te feia rave hara.’ Te tupu nei hoi tei papaihia no ’u.”—Luka 22:35-37.

Faahiti atura Iesu i te taime e patitihia ’i oia i nia i te hoê pou i pihai iho i te feia ohipa ino, aore ra rave hara. I muri iho, e faaruru ta ’na mau pǐpǐ i te hamani-ino-raa u‘ana. Ua ineine ratou i to ratou mana‘o, parau atura ratou: “E te Fatu, inaha, teie e piti ‘o‘e.” Pahono atura oia: “Ua ravai noa te reira.” (Luka 22:38) I muri iho, e horoa ’tu Iesu i te tahi atu haapiiraa faufaa ia faaohipa te hoê aposetolo hoê o na ‘o‘e.