Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 125

Afaihia Iesu ia Ana e ia Kaiapha i muri iho

Afaihia Iesu ia Ana e ia Kaiapha i muri iho

MATAIO 26:57-68 MAREKO 14:53-65 LUKA 22:54, 63-65 IOANE 18:13, 14, 19-24

  • AFAIHIA IESU IA ANA TE TAHU‘A RAHI NA MUA ’‘E

  • TA TE SUNEDERI HAAVARAA TANO ORE IA AU I TE TURE

Afaihia ’tura Iesu, tei taamuhia to ’na na rima mai te hoê taata ohipa ino, ia Ana. E tahu‘a rahi oia i to Iesu apîraa, i te maereraa te mau orometua ia ’na i te hiero. (Luka 2:42, 47) I muri a‘e na vetahi o ta ’na mau tamaiti i mono ia ’na, e i tera taime o ta ’na hunoa o Kaiapha te tahu‘a rahi.

A vai ai Iesu i ǒ Ana, ua nehenehe Kaiapha e haaputuputu i te Sunederi, te tiripuna e 71 mero, to roto atoa te tahu‘a rahi e te tahi atu tei amo na i taua hopoia ra.

Uiui maira Ana ia Iesu “no nia i ta ’na mau pǐpǐ e ta ’na haapiiraa.” Pahono noa ’tura Iesu: “Ua paraparau vau i mua i te taata atoa. I haapii noa na vau ia vetahi ê i roto i te sunago e te hiero, i reira hoi te ati Iuda atoa e ruru ai, e aita vau i parau huna noa ’‘e i te tahi parau. No te aha ïa oe e uiui mai ai ia ’u? A uiui i te feia o tei faaroo i ta ’u i parau ia ratou.”—Ioane 18:19-21.

Poara maira te hoê tiai e tia ra na reira ia Iesu e tama‘i maira: “Mea na ô oe ia pahono i te tahu‘a tiaau?” Pahono atura râ Iesu, tei ite e aita oia i rave i te tahi ohipa ino: “Ua hape ta ’u parau, a faaite mai ïa eaha ta ’u hape. Teie râ, ua tano ta ’u parau, no te aha ïa oe i poara ’i ia ’u?” (Ioane 18:22, 23) Faaue ihora Ana ia afaihia Iesu i ta ’na hunoa o Kaiapha.

Ua ruru ê na te Sunederi taatoa, oia hoi te tahu‘a  rahi, te mau aratai ati Iuda e papai parau, i ǒ Kaiapha. Ia au i te ture, eita e tano ia faatupu i tera huru haavaraa i te po o te Pasa. Aita râ te reira i tapea ia ratou ia faatae i ta ratou opuaraa ino i te hopea.

Eita iho â te Sunederi e haava ia Iesu ma te parau-tia. I faaoti na hoi ratou e haapohe ia ’na i muri iho i to ’na faatiaraa mai ia Lazaro. (Ioane 11:47-53) Tau mahana a‘enei, ua opua te mau aratai haapaoraa e haru e e haapohe ia Iesu. (Mataio 26:3, 4) Mai te huru ra ïa ua faautua-ê-hia na Iesu i te pohe hou a haavahia ’i.

Hau atu i teie haavaraa tano ore ia au i te ture, ua imi te mau tahu‘a tiaau e te tahi atu mau mero o te Sunederi i te tahi mau ite no te pari haavare ia Iesu. Mea rahi tei itehia mai, aita râ ta ratou pariraa e tuea ra. Haere maira e piti ite e na ô maira: “Ua faaroo matou ia ’na i te parauraa: ‘E vavahi au i teie hiero hamanihia e te rima taata e e patu vau e toru mahana i te tahi atu e ere na te rima taata i hamani.’” (Mareko 14:58) Aita atoa ta raua pariraa e tuea ra.

Ui maira Kaiapha ia Iesu: “Eita oe e pahono? Aita oe e faaroo ra i ta teie mau taata e pari nei ia oe?” (Mareko 14:60) Mamû noa ihora Iesu i mua i teie pariraa haavare a te mau ite aita ta ratou parau e tuea ra. Taui ihora ïa Kaiapha i te raveraa.

Ua ite Kaiapha e e riri hanoa te mau ati Iuda i te taata e parau e e Tamaiti oia na te Atua. I to Iesu faahitiraa na mua ’tu i te Atua mai to ’na Metua, ua hinaaro te mau ati Iuda e haapohe ia ’na, i ta ratou hoi parauraa te faafaito ra oia ia ’na i te Atua. (Ioane 5:17, 18; 10:31-39) Na ô maira Kaiapha ia Iesu no te râmâ ia ’na: “Te faaue nei au ia oe i te i‘oa o te Atua ora, ia parau mai e o te Mesia anei oe, te Tamaiti a te Atua!” (Mataio 26:63) Ua parau a‘ena Iesu e e Tamaiti oia na te Atua. (Ioane 3:18; 5:25; 11:4) Ia mamû noa oia i teie taime, e nehenehe e mana‘ohia e ere oia i te Tamaiti na te Atua e te Mesia. Na ô atura oia: “E o vau, e ite atoa outou i te Tamaiti a te taata nei i te parahiraa i te rima atau o te Manahope e te haereraa mai na nia i te mau ata o te ra‘i.”—Mareko 14:62.

Hahae ihora Kaiapha i to ’na ahu ma te haapeu, a na ô ai: “Ua faaino oia i te Atua! Eaha ïa te faufaa ia imi â i te ite? Inaha, ua faaroo outou ia ’na i te faainoraa i te Atua. Eaha to outou mana‘o?” Rave a‘era te Sunederi i ta ratou faaotiraa tano ore: “Ia pohe iho â oia.”—Mataio 26:65, 66.

Faaooo e moto maira ratou ia Iesu. Poara maira te tahi atu ia ’na e tutuha maira i nia i to ’na mata. I muri iho i te tapo‘iraa i to ’na mata e te poararaa ia ’na, parau faaooo maira ratou: “E peropheta oe, faaite mai ïa na vai i tupai ia oe.” (Luka 22:64) Mai tera ïa te rave-ino-raahia te Tamaiti a te Atua i te hoê po haavaraa tano ore ia au i te ture!