Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 116

Haapiiraa o te haehaa i te Pasa hopea

Haapiiraa o te haehaa i te Pasa hopea

MATAIO 26:20 MAREKO 14:17 LUKA 22:14-18 IOANE 13:1-17

  • AMURAA IESU I TA ’NA PASA HOPEA E TE MAU APOSETOLO

  • HAAPIIRAA ’TU OIA I TE HAEHAA MA TE HOROI I TE AVAE O TE MAU APOSETOLO

Ua tae ê na Petero e Ioane i Ierusalema no te faaineine i te Pasa mai ta Iesu i faaue. I muri a‘e e haere atu ai Iesu e na ahuru aposetolo. Te topa ra te mahana i te pae tooa o te râ a pou ai Iesu e ta ’na mau pǐpǐ mai nia mai i te mou‘a Oliveta. Eita Iesu e ite faahou i teie vahi e tae roa i to ’na tia-faahou-raa.

Tae atura Iesu e ta ’na mau pǐpǐ i te oire e haere atura i te fare e amu ai ratou i te Pasa i te piha rahi i nia. Ite a‘era ratou e ua ineine te mau mea atoa ia tamaa ratou ana‘e. I tiai ru na Iesu i taua mahana ra, ua parau hoi oia: “Ua hinaaro roa vau e amu i teie Pasa e outou hou vau e mauiui ai.”—Luka 22:15.

E rave rahi matahiti na mua ’tu, e peu ia faahaerehia te tahi mau au‘a uaina i tera e tera taata e amu ra i te Pasa. A rave mai ai Iesu i te hoê au‘a tei horoahia mai ia ’na, haamauruuru a‘era oia i te Atua e na ô atura: “A rave i teie au‘a e a horoa ’tu i te tahi e te tahi, te parau atu nei hoi au: Mai teie atu nei, e ore roa vau e inu faahou i te uaina e tae noa ’tu i te taime e tae mai ai te Faatereraa arii a te Atua.” (Luka 22:17, 18) Papu maitai fatata oia i te pohe.

A amu noa ’i ratou i te Pasa, tupu ihora te hoê ohipa maere. Tia a‘era Iesu, tatara ’tura i to ’na ahu tapo‘i, e rave maira i te hoê tauera. Manii atura oia i te pape i roto i te hoê farii na pihai iho mai. Te tanoraa, na te fatu fare e haapao e ia horoihia te avae o ta ’na mau manihini e te tahi anei tavini. (Luka 7:44) Aita râ te fatu fare i reira, na Iesu ïa i haapao i te reira. I nehenehe na te hoê aposetolo e rave i teie ohipa, aita râ hoê a‘e i na reira. No te mea anei e aimârôraa to rotopu ia ratou? Ta tatou noa i ite, ua haama ratou i to Iesu horoiraa i to ratou avae.

I to Iesu tapiriraa ia Petero, parau maira Petero: “Eiaha oe e horoi i to ’u avae.” Pahono atura Iesu: “Ia ore au e horoi i to avae, e ere ïa oe i te pǐpǐ na ’u.” Parau maira Petero: “E te Fatu, eiaha ïa to ’u noa avae, to ’u rima atoa râ e to ’u upoo.” Eaha paha oia i te maere i te pahonoraa Iesu: “O tei hopu ê na i te pape, ua mâ ïa to ’na tino taatoa, o to ’na noa ïa avae te horoi. Mea mâ outou, e ere râ outou pauroa.”—Ioane 13:8-10.

Horoi atura Iesu i te avae o na 12, to Iuda Isakariota atoa. Oomo atura oia i to ’na ahu tapo‘i e tarava ’tura i te amuraa maa. Ui atura Iesu: “Te taa ra ia outou ta ’u i rave iho nei ia outou? E parau mai outou ia ’u ‘Orometua’ e ‘Fatu,’ ua  tano outou, e Orometua e e Fatu iho â vau. No reira, ua horoi au te Fatu e te Orometua i to outou avae, ia horoi atoa ïa outou i te avae o te tahi e te tahi e tia ’i. Ua horoa ’tu hoi au i te hi‘oraa, mai ta ’u i rave ia outou, ia na reira atoa ïa outou e tia ’i. E parau mau ta ’u e parau atu: Aita te hoê tavini i hau a‘e i to ’na fatu, aita atoa tei tonohia i hau a‘e i tei tono ia ’na. Ua ite outou i teie mau mea, e oaoa outou ia rave outou i te reira.”—Ioane 13:12-17.

E haapiiraa nehenehe mau teie o te taviniraa ma te haehaa! Eiaha te mau pǐpǐ a Iesu e imi i te parahiraa matamua, a mana‘o ai mea faufaa ratou, e ia tavinihia ratou e tia ’i. Ia pee râ ratou i te hi‘oraa o Iesu, eiaha ma te horoi i te avae ei peu faaroo, ia ineine râ i te tavini te tahi e te tahi ma te haehaa e te maitiiti ore.