Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 105

Haapiiraa o te faaroo no roto mai i te hoê tumu suke

Haapiiraa o te faaroo no roto mai i te hoê tumu suke

MATAIO 21:19-27 MAREKO 11:19-33 LUKA 20:1-8

  • HAAPIIRAA O TE FAAROO E HUTI MAI I TE TUMU SUKE TEI MǍRÔ

  • FAAHAPARAAHIA TE MANA O IESU

Faarue ihora Iesu i Ierusalema i te Monire i te taperaa mahana, no te ho‘i i Betania i te pae hitia o te râ o te mou‘a Oliveta. Eita e ore e ua taoto oia i ǒ Lazaro, Maria e Mareta.

I te poipoi a‘e i te 11 no Nisana, reva ’tura Iesu e ta ’na mau pǐpǐ no te ho‘i i Ierusalema, i reira Iesu e haere ai i te hiero no te taime hopea. Tera ïa te mahana hopea o ta ’na taviniraa hou a faatupu ai i te Pasa, a haamau atu ai i te Oroa haamana‘oraa o to ’na pohe, a haavahia ’i e a haapohehia ’tu ai.

A haere noa ’i ratou na Betania ’tu na nia i te mou‘a Oliveta i Ierusalema, ite ihora Petero i te tumu raau ta Iesu i faaino inanahi a‘e i te poipoi. Na ô maira oia: “Rabi, a hi‘o na, ua mǎrô te tumu suke ta oe i faaino.”—Mareko 11:21.

No te aha te tumu suke i mǎrô ai ia Iesu? Faataa ’tura oia i te tumu: “Oia mau ta ’u e parau atu: Mai te peu e e faaroo papu to outou, e rave ïa outou i ta ’u i rave i te tumu suke. Ia parau atoa outou i teie mou‘a: ‘Ia pee oe e ia taorahia i roto i te miti,’ e tupu iho â te reira. E te mau mea atoa ta outou e ani na roto i te pure ma te faaroo, e fana‘o iho â outou.” (Mataio 21:21, 22) Te faahiti faahou ra oia i ta ’na i parau a‘ena no nia i te faaroo o te nehenehe e faahaere i te hoê mou‘a i te tahi atu vahi.—Mataio 17:20.

I te mǎrôraa te tumu suke ia Iesu, te haapii ra oia i ta ’na mau pǐpǐ i te faufaa rahi o te faaroo i te Atua, a na ô ai: “Te mau mea atoa ta outou e ani ia pure outou, a tiaturi e ua noaa ia outou, e noaa iho â ïa.” (Mareko 11:24) E haapiiraa faufaa mau teie no te mau pǐpǐ atoa a Iesu, e tano iho â râ no te mau aposetolo fatata i te faaruru i te mau tamataraa fifi. Te vai ra te tahi atu â taairaa i rotopu te mǎrôraa te tumu suke e te faaroo.

Mai teie tumu suke te nunaa Iseraela. Ua faaau te Atua i te hoê faufaa e teie nunaa, e e au ra e mea haapao ratou i te ture a Mose. Tera râ, te ere ra ratou i te faaroo e aita e hotu maitai ta ratou i faatupu. Ua patoi atoa ratou i te Tamaiti iho a te Atua! No reira, i te mǎrôraa ia Iesu te tumu suke hotu ore, te faaite maitai ra oia eaha te tiai mai ra i teie nunaa hotu ore e te faaroo ore.

I muri iho, tomo ihora Iesu e ta ’na mau pǐpǐ i Ierusalema. Mai ta ’na i matau, haere ihora Iesu i te hiero e haapii atura i te taata. A mana‘o ai i ta Iesu i rave inanahi a‘e i nia i te feia taui moni, mârô maira te mau tahu‘a tiaau e aratai ati Iuda: “I teihea mana e rave ai oe i teie mau mea? Aore ra na vai i horoa ia oe i teie mana no te rave i teie mau mea?”—Mareko 11:28.

Pahono atura Iesu: “E uiraa atoa ta ’u. Ia pahono mai outou, e faaite atoa ’tu ïa vau i teihea mana e rave ai au i teie mau mea. Te bapetizoraa a Ioane, no te ra‘i mai anei aore ra no ǒ mai i te taata ra? A pahono mai.” Ratou atura ïa te uihia ra. Na ô a‘era te tahi i te tahi: “Ia parau tatou: ‘No te ra‘i mai,’ e na ô mai ïa oia: ‘No te aha ïa outou i ore ai i tiaturi ia ’na?’ Ia parau râ tatou: ‘No ǒ mai i te taata ra,’ e naheahia mai ïa tatou?” No to ratou mǎta‘u i te nahoa “o te tiaturi ra e e peropheta Ioane,” i feruri ai ratou mai tera.—Mareko 11:29-32.

Aita teie feia patoi i ite e nafea ia pahono ia Iesu. Na ô maira ratou: “Aita matou i ite.” Na ô atura Iesu: “Eita atoa ïa vau e faaite atu i teihea mana e rave ai au i teie mau mea.”—Mareko 11:33.