Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 137

Ua hanere tei ite ia ’na hou te Penetekose

Ua hanere tei ite ia ’na hou te Penetekose

MATAIO 28:16-20 LUKA 24:50-52 OHIPA 1:1-12; 2:1-4

  • FARAA IESU I E RAVE RAHI TAATA

  • REVARAA OIA I TE RA‘I

  • NINIIRAA OIA I TE VARUA MO‘A I NIA 120 PǏPǏ

I muri iho i to Iesu tia-faahou-raa, ua parau oia i ta ’na na 11 aposetolo e i nia i te hoê mou‘a i Galilea ratou e farerei ai. To reira atoa piri i te 500 pǐpǐ, te feaa noa ra vetahi. (Mataio 28:17; Korinetia 1, 15:6) E faahiti râ Iesu i te tahi parau a tiaturi roa ’tu ai ratou pauroa e te ora mau ra oia.

Faataa ihora Iesu e ua horoa te Atua ia ’na i te mana atoa i te ra‘i e i te fenua. Na ô atura oia: “A haere ïa e faariro i te taata o te mau nunaa atoa ei pǐpǐ na ’u ma te bapetizo ia ratou i te i‘oa o te Metua e o te Tamaiti e o te varua mo‘a, ma te haapii ia ratou ia haapao i te mau mea atoa ta ’u i faaue ia outou.” (Mataio 28:18-20) Te ora mau ra Iesu e te hinaaro noa ra ia porohia te parau apî oaoa.

Hoê â ohipa tei faauehia i ta Iesu mau pǐpǐ atoa, te tane, te vahine e te tamarii: faariro i te taata ei pǐpǐ. E tamata paha te feia patoi i te tapea i ta ratou ohipa pororaa e haapiiraa. Ua haapapu râ Iesu: “Ua horoahia mai ia ’u te mana atoa i te ra‘i e i te fenua.” Eaha ïa te auraa no ta ’na mau pǐpǐ? Na ô atura oia: “A haamana‘o, tei pihai iho vau ia outou i te mau mahana atoa e tae noa ’tu i te anotau hopea o te faanahoraa o te ao nei.” Aita Iesu e parau ra pauroa te feia o te poro i te parau apî oaoa te faatupu i te mau semeio. E turuhia râ ratou e te varua mo‘a.

I muri iho i to ’na tia-faahou-raa, ua fa ’tu Iesu i ta ’na mau pǐpǐ “e 40 mahana” ma te rave e rave rau tino taata. “Ua fa ’tu oia e rave rahi taime ia ratou ia papu maitai ia ratou e te ora ra oia,” a haapii atu ai “i te Faatereraa arii a te Atua.”—Ohipa 1:3; Korinetia 1, 15:7.

E au ra e tei Galilea noa â te mau aposetolo i to Iesu faaueraa ’tu e ho‘i i Ierusalema. A putuputu ai ratou i ǒ, na ô atura oia: “Eiaha e faarue ia Ierusalema, a tiai noa râ i ta te Metua i fafau mai e ta outou i faaroo mai ia ’u. I bapetizo na hoi Ioane i te taata i te pape, outou râ, e bapetizohia ïa i te varua mo‘a i roto tau mahana noa.”—Ohipa 1:4, 5.

Putuputu faahou a‘era Iesu e ta ’na mau aposetolo i muri iho. “Aratai atura Iesu ia ratou i Betania” i te pae hitia o te râ o te mou‘a Oliveta. (Luka 24:50) Noa ’tu ta Iesu i parau ia ratou no nia i to ’na revaraa, te tiaturi noa ra ratou e haamauhia ta ’na Faatereraa arii i te fenua.—Luka 22:16, 18, 30; Ioane 14:2, 3.

Ui maira te mau aposetolo: “E te Fatu, i teie nei oe e haamau faahou ai i te faatereraa arii i Iseraela?” Pahono noa ’tura oia: “E ere tei ia outou te iteraa i te hora aore ra te tau ta te Metua i faaoti.” Haapapu faahou atura oia i te ohipa e titauhia ia rave ratou, a na ô ai: “E noaa . . . ia outou te puai ia tae mai te varua mo‘a i nia iho ia outou, e e riro outou ei ite no ’u na Ierusalema, na Iudea taatoa, na Samaria e tae noa ’tu i te hopea o te fenua.”—Ohipa 1:6-8.

To nia te mau aposetolo e o Iesu tei faatiahia mai i te mou‘a Oliveta i to Iesu haamataraa i te reva i nia i te ra‘i. Vehîhia ihora oia i te hoê ata e aita ’tura ratou i ite faahou ia ’na. I muri iho i to ’na tia-faahou-raa, i rave na Iesu i te tino taata. Vaiiho maira râ oia i te tino ta ’na i rave i tera taime, e reva a‘era i nia i te ra‘i ei varua. (Korinetia 1, 15:44, 50; Petero 1, 3:18) A hi‘o noa ’i te mau aposetolo haapao maitai i te ra‘i, fa maira e piti tane ahu uouo i pihai iho ia ratou. E melahi raua tei rave i te tino taata. Ui maira raua: “Outou to Galilea, eaha outou e hi‘o noa ’i i te ra‘i? O Iesu tei ravehia a‘enei i nia i te ra‘i mai rotopu ia outou, e haere mai ïa mai ta outou i ite ia ’na i te revaraa i nia i te ra‘i.”—Ohipa 1:10, 11.

E ere mea faaoto i te pu to Iesu faarueraa mai i te fenua, o ta ’na mau pǐpǐ haapao maitai ana‘e  tei ite ia ’na i te revaraa. Mai tera atoa ia ho‘i mai o ’na, o ta ’na mau pǐpǐ haapao maitai ana‘e te haro‘aro‘a i te tau o to ’na ho‘iraa mai ei Arii.

Ho‘i a‘era te mau aposetolo i Ierusalema. I to muri iho mau mahana, putuputu a‘era ratou e te tahi atu mau pǐpǐ, oia atoa “to Iesu mau taeae e to ’na metua vahine o Maria.” (Ohipa 1:14) Tamau noa ’tura ratou pauroa i te pure, no te maiti iho â râ i te pǐpǐ o te mono ia Iuda Isakariota, a raea ’tu ai 12 aposetolo. (Mataio 19:28) Ua hinaaro ratou i te hoê pǐpǐ tei ite i ta Iesu mau ohipa e to ’na tia-faahou-raa. No te ite i te hinaaro o te Atua, tuu a‘era ratou i te kelero. Teie te taime hopea i faahiti ai te Bibilia i teie peu. (Salamo 109:8; Maseli 16:33) Maitihia ’tura Matatia, to roto atoa paha oia i na 70 ta Iesu i tono e poro. “Amuihia ’tura oia i na aposetolo 11.”—Ohipa 1:26.

Ahuru mahana i muri iho i to Iesu revaraa i te ra‘i, tupu ihora te oroa ati Iuda Penetekose 33. Piri i te 120 pǐpǐ tei putuputu i te hoê piha i nia i Ierusalema. Faaroohia ihora te hoê haruru e au i te mata‘i puai i roto i te fare taatoa. Itehia a‘era te mau arero e au i te auahi, hoê i nia i te pǐpǐ tataitahi. Haamata ’tura ratou pauroa i te paraparau na roto i te reo ěê. Ua ninii mai Iesu i te varua mo‘a i nia ia ratou, mai ta ’na i fafau.—Ioane 14:26.