Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 104

E faatupu anei te mau ati Iuda i faaroo i te reo o te Atua i te faaroo?

E faatupu anei te mau ati Iuda i faaroo i te reo o te Atua i te faaroo?

IOANE 12:28-50

  • FAAROORAA E RAVE RAHI I TE REO O TE ATUA

  • NA TE AHA E HAAVA I TE TAATA?

I te hiero i te Monire 10 no Nisana, te faahiti ra Iesu i to ’na pohe e fatata mai ra. No to ’na haapeapea no te roo o te Atua, na ô atura Iesu: “To ’u Metua, a faahanahana i to i‘oa.” Na ô maira te hoê reo puai mai te ra‘i mai: “Ua faahanahana vau e e faahanahana â vau i te reira.”—Ioane 12:27, 28.

Maere ihora te taata na pihai iho mai. Mana‘o ihora vetahi e e patiri. Na ô a‘era te tahi atu: “E melahi tei paraparau ia ’na.” (Ioane 12:29) O te reo râ o Iehova ta ratou i faaroo iho nei! E ere a tahi ra to te taata faarooraa i te reo o te Atua no nia ia Iesu.

E toru matahiti e te afa na mua ’tu, i te bapetizoraahia Iesu, ua faaroo Ioane Bapetizo i te parauraa te Atua no Iesu: “O ta ’u Tamaiti teie, tei herehia, ta ’u i mauruuru roa.” I muri a‘e i te Pasa 32, i te tauiraa to Iesu huru i mua ia Iakobo, Ioane e Petero, faaroo a‘era na toru tane i te parauraa te Atua: “O ta ’u Tamaiti teie, tei herehia, ta ’u i mauruuru roa. A faaroo ia ’na.” (Mataio 3:17; 17:5) I te toru râ o te taime, mea rahi tei faaroo ia Iehova i te paraparauraa.

Na ô atura Iesu: “E ere no ’u i faaroohia ’i taua reo ra, no outou râ.” (Ioane 12:30) E haapapuraa teie e o ’na iho â te Tamaiti a te Atua, te Mesia i tohuhia.

E hi‘oraa atoa to Iesu oraraa haapao maitai ia pee te taata, e o te haapapu e mea tano iho â ia haamouhia Satani te Diabolo, te arii o teie nei ao. Na ô atura Iesu: “Te haava nei te Atua i teie nei ao e e tiavaru oia i te arii o teie nei ao i rapae.” E riro to Iesu pohe e fatata mai ra ei upootiaraa. Faataa ’tura oia: “O vau nei râ, ia faateiteihia vau, e faafatata mai au i te mau huru taata atoa ia ’u.” (Ioane 12:31, 32) Na roto i to ’na pohe i nia i te pou e faafatata mai ai Iesu i te taata ia ’na, a iriti atu ai i te e‘a e tae atu ai i te ora mure ore.

No ta Iesu parau e e “faateiteihia” o ’na, na ô maira te nahoa: “Ua ite matou i roto i te mau papai mo‘a e e ora te Mesia e a muri noa ’tu. Eaha ïa oe e parau ai e ia faateiteihia te Tamaiti a te taata nei e tia ’i? O vai tena Tamaiti a te taata nei?” (Ioane 12:34) Noa ’tu te mau haapapuraa atoa, tae noa ’tu te faarooraa i te reo iho o te Atua, aita te rahiraa o ratou i farii e o Iesu iho â te Tamaiti a te taata, te Mesia fafauhia.

Parau faahou atura Iesu e o ’na “te maramarama.” (Ioane 8:12; 9:5) A‘o atura oia i te nahoa: “E vai rii mai â te maramarama i rotopu ia outou. A haere a vai noa mai ai te maramarama ia outou ra, ia ore outou ia roohia i te poiri. . . . A vai noa mai ai te maramarama ia outou ra, a faatupu i te faaroo i te maramarama ia riro hoi outou ei tamarii na te maramarama.” (Ioane 12:35, 36) I muri iho, reva ’tura Iesu, e ere hoi i te 10 no Nisana e pohe ai oia. E “faateiteihia” oia, aore ra e patitihia i nia i te pou, i te Pasa 14 no Nisana.—Galatia 3:13.

I te roaraa o ta Iesu taviniraa, ua tupu iho â taua parau tohu ra i te oreraa te ati Iuda e tiaturi ia ’na. Ua tohu Isaia e e haamatapohia te taata e e faaetaetahia to ratou aau, a ore atu ai ratou e fariu mai ia faaorahia ratou. (Isaia 6:10; Ioane 12:40) Ua patoi iho â te rahiraa o te ati Iuda i te haapapuraa e o Iesu to ratou Faaora fafauhia, te e‘a e tae atu ai i te ora.

Ua “tiaturi mau â” Nikodemo, Iosepha no Arimataio, e e rave rahi atu â raatira ia Iesu. E haa anei râ ratou ma te faaroo, aore ra eita no to ratou taiâ ia tiavaruhia ratou i rapae i te sunago aore ra no to ratou au i te hanahana no ǒ mai i te taata?—Ioane 12:42, 43.

 Faataa ’tura Iesu eaha te auraa e tiaturi ia ’na: “O te tiaturi ia ’u, te tiaturi ra ïa eiaha ia ’u noa, i tei tono atoa mai râ ia ’u. E o tei ite mai ia ’u, ua ite atoa ïa i tei tono mai ia ’u.” Te pue parau mau ta te Atua i faaue ia Iesu e haapii i te taata e ta Iesu e faaite haere noa ra, mea faufaa roa ïa i parau ai oia: “Te taata o te patoi mai ia ’u e o te ore e farii i ta ’u mau parau, te vai ra ïa o te faautua ia ’na. Na te parau ta ’u i faahiti e haava ia ’na i te mahana hopea.”—Ioane 12:44, 45, 48.

Parau atura Iesu: “E ere na ’u iho ta ’u i parau, ua horoa mai râ te Metua tei tono mai ia ’u i te hoê faaueraa no nia i ta ’u e parau e ta ’u e haapii i te taata. Ua ite atoa vau e maoti ta ’na faaueraa e noaa ’i te ora mure ore.” (Ioane 12:49, 50) Ua ite Iesu e ua fatata oia i te ninii i to ’na iho toto ei tusia no te feia e faatupu i te faaroo ia ’na.—Roma 5:8, 9.