Eaha to roto?

Tapura tumu parau

 PENE 121

“A faaitoito râ! Ua vî teie nei ao ia ’u”

“A faaitoito râ! Ua vî teie nei ao ia ’u”

IOANE 16:1-33

  • ORERAA TE MAU APOSETOLO E ITE FAAHOU IA IESU

  • RIRORAA TO TE MAU APOSETOLO OTO EI OAOA

Te faarue ra Iesu e ta ’na mau aposetolo i te piha i nia i reira ratou i amu ai i te Pasa. Mea rahi ta Iesu faaararaa ia ratou, na ô faahou atura oia: “Ua parau atu vau i teie mau mea ia ore outou e taiva.” No te aha mea tano ai teie parau? Na ô atura oia: “E tiavaruhia outou i rapae i te sunago. Inaha, ua fatata te taime e mana‘o ai te feia o te haapohe ia outou e te pûpû ra ratou i i te hoê taviniraa mo‘a i te Atua.”—Ioane 16:1, 2.

Ua peapea paha te mau aposetolo i teie parau. Ua parau a‘enei Iesu e e hae teie nei ao ia ratou, aita râ oia i parau roa ’tu e e haapohehia ratou. No te aha? Na ô atura oia: “Aita vau i parau atu i teie mau mea i te omuaraa, no te mea i pihai iho na vau ia outou.” (Ioane 16:4) I teie nei, te faaara ra oia ia ratou hou a reva ’i ia ore ratou ia taiva i muri a‘e.

Parau faahou atura Iesu: “Te haere nei au i tei tono mai ia ’u, e aore roa râ hoê o outou e ui mai e te haere nei au ihea.” I taua noa po ra, ua ui a‘enei ratou ia ’na e te haere ra oia ihea. (Ioane 13:36; 14:5; 16:5) I te faaiteraa râ oia e e hamani-ino-hia ratou, taiâ e oto ihora ratou. Aita ’tura ïa ratou i uiui atu â ia ’na no nia i te hanahana ta ’na e fana‘o e te auraa o te reira no te feia e haamori mau ra i te Atua. Na ô atura Iesu: “No to ’u parauraa ’tu i teie mau mea i oto ai to outou aau.”—Ioane 16:6.

Faataa ’tura Iesu: “No to outou hoi maitai e haere ai au. Ia ore hoi au e haere, e ore te tauturu e tae mai ia outou ra. Ia haere râ vau, e tono mai au i taua tauturu ra ia outou ra.” (Ioane 16:7) Na roto noa i to Iesu pohe e haereraa i te ra‘i e fana‘o ai ta ’na mau pǐpǐ na te mau vahi atoa o te fenua i te varua mo‘a, ta ’na e tono mai ei tauturu.

“E faaite roa [te varua mo‘a] i to te ao eaha te hara, eaha te parau-tia e eaha te haavaraa no ǒ mai i te Atua.” (Ioane 16:8) E faaitehia iho â e aita teie nei ao e faatupu ra i te faaroo i te Tamaiti a te Atua. E haapapu to Iesu revaraa i te ra‘i i to ’na huru parau-tia a itehia ’tu ai no te aha mea tano ai ia faautuahia Satani “te arii o teie nei ao.”—Ioane 16:11.

Na ô faahou atura Iesu: “Mea rahi â ta ’u e parau ia outou, eita râ e taa ia outou i teie nei.” Ia ninii oia i te varua mo‘a i nia ia ratou e taa roa ’i ia ratou “te parau mau,” a nehenehe atu ai e ora ia au i te reira.—Ioane 16:12, 13.

Maere ihora te mau aposetolo i ta Iesu i parau i muri iho: “E maa taime â e ore outou e ite faahou mai ia ’u, e e maa taime â e ite mai outou ia ’u.” Ui a‘era te tahi i te tahi eaha te auraa. Taa ihora ia Iesu e hinaaro ratou e ite atu â, e faataa ’tura: “E parau mau ta ’u e parau atu: E ta‘i e e auê outou, e oaoa râ to te ao. E oto outou, e riro râ to outou oto ei oaoa.” (Ioane 16:16, 20) I te haapoheraahia Iesu ananahi a‘e i te taperaa mahana, oaoa ihora te mau aratai haapaoraa, oto ihora râ te mau pǐpǐ. Ua riro râ to ratou oto ei oaoa i te faatiaraahia mai Iesu! Ua oaoa atu â ratou i to ’na niniiraa i te varua mo‘a o te Atua i nia ia ratou.

Faaau atura Iesu i te tupuraa o te mau aposetolo i to te hoê vahine e roohia ra e te mauiui fanau: “E mauiui te hoê vahine i te taime e fanau ai oia. Ua fanau ana‘e râ oia i ta ’na aiû iti, eita oia e haamana‘o faahou i to ’na mauiui no to ’na oaoa e e taata tei fanauhia mai i te ao nei.” Faaitoito atura Iesu i ta ’na mau aposetolo: “Outou atoa ïa, te oto nei outou i teie nei. Tera râ, e ite faahou vau ia outou e e oaoa to outou aau, e aore e taata e rave ê atu i to outou oaoa.”—Ioane 16:21, 22.

Tae roa i taua taime ra, aita te mau aposetolo i pure a‘enei ma te i‘oa o Iesu. Parau ihora oia:  “I taua mahana ra, e pure outou i te Metua ma to ’u i‘oa.” No te aha? E ere no te mea eita te Metua e hinaaro e pahono. Parau atura râ Iesu: “Mea here hoi na te Metua ia outou, no te mea mea here na outou ia ’u e ua tiaturi e no ǒ mai au i te Metua.”—Ioane 16:26, 27.

No ta Iesu mau parau faaitoito i parau roa ’tu ai te mau aposetolo: “No reira matou e tiaturi ai e no ǒ mai oe i te Atua.” Fatata râ to ratou tiaturiraa i te tamatahia. Faataa ’tura Iesu eaha te tupu: “Inaha, ua fatata te taime e ua fatata roa hoi, e horo ai outou pauroa i to outou iho fare, a faarue mai ai ia ’u o vau ana‘e.” Haapapu atura râ oia: “Ua parau atu vau i teie mau mea ia outou ia noaa ia outou te hau na roto ia ’u. E ati to outou i roto i teie nei ao, a faaitoito râ! Ua vî teie nei ao ia ’u.” (Ioane 16:30-33) Aita roa ’tu Iesu e faarue ra ia ratou. Ua papu ia ’na e nehenehe e vî ia ratou atoa teie nei ao mai ia ’na, ia haapao maite ratou i te hinaaro o te Atua noa ’tu te mau tamataraa a Satani e ta ’na ao ia taiva ratou.