Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 109

Faaite-roa-raa Iesu i te huru mau o te feia patoi

Faaite-roa-raa Iesu i te huru mau o te feia patoi

MATAIO 22:41–23:24 MAREKO 12:35-40 LUKA 20:41-47

  • E TAMAITI TE MESIA NA VAI?

  • FAAITE-ROA-RAA IESU E E HAAVAREVARE TE FEIA PATOI

Aita i noaa i te feia patoi ia faahapa ia Iesu aore ra ia râmâ ia ’na, a tuu atu ai ia ’na i te feia mana e te tavana Roma. (Luka 20:20) Tei te hiero â Iesu i te 11 no Nisana, o ’na ’tura tei uiui ia ratou, a faaite atu ai o vai mau â oia. Ui atura oia: “Eaha to outou mana‘o i te Mesia? E tamaiti oia na vai?” (Mataio 22:42) Ua matau-maitai-hia e e huaai te Mesia, aore ra Kirito, no Davida. Te pahonoraa ïa ta ratou i horoa.—Mataio 9:27; 12:23; Ioane 7:42.

Ui atura Iesu: “No te aha ïa Davida tei arataihia e te varua mo‘a i parau ai ia ’na e Fatu? Ua na ô oia: ‘Ua parau Iehova i to ’u Fatu: “A parahi i to ’u rima atau nei e ia tuu roa vau i to oe mau enemi i raro a‘e i to oe na avae”’? Mai te peu e ua parau Davida i te Mesia e Fatu, mea nafea ïa e tamaiti ai oia na ’na?”—Mataio 22:43-45.

Mamû noa ’tura te mau Pharisea, te tiai ra hoi ratou i te hoê taata no te huaai o Davida o te nehenehe e faatiamâ ia ratou i te faatereraa Roma. Ma te faahiti râ i ta Davida i parau i roto i te Salamo 110:1, 2, haapapu atura Iesu e e ere te Mesia i te hoê faatere i te fenua nei. E Fatu oia no Davida, e i muri a‘e i te parahiraa i te rima atau o te Atua, e faatere mai oia. Ua haamamû ta Iesu pahonoraa i te feia patoi.

Te faaroo noa mai ra te mau pǐpǐ e e rave rahi atu â. Faaara ’tura Iesu ia ratou no nia i te mau papai parau e Pharisea. “Ua rave” teie mau tane “i te parahiraa o Mose” no te haapii i te taata i te ture a Mose. Faaue atura Iesu i tei faaroo ra ia ’na: “Te mau mea atoa ta ratou e parau mai, a rave, eiaha râ e pee i ta ratou mau peu, e parau hoi ratou eita râ e rave mai ta ratou e parau ra.”—Mataio 23:2, 3.

Horoa ’tura Iesu i te tahi mau hi‘oraa o to ratou huru haavarevare: “Te faaaano nei hoi ratou i te mau afata nainai e irava o te mau Papai to roto, ta ratou e taamu i nia iho ia ratou ei tao‘a paruru.” E taamu na te tahi mau ati Iuda i nia i to ratou rae aore ra rima i teie mau afata nainai e irava poto o te ture a Mose to roto. E faaaano te mau Pharisea i ta ratou mau afata ia mana‘ohia e mea haapao roa ratou i te ture a Mose. Oia atoa, “te faaroa nei [ratou] i to ratou hiti ahu.” I faauehia na te mau Iseraela ia hamani i te faaunauna i nia i te hiti o to ratou ahu. Ua faaroa ’tu â râ te Pharisea i to ratou. (Numera 15:38-40) “Ia hi‘ohia ïa ratou e te taata” i na reira ’i ratou.—Mataio 23:5.

Ua hinaaro atoa te mau pǐpǐ a Iesu i te tiaraa teitei, i a‘o atu ai Iesu ia ratou: “Eiaha e titau ia parauhia outou e Rabi, hoê ana‘e hoi Orometua to outou, e taeae ana‘e outou paatoa. Eiaha atoa e parau i te taata o te fenua nei e metua no outou, hoê ana‘e hoi Metua to outou, tei te ra‘i ïa. Eiaha atoa e titau ia parauhia outou e aratai, hoê ana‘e hoi Aratai to outou, o te Mesia.” Ia riro ïa te mau pǐpǐ ei aha e ia faaite ratou i teihea huru? Na ô atura Iesu: “O tei rahi a‘e . . . i rotopu ia outou, ia riro ïa ei tavini no outou. Te taata o te faateitei ia ’na, e faahaehaahia ïa, e te taata o te faahaehaa ia ’na, e faateiteihia ïa.”—Mataio 23:8-12.

I muri iho, parau atura Iesu: “Ua ati outou te mau papai parau e te mau Pharisea, haavarevare ma, no te mea te ponao nei outou i te uputa o te Faatereraa arii o te ra‘i i mua i te taata, eita hoi outou iho e tomo, e te feia e hinaaro e tomo, e tapea ïa outou.”—Mataio 23:13.

Faahapa ’tura Iesu i te mau Pharisea i te ereraa i te mau faufaa pae varua, ia hi‘ohia te mau ture etaeta ta ratou iho i haamau. E parau ratou ei hi‘oraa: “Ia tǎpǔ te taata i te hiero, aita e faufaa ia tapea oia i te reira. Ia tǎpǔ râ oia i te auro o te hiero, ia tapea ïa oia i te reira e tia ’i.” E matapo ratou, aita i ite eaha te mea maitai e  te mea ino. Mea faufaa a‘e no ratou te auro o te hiero i te faufaa pae varua o te vahi haamoriraa ia Iehova. Ua haapae ratou i “te mau mea faufaa a‘e o te ture a Mose, oia hoi te parau-tia, te aroha hamani maitai e te taiva ore.”—Mataio 23:16, 23; Luka 11:42.

Ua parau Iesu e e “aratai matapo” teie mau Pharisea, o te titia nei i te naonao e te horomii nei râ i te kamela! (Mataio 23:24) E titia ratou i te naonao i topa i roto i ta ratou uaina, e manumanu viivii hoi teie. E au râ te haapaeraa ratou i te mau mea faufaa a‘e o te ture a Mose i te horomiiraa i te kamela, e animara rahi a‘e mea viivii atoa.—Levitiko 11:4, 21-24.