Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 120

Ia riro te mau pǐpǐ ei amaa hotu e ei hoa no Iesu

Ia riro te mau pǐpǐ ei amaa hotu e ei hoa no Iesu

IOANE 15:1-27

  • TE TUMU VINE MAU E TE MAU AMAA

  • EAHA TE RAVE E HERE NOA ’I IESU IA TATOU?

I faaitoito noa na Iesu i ta ’na mau aposetolo haapao maitai ma te haamahora i to ’na aau. Ua mairi paha te tuiraa po a faahiti ai Iesu i teie faahoho‘araa faaitoito mau:

“O vau te tumu vine mau, e na to ’u Metua i tanu.” (Ioane 15:1) E au teie faahoho‘araa i tei parauhia e hanere matahiti na mua ’tu no te nunaa Iseraela, tei parauhia te tumu vine a Iehova. (Ieremia 2:21; Hosea 10:1, 2) Te faarue roa ra râ Iehova i tera nunaa. (Mataio 23:37, 38) Faahiti ihora Iesu i te hoê mana‘o apî. O ’na te tumu vine ta to ’na Metua i atuatu mai to ’na faatavairaahia i te varua mo‘a i 29. Faaite atura Iesu e e ere o ’na ana‘e te tumu vine:

“E tâpû [to ’u Metua] i te mau amaa hotu ore atoa i roto ia ’u, e e tamâ oia i te mau amaa hotu atoa, ia rahi atu â hoi te hotu. . . . Eita te amaa e hotu mai oia ana‘e ra ia ore te reira e vai noa i nia i te tumu vine. Na reira atoa ïa outou ia ore outou e ati noa mai ia ’u. O vau te tumu vine, o outou te mau amaa.”—Ioane 15:2-5.

Ua fafau Iesu i ta ’na mau pǐpǐ haapao maitai e ua reva ana‘e oia, e tono mai oia i te tahi tauturu, te varua mo‘a. E 51 mahana i muri a‘e, i te fana‘oraa te mau aposetolo e te tahi atu mau pǐpǐ i taua varua ra, riro atura ratou ei amaa no te tumu vine, e ia ati noa mai te mau “amaa” atoa ia Iesu e tia ’i. No te aha?

Faataa ’tura oia: “O te ati noa mai ia ’u, a ati atu ai au ia ’na, e hotu rahi mai ïa. Ia taa ê hoi outou ia ’u, aore roa ïa e mea e tia ia outou ia rave.” E riro ta Iesu mau pǐpǐ haapao maitai ei “amaa” hotu rahi a pee ai i to ’na mau huru maitatai, a poro ai i te Faatereraa arii a te Atua ma te itoito rahi, e a faariro ai e rave rahi taata ei pǐpǐ. E ahahia tei ore e ati noa ia Iesu, e au hoi i te hoê amaa hotu ore? Faataa ’tura Iesu: “O te ore e ati noa mai ia ’u, e hurihia ïa i rapae.” Na ô atura râ Iesu: “Ia ati noa mai outou ia ’u e ia vai noa ta ’u mau parau i roto i to outou aau, e horoahia ’tu ïa ia ani outou i ta outou atoa e hinaaro.”—Ioane 15:5-7.

Faahiti faahou ihora Iesu i ta ’na i faahiti a‘ena e piti taime, te haapaoraa i ta ’na mau faaueraa. (Ioane 14:15, 21) Faataa ’tura Iesu e nafea te mau pǐpǐ e haapapu ai e te na reira ra ratou: “Ia haapao outou i ta ’u mau faaueraa, e here noa ïa vau ia outou, mai ia ’u hoi e haapao nei i te mau faaueraa a te Metua, a here noa ’i o ’na ia ’u.” Eita râ e navai ia here noa i te Atua ra o Iehova e ta ’na Tamaiti. Na ô atura Iesu: “Teie ta ’u faaueraa, ia here outou te tahi i te tahi mai ia ’u e here nei ia outou. Ia horoa te hoê taata i to ’na ora no to ’na mau hoa, tera te here rahi a‘e. E hoa outou no ’u ia rave outou i ta ’u e faaue atu nei ia outou.”—Ioane 15:10-14.

Tau hora i muri iho, e faaite Iesu i to ’na here a horoa ’i i to ’na ora no te feia atoa e faatupu ra i te faaroo ia ’na. Ia turai to ’na hi‘oraa i ta ’na mau pǐpǐ ia here te tahi i te tahi ma te haapae ia ratou iho. Na teie huru here e faaite o vai ratou, mai ta Iesu i parau iho nei: “I te mea e mea here outou te tahi i te tahi, e ite ïa te taata atoa e e pǐpǐ outou na ’u.”—Ioane 13:35.

Ua tapao iho â te mau aposetolo e ua pii Iesu ia ratou e “hoa.” Faataa ’tura oia no te aha: “Ua parau vau ia outou e hoa, no te mea ua faaite atu vau ia outou i te mau mea atoa ta ’u i faaroo i to ’u Metua.” E haamaitairaa te riroraa ei hoa rahi no Iesu e te iteraa i ta to ’na Metua i parau ia ’na! No te fana‘o râ i teie huru taairaa, ia “hotu rahi noa ïa ratou.” Parau atura Iesu e, ia na reira ratou, e horoa te Metua i ta ratou atoa e ani ia ’na ma to Iesu i‘oa.—Ioane 15:15, 16.

Ia here ta ’na mau pǐpǐ, taua mau “amaa” ra, te tahi i te tahi, e nehenehe ïa ratou e faaruru i  te tupu mai. Faaara ’tura oia e e hae teie nei ao ia ratou, e tamahanahana ’tura ia ratou: “Ia hae teie nei ao ia outou, a haamana‘o e o vau ta ratou i hae hou a hae ai ia outou. Ahiri outou no teie nei ao, e au mai ïa ratou ia outou. No te mea râ e e ere outou no teie nei ao, . . . no reira ïa ratou e hae ai ia outou.”—Ioane 15:18, 19.

Faataa maitai atura Iesu no te aha teie nei ao e hae ai ia ratou: “E na reira mai ratou ia outou no te mea e pǐpǐ outou na ’u, aita hoi ratou i ite i tei tono mai ia ’u.” Te parau ra Iesu e na ta ’na mau semeio e faahapa ra i tei hae mai ia ’na: “Ahiri au aore i rave na i rotopu ia ratou i te mau semeio aita hoê a‘e i rave a‘enei, eita ïa ratou e hara. I teie nei râ, ua ite ratou i taua mau semeio ra e ua hae atoa ia ’u e i to ’u Metua.” E parau tohu tei tupu i to ratou haeraa ia ’na.—Ioane 15:21, 24, 25; Salamo 35:19; 69:4.

Fafau faahou ihora Iesu e tono mai oia i te tauturu, te varua mo‘a. E fana‘o ta ’na mau pǐpǐ atoa i taua puai ohipa ra a hotu mai ai ratou e a faaite ai i te parau no Iesu.—Ioane 15:27.