Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 113

Te rohi-noa-raa i te faaohipa i te mau taleni ei haapiiraa

Te rohi-noa-raa i te faaohipa i te mau taleni ei haapiiraa

MATAIO 25:14-30

  • HOROARAA IESU I TE FAAHOHO‘ARAA O TE MAU TALENI

Tei nia â Iesu i te mou‘a Oliveta e na maha aposetolo i faatia ’tu ai oia i te tahi atu faahoho‘araa. Tau mahana na mua ’tu i Ieriko, ua horoa oia i te faahoho‘araa o te mina no te faaite e e haamauhia te Faatereraa arii a muri a‘e roa. Fatata hoê â haapiiraa to te faahoho‘araa ta ’na e faatia ’tu ra. Te pahono atoa ra te reira i te uiraa no nia i te tau o to ’na ho‘iraa mai e te anotau hopea o te faanahoraa o te ao nei. Te haapapu ra te reira e ia rohi noa ta ’na mau pǐpǐ no tei tuuhia ia ratou e tia ’i.

Faatia ’tura Iesu: “E au atoa hoi te Faatereraa arii o te ra‘i i te hoê taata hou a reva ’i i te ara, o tei titau i ta ’na mau tavini, e tuu atura i ta ’na mau faufaa ia ratou.” (Mataio 25:14) I te mea e ua faaau a‘ena Iesu ia ’na iho i te hoê taata tei reva i te ara “ia faatoroahia oia ei arii,” ua taa maitai i na aposetolo e o ’na iho taua “taata” ra.—Luka 19:12.

Hou taua taata ra a reva ’i i te ara, ua tuu oia i ta ’na mau faufaa i ta ’na mau tavini. I te roaraa o ta ’na taviniraa e toru matahiti e te afa, ua tutava na mua Iesu i te poro i te parau apî oaoa o te Faatereraa arii a te Atua e ua faaineine i ta ’na mau pǐpǐ no teie ohipa. Te reva ra râ oia, ma te tiaturi e e tamau ratou i te rave i te mea ta ’na i faaineine ia ratou.—Mataio 10:7; Luka 10:1, 8, 9; a hi‘o i te Ioane 4:38; 14:12.

Mea nafea te taata i te opereraa i ta ’na mau faufaa? Faatia ’tura Iesu: “Ua horoa oia e pae taleni na te hoê, e piti na te tahi e hoê na te tahi atu, ia au i tei tia ia ratou tataitahi ia haapao, e reva ’tura oia i te ara.” (Mataio 25:15) Ua aha teie mau tavini i tei tuuhia ia ratou? Ua rohi anei ratou i te faaohipa i teie mau faufaa ia apî to ratou fatu? Parau atura Iesu i na aposetolo:

“Haere oioi ihora te tavini tei horoahia ’tu e pae taleni e faaohipa i te reira ia hoona mai e ua apî mai oia e pae atu â taleni. Oia atoa te tavini tei horoahia ’tu e piti, ua apî mai ïa e piti atu â taleni. Area te tavini tei horoahia ’tu hoê noa taleni, ua haere ïa e ô i te apoo e huna ’tura i te moni a to ’na fatu.” (Mataio 25:16-18) Eaha tei tupu i te ho‘iraa mai te fatu?

Na ô atura Iesu: “I muri a‘e roa, ho‘i maira te fatu o taua mau tavini ra e titau ihora i ta ’na moni.” (Mataio 25:19) Ua rohi na tavini matamua “ia au i tei tia ia [raua] tataitahi ia haapao,” a imi ai i te apî ma te faaohipa i tei tuuhia ia raua. Ua tataipiti te taleni a tei tuuhia e pae taleni, na reira atoa ta tei tuuhia e piti. (I tera tau, e noaa i te tahi taata hoê taleni ia rave oia i te ohipa 19 matahiti.) Hoê â parau haapopou ta ’na i na tavini tataitahi: “Maitai roa, e tavini afaro oe e te haapao maitai! Ua haapao  maitai oe vetahi o ta ’u mau ohipa. E faatoroa vau ia oe ei tiaau i te mau mea rahi atu â. Ia oaoa atoa oe e to oe fatu.”—Mataio 25:21.

E ere râ hoê â huru no te tavini tei tuuhia hoê taleni. Parau maira oia: “E te Fatu, ua ite au e e taata etaeta oe, o te ooti i ta oe i ore i ueue e o te haaputu i ta oe i ore i tanu. Mǎta‘u ihora vau e haere atura vau e huna i ta oe taleni i roto i te repo. Tera mai ta oe taleni.” (Mataio 25:24, 25) Aita oia i hopoi noa ’‘e i te moni i te fare moni ia apî rii mai to ’na fatu. Ua mâu‘a ïa te faufaa a to ’na fatu ia ’na.

Ua tano te fatu i te parau ia ’na e “tavini ino e te faatau.” Iriti-ê-hia maira ta ’na, e horoahia ’tura i te tavini ua ineine i te rohi atu â. Na ô atura te fatu: “Te taata hoi e faufaa ta ’na, e horoahia ’tu â ïa ta ’na e e rahi atu â. Te taata râ aita ta ’na e faufaa, e iriti-ê-atoa-hia ïa ta ’na.”—Mataio 25:26, 29.

Mea rahi te haapiiraa ta te mau pǐpǐ a Iesu e nehenehe e feruriruri, no nia atoa i teie faahoho‘araa. Te taa ra ia ratou e mea faufaa roa ta Iesu i tuu ia ratou, oia hoi te haamaitairaa e faariro i te taata ei pǐpǐ, e te tiai ra oia ia ratou ia rohi i te haapaoraa i teie haamaitairaa. Aita Iesu e parau ra e ia aifaito ta ratou paatoa e rave no te ohipa pororaa ta ’na i faaue ia ratou. I roto i teie faahoho‘araa, ia rohi te taata atoa “ia au i tei tia ia ratou tataitahi.” Te auraa, eita roa ’tu Iesu e mauruuru i te tahi taata “faatau” o te ore e imi ma to ’na puai atoa i te apî i nia i te faufaa a to ’na Fatu.

Eaha paha na aposetolo i te oaoa i teie haapapuraa: “Te taata . . . e faufaa ta ’na, e horoahia ’tu â ïa ta ’na e e rahi atu â”!