Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 119

O Iesu te e‘a, te parau mau, te ora

O Iesu te e‘a, te parau mau, te ora

IOANE 14:1-31

  • REVARAA IESU E FAAINEINE I TE TAHI VAHI

  • FAFAURAA OIA I TA ’NA MAU PǏPǏ E FANA‘O RATOU I TE HOÊ TAUTURU

  • MEA HAU A‘E TE METUA IA IESU

Tei te piha i nia â Iesu e ta ’na mau aposetolo haapao maitai i muri iho i te Oroa haamana‘oraa, faaitoito atura oia ia ratou: “Eiaha to outou aau ia horuhoru. A faatupu i te faaroo i te Atua, a faatupu atoa i te faaroo ia ’u.”—Ioane 13:36; 14:1.

Faataa ’tura Iesu no te aha eiaha ’i ratou ia horuhoru ia reva oia: “Mea rahi te vahi faaearaa i roto i te fare o to ’u Metua. . . . Ia reva vau e faaineine i te tahi vahi no outou, e ho‘i mai â vau e aratai ia outou i ǒ ’u ra, i te vahi hoi to reira vau, to reira atoa ïa outou.” Aita râ i taa ia ratou e o to ’na revaraa i te ra‘i ta ’na e parau ra. Na ô maira Toma: “E te Fatu, aita matou i ite i te vahi ta oe e haere nei. Mea nafea ïa matou i ite ai i te e‘a?”—Ioane 14:2-5.

Pahono atura Iesu: “O vau te e‘a e te parau mau e te ora.” Ia farii te tahi taata ia ’na e ta ’na mau haapiiraa, e ia pee i to ’na huru oraraa e tomo ai oia i te fare i te ra‘i o to ’na Metua. Na ô atura Iesu: “Aore roa e taata e tae i te Metua ra, na roto noa râ ia ’u.”—Ioane 14:6.

Ani maira Philipa o te faaroo maitai mai ra: “E te Fatu, a faaite mai i te Metua, atira ’tu ai.” E au ra e ua hinaaro Philipa e ite orama i te Atua, mai ia Mose, Elia e Isaia. Mea fana‘o a‘e râ te mau aposetolo, ta Iesu i haapapu atu: “Ahia ’tura maororaa to ’u parahiraa mai ia outou ra, aita â oe e Philipa i ite atura o vai au? O tei ite mai ia ’u, ua ite atoa ïa i te Metua.” E faaite Iesu i te huru o to ’na Metua ma te tia roa. No reira, te oraraa i pihai iho ia Iesu e te iteraa ia ’na, mai te huru ra e te ite ra ratou i te Metua. Parau mau, mea hau a‘e te Metua i ta ’na Tamaiti, ua haapapu hoi Iesu: “Te mau mea ta ’u e parau ia outou pauroa, e ere ïa i to ’u iho mau mana‘o.” (Ioane 14:8-10) Te parau ra ïa Iesu i te mau aposetolo e no ǒ mai i to ’na Metua ta ’na mau haapiiraa atoa.

Ua ite te mau aposetolo ia Iesu i te raveraa i  te tahi mau ohipa faahiahia e ua faaroo ia ’na i te pororaa i te parau apî oaoa o te Faatereraa arii a te Atua. Na ô atura oia ia ratou: “O te faatupu i te faaroo ia ’u, e rave atoa ïa oia i te mau ohipa ta ’u e rave nei. E ohipa rahi a‘e i teie ta ’na e rave.” (Ioane 14:12) Aita Iesu e parau ra e e faatupu ratou i te semeio rahi a‘e i ta ’na. E poro râ ratou i nia i te hoê tau maoro atu â, na te hoê tuhaa fenua aano atu â, e i te taata e rave rahi atu â.

Ia reva Iesu, eita oia e faarue ia ratou, ua fafau hoi oia: “Ia ani outou i te tahi mea ma to ’u i‘oa, e rave au.” Na ô faahou atura oia: “Na ’u e ani i te Metua e na ’na e horoa ’tu i te tahi atu tauturu o te vai noa mai ia outou ra e a muri noa ’tu. O te varua mo‘a ïa o te parau mau.” (Ioane 14:14, 16, 17) Ua haapapu oia e e fana‘o ratou i te varua mo‘a, te tahi atu tauturu. Te ohipa ïa i tupu i te Penetekose.

Na ô atura Iesu: “E maa taime â e ore teie nei ao e ite faahou mai ia ’u. Outou râ, oia ïa no te mea te ora nei au, e ora ïa outou.” (Ioane 14:19) I muri iho i to Iesu faatiaraahia mai, ua ite te mau pǐpǐ ia ’na hou oia a reva ’i i te ra‘i. I te tau faataahia râ, e faatia mai oia ia ratou ia ora e o ’na i te ra‘i ei varua.

Faahiti atura Iesu i teie parau mau: “O te farii i ta ’u mau faaueraa e o te haapao i te reira, mea here ïa na ’na ia ’u. E o te here ra ia ’u, e herehia ïa o ’na e to ’u Metua. E here atoa vau ia ’na, a faaite maitai atu ai ia ’na o vai au.” Ui maira te aposetolo Iuda, pii-atoa-hia Tadaio: “E te Fatu, no te aha oe e hinaaro ai ia ite maitai matou o vai oe, eiaha râ to te ao?” Pahono atura Iesu: “Ia here te hoê taata ia ’u, e haapao ïa o ’na i ta ’u parau, e here to ’u Metua ia ’na . . . O te ore e here ia ’u, eita ïa e haapao i ta ’u mau parau.” (Ioane 14:21-24) Aita to te ao e farii ra e o Iesu te e‘a, te parau mau e te ora, area ta ’na mau pǐpǐ, oia ïa.

Ia reva Iesu, e nafea ïa te mau pǐpǐ e haamana‘o ai i ta ’na i haapii ia ratou? Faataa ’tura Iesu: “Area te tauturu, te varua mo‘a ta te Metua e tono atu ma to ’u i‘oa, na ’na e haapii ia outou i te mau mea atoa e e haamana‘o ia outou i te mau mea atoa ta ’u i parau atu.” E parau tamahanahana teie, ua ite hoi te mau aposetolo i te ohiparaa te varua mo‘a ma te puai rahi. Na ô faahou atura Iesu: “E vaiiho atu vau i te hau, e horoa ’tu vau i to ’u nei hau. . . . Eiaha to outou aau ia horuhoru, eiaha atoa ia taiâ.” (Ioane 14:26, 27) Eiaha iho â te mau pǐpǐ e horuhoru, na te Metua hoi o Iesu e aratai e e paruru ia ratou.

I muri iho, e ite papu ratou i te parururaa a te Atua. Parau atura Iesu: “Te haere mai nei hoi te arii o teie nei ao e aita to ’na e mana i nia ia ’u.” (Ioane 14:30) I nehenehe na te Diabolo e tomo i roto ia Iuda a mana ’tu ai i nia ia ’na. Aita râ to Iesu e paruparu ta Satani e nehenehe e ohipa i nia iho ia patoi Iesu i te Atua. Aita atoa i tia i te Diabolo ia tapea ia Iesu i roto i te pohe. No te aha? Faataa ’tura Iesu: “Te rave nei au i ta te Metua i faaue mai.” Ua papu ia ’na e e faatia to ’na Metua ia ’na mai te pohe mai.—Ioane 14:31.