Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 117

Te Amuraa maa a te Fatu

Te Amuraa maa a te Fatu

MATAIO 26:21-29 MAREKO 14:18-25 LUKA 22:19-23 IOANE 13:18-30

  • FAAITERAAHIA E ENEMI O IUDA

  • HAAMAURAA IESU I TE HOÊ OROA HAAMANA‘ORAA

I taua po ra, ua haapii iho nei Iesu i ta ’na mau aposetolo i te haehaa ma te horoi i to ratou avae. I te otiraa ratou i te amu i te Pasa, faahiti atura oia i ta Davida parau tohu: “Tau hoa here nei hoi i tiaturihia e au ra, tei amu atoa i ta ’u nei maa, o tei faateitei i to ’na poro avae ia ’u nei.” Faataa ’tura oia: “E tuu atu te hoê o outou ia ’u i te rima o to ’u mau enemi.”—Salamo 41:9; Ioane 13:18, 21.

Hi‘o a‘era te mau aposetolo te tahi i te tahi, e ui maira ratou pauroa, o Iuda atoa: “E te Fatu, o vau anei?” Parau atura Petero ia Ioane ia ui atu o vai, to pihai iho hoi oia ia Iesu. Fariu maira Ioane ia Iesu e ui maira: “E te Fatu, o vai ta oe e parau ra?”—Mataio 26:22; Ioane 13:25.

Pahono atura Iesu: “O te taata ïa ta ’u e horoa ’tu i te pane ofatihia ta ’u e tuu i roto i te au‘a.” Tuu atura Iesu i te pane i roto i te hoê au‘a i nia i te amuraa maa, e horoa ’tura ia Iuda, a na ô ai: “Te reva nei iho â te Tamaiti a te taata nei, mai tei papaihia no ’na, ua ati râ te taata na ’na e tuu i te Tamaiti a te taata nei i to ’na mau enemi! Mea maitai a‘e no tera taata ahani aita oia i fanauhia.” (Ioane 13:26; Mataio 26:24) Tomo ihora Satani i roto ia Iuda. Ua ino ê na teie taata, tuu atura ïa oia ia ’na iho i te Diabolo a riro atu ai ei “taata o te haamouhia.”—Ioane 6:64, 70; 12:4; 17:12.

Na ô atura Iesu ia Iuda: “Ta oe e rave nei, haaviti atu â ïa i te rave.” Mana‘o ihora te tahi atu mau aposetolo e i te mea tei ia Iuda ra te afata moni, te na ô ra Iesu ia ’na: “‘A hoo mai i tei hinaaro-mau-hia e tatou no te oroa,’ aore ra ia horoa oia i te tahi mea na te feia veve.” (Ioane 13:27-30) Aita, ua haere Iuda e tuu ia Iesu i to ’na mau enemi.

I taua noa po ra o te Pasa, haamau ihora Iesu  i te hoê oroa apî. Rave maira oia i te hoê pane, pure a‘era i te Atua no te haamaitai i te reira, ofati ihora i te pane e horoa ’tura i te mau aposetolo ia amu. Na ô atura oia: “O to ’u tino teie e horoahia no outou. A tamau i te rave i te reira ei mana‘oraa ia ’u.” (Luka 22:19) Operehia ’tura te pane ta te mau aposetolo i amu.

Rave maira Iesu i te hoê au‘a uaina, pure a‘era i te Atua no te haamaitai i te reira, e horoa ’tura i te mau aposetolo. Inu a‘era ratou tataitahi i te uaina i roto i te au‘a, ta Iesu i parau: “Teie au‘a, o te faufaa apî ïa e haamauhia maoti to ’u toto o te haamaniihia no outou.”—Luka 22:20.

Ua haamau ïa Iesu i te Oroa haamana‘oraa o to ’na pohe ta ta ’na mau pǐpǐ e faatupu i te mau matahiti atoa i te 14 no Nisana. E haamana‘o te reira eaha ta Iesu e to ’na Metua i rave e tiamâ ’i te feia e faaroo to ratou i te utua o te hara e te pohe. Ua hau a‘e teie oroa i te Pasa ati Iuda, o te taata atoa hoi e faaroo to ratou te tiamâ.

Ua parau Iesu e ia “haamaniihia [to ’na toto] no te taata e rave rahi ia faaorehia ta ratou mau hara,” oia atoa ta ta ’na mau aposetolo e ta te tahi atu mau pǐpǐ haapao maitai. O ratou te parahi e o ’na i roto i te Faatereraa arii a to ’na Metua.—Mataio 26:28, 29.