Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 91

Ua faatiahia mai Lazaro

Ua faatiahia mai Lazaro

IOANE 11:38-54

  • TIA-FAAHOU-RAA O LAZARO

  • OPUARAA TE SUNEDERI E HAAPOHE IA IESU

I muri iho i to Iesu farereiraa ia Mareta na mua e ia Maria i muri iho i pihai iho i Betania, haere atura ratou i to Lazaro menema, te hoê ana tei opanihia i te hoê ofai. Faaue atura Iesu: “A turai i te ofai.” Faahiti maira Mareta i to ’na haapeapea, ma te taa ore i ta Iesu i opua e rave: “E te Fatu, ua hau‘a oia i teie nei, a maha ’tura hoi mahana.” Na ô atura râ Iesu: “Aita anei au i parau ia oe e ia tiaturi oe, e ite ïa oe i te hanahana o te Atua?”—Ioane 11:39, 40.

Turaihia ’tura te ofai. Hi‘o a‘era Iesu i nia e pure a‘era: “To ’u Metua, te haamauruuru nei au ia oe no to oe faarooraa i ta ’u pure. Ua ite au e e faaroo noa mai oe ia ’u. No teie râ rahiraa taata e haaati nei ia ’u i pure atu ai au, ia tiaturi hoi ratou e na oe i tono mai ia ’u.” Ua pure Iesu i  mua i teie mau taata ia ite ratou e maoti te mana no ǒ mai i te Atua e tupu ai ta ’na e fatata i te rave. Tuô atura oia: “Lazaro, haere mai i rapae!” Haere maira Lazaro i rapae, ua vehîhia to ’na na avae e na rima e ua puohuhia to ’na upoo i te hoê ahu. Na ô atura Iesu: “A tatara i te ahu i vehîhia ’i oia e a tuu ia ’na ia haere.”—Ioane 11:41-44.

Mea rahi te ati Iuda o tei haere mai e tamahanahana ia Maria raua Mareta, tei ite i teie semeio e tei tiaturi ia Iesu, ua haere râ vetahi e faatia i te mau Pharisea. Haaputuputu maira te mau Pharisea e tahu‘a tiaau i te Sunederi, te tiripuna teitei ati Iuda, to roto atoa te tahu‘a rahi o Kaiapha. Autâ a‘era vetahi o ratou: “E nafea ïa tatou? Mea rahi hoi te semeio ta tera taata e rave nei. Ia vaiiho tatou ia ’na ia na reira noa, e tiaturi ïa te taata atoa ia ’na, e e haere mai to Roma e rave i ta tatou vahi haamoriraa e to tatou nunaa.” (Ioane 11:47, 48) Noa ’tu te haapapuraa a te tahi mau ite e “mea rahi hoi te semeio ta [Iesu] e rave nei,” aita teie mau taata i oaoa no ta te Atua e rave ra na roto ia ’na. Ta ratou haapeapearaa rahi, to ratou ïa tiaraa e mana.

Te faatiaraahia mai Lazaro mai te pohe mai, e faahaparaa rahi ïa i te mau Sadukea aita e tiaturi ra i te tia-faahou-raa. Parau maira Kaiapha, te hoê Sadukea: “Aita outou e taa ra? Aita outou e ite ra e mea maitai a‘e no outou ia pohe hoê noa taata no te nunaa eiaha râ ia mou te nunaa taatoa?”—Ioane 11:49, 50; Ohipa 5:17; 23:8.

Na te Atua i rave ia paraparau Kaiapha mai tera, o ’na hoi te tahu‘a rahi, e ere “no ’na iho teie mana‘o.” Te hinaaro ra Kaiapha e parau e ia haapohehia Iesu ia ore oia e haafifi atu â i te mana e te ohiparaa a te mau aratai haapaoraa ati Iuda. Te faaite ra râ ta Kaiapha i tohu e na roto i to Iesu pohe e aufauhia ’i te hoê hoo, eiaha noa no te mau ati Iuda, oia atoa râ no te taatoaraa o “te mau tamarii a te Atua tei purara ê.”—Ioane 11:51, 52.

Opua a‘era te Sunederi e haapohe ia Iesu, ta Kaiapha iho â i hinaaro. Ua faaarahia anei Iesu e Nikodemo, mero o te Sunederi mea hamani maitai ia Iesu? Ta tatou noa i ite, ua faarue Iesu i Ierusalema, a ore atu ai e pohe hou te taime faataahia e te Atua.