Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 90

“Te tia-faahou-raa e te ora”

“Te tia-faahou-raa e te ora”

IOANE 11:17-37

  • TAERAA MAI IESU UA POHE Ê NA LAZARO

  • “TE TIA-FAAHOU-RAA E TE ORA”

Na Perea mai, tae atura Iesu i pihai iho i Betania, piri i te toru kilometera i te pae hitia o te râ o Ierusalema. Te oto ra Maria raua Mareta, na tuahine o Lazaro, tei pohe a‘enei. Mea rahi tei haere mai e tamahanahana ia raua.

Faaarahia maira Mareta e te haere mai ra Iesu. Haaviti ihora oia i te haere e farerei ia ’na. Parau atura Mareta ia Iesu i ta raua Maria i mana‘o noa na a maha ’tura mahana: “Fatu, ahani oe i ǒ nei, e ore ïa to ’u taeae e pohe.” E ere râ te auraa e aita e tiaturiraa to Mareta. Na ô atura hoi oia: “Te tiaturi nei au e noa ’tu eaha ta oe e ani i te Atua, e horoa mai iho â oia.” (Ioane 11:21, 22) No ’na, e ravea â ta Iesu no to ’na taeae.

Pahono atura Iesu: “E tia faahou mai to taeae.” Mana‘o atura Mareta e te faahiti ra Iesu i te tia-faahou-raa a muri a‘e i te fenua nei, ta Aberahama e te tahi atu i tiaturi noa na, a na ô ai: “Ua ite au e e tia faahou mai oia i te tia-faahou-raa i te mahana hopea.”—Ioane 11:23, 24.

E nehenehe râ ta Iesu e horoa i te tahi tamǎrûraa i reira iho. Haamana‘o atura oia ia Mareta e e mana to ’na no ǒ mai i te Atua i nia i te pohe: “Ia pohe noa ’tu te taata o te faatupu i te faaroo ia ’u, e ora faahou mai oia. E te taata atoa e ora nei e e faatupu i te faaroo ia ’u, e ore roa ïa e pohe.”—Ioane 11:25, 26.

Aita Iesu e parau ra e ore roa ta ’na mau pǐpǐ e ora ra e pohe. O ’na atoa hoi te pohe, mai ta ’na i faaara i ta ’na mau aposetolo. (Mataio 16:21; 17:22, 23) Te haapapu ra râ oia e te taata o te faatupu i te faaroo ia ’na, e nehenehe oia e fana‘o i te ora mure ore. Mea rahi te fana‘o i te reira ia faatiahia mai ratou. Tera râ, te vai ra te feia haapao maitai e ora noa ra ia mou teie faanahoraa o te ao nei, o te ore roa e pohe. Noa ’tu eaha te tupuraa, e ore roa te taata atoa o te faatupu i te faaroo ia Iesu e roohia i te pohe mure ore.

E nehenehe anei râ ta Iesu, tei parau a‘enei, “O vau te tia-faahou-raa e te ora,” e faatia mai ia Lazaro, tau mahana ’tura te poheraa? Ui atura Iesu ia Mareta: “Tiaturi anei oe i te reira?” Pahono maira Mareta: “E, e te Fatu. Te tiaturi nei au e o oe te Mesia te Tamaiti a te Atua, tei haere mai i teie nei ao.” No to ’na faaroo e e nehenehe ta Iesu e rave i te tahi mea i taua mahana ra, haere ru ihora Mareta i te fare e parau mǎrû atura i to ’na tuahine: “To ǒ nei te Orometua e te ani mai ra ia oe.” (Ioane 11:25-28) Faarue ihora Maria i te fare, e apee maira te taata, tei mana‘o e te haere ra oia i te menema o Lazaro.

Aita, te haere ra Maria ia Iesu ra. Tuturi ihora oia i to ’na pae avae a ta‘i noa ’i, e parau maira i ta to ’na tuahine atoa i parau: “E te Fatu, ahani oe i ǒ nei, e ore ïa to ’u taeae e pohe.” No to ’na aroha i te iteraa ia Maria e te taata e ta‘i  ra, autâ ihora Iesu, horuhoru ihora e ta‘i atoa ’tura. Putapû ihora te feia e hi‘o noa mai ra. Parau a‘era râ vetahi: “Ua faaaraara teie taata i te mata o te hoê matapo. Aita ïa i tia ia ’na ia rave i te tahi mea ia ore Lazaro e pohe?”—Ioane 11:32, 37.