Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 83

Titau-manihini-raa i te hoê tamaaraa

Titau-manihini-raa i te hoê tamaaraa

LUKA 14:7-24

  • HAAPIIRAA O TE HAEHAA

  • IMIRAA TE MAU MANIHINI I TE OTOHERAA

I muri iho i to Iesu faaoraraa i te ma‘i o te taata ua oruoru to ’na na avae i te pape, tei te fare â o te Pharisea Iesu. Ite atura Iesu i te tahi mau manihini e maiti ra i te mau vahi faataahia no te feia tiaraa teitei. Horoa ’tura oia i te hoê haapiiraa o te haehaa:

“Ia titau-manihini-hia oe i te hoê oroa faaipoiporaa, eiaha e tarava i te vahi faataahia no te feia tiaraa teitei. Peneia‘e ua titau-manihini-atoa-hia te tahi atu taata tei hau a‘e ia oe. Haere maira te fatu fare e na ô maira ia oe: ‘A vaiiho i tena parahiraa no teie taata.’ Haere haama noa ’tura oe i te parahiraa hopea.”—Luka 14:8, 9.

Na ô faahou atura Iesu: “Ia titau-manihini-hia râ oe, a haere i te parahiraa hopea. Ia haere mai te fatu fare, e na ô mai oia: ‘To ’u hoa, a haere i mua ’tu.’ I reira ïa oe e faaturahia ’i e te mau manihini atoa.” E ere noa te reira i te peu maitai. Faataa ’tura Iesu: “Te taata hoi o te faateitei ia ’na, e faahaehaahia ïa, e te taata o te faahaehaa ia ’na, e faateiteihia ïa.” (Luka 14:10, 11) Te faaitoito ra iho â Iesu i te feia e faaroo ra ia ’na ia faatupu noa i te haehaa.

Horoa ’tura Iesu i te tahi atu haapiiraa i te Pharisea i titau manihini ia ’na, a faataa ’i o vai te tia ia titau-manihini-hia ia mauruuru te Atua: “Ia faatupu oe i te hoê tamaaraa i te avatea aore ra i te ahiahi, eiaha oe e titau manihini i to mau hoa, taeae, fetii aore ra te feia tapiri tao‘a rahi. E titau manihini atoa mai paha ratou ia oe ei faaho‘iraa i ta oe. Ia faatupu râ oe i te hoê tamaaraa, a titau manihini i te feia veve, te huma, te piri‘o‘i, te matapo. E oaoa ïa oe, no te mea aita ta ratou no te faaho‘i mai i ta oe.”—Luka 14:12-14.

E titau manihini iho â tatou i to tatou mau hoa, fetii aore ra feia tapiri no te hoê tamaaraa, aita Iesu e parau ra e aita e tano ra. Ua haapapu râ oia e e haamaitairaa rahi te noaa ia faatamaa i te feia riirii, mai te veve, te huma aore ra te matapo. Faataa ’tura Iesu i te Pharisea tei titau ia ’na: “I te tia-faahou-raa hoi o te feia parau-tia e faaho‘ihia mai ai ta oe.” Turu atoa maira te tahi atu manihini a na ô ai: “E oaoa te taata o te tamaa i roto i te Faatereraa arii a te Atua.” (Luka 14:15) Ua taa i taua manihini ra e e haamaitairaa taa ê te reira. E ere râ tera te mana‘o o te taata atoa, mai ta Iesu i faahiti i roto i te hoê faahoho‘araa:

“E tamaaraa rahi ta te hoê taata i te ahiahi, e mea rahi te taata ta ’na i titau manihini. . . . Tono ihora oia i ta ’na tavini e parau i te mau manihini: ‘Haere mai, ua ineine te maa.’ Otohe a‘era râ ratou pauroa. Na ô maira te hoê: ‘E faaapu ta ’u i hoo mai e te haere atu nei au e hi‘o. Eiaha e inoino mai, eita vau e tae atu.’ Na ô maira te tahi atu: ‘Hoê ahuru puaatoro ta ’u i hoo mai e te haere nei au e tamatamata. Eiaha e inoino mai, eita vau e tae atu.’ Na ô atoa maira te tahi atu: ‘No faaipoipo noa mai ra vau i te vahine, eita ïa vau e tae atu.’”—Luka 14:16-20.

E otoheraa ana‘e teie! I te tanoraa, e hi‘o maitai te tahi taata i te hoê faaapu aore ra nǎnǎ puaatoro hou a hoo mai ai. E ere ïa mea ru ia haere oia e hi‘o atu i muri iho. Aita te toru o te taata e faaineine ra i te faaipoipo, ua faaipoipo ê na râ. Eita ïa te reira e tapea ia ’na ia farii i te hoê titau-manihini-raa faufaa. I te faarooraa te fatu i teie mau otoheraa, riri ihora oia e parau atura i ta ’na tavini:

“A haere haaviti na te mau aroâ e te mau purumu o te oire, a aratai mai ai i ǒ nei i te feia veve, te huma, te matapo e te piri‘o‘i.” Na reira ’tura te tavini, e toe noa maira te parahiraa. Na ô atura te fatu i ta ’na tavini: “A haere na te mau purumu e te mau e‘a, a onoono maite atu ai i te  taata ia haere mai ia î hoi to ’u fare. Te parau atu nei hoi au: E ore roa tera mau taata tei titau-manihini-hia e amu i te maa ta ’u i faaineine.”—Luka 14:21-24.

Te faahoho‘a maitai ra ta Iesu i faatia iho nei i te tonoraa te Atua ra o Iehova ia Iesu Mesia e titau manihini i te taata no te Faatereraa arii o te ra‘i. Ua titauhia na mua te ati Iuda, te mau aratai haapaoraa iho â râ. Aita te rahiraa i farii i te titauraa a rave ai Iesu i ta ’na taviniraa. E ere râ o ratou ana‘e te titauhia. Ua haapapu maitai Iesu e a muri a‘e, i te piti o te titauraa, e titauhia te feia riirii o te nunaa ati Iuda e te feia i farii i te haapaoraa ati Iuda. I muri a‘e, i te toru o te titauraa e te hopea, no te feia ïa ta te ati Iuda i mana‘o na e mea viivii i mua i te Atua.—Ohipa 10:28-48.

Te haapapu mau ra ta Iesu e faatia ra i te parau a te hoê o te mau manihini: “E oaoa te taata o te tamaa i roto i te Faatereraa arii a te Atua.”