Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 87

A feruri na mua e a haa ma te paari

A feruri na mua e a haa ma te paari

LUKA 16:1-13

  • FAAHOHO‘ARAA O TE TIAAU PARAU-TIA ORE

  • “A IMI I TE HOA” MAOTI TA OE MAU TAO‘A

I to Iesu faatiaraa a‘enei i te faahoho‘araa o te tamaiti tei mo‘e na, eita e ore e ua putapû te tahi mau titau tute, papai parau e Pharisea e ua ineine te Atua i te faaore i te hara a te feia rave hara tei tatarahapa. (Luka 15:1-7, 11) I muri iho paraparau atura Iesu i ta ’na mau pǐpǐ, a faatia ’i i te tahi atu faahoho‘araa. O te hoê ïa taata tao‘a rahi tei faaroo e ua rave ta ’na tiaau i te tahi ohipa tano ore.

Ua parihia te tiaau i te haamâu‘araa i te faufaa a to ’na fatu. Parau atura te fatu e e tihati oia i te tiaau. Haapeapea ihora te tiaau: “E nafea râ vau, e tihati hoi to ’u fatu ia ’u? Eita e haere ia ’u ia utaru, mea haama atoa ia taparu haere i te moni.” Feruri ihora oia: “Ua ite au eaha ta ’u e rave ia farii mai te taata ia ’u i ǒ ratou ua ere ana‘e au i to ’u toroa tiaau.” Titau ihora oia i te feia tei tarahu i to ’na fatu e ui atura: “Ehia ta oe i tarahu i to ’u fatu?”—Luka 16:3-5.

Pahono maira te taata tarahu matamua: “Hoê hanere tura hinu olive.” Piri ïa i te 2 200 litera. E faaapu olive rahi paha ta ’na aore ra e hoo atu oia i te hinu. Na ô atura te tiaau: “A rave i ta oe parau faaau, a parahi e a papai haaviti e 50 [1 100 ïa litera].”—Luka 16:6.

Ui ihora te tiaau i te tahi atu: “E oe, ehia ta oe tarahu?” Pahono maira oia: “Hoê hanere pute sitona.” Piri ïa i te 17 000 kilo. Na ô atura te tiaau: “A rave i ta oe parau faaau e a papai e 80.” Ua faaiti mai ïa oia i te tarahu.—Luka 16:7.

Na te tiaau noa iho â e haapao ra i te faufaa a to ’na fatu. E tiaraa ïa to ’na e faaiti mai i ta taua mau taata ra i tarahu i te fatu. Ma te na reira, te faahoa ra oia i te feia e nehenehe e hamani maitai ia ’na ia ere oia i ta ’na ohipa.

Faarooroo atura te fatu i te ohipa i tupu. Noa ’tu e pau rahi oia, ua faahiahia oia i te tiaau e ua haapopou ia ’na, “noa ’tu e e taata parau-tia ore, no to ’na haaraa ma te paari.” Na ô atura Iesu: “E rahi a‘e te paari o te mau tamaiti o teie faanahoraa o te ao nei i to te mau tamaiti o te maramarama ia ohipa ratou i nia ia vetahi ê.”—Luka 16:8.

Aita Iesu e turu ra i te huru raveraa a te tiaau aore ra te ohipa taviri. Eaha ïa ta ’na haapiiraa? A‘o ihora oia i te mau pǐpǐ: “A imi i te hoa no outou maoti te mau tao‘a a teie nei ao parau-tia ore. E ia mo‘e taua mau tao‘a ra, e fariihia mai ïa outou . . . i roto i te mau nohoraa mure ore.” (Luka 16:9) Te haapiiraa i ǒ nei, te haro‘aro‘a ïa e te haaraa ma te paari. Ia faaohipa hoi te mau tavini a te Atua, “te mau tamaiti o te maramarama,” i ta ratou mau tao‘a ma te paari, a feruri ai i te tau mure ore a muri a‘e.

O te Atua ra o Iehova e ta ’na Tamaiti ana‘e te nehenehe e farii i te hoê taata i roto i te Faatereraa arii i te ra‘i aore ra i te paradaiso i te fenua nei i raro a‘e i taua Faatereraa arii ra. Ia rohi ïa tatou i te faahoa ’tu ia raua, ma te faaohipa i  ta tatou mau tao‘a no te turu i te mau faufaa a te Faatereraa arii. Mo‘e aore ra pau noa ’tu te auro, te ario, e te tahi atu mau tao‘a, e fana‘o iho â tatou i te ora mure ore a muri a‘e.

Ua parau atoa Iesu e te feia o te haapao maitai e o te faaohipa i ta ratou mau faufaa aore ra tao‘a atoa, e haapao maitai atoa ïa i te mau mea faufaa a‘e. Na ô atura Iesu: “No reira, ua faaite outou e aita outou i haapao maitai i te mau tao‘a a teie nei ao parau-tia ore, eita atoa ïa e horoahia ’tu te mau tao‘a mau [mai te mau faufaa a te Faatereraa arii].”—Luka 16:11.

Te faaite ra Iesu i ta ’na mau pǐpǐ e mea rahi te anihia ia ratou ia fariihia ratou “i roto i te mau nohoraa mure ore.” Eita te hoê tavini mau a te Atua e nehenehe e tavini atoa i te mau tao‘a a teie nei ao parau-tia ore. Na ô atura Iesu: “E ore e tia i te hoê tavini ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni.”—Luka 16:9, 13.