Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 86

Ho‘iraa mai te tamaiti tei mo‘e na

Ho‘iraa mai te tamaiti tei mo‘e na

LUKA 15:11-32

  • FAAHOHO‘ARAA O TE TAMAITI TEI MO‘E NA

E au ra e ua horoa Iesu i na faahoho‘araa o te mamoe i mo‘e na e te moni ario i mo‘e na i Perea i te pae hitia o te râ o te anavai Ioridana. Te mana‘o faufaa e haapii mai, ia oaoa ïa tatou ua tatarahapa ana‘e te hoê taata rave hara a ho‘i mai ai i te Atua. Ua faahapa te mau Pharisea e papai parau ia Iesu tei farii maitai i tera huru taata. Ua taa anei râ ia ratou te haapiiraa a Iesu i roto i na faahoho‘araa? Ua taa anei ia ratou te huru aau o to tatou Metua i te ra‘i no te feia rave hara tei tatarahapa? Horoa ’tura Iesu i te hoê faahoho‘araa putapû o te haapapu i teie â haapiiraa faufaa.

O te hoê ïa metua tane e ta ’na e piti tamaiti, no te teina na mua teie aamu. Mea ohie no te taata atoa e faaroo ra ia Iesu, oia atoa no te mau Pharisea e papai parau, ia huti i te haapiiraa i te aamu o teie teina. Mea faufaa atoa râ ta Iesu e faatia ra no te metua tane e te tamaiti matahiapo, e haapiiraa atoa hoi te huti mai i to raua huru. A mana‘o ïa i teie e toru tane a faatia ’i Iesu i te faahoho‘araa:

“E piti tamaiti ta te hoê taata. Parau maira te teina i to ’na metua tane: ‘To ’u metua, horoa mai na i ta ’u tufaa.’ Tufa ihora te metua tane i ta ’na mau faufaa mai tei au ia raua tataitahi.” (Luka 15:11, 12) A tapao na e aita te metua tane i pohe i ani ai te teina i ta ’na tufaa. Te ora noa ra to ’na metua. Ua hinaaro râ te teina i ta ’na tufaa i tera iho taime no te faarue i te utuafare a faaohipa ’tu ai i ta ’na tufaa mai ta ’na e hinaaro. Ua aha ’tura oia?

Faataa ’tura Iesu: “Tau mahana i muri iho, haaputu ihora te teina i ta ’na mau mea atoa, reva ’tura i te hoê fenua atea, e hue atura i ta ’na faufaa i roto i te ohipa haapaoraa ore.” (Luka 15:13) Aita te teina i faaea i te fare i reira oia e paruruhia ’i, i pihai iho i to ’na metua tane o te aupuru ra e te faatamaa ra i ta ’na na tamaiti. Reva ’tura râ oia i te hoê fenua ê, e hue atura i ta ’na tufaa no te haamâha i to ’na mau hinaaro tia ore o te tino. Roohia ’tura oia e te ati, mai ta Iesu i faatia:

“Pau roa a‘era ta ’na faufaa, tupu ihora te o‘e  rahi i taua fenua ra, e poia roa a‘era oia. Haere roa ’tura oia e rave i te ohipa na te hoê taata no reira, o tei faaue ia ’na ia haere i to ’na mau fenua e haapao i te nǎnǎ puaa. Hiaai atura oia i te maa ta te puaa e amu, aita râ e taata e horoa ’tu i te maa na ’na.”—Luka 15:14-16.

Aita ’tu â e ravea ta te teina maori râ te haapaoraa i te nǎnǎ puaa, noa ’tu e animara viivii teie ia au i te ture a te Atua ia Mose. Ua pohe poia roa o ’na, a hiaai atu ai i te maa a te puaa ta ’na e haapao ra. I roto i to ’na ati e to ’na hepohepo, “haamata ’tura oia i te feruri maitai e na ô ihora: ‘Te tamaa maitai ra te mau rave ohipa e rave rahi a to ’u metua tane, o vau nei râ, te pohe nei ïa i te poia i ǒ nei! E reva vau i ǒ to ’u metua tane ra, a na ô atu ai: “To ’u metua, ua hara vau i te Atua i te ra‘i e ia oe. Eita e tano faahou ia parauhia vau ei tamaiti na oe. Faariro oe ia ’u mai te hoê o ta oe mau rave ohipa.”’” Reva ’tura oia i ǒ to ’na metua tane ra.—Luka 15:17-20.

E nafea to ’na metua ia ’na? E riri anei oia i ta ’na tamaiti a tama‘i ai ia ’na no to ’na maamaa i te faarueraa i te fare na mua roa? E tâu‘a ore anei te metua tane ia ’na, a ore atu ai e farii maitai ia ’na? O oe a‘e teie, e nafea oe ahiri e tamaiti aore ra e tamahine na oe?

 HO‘IRAA MAI TE TAMAITI I MO‘E NA

Faaite maira Iesu i te huru aau o te metua tane e ta ’na i rave: “Tei te atea ê â [te tamaiti], ite maira to ’na metua tane ia ’na, aroha ihora, horo maira, tauahi maitai ihora ia ’na e apa maira.” (Luka 15:20) Noa ’tu ua faarooroo te metua tane e oraraa haapaoraa ore to ta ’na tamaiti, ua farii maitai oia ia ’na i te ho‘iraa mai. E te mau aratai ati Iuda o te parau ra e ua ite ratou ia Iehova e te tavini ra ratou ia ’na? E taa anei ia ratou te huru aau o to tatou Metua i te ra‘i no te feia rave hara tei tatarahapa? E taa atoa anei ia ratou e te pee ra Iesu i te huru o to ’na Metua?

Ua ite te metua tane haro‘aro‘a i nia i te hoho‘a mata hepohepo o ta ’na tamaiti e ua tatarahapa o ’na. No te ru râ teie metua tane î i te here i te farii maitai i ta ’na tamaiti, i fa‘i roa mai ai te tamaiti i ta ’na mau hara. Faatia ’tura Iesu: “Na ô atura te tamaiti: ‘To ’u metua, ua hara vau i te Atua i te ra‘i e ia oe. Eita e tano faahou ia parauhia vau ei tamaiti na oe.’”—Luka 15:21.

Faaue atura te metua tane i ta ’na mau tavini: “‘Haaviti, hopoi mai i te hoê ahu roa, te mea nehenehe roa ’‘e, a faaahu ia ’na, a oomo i te tapea i to ’na rima e te tiaa i to ’na avae. Putô atoa mai i te puaatoro oni apî poria e tupai atu. Tamaa e arearea ana‘e, i pohe na hoi ta ’u tamaiti nei e ua ora faahou mai. I mo‘e na oia e ua ho‘i mai.’ Arearea ’tura ratou.”—Luka 15:22-24.

I tera taime, tei te faaapu te tamaiti matahiapo. Parau atura Iesu no ’na: “I to ’na . . . ho‘iraa mai e piriraa mai i te fare, faaroo ihora oia i te upaupa e te ori. Pii maira oia i te hoê tavini e ui maira eaha tera. Pahono atura te tavini: ‘Ua tae mai to teina, e ua tupai to metua tane i te puaatoro oni apî poria no te mea ua ho‘i mai oia e mea maitai o ’na.’ Riri ihora râ oia e aita ’tura i hinaaro e tomo i roto i te fare. Haere atura to ’na metua tane i rapaeau e taparu ia ’na ia tomo mai. Pahono maira oia i to ’na metua tane: ‘Ahia ’tura matahiti to ’u taviniraa ia oe e haapao-noa-raa i ta oe i faaue mai. Aita roa ’tu râ oe i  horoa mai i te hoê puaaniho apî ia tamaa vau e to ’u mau hoa. I te taeraa mai iho â tena tamaiti ta oe, o tei hue i ta oe faufaa na te mau vahine taiata, tupai ihora ïa oe i te puaatoro oni apî poria no ’na.’”—Luka 15:25-30.

O vai tei faahapa, mai te tamaiti matahiapo, i te aroha-hamani-maitai-raa e te tâu‘araa Iesu i te feia riirii e te feia rave hara? Te mau papai parau e Pharisea. No to ratou faahaparaa ia Iesu tei farii maitai i te feia rave hara i horoahia ’i teie faahoho‘araa. Ia haamana‘o maitai ïa te taata atoa o te faahapa ra i to te Atua aroha hamani maitai i teie haapiiraa.

No te faaoti i ta ’na faahoho‘araa, faatia ’tura Iesu i te taparuraa te metua tane i ta ’na tamaiti matahiapo: “Ta ’u tamaiti, to pihai iho noa na oe ia ’u, e ta ’u mau tao‘a atoa, na oe ïa. E mea tia râ ia arearea e ia oaoa tatou, i pohe na hoi to teina e ua ora faahou mai. I mo‘e na oia e ua ho‘i mai.”—Luka 15:31, 32.

Aita Iesu i faaite eaha ta te tamaiti matahiapo i rave i muri iho. I muri a‘e râ i to Iesu poheraa e tia-faahou-raa, “e rave rahi atoa tahu‘a tei tiaturi.” (Ohipa 6:7) Ua faaroo atoa paha vetahi ia Iesu i te faatiaraa i teie faahoho‘araa putapû. Ua nehenehe atoa ïa ratou e feruri maitai, e tatarahapa a ho‘i mai ai i te Atua.

Mai tera mahana mai i nehenehe ai te mau pǐpǐ a Iesu e haamana‘o maitai i te mau haapiiraa faufaa ta ’na i horoa na roto i teie faahoho‘araa faahiahia e i titauhia ’i ia na reira ratou. Na mua roa, e haerea paari ia faaea i roto i te nunaa paruruhia o te Atua, i reira to tatou Metua o te here ra ia tatou e haapao e e aupuru ai ia tatou, eiaha râ ia haere hanoa ma te imi i te haamâha i to tatou mau hinaaro tia ore i “te hoê fenua atea.”

Te tahi atu haapiiraa, ia hahi ê tatou i te e‘a o te Atua, ia ho‘i haehaa ïa tatou i to tatou Metua e tia ’i ia fana‘o faahou i ta ’na farii maitai.

E haapiiraa atoa te huti mai i te taa-ê-raa i rotopu i te metua tane tei farii maitai i ta ’na tamaiti a faaore ai i ta ’na hara, e te matahiapo tei inoino a ore atu ai e farii maitai i to ’na teina. Ia ineine te mau tavini a te Atua i te faaore i te hara e te farii maitai i te tahi taata tei hahi ê na, e ua tatarahapa mau râ i muri a‘e a ho‘i mai ai i te fare o to tatou Metua. E oaoa ana‘e no to tatou taeae tei “pohe na” e “ua ora faahou mai,” e tei “mo‘e na” e “ua ho‘i mai.”