Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 96

Pahonoraa Iesu i te hoê raatira apî tao‘a rahi

Pahonoraa Iesu i te hoê raatira apî tao‘a rahi

MATAIO 19:16-30 MAREKO 10:17-31 LUKA 18:18-30

  • UIRAA A TE HOÊ TAATA TAO‘A RAHI NO NIA I TE ORA MURE ORE

Na Perea noa ra Iesu i te haere i Ierusalema. Horo maira te hoê taata apî tao‘a rahi ia ’na ra e tuturi ihora i mua ia ’na. E “raatira” o ’na, e aratai paha o te hoê sunago aore ra e mero no te Sunederi. Ui maira oia: “Orometua maitai, eaha ta ’u e rave e noaa ’i ia ’u te ora mure ore?”—Luka 8:41; 18:18; 24:20.

Pahono atura Iesu: “Eaha oe e parau mai ai Orometua maitai? Aita hoê a‘e e mea maitai, o te Atua ana‘e râ.” Eita e ore e ua faahiti oia i te parau “Orometua maitai” mai te hoê tiaraa, mai ta te mau rabi e rave ra. Mea ite Iesu i te haapii i te taata. Ua faaite râ oia i teie taata e no te Atua ana‘e te parau hanahana ra “maitai.”

A‘o atura Iesu: “Ia hinaaro hoi oe e fana‘o i te ora, a haapao noa ïa i te mau faaueraa.” Ui maira te taata apî: “Teihea mau faaueraa?” Faahiti atura Iesu e pae o na Ture Ahuru, eiaha e taparahi pohe i te taata, e faaturi, e eiâ, e pari haavare, e ia faatura i to ’na na metua. Faahiti atura oia i te hoê faaueraa faufaa ’tu â: “Ia here oe i to oe taata tupu mai ia oe iho.”—Mataio 19:17-19.

Parau maira teie taata: “Ua hope ia ’u i te haapao i teie mau mea atoa, eaha te toe ra ia ’u ia rave?” (Mataio 19:20) Ua mana‘o paha oia e te toe ra ia ’na te tahi ohipa faahiahia a nehenehe atu ai oia e fana‘o i te ora mure ore. No ta ’na uiraa haavare ore, “hi‘o ihora Iesu ia ’na ma te here.” (Mareko 10:21) E fifi râ to teie taata.

Mea au na ’na ta ’na mau tao‘a. Parau atura Iesu: “Hoê noa mea e toe ra ia oe: A haere a hoo i ta oe mau tao‘a, a horoa ’tu ai i te moni na te feia veve, e tao‘a ïa ta oe i nia i te ra‘i, e a pee mai ia ’u.” E nehenehe teie taata e opere i ta ’na moni na te feia veve, eita e haere ia ratou ia faaho‘i, a riro mai ai ei pǐpǐ na Iesu. Eita e ore ua peapea Iesu i to ’na tiaraa e haereraa ma te oto.  Mea au na ’na ta ’na mau tao‘a “mea rahi hoi,” aita ’tura oia i haro‘aro‘a eaha te tao‘a mau. (Mareko 10:21, 22) Na ô atura Iesu: “Mea fifi mau â no te feia mea rahi ta ratou moni ia faaô i roto i te Faatereraa arii a te Atua!”—Luka 18:24.

Ua maere te mau pǐpǐ i teie mau parau e ta Iesu i parau i muri iho: “Inaha, mea ohie a‘e no te hoê kamela ia ô i roto i te hoê apoo nira eiaha râ no te hoê taata tao‘a rahi ia ô i roto i te Faatereraa arii a te Atua.” Ui maira te mau pǐpǐ: “O vai ïa te nehenehe e ora ’tu?” Eita roa anei te hoê taata e nehenehe e ora ’tu? Hi‘o roa ’tura Iesu ia ratou e pahono atura: “Te mau mea e ore e tia i te taata, e tia ïa i te Atua.”—Luka 18:25-27.

Ua faaite Petero e mea taa ê te faaotiraa ta ratou i rave e ta teie taata tao‘a rahi: “Ua haapae hoi matou i te mau mea atoa e ua pee mai ia oe, eaha ïa ta matou e fana‘o?” Ua faahiti Iesu i ta ratou e fana‘o no ta ratou faaotiraa maitai: “E faaapî te Atua i te mau mea atoa ia parahi te Tamaiti a te taata nei i nia i to ’na terono hanahana. I reira outou o tei pee mai ia ’u e parahi atoa ’i i nia 12 terono, a haava ’i i na opu 12 o Iseraela.”—Mataio 19:27, 28.

Te mana‘o ra Iesu i te tau a muri a‘e e faaapîhia ’i te mau mea atoa i te fenua nei mai tei itehia na i roto i te ô i Edene. E faatere Petero e te tahi atu mau pǐpǐ e o Iesu i taua fenua paradaiso ra. No teie haamaitairaa, e hoona mau â te mau haapaeraa atoa ta ratou e rave!

E ere râ te mau haamaitairaa no a muri a‘e noa. Te fana‘o ra ta ’na mau pǐpǐ vetahi. Ua parau Iesu: “Te taata tei haapae i te fare aore ra vahine faaipoipo, taeae, metua aore ra tamarii no te Faatereraa arii a te Atua, e fana‘o iho â oia hau atu i teie nei â, e i roto i te faanahoraa o te ao nei no a muri a‘e, te ora mure ore ïa.”—Luka 18:29, 30.

I te mau vahi atoa e haere ai ta ’na mau pǐpǐ, te vai ra to ratou fetii taeae e haamori ra ia Iehova mea piri a‘e e mea faufaa a‘e i to ratou iho fetii. Te mea peapea, e au ra e eita te raatira apî tao‘a rahi e fana‘o i taua haamaitairaa ra e te oraraa i roto i te Faatereraa arii a te Atua i te ra‘i.

Na ô faahou atura Iesu: “E rave rahi râ to mua, e riro ïa no muri e to muri no mua.” (Mataio 19:30) Eaha te auraa?

To rotopu atoa te raatira apî tao‘a rahi i “to mua,” oia hoi te mau aratai ati Iuda. Te haapao ra oia i te mau faaueraa a te Atua, e au ra ïa e riro mai oia ei pǐpǐ na Iesu, a rave atu ai e rave rahi ohipa maitatai. Te mea faufaa roa ’‘e râ no ’na, te mau tao‘a ïa e te faufaa. Area te feia riirii, ua ite ïa i te parau mau e te e‘a e tae atu ai i te ora na roto i ta Iesu haapiiraa. O ratou “to muri,” ei auraa parau, tei riro “no mua.” E nehenehe ïa ratou e tiai ru i te parahi i nia i te mau terono i nia i te ra‘i i pihai iho ia Iesu, a faatere mai ai i te fenua paradaiso.