Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 85

Oaoaraa i te tatarahaparaa te taata rave hara

Oaoaraa i te tatarahaparaa te taata rave hara

LUKA 15:1-10

  • FAAHOHO‘ARAA O TE MAMOE TEI MO‘E E TE MONI TEI MO‘E

  • OAOARAA TE MAU MELAHI O TE RA‘I

I roto i ta Iesu taviniraa, pinepine oia i te haamana‘o i te faufaaraa o te haehaa. (Luka 14:8-11) Ua hinaaro mau oia ia itehia mai ia ’na te tane e te vahine e hinaaro ra e tavini i te Atua ma te haehaa. E tae roa i tera taime o ta ’na taviniraa, ua matauhia vetahi o ratou ei feia rave hara.

Ua tapao te mau Pharisea e papai parau e tera mau taata ta ratou e haafaufaa ore ra, mea au na ratou ia Iesu e ta ’na poroi. Ohumu a‘era ratou: “Te farii maitai ra teie taata i te feia rave hara e te tamaa ra e o ratou.” (Luka 15:2) I mana‘o na ratou e mea hau a‘e ratou, e i faariro na i te taata riirii mai te repo i raro a‘e i to ratou avae. No to ratou vahavaha ia ratou, e faahiti te mau aratai haapaoraa i te parau Hebera amahaareta, oia hoi e “taata no te fenua [repo].”

Area Iesu, e faatura ïa i te taata atoa ma te hamani maitai atu e te aumihi, i hinaaro ai e rave rahi taata riirii, oia atoa te taata rave hara, e faaroo i ta ’na mau parau. Eaha râ te huru aau o Iesu i te faahaparaahia oia no to ’na tautururaa i te feia riirii, e ua aha ’tura oia?

Taa-maitai-hia ’tura te pahonoraa a faahiti ai Iesu i te hoê faahoho‘araa putapû, hoê â e ta ’na i faahiti a‘ena i Kaperenaumi. (Mataio 18:12-14) I roto i te faatiaraa a Iesu, e au ra e e feia parau-tia te mau Pharisea e te parahi hau noa ra ratou i roto i te nǎnǎ mamoe a te Atua. Area te feia riirii, mai te huru ra e ua atea ê e ua mo‘e ratou. Na ô atura Iesu:

“O vai ïa taata i rotopu ia outou 100 mamoe ta ’na, ia mo‘e te hoê, e ore e vaiiho i na 99 i te medebara, a imi atu ai i tei mo‘e e ia itehia ’tu? E ia itehia ia ’na, e amo oia i taua mamoe ra i nia i to ’na tapono ma te oaoa. E ia tae oia i te fare, e titau oia i to ’na mau hoa e te feia tapiri atoa a na ô ai: ‘Mai oaoa ana‘e, ua itea mai hoi ia ’u ta ’u mamoe i mo‘e na.’”—Luka 15:4-6.

Eaha te haapiiraa ta Iesu e horoa mai ra? Faataa ’tura oia: “Te parau atu nei au, e oaoa rahi atoa tei te ra‘i no te hoê noa taata rave hara e tatarahapa, eiaha râ no na 99 taata parau-tia e mana‘o ra e aita e faufaa ia tatarahapa ratou.”—Luka 15:7.

Eita e ore e ua huru ê roa te mau Pharisea i to Iesu faahitiraa i te tatarahapa. No ratou, e feia parau-tia ratou, aita ïa e faufaa ia tatarahapa ratou. I to vetahi o ratou faahaparaa ia Iesu e piti matahiti na mua ’tu no to ’na tamaaraa e te feia titau tute e te feia rave hara, pahono atura oia: “Ua haere mai hoi au e titau i te feia rave hara ia tatarahapa, eiaha râ te feia parau-tia.”  (Mareko 2:15-17) No te mau Pharisea faahua parau-tia, aita e faufaa ia tatarahapa, aita ïa e oaoa tei te ra‘i no ratou. E oaoa râ tei te ra‘i ia tatarahapa mau te feia rave hara.

No te haapapu i te mana‘o e e oaoa rahi tei te ra‘i ia maitai faahou mai te feia rave hara i mo‘e na, horoa ’tura Iesu i te tahi atu faahoho‘araa o te tupu ra i roto i te hoê utuafare: “O vai atoa ïa vahine hoê ahuru moni ario ta ’na, ia mo‘e te hoê, e ore e tutui i te mori, a purumu atu ai i to ’na fare e a paimi maitai atu ai e ia iteahia ’tu? E ia itehia ia ’na, e titau oia i to ’na mau hoa e te feia tapiri atoa a na ô ai: ‘Mai oaoa ana‘e, ua itea mai hoi ia ’u te moni ario i mo‘e na ia ’u.’”—Luka 15:8, 9.

Hoê â haapiiraa ta ’na i horoa mai no teie faahoho‘araa e no te faahoho‘araa o te mamoe i mo‘e na: “E oaoa te mau melahi a te Atua no te hoê noa taata rave hara e tatarahapa.”—Luka 15:10.

A feruri na, te tâu‘a mau ra ta te Atua mau melahi i te feia rave hara ia maitai faahou mai ratou! E parau faahiahia teie no te mea ia tatarahapa te hoê taata rave hara a roaa mai ai ia ’na te hoê parahiraa i roto i te Faatereraa arii a te Atua, e roaa ïa i taua taata ra te hoê tiaraa hau a‘e i to te mau melahi! (Korinetia 1, 6:2, 3) Aita râ te mau melahi e pohehae ra. Ia aha ïa tatou ia tatarahapa mau te hoê taata rave hara a fariu atu ai i te Atua?