Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 84

Te hopoia e riro ei pǐpǐ na te Mesia

Te hopoia e riro ei pǐpǐ na te Mesia

LUKA 14:25-35

  • TE MAU HAAPAERAA I TE RIRORAA EI PǏPǏ

E haapiiraa faufaa ta Iesu i horoa a tamaa ’i oia i ǒ te hoê aratai Pharisea. A tamau noa ’i Iesu i to ’na tere i Ierusalema, te na muri ra e rave rahi ia ’na. No te aha? Te hinaaro mau ra anei ratou e riro ei pǐpǐ na ’na, noa ’tu eaha te titauhia?

A haere noa ’i ratou, faahiti atura Iesu i te hoê parau i huru ê ai paha vetahi: “Te taata e pee mai ia ’u, ia rahi a‘e ïa to ’na here ia ’u i to ’na metua tane, to ’na metua vahine, ta ’na vahine faaipoipo, ta ’na mau tamarii, to ’na mau taeae, to ’na mau tuahine, ia ’na iho atoa [aore ra to ’na iho ora]. Aita ana‘e, eita e tia ia ’na ia riro ei pǐpǐ na ’u.” (Luka 14:26) Eaha te auraa o teie mau parau?

Aita Iesu e parau ra e eiaha te feia e pee ra ia ’na ia here i to ratou mau fetii, eiaha râ tera here fetii ia hau a‘e i to ratou here ia ’na. Ia ore, eita ta ’na mau pǐpǐ e farii i te titauraa faufaa roa mai te tane no faaipoipo noa ’tu ra i roto i te faahoho‘araa o te tamaaraa. (Luka 14:20) Te parauhia ra e “aore Lea i herehia” e Iakoba te tupuna o te ati Iuda, mea here râ na ’na ia Rahela, oia hoi mea iti a‘e to ’na here ia Lea i to ’na tuahine ia Rahela.—Genese 29:31.

Aita Iesu e faaue ra i te feia e pee ra ia ’na ia tâu‘a ore i to ratou iho ora. E here rahi râ te pǐpǐ mau a Iesu ia ’na, a ineine ai i te pohe ia titauhia. E hopoia mau â te riroraa ei pǐpǐ na te Mesia. Eiaha te reira ia rave-hanoa-hia, ma te ore e feruri maite.

E nehenehe te pǐpǐ e roohia e te ati e te hamani-ino-raa, ua parau hoi Iesu: “Te taata o te ore e amo i ta ’na pou haamauiuiraa, a pee mai ai ia ’u, eita ïa e tia ia riro ei pǐpǐ na ’u.” (Luka 14:27) Ia ineine iho â te pǐpǐ mau a Iesu i te faaruru i te faainoraa, mai ia Iesu. Ua parau atoa Iesu e e pohe oia i te rima o to ’na mau enemi.

Ia feruri maitai ïa te taata e rave rahi e ratere ra e o Iesu i te auraa mau o te riroraa ei pǐpǐ na te Mesia. Haapapu maitai atura Iesu i te reira na roto i te hoê faahoho‘araa: “O vai o outou, ia hinaaro oia e patu i te hoê pare, e ore e parahi na mua, a numera ’tu ai i te haamâu‘araa no te ite e navai anei ta ’na moni no te faaoti i te paturaa? Ia haamau noa ’tu oia i te niu, a ore atu ai râ e oti ia ’na, e faaooo mai ïa te taata atoa e hi‘o mai ia ’na.” (Luka 14:28, 29) Hou ïa te feia e ratere ra e o Iesu i Ierusalema a riro ai ei pǐpǐ na ’na, ia faaoti papu ratou i te amo maite i teie hopoia. Haapapu atura oia i teie mana‘o na roto i te tahi atu faahoho‘araa:

“O vai ïa arii 10 000 faehau ta ’na o te haere ra e faaû i te tahi atu arii e 20 000 faehau ta ’na, e ore e parahi na mua, a uiui atu ai ia vetahi ê no te ite e upootia anei oia? Mai te peu e eita, e tono ïa oia i te tahi mau tia e ani i te hau i tera arii tei te atea ê â hoi. Oia atoa, te  taata i rotopu ia outou o te ore e haapae i ta ’na faufaa atoa, e ore ïa e tia ia riro ei pǐpǐ na ’u.”—Luka 14:31-33.

E ere teie mau parau ta Iesu no te taata ana‘e e na muri ra ia ’na i to ’na tere, no te taata atoa râ e haapiihia ra e te Mesia, ia rave ratou i ta ’na i parau iho nei ma te aau tae. Mea titauhia ïa ia ineine ratou i te haapae i ta ratou mau faufaa e tae roa ’tu i to ratou ora, no te riro ei pǐpǐ na ’na. Mea tia ïa ia feruri e ia pure no te reira.

I muri iho, faahiti faahou atura Iesu i te hoê parau ta ’na i faahiti a‘ena i roto i te A‘oraa i nia i te mou‘a o “te miti o te fenua” ta ’na mau pǐpǐ. (Mataio 5:13) Ua hinaaro paha oia e parau e, mai te miti e rapaau i te maa, oia atoa ïa te huru o ta ’na mau pǐpǐ i nia i te taata, ia paruru ratou i te taata ia ore ia mutu to ratou taairaa e o Iehova e ia ore to ratou haerea ia ino. A piri ai râ te hopea o ta ’na taviniraa, na ô atura oia: “Mea maitai roa iho â te miti. Ia maaro râ te reira, e nafea ïa e avaava faahou ai?” (Luka 14:34) Ua ite te feia e faaroo ra ia ’na e te vai ra te miti mea viivii, ua anoihia hoi i te repo, a faufaa ore atu ai.

Te faaite ra ïa Iesu e eiaha atoa te aau tae o te feia mea maoro i te riroraa ei pǐpǐ na ’na ia paruparu, a‘unei ratou e faufaa ore ai, mai te miti i maaro. E riro ratou ei faaoooraa na to te ao. E ere atoa ratou i te farii maitai a te Atua, a faaino atu ai i to ’na i‘oa. Haapapu atura Iesu i te faufaaraa ia ape i te reira: “E tari‘a to ’na no te faaroo, a faaroo ïa.”—Luka 14:35.