Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 94

Faufaaraa o te pure e te haehaa

Faufaaraa o te pure e te haehaa

LUKA 18:1-14

  • FAAHOHO‘ARAA O TE VAHINE IVI ONOONO

  • TE PHARISEA E TE TITAU TUTE

Ua faatia a‘ena Iesu i ta ’na mau pǐpǐ i te hoê faahoho‘araa no nia i te tamauraa i te pure. (Luka 11:5-13) Tei Samaria aore ra Galilea paha oia i haapapu faahou ai oia i te faufaaraa o te reira na roto i teie faahoho‘araa:

“E haava tei te hoê oire. Aita oia e mǎta‘u ra i te Atua e aita e tâu‘a ra i te taata. E vahine ivi atoa tei taua oire ra. E haere noa oia e parau i te haava: ‘A haava mai na ia ’u e te taata i horo ia ’u i te haavaraa ma te parau-tia.’ Aita râ te haava i farii oioi, i muri a‘e râ, feruri ihora oia: ‘Aita vau e mǎta‘u ra i te Atua e aita atoa e tâu‘a ra i te taata, no te mea râ e haapeapea noa teie vahine ivi ia ’u, e haava vau ia ’na ma te parau-tia a ore atu ai oia e haere noa mai, a taahoa ’tu vau ia ’na no to ’na onoono.’”—Luka 18:2-5.

Faataa ’tura Iesu i te haapiiraa: “A faaroo i ta te haava i parau, noa ’tu e e taata parau-tia ore oia! E ore anei ïa te Atua e rave e ia haavahia ma te parau-tia te feia ta ’na i maiti, o te taparuparu ra ia ’na i te rui e te ao, a faaoromai noa ’i oia ia ratou?” (Luka 18:6, 7) Eaha ta Iesu e faaite ra no nia i to ’na Metua?

Aita Iesu e parau ra e mai te haava parau-tia ore te Atua ra o Iehova. E mana‘o taa ê ta ’na e horoa ra: Mai te peu e pahono te hoê haava parau-tia ore i te mau taparuraa onoono, papu roa e na reira atoa te Atua. E Atua parau-tia oia e te maitai o te pahono mai ia tamau noa to ’na nunaa i te pure ia ’na. Ua parau hoi Iesu e e rave iho â te Atua e ia haava-oioi-hia ratou ma te parau-tia.—Luka 18:8.

Pinepine eita te feia haihai e te riirii e haavahia ma te parau-tia, o te feia mana râ e te tao‘a rahi te tâu‘ahia. E ere te Atua mai tera. I te taime faataahia, e faautua oia i te feia ino ma te tano, e e fana‘o ta ’na mau tavini i te ora mure ore.

O vai ma e faaroo to ratou mai to te vahine ivi? Ehia te tiaturi mau ra e e rave iho â te Atua e ia haava-oioi-hia ratou ma te parau-tia? No faahoho‘a iho nei Iesu i te faufaaraa ia tamau i te pure. No nia râ i te faaroo e mea puai mau te pure, ui atura oia: “Ia tae mai te Tamaiti a te taata nei, e ite anei oia i teie huru faaroo i te fenua nei?” (Luka 18:8) Mea varavara ïa te taata e faatupu i teie huru faaroo ia tae mai te Mesia.

Te mana‘o ra vetahi e faaroo ra ia Iesu e faaroo papu to ratou. Te tiaturi ra ratou e e taata parau-tia ratou, mea vahavaha râ ratou ia vetahi ê. No ratou ïa teie faahoho‘araa a Iesu:

“E piti taata tei haere i te hiero e pure, e Pharisea hoê, e titau tute te tahi. Tia noa ihora te Pharisea e pure atura i roto i to ’na aau mai teie: ‘E te Atua e, te haamauruuru atu nei au ia oe i te mea e ere au mai te tahi atu mau taata, e eiâ hoi, e feia parau-tia ore, e faaturi. E ere atoa vau mai tera titau tute. E haapae au i te maa e piti taime i te hebedoma. E horoa vau i te tuhaa ahuru o te mau mea atoa i noaa mai ia ’u.’”—Luka 18:10-12.

Ua matauhia te mau Pharisea no te faaiteite i to ratou faahua parau-tia ia faahiahia te taata. I  haapae na ratou i te maa, na ratou iho i haamau i teie peu, i te Monire e te Mahana maha, mea taata roa hoi na te matete. Mea rahi ïa te ite mai ia ratou. Mea horoa atoa ratou i te tuhaa ahuru o te mau raau tupu atoa. (Luka 11:42) Tau ava‘e na mua ’tu, ua faahiti ratou i to ratou vahavaha no te feia riirii: “Teie . . . mau taata aita i ite i te ture a Mose [te mana‘o ïa o te mau Pharisea], eita roa ïa te Atua e au ia ratou.”—Ioane 7:49.

Na ô faahou atura Iesu: “Te titau tute râ, te tia noa ra ïa i te atea ê e aita i hinaaro noa ’‘e e hi‘o i nia i te ra‘i. Na ô ihora oia a tupaipai noa ’i i to ’na ouma: ‘E te Atua e, aroha mai oe ia ’u te hoê taata hara.’” Te fa‘i ra te titau tute ma te haehaa i ta ’na mau hapa. Na ô atura Iesu: “Te parau atu nei au: Ia ho‘i oia i te fare, o ’na te taata parau-tia a‘e i te aro o te Atua eiaha tera Pharisea. Te taata hoi o te faateitei ia ’na, e faahaehaahia ïa. Te taata râ o te faahaehaa ia ’na, e faateiteihia ïa.”—Luka 18:13, 14.

Te haapapu ra Iesu i te faufaaraa ia haehaa. E a‘oraa maitai teie no ta ’na mau pǐpǐ, tei paari mai i roto i te hoê nunaa mea faufaa roa no te mau Pharisea faahua parau-tia te toroa e te tiaraa. E a‘oraa faufaa atoa no te mau pǐpǐ atoa a Iesu.