Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 92

Haamauruururaa hoê noa taata ua ora to ’na lepera ia Iesu

Haamauruururaa hoê noa taata ua ora to ’na lepera ia Iesu

LUKA 17:11-19

  • FAAORARAA IESU I TE LEPERA O HOÊ AHURU TAATA

Mai Ierusalema ’tu, reva ihora Iesu i Epheraima, i te pae apatoerau hitia o te râ, a ore atu ai te opuaraa a te Sunederi e tupu. Ua atea roa ïa oia i to ’na mau enemi. Faaea ihora oia i reira e ta ’na mau pǐpǐ. (Ioane 11:54) No te mea râ te piri mai ra te Pasa 33, reva ’tura oia i te pae apatoerau na Samaria ’tu e tae atu ai i Galilea, to ’na ïa tere hopea i reira hou a pohe ai.

I te haamataraa Iesu i te tere na tera e tera oire iti, farerei ihora oia hoê ahuru taata lepera. E nehenehe teie ma‘i e ai riirii noa e rave rau mero o te tino, mai te manimani rima, te manimani avae aore ra te tari‘a. (Numera 12:10-12) Mea titauhia e te ture a te Atua ia Mose ia pii te hoê taata lepera “ua viivii, ua viivii,” e ia faaea i rapaeau mai i te puhapa.—Levitiko 13:45, 46.

Na te atea ïa to na ahuru taata lepera tuôraa mai ia Iesu: “E Iesu e, Orometua, aroha mai ia matou!” I to ’na iteraa ’tu ia ratou, faaue atura oia: “Haere a faaite ia outou i te mau tahu‘a.” (Luka 17:13, 14) Te faatura ra ïa oia i te ture a te Atua ia Mose, e faatia ra i te mau tahu‘a ia haapapu e ua ora te lepera o te feia tei roohia i taua ma‘i ra, a nehenehe atu ai e faaea i rotopu i te feia oraora maitai.—Levitiko 13:9-17.

Te tiaturi ra na ahuru taata lepera i te mana o Iesu e faatupu i te semeio. Haere ihora ratou e hi‘o i te mau tahu‘a, aita â to ratou ma‘i i ora ’tura. A haere noa ’i ratou, ua haamaitaihia to ratou faaroo ia Iesu. Ite a‘era ratou e ua ora to ratou lepera!

O na ahuru taata ua ora to ratou lepera, hoê ana‘e tei ho‘i mai e imi ia Iesu, e taata Samaria. No te aha? Ua mauruuru roa oia ia Iesu. “Faahanahana” a‘era teie taata ua ora to ’na lepera “i te Atua ma te reo puai,” ua taa hoi ia ’na e na te Atua i faaora i to ’na ma‘i. (Luka 17:15) I te iteraahia mai Iesu, tipapa ihora oia i mua ia ’na e haamauruuru maira.

Na ô atura Iesu i te feia ati a‘e ia ’na: “E ere anei hoê ahuru tei ora to ratou ma‘i? Teihea roa ïa na iva? Aita ’tu anei taata i ho‘i mai no te faahanahana i te Atua, o teie ana‘e râ taata nunaa ê?” Na ô atura oia i te taata Samaria: “A tia e a haere, no to oe faaroo i ora ’i oe.”—Luka 17:17-19.

Ma te faaora i te lepera o na ahuru taata, ua faaite Iesu e te turu ra te Atua ra o Iehova ia ’na. I tera taime, e au ra e hoê ana‘e o ratou tei nia i te e‘a e tae atu ai i te ora. I teie tau ta tatou e ora nei, aita te Atua e faaohipa ra ia Iesu no te faaora i te ma‘i. No to tatou râ faaroo ia Iesu, e nehenehe tatou e na nia i te e‘a e tae atu ai i te ora, oia hoi te ora mure ore. Te faaite ra anei tatou i to tatou mauruuru, mai te taata Samaria?