Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 100

Ta ’na faahoho‘araa o na ahuru mina

Ta ’na faahoho‘araa o na ahuru mina

LUKA 19:11-28

  • TA IESU FAAHOHO‘ARAA O NA AHURU MINA

Noa ’tu i Ierusalema Iesu e haere ai, tei te fare â paha o Zakaio Iesu e ta ’na mau pǐpǐ, tei mana‘o e fatata “te Faatereraa arii a te Atua” o Iesu te Arii i te haamauhia. (Luka 19:11) Ua hape râ ratou, tei ore atoa i taa na e ia pohe Iesu e tia ’i. Horoa ’tura ïa oia i te hoê faahoho‘araa ia taa ia ratou e a muri a‘e roa te Faatereraa arii e haamauhia ’i:

“Ua reva ’tu te hoê taata no roto mai i te hui arii i te hoê fenua atea ia faatoroahia oia ei arii a ho‘i mai ai.” (Luka 19:12) E tere roa teie. O Iesu te “taata no roto mai i te hui arii” o te reva i te hoê “fenua atea,” oia hoi te ra‘i, i reira to ’na Metua e faatoroa ’i ia ’na ei Arii.

Hou te “taata no roto mai i te hui arii” a reva ’i, titau ihora oia ahuru tavini, horoa ’tura hoê mina ario na ratou tataitahi e na ô atura: “A faaohipa i te reira ia hoona mai e ia ho‘i noa mai au.” (Luka 19:13) E moni rahi te mina ario. Hoê mina te moni ohipa a te hoê taata faaapu no hau e toru ava‘e.

Ua haro‘aro‘a paha te mau pǐpǐ e e au ratou i na ahuru tavini o te faahoho‘araa, ua faaau a‘ena hoi Iesu ia ratou i te rave ohipa no te ootiraa. (Mataio 9:35-38) Aita oia i faaue ia ratou ia ooti e ia haapue i te huero maa, ia haaputuputu râ i te tahi atu mau pǐpǐ o te parahi i roto i te Faatereraa arii a te Atua. E faaohipa ratou i to ratou taime e puai atoa e ta ratou atoa mau tao‘a no te reira.

Eaha ’tu â ta Iesu i faaite i roto i teie faahoho‘araa? Ua parau oia e “mea hae” na te mau taata o to ’na fenua i te taata no roto mai i te hui arii. “Tono maira ratou i te tahi mau tia e parau ia ’na: ‘Eita matou e hinaaro ia oe ei arii no matou.’” (Luka 19:14) Ua ite te mau pǐpǐ e aita te mau ati Iuda i farii ia Iesu, ua hinaaro atoa vetahi e haapohe ia ’na. I muri a‘e i to Iesu poheraa e revaraa i te ra‘i to te rahiraa o te mau ati Iuda faaiteraa i to ratou hae ia ’na ma te hamani ino i ta ’na mau pǐpǐ. Aita mau â teie feia patoi i hinaaro ia Iesu ei Arii no ratou.—Ioane 19:15, 16; Ohipa 4:13-18; 5:40.

Ua aha na ahuru tavini i ta ratou mina e tae roa i te taime a faatoroahia ’i te “taata no roto mai i te hui arii” ei arii e a ho‘i mai ai? Faatia ihora Iesu: “Ho‘i maira oia i muri a‘e i to ’na faatoroaraahia ei arii, e titau ihora i te mau tavini ta ’na i horoa ’tu i te moni no te ite ehia ta ratou i apî mai. Tia maira ïa te tavini matamua e na ô maira: ‘Fatu, hoê ahuru mina tei noaa mai i ta oe mina.’ Na ô atura oia: ‘Maitai roa, e tavini maitai oe! No te mea ua haapao maitai oe i te mea haihai roa, e faatere ïa oe hoê ahuru oire.’ Haere maira te piti o te tavini e na ô maira: ‘Fatu, e pae mina tei noaa mai i ta oe mina.’ Na ô atura oia i teie tavini: ‘E faatere ïa oe e pae oire.’”—Luka 19:15-19.

Mai te peu ua haro‘aro‘a te mau pǐpǐ e au ratou i na tavini, a faaohipa ’tu ai i to ratou taime e puai atoa e ta ratou atoa mau tao‘a no te haaputuputu i te tahi atu mau pǐpǐ, e oaoa ïa Iesu a haamaitai mai ai no to ratou rohi-noa-raa. Parau mau, e ere hoê â huru tupuraa aore ra aravihi to te mau pǐpǐ atoa a Iesu. E farii râ e e haamaitai Iesu, o te faatoroahia ei arii, i ta ratou mau tutavaraa taiva ore i te faariroraa i te taata ei pǐpǐ.—Mataio 28:19, 20.

Na ô faahou atura Iesu: “Haere maira râ te tahi atu tavini e na ô maira: ‘Fatu, tera mai ta oe mina ta ’u i huna i roto i te hoê ahu. Ua mǎta‘u hoi au ia oe, e taata etaeta oe. E rave oe i te moni ta oe i ore i tuu i te fare moni, e ooti atoa oe i ta oe i ore i ueue.’ Na ô atura oia: ‘I ta oe iho mau parau e faahapa ’i au ia oe, tavini ino. Ua ite ïa oe e e taata etaeta vau, o te rave i te  moni ta ’u i ore i tuu i te fare moni, o te ooti atoa i ta ’u i ore i ueue. No te aha ïa oe i ore ai i tuu i ta ’u moni i te fare moni? Ia tae mai au, e rave ïa vau i ta ’u moni e te moni taime.’ Na ô atura oia i te feia e tia noa ra na pihai iho mai: ‘A rave i ta ’na mina e a horoa ’tu na te tavini ahuru mina ta ’na.’”—Luka 19:20-24.

Aita teie tavini i rohi ia rahi mai te faufaa a te faatereraa arii a to ’na fatu. Ua ere ïa oia i ta ’na mina. Te tiai ru ra te mau aposetolo ia faatere mai Iesu i roto i te Faatereraa arii a te Atua. Eita e ore na roto i ta Iesu i parau no teie tavini hopea, ua haro‘aro‘a ratou e ia ore ratou e tamau i te rohi, eita ratou e parahi i roto i taua Faatereraa arii ra.

Ia faaitoito ta Iesu parau i te mau pǐpǐ haapao maitai ia tutava ’tu â. Teie ta ’na parau hopea: “Te parau atu nei au: Te taata e faufaa ta ’na, e horoahia ’tu â ïa ta ’na. Te taata râ aita ta ’na e faufaa, e iriti-ê-atoa-hia ïa ta ’na.” Na ô atoa ’tura oia e e taparahi-pohe-hia to ’na mau enemi, aita i hinaaro ia ’na “ei arii no ratou.” Reva ’tura Iesu a pauma ’i i Ierusalema.—Luka 19:26-28.