Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 4

Ua hapû Maria, aita râ i faaipoipo

Ua hapû Maria, aita râ i faaipoipo

MATAIO 1:18-25 LUKA 1:56

  • ITERAA IOSEPHA E UA HAPÛ MARIA

  • RIRORAA MARIA EI VAHINE FAAIPOIPO NA IOSEPHA

A haamana‘o e i faaea na Maria i ǒ Elisabeta to ’na fetii i te tuhaa fenua mou‘a no Iudea i te pae apatoa, i na toru ava‘e matamua i hapû ai oia. A maha ’tura ava‘e to ’na. Ua ho‘i oia i to ’na fare i Nazareta. E ite oioi te taata e ua hapû oia. Eaha paha oia i te haapeapea!

Hau atu â, ua momo‘ahia Maria i te hoê tamuta no Nazareta o Iosepha te i‘oa. E ua ite oia e ia au i te ture a te Atua ia Iseraela, e pehihia te hoê vahine momo‘ahia o te taoto i te tahi atu tane. (Deuteronomi 22:23, 24) No reira, noa ’tu e aita Maria i taoto i te tahi atu tane, ua feruri paha oia e nafea o ’na e faataa ’i ia Iosepha mea nafea o ’na i te hapûraa e eaha te tupu.

E toru hoi ava‘e to Maria faaearaa i ǒ Elisabeta. Papu roa ïa e te tiai ru ra Iosepha i te ite ia ’na. I to raua farereiraa, ua faaite iho â Maria ia ’na e ua hapû oia, a faataa maitai atu ai e maoti te varua mo‘a o te Atua i hapû ai oia. Tera noa râ, mea fifi roa no Iosepha ia taa i te reira e ia tiaturi.

Ua ite Iosepha e e vahine maitai Maria e e roo maitai roa to ’na. E mea here roa na ’na ia Maria. Noa ’tu râ ta Maria parau, e au ra e no Iosepha ua taoto Maria i te tahi atu tane i hapû ai oia. Aita Iosepha i hinaaro ia pehihia Maria i te ofai aore ra e faahaama ia Maria. Opua ihora oia e faataa huna noa ia raua. I tera tau, e hi‘ohia te feia momo‘ahia ei feia faaipoipohia, e e titauhia te hoê parau faataaraa e mutu ai taua taatiraa ra.

Feruri ihora Iosepha i taua mau parau ra e taoto ihora. Fa maira ta Iehova melahi ia ’na na roto i te moemoeâ e na ô maira: “Eiaha oe e mǎta‘u  i te faaipoipo ia Maria [“i te rave i to vahine ia Maria i ǒ oe,” nota i raro i te api], maoti hoi te varua mo‘a i hapû ai oia. E fanau oia i te hoê tamaiti e ia topa oe i to ’na i‘oa o Iesu, e faaora hoi oia i te taata i ta ratou hara.”—Mataio 1:20, 21.

I to Iosepha araraa mai, mauruuru roa ihora oia i te taa-maitai-raa i te tupuraa! Ma te haamarirau ore, rave ihora oia ia Maria i ǒ ’na, mai ta te melahi i faaue ia ’na. E oroa faaipoiporaa teie ohipa ei faaiteraa i te taata e ua faaipoipo Iosepha raua Maria. Tera râ, aita Iosepha i taoto ia Maria a hapû ai oia ia Iesu.

Tau ava‘e i muri a‘e, ua titauhia ia faaineine Iosepha e o Maria ua rahi roa hoi to ’na opu, i te faarue i to raua fare i Nazareta. Ihea ïa to raua haereraa ua fatata hoi Maria i te fanau?