Eaha to roto?

Tapura tumu parau

 PENE 7

Haereraa te tahi mau hi‘o fetia e hi‘o ia Iesu

Haereraa te tahi mau hi‘o fetia e hi‘o ia Iesu

MATAIO 2:1-12

  • PEERAA TE FEIA HI‘O FETIA I TE HOÊ “FETIA” E TAE ROA I IERUSALEMA E IA IESU RA

Tae maira te tahi mau tane no hitia o te râ mai. E feia hi‘o fetia, o te tuatapapa i te vairaa o te mau fetia, a nehenehe atu ai ratou, i ta ratou parauraa, e tatara i te auraa o te mau ohipa e tupu i roto i te oraraa o te taata. (Isaia 47:13) I hitia o te râ to ratou iteraa e peeraa i te hoê “fetia” hau atu i te hanere kilometera i te atea, e tae roa i Ierusalema eiaha râ i Betelehema.

I to ratou taeraa i reira, ui atura ratou: “Teihea roa te arii o te ati Iuda tei fanauhia mai nei? Ua ite hoi matou i to ’na fetia i hitia o te râ e te haere mai nei matou e tahopu ia ’na.”—Mataio 2:1, 2.

Faaroo ihora te arii Heroda no Ierusalema i te reira e horuhoru ihora. Titau atura oia i te mau tahu‘a tiaau e te tahi atu mau aratai haapaoraa ati Iuda e ui atura ihea te Mesia e fanauhia ’i. Pahono maira ratou e “i Betelehema,” ia au i te mau Papai. (Mataio 2:5; Mika 5:2) Tii huna ’tura Heroda i te feia hi‘o fetia e parau atura: “A haere a maimi i tera tamarii e ia ite outou ia ’na, a ho‘i mai e faaite ia ’u, ia haere atoa hoi au e tahopu ia ’na.” (Mataio 2:8) Te hinaaro mau râ o Heroda, ia itehia mai taua tamarii ra no te haapohe ia ’na!

I te revaraa te feia hi‘o fetia, tupu ihora te tahi ohipa maere. Te “fetia” ta ratou i ite na i hitia o te râ, tere ihora ïa na mua ia ratou. Papu maitai, e ere taua fetia ra mai te tahi atu mau fetia. Ua fa mai râ te reira no te aratai ia ratou. Ua pee te feia hi‘o fetia i taua fetia ra e tae roa i to ’na mauraa i nia a‘e i te fare i reira Iosepha raua Maria e faaea ’i e ta raua tamaiti.

Tomo a‘era te feia hi‘o fetia i roto i te fare e ite atura ia Maria e te hoê tamarii, o Iesu ïa. Tipapa ihora te feia hi‘o fetia i raro i mua ia Iesu, e pûpû maira na ’na i te auro, te tapau libano e te tapau mura. I muri iho, a fatata ’i ratou i te reva, faaarahia maira ratou e te Atua na roto i te moemoeâ eiaha e ho‘i ia Heroda ra. Reva ’tura ïa ratou i to ratou fenua na te tahi atu e‘a.

I to oe mana‘o, na vai i rave ia fa mai te “fetia” tei aratai i te feia hi‘o fetia? A haamana‘o, aita te fetia i aratai tia ’tu ia ratou ia Iesu ra i Betelehema. Aita, ua arataihia ratou i Ierusalema, i reira to ratou farereiraa i te arii Heroda, tei hinaaro e haapohe ia Iesu. E na reira iho â o ’na ahani aita te Atua i ohipa mai, a faaara ’i i te feia hi‘o fetia eiaha e faaite ia Heroda teihea roa Iesu. Papu maitai, na te enemi o te Atua, o Satani tei hinaaro e haapohe ia Iesu, i rave ia fa mai tera fetia. Ua faaohipa oia i tera ravea ia tupu ta ’na opuaraa.