Eaha to roto?

Tapura tumu parau

 PENE 2

Haamaitaihia Iesu hou to ’na fanauraa

Haamaitaihia Iesu hou to ’na fanauraa

LUKA 1:34-56

  • HAERERAA MARIA I Ǒ ELISABETA TO ’NA FETII

I muri iho i to te melahi Gaberiela parauraa i te vahine apî ra o Maria e e fanau mai oia i te hoê tamaiti o te topahia i te i‘oa o Iesu e o te faatere ei Arii e a muri noa ’tu, ui maira Maria: “E nafea te reira e tupu ai, aita hoi au i taoto a‘enei i te hoê tane?”—Luka 1:34.

Pahono atura Gaberiela: “E vai mai te varua mo‘a i nia ia oe e e tapo‘i mai te mana o te Teitei ia oe. No reira atoa te aiû o te fanauhia mai e parauhia ’i mo‘a e Tamaiti a te Atua.”—Luka 1:35.

No te tauturu paha ia Maria ia farii i ta ’na poroi, na ô atoa ’tura Gaberiela: “Inaha, ua hapû atoa o Elisabeta to fetii, e ono ava‘e to ’na i teie nei, noa ’tu e e ruhiruhia oia e ua matau te taata i te parau e eita ta ’na tamarii e noaa, aore hoi e parau e ore e tia i te Atua ia faatupu.”—Luka 1:36, 37.

Farii ihora Maria i ta Gaberiela i parau. Teie hoi ta ’na pahonoraa: “Inaha, e tavini vahine au na Iehova! Mai ta oe i parau, ia na reirahia mai ïa vau.”—Luka 1:38.

Reva ’tura Gaberiela e faaineine ihora Maria ia ’na no te haere e hi‘o ia Elisabeta, e noho ra e ta ’na tane faaipoipo o Zekaria i pihai iho ia Ierusalema i te tuhaa fenua mou‘a o Iudea. E toru aore ra e maha mahana e tae ai Maria i ǒ, mai Nazareta ’tu.

Tae atura Maria i te fare o Zekaria. I to ’na tomoraa ’tu, aroha ’tura oia ia Elisabeta to ’na fetii. Î ihora Elisabeta i te varua mo‘a, e na ô maira ia Maria: “O oe te vahine haamaitai-rahi-roa-hia a‘e o te mau vahine atoa e ia haamaitai te Atua i te aiû i roto i to opu! O vai hoi au e haere mai ai te metua vahine o to ’u Fatu e hi‘o ia ’u? Inaha hoi, i to ’u iho â faarooraa ia oe i te aroharaa mai, hauti ihora te aiû i roto i to ’u opu no te oaoa.”—Luka 1:42-44.

Pahono atura Maria ma te aau mauruuru: “Te arue nei au ia Iehova, e te oaoa roa nei to ’u aau i te Atua to ’u Faaora, ua hi‘o mai hoi oia i ta ’na tavini vahine, noa ’tu to ’na riirii. Inaha hoi, mai teie atu nei e faaite haere ai te mau u‘i atoa e ua haamaitaihia vau, e ohipa faahiahia hoi ta te Atua puai i rave no ’u.” A hi‘o na, noa ’tu e ua farii-maitai-hia oia e te Atua, o te Atua ta Maria i faahanahana. “E i‘oa mo‘a to ’na,” ta Maria ïa i parau, “e e aroha hamani maitai oia i te feia e mǎta‘u ra ia ’na i tera u‘i, i tera u‘i.”—Luka 1:46-50.

Arue faahou atura Maria i te Atua ma teie mau parau i tohuhia e te Atua: “Ua haa oia ma to ’na rima puai. Ua haapurara i te feia teoteo i roto i te mau opuaraa a to ratou aau. Ua huri oia i te feia mana i raro i to ratou terono e ua faateitei i te feia riirii. Ua horoa oia i te mau mea maitatai na te feia veve e ua faaho‘i i te feia e faufaa ta ratou ma te tao‘a ore. Ua tauturu oia ia Iseraela ta ’na tavini, a faaite ai e e haamana‘o oia i ta ’na parau fafau e aroha hamani maitai ia Aberahama e to ’na huaai e a muri noa ’tu, mai ta ’na i parau i to tatou mau tupuna.”—Luka 1:51-55.

Piri i te toru ava‘e to Maria faaearaa i ǒ Elisabeta, a tauturu ai ia Elisabeta i te mau hebedoma hopea o to ’na hapûraa. Mea tano roa i amui ai na vahine haapao maitai, tei hapû maoti te tauturu a te Atua, i tera taime o to raua oraraa!

A tapao atoa na e ua haamaitaihia Iesu hou to ’na fanauraa. Ua pii Elisabeta ia Iesu “to ’u Fatu,” e ua “hauti” te aiû i roto i to ’na opu “no te oaoa” i to Maria aroharaa ’tu ia Elisabeta. Mea taa ê roa te huru o te tahi atu mau taata i nia ia Maria e ta ’na aiû i roto i te opu i muri a‘e, mai ta tatou e ite mai.