Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 3

Fanauhia tei faaineine i te e‘a

Fanauhia tei faaineine i te e‘a

LUKA 1:57-79

  • FANAURAAHIA IOANE BAPETIZO E MAIRIRAAHIA I TERA I‘OA

  • TOHURAA ZEKARIA I TA IOANE OHIPA A MURI A‘E

Ua fatata roa Elisabeta i te fanau i ta ’na aiû. E toru ava‘e to to ’na fetii o Maria faaearaa i pihai iho ia ’na. Ua tae i te taime e vaiiho mai ai Maria ia ’na no te ho‘i i ǒ roa i Nazareta i te pae apatoerau. I roto piri i te ono ava‘e, e fanau atoa o ’na i ta ’na tamaiti.

Reva ’tura Maria e fanau ihora Elisabeta. Oaoa ihora Elisabeta raua Zekaria i te mea aita i fifi noa ’‘e te fanauraa e mea maitai roa Elisabeta e ta ’na aiû. I to Elisabeta faaiteraa i ta ’na tamaiti iti i te feia tapiri e to ’na fetii, oaoa ihora ratou e oia atoa.

Ia au i te ture a te Atua ia Iseraela, ia peritomehia te hoê aiû tamaroa i te va‘u o te mahana i muri a‘e i to ’na fanauraa, e i reira atoa oia e mairihia ’i i to ’na i‘oa. (Levitiko 12:2, 3) Ua mana‘o vetahi e ia mairihia te tamaiti a Zekaria i to ’na iho i‘oa. Parau atura râ Elisabeta: “Eiaha! O Ioane to ’na i‘oa.” (Luka 1:60) A haamana‘o i ta te melahi Gaberiela i parau, ia mairihia tera aiû i te i‘oa Ioane.

Aita râ te feia tapiri e to ’na fetii i farii, a na ô ai: “Aore roa e taata i roto i to oe fetii tera to ’na i‘oa.” (Luka 1:61) Ma te apǎ i te rima, ani atura ratou ia Zekaria i te i‘oa ta ’na e hinaaro e horoa no ta ’na tamaiti. Ani maira Zekaria i te hoê iri e papai ihora i ta ’na pahonoraa: “O Ioane to ’na i‘oa.”—Luka 1:63.

Tupu ihora te hoê semeio i te matararaa to Zekaria vaha e to ’na arero. Te haamana‘o ra oe e ua vavahia oia i to ’na oreraa e tiaturi i te parau a te melahi, oia hoi e fanau Elisabeta i te hoê tamaiti. I teie nei, te paraparau ra Zekaria. Maere ihora te feia tapiri e ui a‘era i roto i to ratou aau: “O vai hoi teie tamaiti?” (Luka 1:66) Ua taa ia ratou e i te mana o te Atua i mairihia ’i te aiû i te i‘oa Ioane.

Na ô ihora Zekaria tei î i te varua mo‘a: “Ia  aruehia Iehova te Atua o Iseraela, no te mea ua aroha oia i to ’na nunaa e ua faaora ia ratou. I horoa na oia i te hoê tara faaora no tatou no roto mai i te fare o to tavini ra o Davida.” (Luka 1:68, 69) O te Fatu Iesu, o te fanauhia mai, te “tara faaora.” Ua parau Zekaria e “i muri a‘e i to te Atua faaoraraa ia tatou i te rima o te mau enemi,” na roto ia Iesu, “e nehenehe tatou e pûpû ia ’na i te hoê taviniraa mo‘a ma te mǎta‘u ore, te taiva ore e te parau-tia i mua i to ’na aro e hope noa ’tu to tatou pue mahana.”—Luka 1:74, 75.

Tohu ihora Zekaria no nia i ta ’na tamaiti: “Area oe, e tamaiti, e parauhia oe peropheta na te Teitei, e tono hoi Iehova ia oe na mua ia ’na no te faaineine i te e‘a no ’na, no te faaite i to ’na nunaa e e faaora oia ia ratou ma te faaore i ta ratou mau hara no to te Atua hoi aumihi î i te here. Mai te mahana e anaana mai i te aahiata teie aumihi î i te here no nia mai no te turama i tei parahi ra i roto i te poiri e te maru pohe, e no te aratai i to tatou avae na te e‘a o te hau.” (Luka 1:76-79) E parau tohu faaitoito mau â teie!

I tera taime, ua tae Maria aita â i faaipoipo atura i to ’na fare i Nazareta. Eaha te tupu i nia ia ’na ia itehia e ua hapû o ’na?