Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 11

Faaineineraa Ioane Bapetizo i te e‘a

Faaineineraa Ioane Bapetizo i te e‘a

MATAIO 3:1-12 MAREKO 1:1-8 LUKA 3:1-18 IOANE 1:6-8, 15-28

  • PORORAA IOANE E BAPETIZORAA I TE TAATA

  • MEA RAHI TEI BAPETIZOHIA, E ERE RÂ PAUROA

Mai to Iesu uiuiraa i te mau orometua i te hiero i te 12raa o to ’na matahiti, 17 matahiti tei mairi. Tei te haamataraa ïa o te matahiti 29. Mea rahi te paraparau ra no Ioane te fetii o Iesu. Te poro haere ra oia na te pae tooa o te râ o te anavai Ioridana.

Mea taa ê Ioane i te tahi atu mau taata no to ’na faaahuraa e ta ’na huru paraparau. E ahu huruhuru kamela to ’na e te hatua iri animara i nia i to ’na tauupu. E meli e e vivi ta ’na maa. E teie ta ’na poroi: “A tatarahapa, ua fatata mai hoi te Faatereraa arii o te ra‘i.”—Mataio 3:2.

I anaanatae na te feia i haere mai e faaroo ia Ioane, i ta ’na poroi. Taa a‘era e rave rahi e mea titauhia ia tatarahapa ratou, oia hoi ia taui i to ratou huru feruriraa e haerea, a haapae atu ai i to ratou huru oraraa haapaoraa ore na mua ’‘e. “Haere maira to Ierusalema ia ’na ra, to Iudea e to te mau fenua atoa e ati a‘e Ioridana.” (Mataio 3:5) Ua tatarahapa iho â e rave rahi o tei haere mai ia Ioane ra. Bapetizo ihora oia ia ratou, ma te taumi ia ratou i raro i te pape o Ioridana. No te aha?

I bapetizo na Ioane i te taata ei faaiteraa i to ratou tatarahapa mau i te hararaa i te ture a Mose, te faufaa ta te Atua i faaau ia Iseraela. (Ohipa 19:4) E ere râ pauroa tei tia ia bapetizohia. I te haereraa mai te tahi mau aratai haapaoraa, te mau Pharisea e te mau Sadukea, ia Ioane ra, ua pii Ioane ia ratou e “fanau‘a ophi taero.” Teie ta ’na i parau: “A rave . . . i te mau ohipa o te faaite i to outou tatarahapa. Eiaha e parau i roto ia outou iho: ‘O Aberahama to matou metua.’ Te parau atu nei hoi au e e nehenehe te Atua e faariro i teie mau ofai ei tamarii na Aberahama. Ua ineine te opahi no te tâpû i te mau tumu raau i te a‘a. Te tumu raau atoa e ore e faahotu mai i te maa maitai, ia tâpûhia ïa a hurihia ’tu ai i roto i te auahi.”—Mataio 3:7-10.

No te mea mea rahi te paraparau ra no Ioane, mea puai ta ’na poroi e mea rahi te taata ta ’na e bapetizo ra, tonohia maira te mau tahu‘a tiaau e te ati Levi e ui ia ’na: “O vai oe?”

Pahono atura Ioane: “E ere au i te Mesia.”

Ui maira ratou: “O vai ïa oe? O Elia?”

Pahono atura oia: “E ere.”

Ui maira ratou: “O oe anei te peropheta i tohuhia na?” Te mana‘o ra ratou i te Peropheta rahi ta Mose i parau e e haere mai oia.—Deuteronomi 18:15, 18.

Pahono atura Ioane: “E ere!”

Onoono noa maira ratou i te ui: “O vai ïa oe? A faaite mai na ia horoa ’tu matou i te tahi pahonoraa i tei tono mai ia matou. Eaha ta oe e parau no oe iho?” Na ô atura Ioane: “O vau te taata e tuô haere nei na te medebara: ‘A haamanina i te purumu no Iehova,’ mai ta Isaia te peropheta i parau.”—Ioane 1:19-23.

“Eaha ïa oe e bapetizo ai i te taata,” ta ratou ïa i hinaaro e ite, “e ere hoi oe te Mesia, e ere o Elia, e ere atoa te peropheta i tohuhia na?” Faataa maitai atura oia: “Te bapetizo nei au i roto i te pape. Te ora nei te hoê taata i rotopu ia outou aita outou i matau, e na muri mai o ’na ia ’u.”—Ioane 1:25-27.

Oia mau, te faaite ra Ioane e te faaineine ra oia i te e‘a ma te tauturu i te taata ia noaa ia ratou te huru feruriraa maitai, a farii atu ai i te Mesia fafauhia o te riro mai ei Arii. No ’na hoi i parau ai Ioane: “Te taata e haere mai i muri a‘e ia ’u, e mana rahi a‘e ïa to ’na i to ’u. E ore e tia ia ’u ia tatara i to ’na tiaa.” (Mataio 3:11) Na ô atoa ’tura Ioane: “O te haere mai na muri mai ia ’u, e na mua ’tu ïa ia ’u, no te mea i vai na oia na mua ’‘e ia ’u.”—Ioane 1:15.

Mea tano mau â ïa ta Ioane poroi: “A tatarahapa, ua fatata mai hoi te Faatereraa arii o te ra‘i.” (Mataio 3:2) E faaiteraa teie i te taata e ua fatata i te haamata te taviniraa a Iesu Mesia, o te riro mai ei Arii na Iehova.