Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 6

Te Tamaiti fafauhia

Te Tamaiti fafauhia

LUKA 2:21-39

  • PERITOMERAAHIA IESU E AFAIRAAHIA I TE HIERO

Aita Iosepha raua Maria i ho‘i i Nazareta, ua faaea râ i Betelehema. I te va‘uraa o te mahana o to Iesu fanauraa, ua peritomehia Iesu mai ta te ture a te Atua ia Iseraela i faaue. (Levitiko 12:2, 3) E peu matau-atoa-hia ia mairi i te i‘oa o te aiû tamaroa i taua mahana ra. Ua mairi raua i ta raua tamaiti i te i‘oa Iesu, mai ta te melahi Gaberiela i faaue.

Hau atu i te hoê ava‘e i muri iho, i te 40raa o te mahana o to Iesu fanauraa, afai a‘era to ’na na metua ia ’na. Ihea ïa? I te hiero i Ierusalema, tau kilometera i te atea i te vahi ta ratou e faaea ra. I raro a‘e i te ture a Mose, e titauhia ia hopoi te hoê metua vahine tei fanau i te hoê tamaroa i te hoê tusia tamâraa ia raua i te hiero e 40 mahana i muri a‘e.—Levitiko 12:4-8.

Ta Maria iho â ïa i rave. E piti manu rii ta ’na i hopoi ei tusia. Te taa ra ïa ia tatou e e ere Iosepha raua Maria i te mea navai. Ia au i te ture a Mose, hoê mamoe oni apî e hoê manu te pûpûhia e tia ’i. Mai te peu râ e aita ta te hoê metua vahine e mamoe oni, e navai noa ïa e piti uupa aore ra e piti uuairao. Ta Maria ïa i pûpû, mea navai ore hoi oia.

I te hiero, tapiri maira te hoê tane ruhiruhia ia Iosepha raua Maria. O Simeona to ’na i‘oa. Ua faaite te Atua ia ’na e e ite oia i te Mesia, aore ra Kirito, fafauhia a Iehova hou oia a pohe ai. I taua mahana ra, ua arataihia Simeona e te varua mo‘a i te hiero, i reira to ’na iteraa ia Iosepha raua Maria e ta raua aiû. Rave maira Simeona i taua aiû ra.

A amo noa ’i oia ia Iesu, haamauruuru a‘era Simeona i te Atua, a na ô ai: “I teie nei, e to ’u Arii hau ê e Fatu, e nehenehe to tavini e pohe ma te hau ia au i ta oe parau, no te mea ua ite to ’u mata i ta oe ravea faaoraraa ta oe i horoa mai ia ite te taata atoa, e maramarama oia e ite ai te mata o te feia o te mau nunaa ěê e e maramarama anaana atoa no to nunaa Iseraela.”—Luka 2:29-32.

Maere ihora Iosepha raua Maria i te faarooraa i te reira. Haamaitai ihora Simeona ia raua e parau atura ia Maria e “ua maitihia [ta ’na] tamaiti ia hi‘a e ia faateiteihia e rave rahi i Iseraela,” e e mauiui roa oia mai te huru ra e ua puta roa o ’na i te ‘o‘e.—Luka 2:34.

E taata ê atu to te hiero i taua mahana ra. O Ana ïa, te hoê peropheta vahine e 84 matahiti. I haere noa na oia i te hiero. I taua taime ra, tapiri maira oia ia Iosepha raua Maria e te aiû ra o Iesu. Haamauruuru a‘era oia i te Atua e faaite atura i te parau no Iesu i te feia atoa e faaroo mai.

Eaha paha Iosepha raua Maria i te oaoa no teie mau ohipa i tupu i te hiero! Papu roa ’tura ia raua e o te Tamaiti fafauhia a te Atua ta raua tamaroa.