Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 13

Haapii mai i ta Iesu i rave a faahemahia ’i

Haapii mai i ta Iesu i rave a faahemahia ’i

MATAIO 4:1-11 MAREKO 1:12, 13 LUKA 4:1-13

  • FAAHEMARAA SATANI IA IESU

I muri iho i to Iesu bapetizoraahia e Ioane, aratai ihora te varua o te Atua ia Iesu i te medebara no Iudea. Mea rahi te ohipa ta ’na e feruri. I to Iesu bapetizoraahia, “matara a‘era te ra‘i.” (Mataio 3:16) Haamana‘o ihora oia i te tahi mau mea ta ’na i haapii mai e i rave i nia i te ra‘i. Mea rahi mau â ïa te ohipa ta ’na e feruriruri!

E 40 rui e 40 ao to Iesu parahiraa i te medebara. I tera roaraa, aita oia i tamaa. Poia roa ihora Iesu e haere maira te Diabolo ra o Satani e faahema ia ’na a na ô ai: “E tamaiti oe na te Atua, a parau i teie mau ofai ia riro ei faraoa.” (Mataio 4:3) Patoi atura Iesu i taua faahemaraa ra, ua ite hoi oia e eita e tano ia faaohipa i to ’na mana e faatupu i te semeio no te haamâha i to ’na iho hiaai.

Aita te Diabolo i tuu. Tamata ihora oia i te tahi atu faahemaraa. Ua parau oia ia Iesu ia ou‘a i raro mai nia mai i te vahi teitei roa o te hiero. Aita râ Iesu i hinaaro e riro ei mataitairaa na te taata. Ua faahiti râ oia i te mau Papai no te faaite e eita e tano ia aa i te Atua.

E te toru o te faahemaraa, faaite semeio maira te Diabolo ia Iesu i “te mau faatereraa arii atoa o te ao nei e to ratou hanahana,” e na ô maira: “Teie mau mea atoa e horoa vau na oe ia tipapa mai oe i raro a haamori mai ai ia ’u [“a haamori mai ai ia ’u hoê noa taime,” nota i raro i te api].” Patoi faahou atura Iesu, a na ô ai: “Haere ê atu e Satani.” (Mataio 4:8-10) Aita Iesu i hema, ua ite hoi oia e ia Iehova ana‘e e pûpû ai i te taviniraa mo‘a. Ua faaoti oia e tapea i to ’na haapao maitai i te Atua.

Te vai ra te haapiiraa e huti mai i taua mau faahemaraa ra e ta Iesu i rave. Ua faahema iho â te Diabolo ia Iesu, te auraa ïa e ere te Diabolo i te ino, mai ta vetahi e parau ra. E varua itea ore mau râ o ’na. Te faaite atoa mai ra teie faatiaraa e na te Diabolo te mau faatereraa o te ao nei e te mana ra oia i nia ia ratou. Ahani aita ra, eita ïa ta ’na e nehenehe e pûpû i taua mau faatereraa ra no te faahema i te Mesia.

Hau atu â, ua parau te Diabolo ia Iesu e ia haamori oia ia ’na hoê noa taime, e horoa ’tu oia i te mau faatereraa arii atoa o te ao nei. E tamata atoa paha te Diabolo i te faahema ia tatou ma te tuu i mua ia tatou i te mau faatianianiraa ia noaa mai te faufaa, te mana aore ra te tiaraa i roto i teie nei ao. E haerea paari ia pee i te hi‘oraa o Iesu, ma te tapea i to tatou haapao maitai i te Atua noa ’tu eaha te faahemaraa! A haamana‘o râ, ua vaiiho mai te Diabolo ia Iesu “a tiai ai i te tahi atu taime tano.” (Luka 4:13) E nehenehe te Diabolo e na reira atoa i nia ia tatou. No reira, e vai ara noa ana‘e ïa.