Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 17

Haapiiraa oia ia Nikodemo i te po

Haapiiraa oia ia Nikodemo i te po

IOANE 2:23–3:21

  • PARAPARAURAA IESU IA NIKODEMO

  • TE AURAA E “FANAU-FAAHOU-HIA”

A parahi ai oia i Ierusalema no te Pasa 30, rave ihora Iesu i te mau tapao faahiahia, aore ra semeio. Faatupu a‘era ïa e rave rahi i te faaroo ia ’na. Putapû ihora Nikodemo, te hoê Pharisea e mero o te tiripuna teitei ati Iuda parauhia Sunederi. No to ’na hinaaro e ite hau atu â, haere ihora oia e farerei ia Iesu i te po, no to ’na paha taiâ ia ino to ’na roo i rotopu i te tahi atu mau aratai ati Iuda ia itehia mai oia.

Parau maira Nikodemo: “Rabi, ua ite matou e e orometua oe no ǒ mai i te Atua ra, aore roa hoi e taata e nehenehe e rave i teie mau semeio ta oe e rave nei ia ore te Atua e turu ia ’na.” Pahono atura Iesu ia Nikodemo e e ô te hoê taata i roto i te Faatereraa arii a te Atua ia “fanau-faahou-hia” oia e tia ’i.—Ioane 3:2, 3.

E nafea hoi te hoê taata e fanau-faahou-hia ’i? “Eita oia e nehenehe e tomo faahou i roto i te opu o to ’na metua vahine, a fanau-faahou-hia mai ai, e ere anei,?” ta Nikodemo ïa i parau.—Ioane 3:4.

E ere tera te auraa o te parau fanau-faahou-hia. Faataa ihora Iesu: “Ia ore te hoê taata e fanauhia i te pape e te varua mo‘a, e ore oia e ô i roto i te Faatereraa arii a te Atua.” (Ioane 3:5) I to Iesu bapetizoraahia e to te varua mo‘a pouraa mai i nia ia ’na, ua fanauhia ïa oia “i te pape e te varua mo‘a.” I taua taime ra, e reo atoa mai te ra‘i mai tei faaroohia i te na ôraa: “O ta ’u Tamaiti teie, tei herehia, ta ’u i mauruuru roa.” (Mataio 3:16, 17) Mea na reira ïa to te Atua faaiteraa e ua riro mai Iesu i teie nei ei tamaiti pae varua o te nehenehe e ô i roto i te Faatereraa arii i te ra‘i. I muri a‘e, i te Penetekose 33, niniihia maira te varua mo‘a i nia i te tahi atu mau mero bapetizohia, a fanau-faahou-hia ’i ratou ei tamaiti pae varua na te Atua.—Ohipa 2:1-4.

Mea fifi no Nikodemo ia taa i ta Iesu e haapii ra ia ’na no nia i te Faatereraa arii. Horoa ’tura ïa Iesu i te tahi atu â mau haamaramaramaraa no nia i ta ’na hopoia taa ê ei Tamaiti na te Atua a parahi ai oia i te fenua nei. Na ô atura Iesu: “Mai ia Mose i faateitei i te ophi i te medebara, ia faateitei-atoa-hia ïa te Tamaiti a te taata nei e tia ’i, ia noaa hoi i te taata e tiaturi ia ’na te ora mure ore.”—Ioane 3:14, 15.

I titauhia na ia hi‘o te mau ati Iseraela tei hohonihia e te ophi taero i te ophi veo ta Mose i hamani ia ora mai ratou. (Numera 21:9) Oia atoa, mea faufaa roa ia faatupu te taata atoa i te faaroo i te Tamaiti a te Atua ia tiamâ mai ratou i te hara e te pohe, a fana‘o atu ai i te ora mure ore. No te haapapu i ta Iehova i rave ma te here no te reira, na ô atura Iesu ia Nikodemo: “No to ’na here rahi i to te ao i horoa mai ai te Atua i ta ’na Tamaiti otahi ia ore ia mou te taata o te faatupu i te faaroo ia ’na, ia roaa râ te ora mure ore.” (Ioane 3:16) I Ierusalema piri i te ono ava‘e i muri a‘e i to ’na haamataraa i ta ’na taviniraa, ua faaite maitai Iesu e o ’na te e‘a e tae atu ai te huitaata i te ora.

Na ô atura Iesu ia Nikodemo: “I tono mai hoi te Atua i ta ’na Tamaiti i te ao nei, eiaha no te haava i to te ao nei.” Te auraa ïa e aita o ’na i tonohia mai no te faautua i te taata atoa i te haamouraa. Ua parau râ Iesu e “ia ora . . . to te ao nei na roto ia ’na” i tonohia mai ai oia.—Ioane 3:17.

I te po to Nikodemo haereraa e farerei ia Iesu no to ’na taiâ. A tapao na i ta Iesu mau parau hopea ia Nikodemo: “I haere mai na te maramarama [o Iesu ïa maoti to ’na oraraa e ta ’na mau  haapiiraa] i roto i te ao, o te poiri râ ta te taata i au eiaha te maramarama, mea ino hoi ta ratou mau ohipa e no reira ratou e faautuahia ’i. Te taata hoi e rave ra i te mau mea ino mau, mea au ore roa na ’na te maramarama, aita atoa e haere mai ra i te maramarama ia ore hoi ia itehia ta ’na mau ohipa ino. Tera râ, te taata e rave i te mea tia, e haere mai ïa i te maramarama ia itehia e ua tuati ta ’na mau ohipa i te hinaaro o te Atua.”—Ioane 3:19-21.

Na taua Pharisea ra e orometua no Iseraela, o Nikodemo, e feruriruri i ta ’na i faaroo mai nei no nia i ta Iesu hopoia i roto i te opuaraa a te Atua.