Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 14

Haamataraa Iesu i te faariro i te taata ei pǐpǐ

Haamataraa Iesu i te faariro i te taata ei pǐpǐ

IOANE 1:29-51

  • PEERAA NA PǏPǏ MATAMUA A IESU IA ’NA

I muri a‘e e 40 mahana i te medebara e hou a ho‘i ai i Galilea, e haere faahou Iesu ia Ioane ra, tei bapetizo na ia ’na. A piri atu ai Iesu ia ’na, na ô atura Ioane i te feia i reira, a tohu ai ia Iesu: “A hi‘o na i te Arenio a te Atua o te faaore roa i te hara a to te ao nei! I parau na hoi au no ’na: ‘Na muri mai ia ’u te haere mai nei te hoê taata o te na mua ’tu ia ’u, no te mea i vai na oia na mua ’‘e ia ’u.’” (Ioane 1:29, 30) Noa ’tu e mea paari rii a‘e Ioane ia Iesu, ua ite o ’na e i vai na Iesu na mua ’‘e ia ’na ei varua i nia i te ra‘i.

Tau hebedoma na mua ’tu, i to Iesu haereraa ia Ioane ra ia bapetizohia oia, e au ra e aita â i papu atura ia Ioane e o Iesu te Mesia. Ua parau hoi Ioane: “Aita vau i matau ia ’na, te tumu râ i bapetizo ai au i te taata i roto i te pape, ia itehia ïa oia e to Iseraela.”—Ioane 1:31.

Faatia atoa ’tura Ioane i te feia e faaroo ra ia ’na i te ohipa i tupu i to ’na bapetizoraa ia Iesu: “Ua ite au i te varua mo‘a i te pouraa mai mai te uupa ra mai nia mai i te ra‘i, e faaea ihora i nia ia ’na. Aita vau i matau ia ’na, ua parau mai râ te Atua tei tono mai ia ’u e bapetizo i te taata i roto i te pape: ‘Ia ite oe i te varua mo‘a ia pou mai e ia faaea i nia ia ’na, o ’na ïa te bapetizo i te taata i te varua mo‘a.’ E ua ite au i te reira, e ua faaite au e o ’na te Tamaiti a te Atua.”—Ioane 1:32-34.

Ananahi a‘e, te tia ra Ioane e toopiti o ta ’na mau pǐpǐ i to Iesu haere-faahou-raa ’tu. Na ô ihora Ioane: “A hi‘o i te Arenio a te Atua!” (Ioane 1:36) Pee ihora na toopiti pǐpǐ a Ioane Bapetizo ia Iesu. O Anederea te i‘oa o te hoê. E te tahi atu, o te taata ïa tei papai i teie faatiaraa, o Ioane atoa te i‘oa. E au ra e e taeae fetii taua Ioane ra no Iesu. E tamaiti oia na Salome, e tuahine paha no Maria, e o Zebedaio ta ’na tane faaipoipo.

Fariu atura Iesu i muri e ite atura ia Anederea raua Ioane e pee mai ra ia ’na. Ui atura oia: “Eaha ta orua e hinaaro ra?”

Na ô maira raua: “Rabi, ihea oe e faaea ’i?”

Pahono atura Iesu: “A haere mai, a hi‘o.”—Ioane 1:37-39.

Tei te area hora maha i te ahiahi, e ua faaea Anederea raua Ioane ia Iesu ra e po noa ’tu. No to Anederea oaoa rahi, tii ihora oia i to ’na taeae o Simona, pii-atoa-hia Petero, e na ô atura ia ’na: “Ua itehia ia mâua te Mesia.” (Ioane 1:41) Aratai atura Anederea ia Petero ia Iesu ra. Ia au i te tahi mau ohipa i tupu i muri iho, te mana‘ohia ra e ua tii atoa Ioane i to ’na taeae Iakobo e ua aratai ia ’na ia Iesu ra. Aita râ Ioane i papai i teie parau i roto i ta ’na faatiaraa.

Ananahi a‘e, farerei ihora Iesu ia Philipa no Betesaida, te hoê oire i te pae apatoerau o te miti o Galilea. Te oire atoa ïa o Anederea raua  Petero. Parau atura Iesu ia Philipa: “A pee mai ia ’u.”—Ioane 1:43.

Farerei atura Philipa ia Natanaela, pii-atoa-hia Baretolomea, e na ô atura: “Ua itehia ia matou Iesu te tamaiti a Iosepha no Nazareta. No ’na hoi te parau i roto i te ture a Mose e te mau papai a te mau peropheta.” Parau maira râ Natanaela, e feaa ra te mana‘o, ia Philipa: “E taata maitai anei te haere mai Nazareta mai?”

Parau onoono atura Philipa: “A haere mai, a hi‘o.” Ite ihora Iesu ia Natanaela i te haereraa mai e parau ihora: “Teie te hoê Iseraela aita roa e haavare i roto ia ’na.”

Ui maira Natanaela: “Mea nafea to oe iteraa?”

Pahono atura Iesu: “Hou Philipa a pii ai ia oe, ua ite au ia oe i raro a‘e i te tumu suke.”

Na ô maira Natanaela ma te maere: “Rabi, o te Tamaiti a te Atua oe, e Arii oe no Iseraela.”

Ui atura Iesu: “Te tiaturi nei oe ia ’u no to ’u parauraa ’tu e ua ite au ia oe i raro a‘e i te tumu suke?” Na ô atura Iesu: “E ite oe i te mau mea rahi a‘e i teie.” Fafau atura Iesu: “E parau mau ta ’u e parau atu: E ite outou i te ra‘i tei matara e ia pou mai te mau melahi a te Atua i te Tamaiti a te taata nei e ia haere i nia.”—Ioane 1:45-51.

I muri iho, faarue maira Iesu e ta ’na mau pǐpǐ apî i te peho no Ioridana e haere atura i Galilea.