Eaha to roto?

Tapura tumu parau

 PENE 12

Bapetizoraahia Iesu

Bapetizoraahia Iesu

MATAIO 3:13-17 MAREKO 1:9-11 LUKA 3:21, 22 IOANE 1:32-34

  • BAPETIZORAAHIA IESU E FAATAVAIRAAHIA

  • PARAURAA IEHOVA E E TAMAITI IESU NA ’NA

Piri i te ono ava‘e i muri a‘e i to Ioane Bapetizo haamataraa i te poro, haere maira Iesu e 30 matahiti ia ’na ra i te anavai Ioridana. Eaha te tumu? E ere no te haere noa mai e hi‘o ia ’na, aore ra no te ite eaha te huru o ta Ioane pororaa. E ere, ua haere mai Iesu e ani ia Ioane ia bapetizo ia ’na.

Aita Ioane i farii, a na ô ai: “O oe te haere mai ia ’u nei? O vau hoi ta oe e bapetizo e tia ’i.” (Mataio 3:14) Ua ite Ioane e e Tamaiti otahi Iesu na te Atua. A haamana‘o na, a vai ai oia i roto i te opu o to ’na metua vahine, i hauti na Ioane ma te oaoa i to Maria, e hapû ra ia Iesu, haereraa ’tu i ǒ Elisabeta, te metua vahine o Ioane. Eita e ore e ua faatia to ’na metua vahine i te reira ia ’na. Ua faarooroo atoa paha oia i to te melahi Gaberiela parauraa ia Maria e e fanau oia ia Iesu e i to te mau melahi faraa ’tu i te mau tiai mamoe i te po i fanauhia ’i Iesu.

Ua taa ia Ioane e ta ’na bapetizoraa, no te feia ïa tei tatarahapa i te raveraa i te hara. O Iesu râ, aita ïa e hara ta ’na. Noa ’tu e aita Ioane i farii, onoono maira Iesu a na ô ai: “Ia tupu iho â te reira, mea na reira hoi tâua e rave ai i te mea tia atoa.”—Mataio 3:15.

No te aha mea tano ai ia bapetizohia Iesu? Eita Iesu e bapetizohia ei faaiteraa i to ’na tatarahapa i te raveraa i te hara. E faaite râ to ’na bapetizoraa e te pûpû ra oia ia ’na iho no te rave i te hinaaro o to ’na Metua. (Hebera 10:5-7) E tamuta Iesu na mua ’‘e. Ua tae râ i te taime e haamata ’i oia i te taviniraa i tonohia mai ai oia i te fenua nei e to ’na Metua i te ra‘i. Ua mana‘o anei Ioane e e tupu te tahi ohipa taa ê ia bapetizo oia ia Iesu? Eaha to oe mana‘o?

Ua na ô Ioane: “Ua parau mai . . . te Atua tei tono mai ia ’u e bapetizo i te taata i roto i te pape: ‘Ia ite oe i te varua mo‘a ia pou mai e ia faaea i nia ia ’na, o ’na ïa te bapetizo i te taata i te varua mo‘a.’” (Ioane 1:33) Ua ite ïa Ioane e e pou mai te varua o te Atua i nia i te tahi taata ta ’na e bapetizo. No reira oia i ore ai i maere i te iteraa i “te varua o te Atua i te pouraa mai mai te uupa ra i nia ia Iesu,” i to Iesu haereraa mai i nia mai raro mai i te pape.—Mataio 3:16.

Tera râ, e ohipa ê atu tei tupu i to Iesu bapetizoraahia.  “Matara a‘era te ra‘i.” Eaha ïa te auraa? I te taime a bapetizohia ’i Iesu, haamana‘o ihora oia i to ’na oraraa i nia i te ra‘i hou oia a riro mai ai ei taata. Haamana‘o ihora ïa Iesu i to ’na oraraa ei tamaiti varua na Iehova, oia atoa te pue parau mau ta te Atua i haapii ia ’na i nia i te ra‘i hou oia a haere mai ai i te fenua nei.

E reo atoa tei faaroohia mai te ra‘i mai i to Iesu bapetizoraahia, i te na ôraa: “O ta ’u Tamaiti teie, tei herehia, ta ’u i mauruuru roa.” (Mataio 3:17) No vai taua reo ra? E ere ïa no Iesu, tei pihai iho hoi oia ia Ioane. No te Atua taua reo ra. Papu maitai, e Tamaiti Iesu na te Atua. E ere o ’na te Atua Mana hope.

A tapao na e a vai ai Iesu i te fenua nei, e tamaiti oia na te Atua mai te taata matamua ra o Adamu. I muri iho i to ’na faatiaraa i te bapetizoraahia o Iesu, ua papai te pǐpǐ Luka: “I to Iesu haamataraa i te haapii i te taata, e 30 matahiti to ’na e i ta te taata parauraa e tamaiti oia na Iosepha, tamaiti na Heli, . . . tamaiti na Davida, . . . tamaiti na Aberahama, . . . tamaiti na Noa, . . . tamaiti na Adamu, tamaiti na te Atua.”—Luka 3:23-38.

Mai ia Adamu e “tamaiti na te Atua,” oia atoa ïa Iesu. I to ’na bapetizoraahia, ua riro mai Iesu ei Tamaiti pae varua na te Atua, a piri roa ’tu â ’i oia i te Atua. No reira Iesu i nehenehe ai e haapii i te taata i te parau mau a te Atua e e faaite i te e‘a e tae atu ai i te ora. Ua haamata Iesu i te hoê taviniraa e tae roa ’tu i te pûpûraa i to ’na ora ei tusia no te huitaata hara.