Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 2

E nafea ia tapea maite i te hoê mana‘o haava hapa ore?

E nafea ia tapea maite i te hoê mana‘o haava hapa ore?

“Ei aau [aore ra mana‘o haava] hapa ore â to outou.”—PETERO 1, 3:16.

1, 2. No te aha e tao‘a faufaa roa ’i te hoê aveia, e e nafea e nehenehe ai e faaau i te reira i te mana‘o haava?

TE FAATERE ra te hoê ihitai i to ’na pahi na roto i te mau are o te hoê moana aano; te haere avae ra te hoê taata ori haere na te hoê medebara ano; te aratai ra te hoê pairati i to ’na manureva o te faura i nia a‘e i te mau ata i nia i te ra‘i. Ua ite anei oe eaha te taairaa o teie mau taata? E fifi roa ïa ratou taitahi aita ana‘e e aveia—mai te peu iho â râ e aita ’tu e ravea anohaa apî e vai ra.

2 E tao‘a haihai te hoê aveia, ma te hoê noa taioraa teteri e te hoê nira auri ovahine o te tohu i te apatoerau. Ia haa maitai te reira e ia apitihia ’tu te hoê hoho‘a fenua tano roa, e nehenehe te reira e faaora i te taata. I roto i te tahi mau tuhaa, e nehenehe te reira e faaauhia i te hoê ô faufaa roa ta Iehova i ho mai —te hoê mana‘o haava. (Iakobo 1:17) Aita ana‘e e mana‘o haava, e moe roa ïa tatou. Ia faaohipa-maitai-hia, e nehenehe te reira e tauturu ia tatou ia ite i te e‘a maitai i roto i te oraraa e ia na reira noa i te haere. No reira, e hi‘opoa tatou eaha te mana‘o haava e ta ’na ohiparaa. I muri iho, e tatara tatou i teie mau mana‘o: (1) E nafea ia haapii i te mana‘o haava, (2) no te aha e mea tia ’i ia tâu‘a tatou i te mana‘o haava o vetahi ê, e (3) eaha te mau maitai ia tapea maite i te hoê mana‘o haava hapa ore.

EAHA TE MANA‘O HAAVA E TA ’NA OHIPARAA

3. Eaha te auraa mau o te ta‘o Heleni i hurihia ei “mana‘o haava,” e te faataa ra te reira i teihea ravea otahi i roto i te taata?

3 I roto i te Bibilia, e “ite e, aore ra ite e o ’na iho” te auraa mau o te ta‘o Heleni i hurihia ei “mana‘o haava.” Taa ê roa i te mau animara, te fatu ra tatou i te hoê ravea ta te Atua i horoa mai e ite ia tatou iho. E nehenehe tatou, ei auraa parau, e faaea, e hi‘opoa ia tatou iho e e haava ia tatou i te pae morare. Mai te hoê ite, aore ra haava, i roto ia tatou, e nehenehe to tatou mana‘o haava e hi‘opoa i ta tatou mau ohipa, to tatou mau haerea e ta tatou mau maitiraa. E nehenehe te reira e aratai ia tatou i te hoê faaotiraa maitai aore ra e faaara mai no nia i te hoê faaotiraa ino. I muri a‘e, e nehenehe te reira e tamahanahana ia tatou no ta tatou maitiraa maitai aore ra e faautua mai i te horuhoru u‘ana no ta tatou maitiraa tano ore.

4, 5. (a) Mea nafea to tatou iteraa e e mana‘o haava to Adamu e to Eva atoa, e eaha te faahopearaa no to raua tâu‘a-ore-raa i te ture a te Atua? (b) Eaha te mau hi‘oraa e faaite ra e ua faaohipa te mau tane haapao maitai hou te Kerisetianoraa i to ratou mana‘o haava?

4 Ua tuuhia teie ravea i roto i te tane e te vahine i te omuaraa iho â. Ua faaite Adamu e o Eva atoa e e mana‘o haava to raua. E haapapuraa ta tatou i to raua iteraa i te haama i muri a‘e i to raua hararaa. (Genese 3:7, 8) Tera noa râ, aita te hoê mana‘o haava peapea i riro ei maitai no raua i taua taime ra. Ua opua roa raua i te tâu‘a ore i te ture a te Atua. Ua maiti ïa raua ma te ite papu i te orure hau, i te patoi i te Atua ra o Iehova. Ei  taata tia roa, ua ite raua eaha ta raua e rave ra, e aita e otoheraa.

5 Taa ê roa ia Adamu e ia Eva, mea rahi te taata tia ore o tei faaroo i to ratou mana‘o haava. Ei hi‘oraa, ua tia i te taata haapao maitai ra o Ioba ia parau e: “Tau parau-tia ta ’u e tapea nei, e ore e tuu; e ore tau aau e pari mai ia ’u nei e pohe noa ’tu vau.” * (Ioba 27:6) Ua faaroo maitai Ioba i to ’na mana‘o haava, ma te vaiiho i te reira ia aratai i ta ’na mau ohipa e faaotiraa. No reira i tia ’i ia ’na ia parau ma te oaoa mau e aita to ’na mana‘o haava i haamauiui ia ’na i te haama e te mana‘o faahapa. A tapao na i te taa-ê-raa i rotopu ia Ioba e ia Davida. I to Davida ereraa i te faatura ia Saula, te arii faatavaihia a Iehova, “ua faahapa . . . to Davida aau ia ’na iho” i muri a‘e. (Samuela 1, 24:5) Eita e ore e ua faufaahia Davida i tera mau faahaparaa u‘ana a to ’na mana‘o haava, o tei haapii ia ’na ia ape i tera faatura ore a muri a‘e.

6. Eaha te faaite ra e e ô te mana‘o haava no te huitaata atoa?

6 No te mau tavini a Iehova ana‘e anei teie ô o te mana‘o haava? A hi‘o na i te mau parau faaurua a te aposetolo Paulo: “Te Etene . . . aita a ratou ture ra, ia rave noa ratou i ta te ture ra, ore noa ’tu â ta ratou ture, o ratou iho â ta ratou ture: ua faaite hua hoi ratou i ta te ture i papaihia i roto i to ratou ra aau, te faaite ra hoi to ratou aau [aore ra mana‘o haava], e to ratou mana‘o te pari ra, e te faatia ra, ratou ratou iho.” (Roma 2:14, 15) E nehenehe te feia atoa aita roa ’tu i ite i te mau ture a Iehova e turaihia i te tahi taime e to ratou mana‘o haava ia haa ia au i te mau faaueraa tumu a te Atua.

7. No te aha te mana‘o haava e nehenehe ai e hape i te tahi taime?

7 E nehenehe râ te mana‘o haava e hape i te tahi taime. No te aha? Ia tuuhia te hoê aveia i pihai iho i te hoê auri ovahine,  eita ïa te nira e tohu faahou i te apatoerau. E aita ana‘e e hoho‘a fenua tano roa, aita ïa e faufaa rahi to te aveia. Oia atoa, ia ohipa roa te mau hinaaro miimii o to tatou aau, e nehenehe to tatou mana‘o haava e tohu mai i te hoê aveia hape. E aita ana‘e te aratairaa papu a te Parau a te Atua ia faaohipa tatou i te reira, eita e haere ia tatou ia faataa ê i te mea maitai i te mea ino i roto e rave rahi tuhaa faufaa. Oia mau, ia ohipa maitai to tatou mana‘o haava, e hinaaro mau tatou i te aratairaa a te varua mo‘a o Iehova. Ua papai Paulo e: “Te faaite apipiti mai nei te [v]arua [m]aitai e tau aau [aore ra mana‘o haava] ia ’u.” (Roma 9:1) E nafea râ e papu ai ia tatou e te tuati ra to tatou mana‘o haava i te varua mo‘a o Iehova? Maoti ïa te haapiiraa.

E NAFEA IA HAAPII I TE MANA‘O HAAVA

8. (a) E nafea te aau e ohipa ’i i nia i te mana‘o haava, e eaha te mea faufaa roa ’‘e i roto i ta tatou mau faaotiraa e tia ’i? (b) No te aha e ore ai e navai noa te hoê mana‘o haava maitai no te hoê Kerisetiano? (A hi‘o i te nota i raro i te api.)

8 E nafea oe e rave ai i te hoê faaotiraa tei niuhia i nia i te mana‘o haava? E au ra e e hi‘opoa noa vetahi i to ratou mau mana‘o e huru aau o roto, a faaoti atu ai i ta ratou e rave. E na ô paha ratou i muri iho e, “Aita pa‘i to ’u mana‘o haava e hauti ra.” E nehenehe te mau hinaaro o te aau e puai roa, a ohipa ’tu ai i nia i te mana‘o haava. Te na ô ra te Bibilia e: “E haavare rahi to te aau i te mau mea atoa nei, e ua ino roa; o vai te ite?” (Ieremia 17:9) No reira, e ere o te mau hinaaro o to tatou aau ta tatou e feruri na mua roa. Ia feruri râ tatou na mua eaha ta te Atua ra o Iehova e au e tia ’i. *

9. Eaha te mǎta‘u i te Atua, e e nafea te reira e ohipa ’i i nia i to tatou mana‘o haava?

 9 Mai te peu e ua niu-mau-hia te hoê faaotiraa i nia i to tatou mana‘o haava haapiihia, e faaite ïa te reira i to tatou mǎta‘u i te Atua, eiaha to tatou iho mau hinaaro. E rave tatou i te hoê hi‘oraa. E tiaraa to te tavana haapao maitai ra o Nehemia e titau i te tahi mau tuhaa moni e tute i te nunaa i Ierusalema. Aita râ oia i na reira. No te aha? Mea riri na ’na te mana‘o e faatupu i te au ore o Iehova ma te haavî i to ’Na nunaa. Ua na ô oia e: “Aita . . . vau i na reira, no te mea, te mǎta‘u ra vau i te Atua.” (Nehemia 5:15) Mea faufaa roa te mǎta‘u haavare ore i te Atua, te mǎta‘u aau atoa e faariri i to tatou Metua i te ra‘i. E turai tera mǎta‘u faatura ia tatou ia imi i te aratairaa i roto i te Parau a te Atua ia rave tatou i te mau faaotiraa.

10, 11. Eaha te mau faaueraa tumu Bibilia no nia i te inuraa i te ava, e e nafea e noaa ’i ia tatou te aratairaa a te Atua no te faaohipa i te reira?

10 A rave na ei hi‘oraa i te parau o te ava. Teie te hoê faaotiraa e mea tia ia rave e rave rahi o tatou i te mau taime faaanaanataeraa, E inu anei au aore ra eita? Na mua, e titauhia ia haapii tatou ia tatou iho. Eaha te mau faaueraa tumu Bibilia e tano i roto i teie tuhaa? Aita iho â te Bibilia e faahapa ra i te inu faaau i te ava. Te arue ra te Bibilia ia Iehova no te ô o te uaina. (Salamo 104:14, 15) Te faahapa ra râ te Bibilia i te inu-hua-raa e te hori, aore ra arearearaa maamaa. (Luka 21:34; Roma 13:13) Hau atu â, te faahiti ra te Bibilia i te taeroraa ava i rotopu i te mau hara ino roa, mai te mau peu taotoraa tia ore. *Korinetia 1, 6:9, 10.

11 Ua haapiihia e ua haamatarohia te mana‘o haava o te hoê Kerisetiano i taua mau faaueraa tumu ra. No reira ia faaoti tatou e inu aore ra eita i te hoê oroa, e ui tatou ia tatou  iho i teie mau uiraa: ‘Eaha te huru oroa e faanahohia ra? E nehenehe anei te reira e faarahi, a riro atu ai ei arearearaa maamaa? Eaha to ’u iho mau hinaaro? Te hiaai ra anei au i te ava, e tîtî anei au no te reira, e inu anei au no te haavî i to ’u mau huru aau e to ’u huru? E hitahita ore anei to ’u e hinaaro-roa-hia no te taotia i ta ’u inu?’ A feruri ai tatou i te mau faaueraa tumu Bibilia e te mau uiraa ta te reira e horoa mai, e mea maitai ia pure ia Iehova no te aratai ia tatou. (A taio i te Salamo 139:23, 24.) Ma te na reira, te ani nei ïa tatou ia Iehova ia aratai ia tatou maoti to ’na varua mo‘a. Te haapii atoa nei tatou i to tatou mana‘o haava ia faaau i nia i te mau faaueraa tumu a te Atua. Te vai ra râ te tahi atu mea e titauhia ia feruri maitai tatou i roto i ta tatou mau faaotiraa.

NO TE AHA E TÂU‘A ’I I TE MANA‘O HAAVA O VETAHI Ê?

E nehenehe te hoê mana‘o haava haapiihia i te Bibilia e tauturu ia oe ia faaoti e inu i te ava aore ra eita

12, 13. Eaha te tahi mau tumu e taa ê ai te mau mana‘o haava Kerisetiano, e eaha to tatou huru i mua i taua mau taa-ê-raa ra e tia ’i?

12 E maere paha oe i te tahi taime i te faito e taa ê ai te mau mana‘o haava Kerisetiano. E huru ê te hoê taata i te hoê peu aore ra peu tumu; area te tahi atu, mea au ïa na ’na e aita e tumu e faahapahia ’i te reira. No nia i te inuraa i te hoê po tamaaraa, ei hi‘oraa, mea au na te hoê e inu maa ava rii e te tahi mau hoa a faafaaea rii noa ’i ratou; area te tahi atu ra, e huru ê ïa. No te aha tera mau taa-ê-raa, e e nafea te reira ia ohipa i nia i ta tatou mau faaotiraa e tia ’i?

13 Mea rahi te tumu e mea taa ê ai te mau taata. E ere hoê â tupuraa to ratou. Ua ite maitai vetahi, ei hi‘oraa, i te hoê paruparu ta ratou i aro na i mutaa ihora—peneia‘e aita ratou i upootia noa. (Te mau arii 1, 8:38, 39) No to ratou mana‘o haava, e feruri maitai ïa taua mau taata ra i te parau o te ava. Ia haere atu te hoê o ratou i ǒ oe, e turai paha to ’na mana‘o haava ia ’na ma te tano ia patoi i te inu ta oe e pûpû atu. E inoino anei oe? E onoono anei oe? Eita. Noa ’tu e ua ite oe  i ta ’na mau tumu aore ra aita—te mau tumu ta ’na e maiti paha i te tapea noa na ’na i roto i teie tupuraa—e turai te here taeae ia oe ia faatura ia ’na.

14, 15. No nia i teihea tumu parau i taa ê ai te mau mana‘o haava o to te amuiraa no te senekele matamua, e eaha te a‘oraa a Paulo?

14 Ua ite te aposetolo Paulo e e pinepine mea taa ê roa te mana‘o haava i rotopu i te mau Kerisetiano i te senekele matamua. I taua tau ra, i huru ê na te tahi mau Kerisetiano i te tahi mau maa tei pûpûhia ei tusia na te mau idolo. (Korinetia 1, 10:25) Aita te mana‘o haava o Paulo i patoi i taua mau maa ra o tei hoohia i muri iho i te vahi hooraa. No ’na, mea faufaa ore te mau idolo; eita roa ’tu e tia i te mau idolo ia fatu i te maa no ǒ mai ia Iehova ra e na ’Na hoi te reira. Ua taa râ ia Paulo e aita te tahi atu e mana‘o ra mai ia ’na no nia i te reira. Peneia‘e mea haamori roa vetahi i te idolo hou a riro ai ei Kerisetiano. No ratou, mea au ore roa te mau mea atoa tei taaihia na mua ’‘e i te haamori idolo. Eaha ïa te ravea?

15 Ua parau Paulo e: “E teie nei, o tatou o tei itoito nei, e faaoromai i te paruparu o te itoito ore e tia ’i, eiaha e faatia i ta tatou iho. Aore atoa hoi te Mesia i haamauruuru ia ’na iho.” (Roma 15:1, 3) Te haaferuriraa a Paulo, oia ïa ia tuu tatou i te mau hinaaro o to tatou mau taeae na mua ’‘e i to tatou iho e tia ’i, mai te Mesia. I roto i te tahi atu aparauraa, ua parau Paulo e e ore roa oia e amu i te puaa, oi maheaitu te hoê mamoe poihere-roa-hia no ’na hoi te Mesia i horoa ’i i to ’na ora.—A taio i te Korinetia 1, 8:13; 10:23, 24, 31-33.

16. No te aha eiaha ’i te feia e mana‘o haava taotia ’tu â to ratou e faaino i te feia e mana‘o haava ê to ratou e tia ’i?

16 Area te feia e mana‘o haava taotia ’tu â to ratou, eiaha ïa e faaino ia vetahi ê, ma te onoono e ia hi‘o te taatoaraa mai ia ratou i te mau mea tei taaihia i te mana‘o haava. (A taio i te Roma 14:10.) Oia mau, e mea maitai ia faaohipa i to tatou mana‘o haava no te haava ia tatou iho, eiaha no te haava ia vetahi ê. A haamana‘o i te mau parau a Iesu: “Eiaha  e faaino, ia ore outou ia faainohia mai.” (Mataio 7:1) E mea maitai ia ape te mau melo atoa o te amuiraa i te mârô i nia i te mau mea e na te taata taitahi e faaoti ia au i to ’na mana‘o haava. E imi râ tatou i te mau ravea no te paturu i te here e te auhoêraa, e maitai apipiti ai tatou, eiaha râ e ino apipiti ai.—Roma 14:19.

TE MAU MAITAI O TE HOÊ MANA‘O HAAVA HAPA ORE

E nehenehe te hoê mana‘o haava hapa ore e aratai ia tatou i roto i te oraraa, ma te hopoi mai i te oaoa e te hau o roto

17. Ua aha te mana‘o haava o te taata e rave rahi i teie tau?

17 Ua papai te aposetolo Petero e: “Ei aau [aore ra mana‘o haava] hapa ore â to outou.” (Petero 1, 3:16) E ô faahiahia roa te hoê mana‘o haava e mea haavare ore i te aro o te Atua ra o Iehova. E ere mai te mau mana‘o haava o e rave rahi roa i teie tau. Ua faataa Paulo i te feia ua “pao roa to ratou aau  [aore ra mana‘o haava].” (Timoteo 1, 4:2) E paapaa te i‘o ia tapaohia i te auri, a pao e a etaeta ’tu ai. Oia mau, mea rahi te taata ua pohe to ratou mana‘o haava—ua pao e ua etaeta roa a ore atu ai e horoa faahou i te mau faaararaa, te mau patoiraa, aore ra te haama aore ra te faahaparaa no te ino i ravehia. I teie tau, mea rahi aita roa ’tu e tâu‘a ra i to ratou mau mana‘o faahapa.

18, 19. (a) Eaha te maitai o te mau mana‘o faahapa aore ra te haama? (b) Eaha ta tatou e nehenehe e rave ia tamau to tatou mana‘o haava i te faautua ia tatou no te mau hara tahito ua tatarahapa ê na hoi tatou?

18 I te tanoraa, e nehenehe te mau mana‘o faahapa e riro ei faaararaa a te mana‘o haava ia tatou e ua rave tatou i te tahi mea ino. Ia turai tera mau mana‘o i te hoê taata hara ia tatarahapa, e nehenehe te hara ino roa ’‘e e faaorehia. A  hi‘o na i te arii Davida tei rave i te hara ino mau, o tei faaorehia râ no te mea iho â râ ua tatarahapa mau oia. Maoti to ’na au ore i to ’na haerea ino e ta ’na faaotiraa papu e faaroo i te mau ture a Iehova mai reira mai, ua ite mata roa oia e mea “maitai” Iehova e te “tia” ia ’na ia “faaore . . . i te hara.” (Salamo 51:1-19; 86:5) E nafea râ ia tamau noa te mau mana‘o faahapa u‘ana e te haama i muri a‘e i to tatou tatarahaparaa e te faaoreraahia ta tatou hapa?

19 I te tahi taime, e nehenehe te mana‘o haava e faautua roa ino i te hoê taata hara, a faahapa maoro atu ai oia ia ’na iho aita hoi e tumu faufaa. I roto i tera mau tupuraa, e titauhia paha ia haapapu i to tatou aau faahapa ia tatou iho e ua rahi a‘e Iehova i te mau huru aau atoa o te taata. E titauhia ia tiaturi e ia farii tatou i to ’na here e ta ’na faaoreraa hapa, mai ta tatou e faaitoito ra ia vetahi ê ia na reira. (A taio i te Ioane 1, 3:19, 20.) Area te mana‘o haava tamâhia, e hopoi mai ïa i te hau o roto, te haapeapea ore e te oaoa rahi mea varavara i te itehia i roto i teie nei ao. Ua ite e rave rahi o tei hara ino mau na, i teie tamǎrûraa faahiahia e e mana‘o haava hapa ore to ratou i teie nei a tavini ai i te Atua ra o Iehova.—Korinetia 1, 6:11.

20, 21. (a) Ua faaineinehia teie buka no te tauturu ia oe ia aha? (b) Ei Kerisetiano, te fana‘o ra tatou i teihea tiamâraa, ia nafea râ tatou ia faaohipa i te reira e tia ’i?

20 Ua faaineinehia teie buka no te tauturu ia oe ia ite i taua oaoa ra, ia tapea maite i te hoê mana‘o haava hapa ore i te roaraa o te toea o teie anotau hopea arepurepu o te faanahoraa o te mau mea a Satani. Parau mau, eita ta teie buka e nehenehe e tatara hu‘ahu‘a i te taatoaraa o te mau ture e faaueraa tumu Bibilia, e titauhia hoi ia feruri oe e ia faaohipa i roto i te mau huru tupuraa e fa mai i te mahana taitahi. Hau atu â, eiaha tatou e tiai ia tuuhia mai te mau faatureraa taa maitai e te ohie no nia i te mau mea tei taaihia i te mana‘o haava. Te tumu o teie buka, o te tautururaa ïa ia oe ia haapii e ia haamataro i to oe mana‘o haava ma te hi‘opoa e  nafea ia faaohipa i te Parau a te Atua i roto i to oe oraraa i te mau mahana atoa. Taa ê roa i te ture a Mose, te ani ra “te ture a te Mesia” i te feia e pee ra i te reira ia faaau atu â i nia i te mana‘o haava e te mau faaueraa tumu, maori râ i nia i te mau ture papaihia. (Galatia 6:2) No reira Iehova e horoa ’i na te mau Kerisetiano i te tiamâraa faahiahia roa. Teie râ, te haamana‘o maira ta ’na Parau e eiaha roa ’tu e faaohipa i te reira ei “tapo‘i parau ino.” (Petero 1, 2:16) E ravea faahiahia râ taua tiamâraa ra no te faaite i to tatou here no Iehova.

21 Ma te feruri i roto i te pure i te maitai rahi ia pee i te mau faaueraa tumu Bibilia e ia faaohipa i ta oe mau faaotiraa, e tamau ïa oe i te hoê ohipa faufaa roa tei haamata i te taime matamua a ite ai oe ia Iehova. O te haamataroraa ïa i to oe ‘puai haroaroaraa na roto i te faaohiparaa.’ (Hebera 5:14, Traduction du monde nouveau) E maitai oe i to oe mana‘o haava haapiihia i te Bibilia i te mau mahana atoa o to oe oraraa. Mai te aveia o te aratai i te ratere, e tauturu to oe mana‘o haava ia oe ia rave i te mau faaotiraa e au to oe Metua i te ra‘i. E ravea papu teie e vai maite ai oe i roto i te here o te Atua.

^ par. 5 Aita e ta‘o taa maitai no “mana‘o haava” i roto i te mau Papai Hebera. Te faataa-maitai-hia ra râ te mana‘o haava i roto i te mau hi‘oraa mai teie. E faataa pinepine te ta‘o “aau” i te taata o roto. I roto i tera mau hi‘oraa mai teie, te faaite-maitai-hia ra te hoê tuhaa taa maitai o te taata o roto—to ’na mana‘o haava. I roto i te mau Papai Kerisetiano Heleni, e 30 taime i faahitihia ’i te ta‘o Heleni tei hurihia ei “aau,” e mana‘o haava te auraa.

^ par. 8 Ia au i te Bibilia, eita e navai noa te hoê mana‘o haava maitai. Ei hi‘oraa, ua parau Paulo e: “Aore . . . au nei i ite i ta ’u nei hapa; eita râ vau e tiahia e te reira: o te hi‘opoa mai râ ia ’u nei, o te Fatu [ra o Iehova] ïa.” (Korinetia 1, 4:4) Te feia atoa o te hamani ino ra i te mau Kerisetiano, mai ia Paulo na mua ’‘e, te na reira ra paha ratou ma te hoê mana‘o haava maitai no te mea te mana‘o ra ratou e te farii ra te Atua i to ratou haerea. Ei mana‘o haava maitai ïa to tatou i to tatou aro e te haavare ore atoa i te aro o te Atua, e tia ’i.—Ohipa 23:1; Timoteo 2, 1:3.

^ par. 10 E mea tia ia tapao i ta te taote e rave rahi e parau ra, eita e maraa i te feia tei matau i te inu ia inu faaau; no ratou, eiaha e inu te auraa o te ta‘o “faaau.”

No te ite atu â

A rave i te mau faaotiraa î i te paari

E nafea ia papu e te tu ra ta tatou mau faaotiraa i to te Atua hinaaro? Eaha te tauturu mai ia rave i ta tatou i faaoti?