Eaha to roto?

Mau faaho'iraa ê

Tapura tumu parau

Ite no Iehova

Tahiti

“Ia vai maite outou i roto i te here o te Atua”

 PENE 17

“I te paturaa ia outou iho i nia i to outou faaroo mo‘a rahi ra”

“I te paturaa ia outou iho i nia i to outou faaroo mo‘a rahi ra”

“I te paturaa ia outou iho i nia i to outou faaroo mo‘a rahi ra . . . Ia vai maite outou i roto i te here o te Atua.”—IUDA 20, 21, Traduction du monde nouveau.

1, 2. Eaha te paturaa ta oe e rave ra, e no te aha e mea faufaa roa ’i te huru o ta oe ohipa?

TE OHIPA puai ra oe i nia i te hoê paturaa. Tau taime ê na te haamataraa te reira e e tamau â a muri a‘e. E mea fifi te paturaa, e mea au râ. Noa ’tu eaha te tupu mai, ua faaoti papu oe eiaha roa ’tu e faarue aore ra e tairi paa, no te mea e faahopearaa to te huru o ta oe ohipa i nia i to oe oraraa i teie nei e a muri a‘e atoa. No te aha? No te mea o oe te patuhia ra!

2 Ua haamataratara te pǐpǐ Iuda i te ohipa paturaa ta tatou e rave i nia ia tatou iho. I to ’na a‘oraa i te mau Kerisetiano “[ia vai] maite outou i [roto i te here o] te Atua,” ua faaite atoa oia i roto i tera noa irava i te ravea no te na reira: “I te [paturaa] ia outou iho i [nia i] to outou faaroo mo‘a rahi ra.” (Iuda 20, 21; MN) E nafea oe e patu ai ia oe, e haapaari atu â ’i i to oe faaroo ia vai maite hoi oe i roto i te here o te Atua? E hi‘opoa mai tatou e toru tuhaa o te paturaa pae varua e mea tia ia rave oe.

A TAMAU I TE PATU I TO FAAROO I TE MAU TITAURAA PARAU-TIA A IEHOVA

3-5. (a) E hinaaro Satani e faatiaturi ia tatou i teihea mana‘o hape no nia i te mau titauraa a Iehova? (b) E nafea tatou ia hi‘o i te mau titauraa a te Atua e tia ’i, e eaha ïa te faahopearaa i nia i to tatou huru aau? A horoa i te hoê faahoho‘araa.

3 Na mua roa, e titauhia ia haapaari tatou i to tatou faaroo i te ture a te Atua. A haapii ai oe i teie buka, ua hi‘opoa oe i te  tahi mau titauraa parau-tia a Iehova no nia i te haerea. Eaha to oe mana‘o i te reira? E hinaaro Satani e faatiaturi ia oe e mea taotia, e mea faahepo atoa te mau ture, faaueraa tumu e ture aveia a Iehova. I faaohipa na oia i teie ravea, tei manuïa maitai, i Edene. (Genese 3:1-6) E manuïa anei ïa i nia ia oe? Tei te huru ïa o ta oe huru hi‘oraa i te mau mea.

4 Ei faahoho‘araa: A ori haere ai oe na roto i te hoê aua nehenehe, e ite oe i te hoê aua auri teitei e opani ra i te hoê tuhaa o te aua. Mea nehenehe roa tera vahi tei auahia. Na mua, e mana‘o paha oe e e taotiaraa tano ore taua aua ra i to oe tiamâraa. Ia hi‘o maitai râ oe i ǒ mai, e ite oe i te hoê liona taehae o te auau ra i ta ’na maa! I teie nei, e taa ia oe e e parururaa hoi te aua. Te vai ra anei te hoê aaiora atâta o te auau ra ia oe i teie nei â taime? Te faaara ra te Parau a te Atua e: “E haapao maitai, e faaitoito, te hahaere nei hoi to outou enemi o te diabolo, mai te liona uuru ra, i te imiraa i te taata e pau ia ’na ra.”—Petero 1, 5:8.

5 E aaiora taehae o Satani. No te mea aita Iehova e hinaaro ra ia pau tatou ia Satani, ua haamau Oia i te mau ture no te paruru ia tatou i te “ravea paari” e rave rahi a taua varua ino ra. (Ephesia 6:11) No reira, i te taime atoa e feruriruri ai tatou i te mau ture a te Atua, e mea maitai ia ite tatou i roto i te reira i te here o to tatou Metua i te ra‘i. Ia na reira tatou i te hi‘o atu, e horoa papu mai ïa te mau ture a te Atua i te panoonoo ore e te oaoa. Ua papai te pǐpǐ Iakobo e: “O te hi‘o . . . i roto i te ture tia roa o te tiamâ ra, ma te tamau maite, . . . e haamaitaihia ïa oia i ta ’na ra raveraa.”—Iakobo 1:25.

6. Eaha te ravea maitai roa ’‘e no te patu i to tatou faaroo i te mau ture e faaueraa tumu parau-tia a te Atua? A horoa i te hoê hi‘oraa.

6 O te faaohiparaa i te mau faaueraa a te Atua te ravea maitai roa ’‘e no te haapaari i to tatou faaroo i te Iriti ture e i te paari o ta ’na mau ture. I roto i “te ture a te Mesia” ei hi‘oraa, te vai ra te faaueraa a Iesu e haapii ia vetahi ê i “te mau mea atoa ta ’[na] i parau.” (Galatia 6:2; Mataio 28:19, 20) Te  haapao maite atoa ra te mau Kerisetiano i te faaueraa e tamau i te putuputu no te haamori ia Iehova e no te fana‘o i te amuimuiraa maitai. (Hebera 10:24, 25) I roto atoa i te mau faaueraa a te Atua, te vai ra te a‘oraa e pure tamau ia Iehova, ma te pinepine atoa e ma te aau haavare ore. (Mataio 6:5-8; Tesalonia 1, 5:17) A haapao ai tatou i taua mau faaueraa ra, e ite maitai roa ’tu â tatou e e aratairaa î i te here te reira. E horoa mai te faarooraa i te reira i te oaoa e te mauruuru ta tatou e ore roa e ite i te tahi atu vahi i roto i teie ao arepurepu. A feruriruri ai oe i te mau maitai ta oe iho i fana‘o no te faarooraa i te mau ture a te Atua, aita anei to oe faaroo i te reira i puai atu â?

7, 8. E nafea te Parau a te Atua e tamahanahana ’i i te feia e uiui ra e e maraa anei ia ratou ia tapea i te hoê haerea tia a mairi ai te tau?

7 I te tahi taime, e uiui vetahi e e maraa anei ia ratou ia haapao i te mau ture a Iehova a mairi ai te tau. Te taiâ ra ratou i te hahi ê i roto i te hoê tuhaa aore ra te tahi atu. Ia puta noa mai tera huru mana‘o, a haamana‘o i teie mau parau: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te e‘atia maitai ia haere oe ra. Ahiri oe i faaroo mai i te mau faaue na ’u e; ua riro ïa to oe [hau] mai te pape pue ra; e ta oe [parau-tia] mai te are moana ra.” (Isaia 48: 17, 18; MN) Ua faafaaea ê na anei oe no te feruri i te huru faaitoito o teie mau parau?

8 I ǒ nei, te haamana‘o maira Iehova e e maitai tatou ia faaroo tatou ia ’na. Te fafau ra oia e piti haamaitairaa ia na reira tatou. A tahi, e riro to tatou hau mai te pape pue ra—mania, rahi, tahe noa. A piti, e riro ta tatou parau-tia mai te are moana ra. Ia tia oe i tatahi a mataitai ai i te mau are ia fati te tahi i muri iho i te tahi, e ite oe i te huru tamau o te reira. Ua ite oe e e fati noa te mau are i te tahatai no te hoê tau hopea ore. Te parau ra Iehova e e nehenehe ta oe parau-tia—to oe haerea tia—e riro mai te reira te huru. A tutava maoro ai oe i te tapea i to taiva ore ia ’na, eita roa ’tu o ’na e faarue ia oe! (A taio i te Salamo 55:22.) Aita anei tera mau parau fafau mahanahana e patu ra i to faaroo ia Iehova e i ta ’na mau titauraa parau-tia?

“E HAERE Â TATOU I MUA I TE PAARI MAU RA”

9, 10. (a) No te aha e fa faahiahia ’i te huru taata paari no te mau Kerisetiano? (b) E nafea te hoê mana‘o pae varua e tauturu ai ia tatou ia oaoa?

9 Te matara ra te piti o te tuhaa o ta oe paturaa i roto i teie mau parau faaurua: “E haere â tatou i mua i te paari mau ra.” (Hebera 6:1) E fa faahiahia te huru taata paari no te hoê Kerisetiano. Taa ê roa i te tia-roa-raa, o te ore hoi e naea i te taata i teie nei, e fa naea te huru taata paari. Oia atoa, e oaoa ’tu â te mau Kerisetiano o te paari mai i te tavini ia Iehova. No te aha hoi?

10 Te hoê Kerisetiano feruriraa paari, e taata haapao ïa i ta te varua. E hi‘o oia i te mau mea ia au i te hi‘oraa a Iehova. (Ioane 4:23) Ua papai Paulo e: “Te feia . . . i au i ta te tino ra, te haapao ra ïa i ta te tino; area te feia i au i ta te [v]arua ra, te haapao ra ïa i ta te [v]arua.” (Roma 8:5) Eita te hoê taata mana‘o pae tino e ite i te oaoa rahi, no te mea e haapao noa o ’na ia ’na iho, eita o ’na e hi‘o atea, e tei nia to ’na mana‘o i te mau mea materia. E oaoa te hoê taata mana‘o pae varua, no  te mea e tiatonu oia ia Iehova, “te Atua no ’na te ao,” aore ra oaoa. (Timoteo 1, 1:11) E hinaaro te hoê taata haapao i ta te varua e faaoaoa ia Iehova e e oaoa oia i roto atoa i te tamataraa. No te aha? E taime maitai te mau tamataraa no te haapapu e e haavare Satani e no te patu i te taiva ore, a oaoa ’tu ai to tatou Metua i te ra‘i.—Maseli 27:11; a taio i te Iakobo 1:2, 3.

11, 12. (a) Eaha ta Paulo i parau no nia i te “puai haroaroaraa” o te hoê Kerisetiano, e eaha te auraa o te parau i hurihia ei “haamataro[hia]”? (b) E hinaarohia teihea haamataroraa ia etaeta e ia vitiviti te tino?

11 E noaa mai te ea pae varua e te huru taata paari maoti te haamataroraa. A hi‘o na i teie irava: “Te maa etaeta ra, na te taata paari ïa, na te feia [“i haamataro, na roto i te faaohiparaa, i to ratou puai haroaroaraa i te faataa ê,” MN] i te maitai e te ino.” (Hebera 5:14) I to Paulo faahitiraa i to tatou puai haroaroaraa tei “haamataro[hia],” ua faaohipa oia i te hoê ta‘o Heleni tei faahiti-pinepine-hia paha i te mau vahi faaetaetaraa tino Heleni o te senekele matamua, e nehenehe hoi te reira e hurihia ei ‘haamatarohia mai te hoê taata faaetaeta tino.’ A feruri na i teie nei i ta taua haamataroraa ra e titau.

Ua haamatarohia te tino o te hoê taata faaetaeta tino na roto i te faaohiparaa

12 Ia fanauhia tatou, aita to tatou tino i haamatarohia. Aita te hoê aiû, ei hi‘oraa, i taa maitai i te aratai i te mau mero rii o to ’na tino. No reira oia e hautiuti noa ’i i to ’na na rima, a poara atoa ’i ia ’na, ma te maere rahi. Ma te haere mǎrû, maoti te faaohiparaa, e mataro mai to ’na tino. Ei aiû, e nee oia, ei tamarii rii, e haere oia, ei tamarii, e horo oia. * E te taata faaetaeta tino ïa? Ia ite oe i taua maona ra ia ou‘a e ia taviri haere i roto i te aore ma te nehenehe e te tano maitai, ua papu roa ia oe e e au to ’na tino i te hoê matini tei faatanohia ma  te tia roa. Aita te aravihi o te taata faaetaeta tino i tupu taue noa mai—ua titauhia e rave rahi hora haamataroraa. Ia au i te Bibilia, e “faufaa iti haihai” to taua haamataroraa ra i ta te tino nei. E faufaa rahi a‘e to te haamataroraa i to tatou puai haroaroaraa pae varua!—Timoteo 1, 4:8.

13. E nafea tatou e nehenehe ai e haamataro i to tatou puai haroaroaraa?

13 I roto i teie buka, ua tatara tatou e rave rahi mana‘o o te tauturu ia oe ia haamataro i to oe puai haroaroaraa, a tia ’tu ai ia oe ia tapea i to haapao maitai ia Iehova ei taata haapao i ta te varua. A feruri hohonu i te mau faaueraa tumu e ture a te Atua e a pure no nia i te reira ia rave oe i te mau faaotiraa i roto i to oe oraraa i te mau mahana atoa. I mua i te faaotiraa atoa, a ui ia oe iho: ‘Teihea ture aore ra faaueraa tumu Bibilia e tano no tera tupuraa? E nafea vau e nehenehe ai e faaohipa i te reira? Eaha te haerea o te faaoaoa i to ’u Metua i te ra‘i?’ (A taio i te Maseli 3:5, 6; Iakobo 1:5.) Ia na reira oe i te rave i ta oe mau faaotiraa atoa, e mataro atu â ïa to oe puai haroaroaraa. E tauturu taua haamataroraa ra ia oe ia riro e ia vai noa ei taata haapao roa i ta te varua.

14. No te paari i te pae varua, e titauhia ia hiaai tatou i teihea maa, ia haamana‘o noa râ tatou i teihea faaararaa e tia ’i?

14 Ua naea ana‘e ia tatou te huru taata paari, e nehenehe noa tatou e paari i te pae varua. Ua taaihia te paariraa i te maa. No reira Paulo i tapao ai e: “Te maa etaeta ra, na te taata paari ïa.” No te patu i to faaroo, e mea faufaa ia amu noa oe i te maa etaeta i te pae varua. A faaohipa ’i oe i ta oe i haapii ma te afaro, e haerea paari ïa, e te na ô ra te Bibilia e:  “O te paari â te mea maitai.” E mea tia ïa ia atuatu tatou i te hiaai mau no te pue parau mau faufaa roa ta to tatou Metua e horoa maira. (Maseli 4:5-7; Petero 1, 2:2) Parau mau, aita e tumu e ahaaha ’i aore ra e teoteo ai tatou no to tatou fana‘oraa i te ite e te paari o te Atua. E titauhia ia hi‘opoa tamau tatou ia tatou iho a‘unei hoi te teoteo aore ra te tahi atu paruparu e a‘a ’i e e rahi mai ai i roto i to tatou aau. Ua papai Paulo e: “E imi maite ia outou iho i to outou faaroo; e hi‘opoa maite ia outou iho.”—Korinetia 2, 13:5.

15. No te aha e mea faufaa roa ’i te here no te paari i te pae varua?

15 Ua oti ana‘e te paturaa o te hoê fare, te vai noa râ te ohipa e rave. Mea faufaa roa te atuaturaa e te tataîraa, e te tapiha-faahou-raa paha ia taui te mau tupuraa. E hinaaro ïa tatou i te aha ia noaa mai te huru taata paari e no te atuatu i to tatou ea pae varua? Na mua roa, te here ïa. E titauhia ia tamau tatou i te faarahi i to tatou here no Iehova e no to tatou mau hoa Kerisetiano. Aita ana‘e e here to tatou, e faufaa ore ïa to tatou ite e ta tatou mau ohipa atoa—mai te maniania rahi aita hoi e tumu. (Korinetia 1, 13:1-3) Maoti te here e noaa ’i ia tatou te huru taata paari Kerisetiano e e tamau ai tatou i te paari i te pae varua.

A HAAMAU I TO FERURIRAA I NIA I TE TIATURIRAA TA IEHOVA E HOROA MAIRA

16. Te faaitoito ra Satani i teihea huru mana‘o, e eaha te parururaa ta Iehova e horoa maira?

16 E hi‘opoa mai tatou i te tahi atu tuhaa o ta oe paturaa. No te patu ia oe iho ei pǐpǐ mau na te Mesia, e mea tia ia ara oe i to oe huru feruriraa. Mea ite roa Satani, te faatere o teie nei ao, i te topata i roto i te feruriraa o te taata i te mau mana‘o faatoaruaru, mai te taiâ, te ereraa i te tiaturi e te hepohepo. (Ephesia 2:2) Mea atâta tera mau huru mana‘o no te hoê Kerisetiano mai te pê mǎrô no te hoê fare raau. Ua ora tatou, te horoa maira Iehova i te hoê mauhaa paruru faufaa roa—te tiaturiraa.

17. E nafea te Parau a te Atua e faahoho‘a ’i i te faufaaraa o te tiaturiraa?

 17 Te tapura ra te Bibilia e rave rau tuhaa o te haana tama‘i pae varua ta tatou e hinaaro mau â i roto i ta tatou aroraa ia Satani e teie nei ao. O te taupoo, te mana‘o aore ra te tiaturiraa o te ora, te hoê tuhaa faufaa o te haana tama‘i. (Tesalonia 1, 5:8) Ua ite te hoê faehau i te tau Bibilia e eita o ’na e ora i roto i te aroraa aita ana‘e to ’na e taupoo. E faatioi te taupoo, e pinepine e taupoo auri tei faatanohia i nia iho i te hoê faaupoo ahu aore ra iri puaa, i te rahiraa o te mau ihe, a iti rii mai ai te pepe. Mai te hoê taupoo o te paruru i te upoo, e nehenehe te tiaturiraa e paruru i to oe mana‘o, to oe feruriraa.

18, 19. Eaha te hi‘oraa ta Iesu i horoa no nia i te tapearaa i te tiaturiraa, e e nafea tatou e pee ai ia ’na?

18 No te tapea i te tiaturiraa, o Iesu te hi‘oraa rahi. A haamana‘o i ta ’na i faaruru i te po hopea o to ’na oraraa i nia i te fenua. Ua hoo te hoê hoa rahi ia ’na no te moni. Ua parau te piti e aita o ’na i matau ia ’na. Ua faarue te tahi atu ia ’na e ua horo ê. Ua patoi te feia o to ’na iho nunaa ia ’na e ua titau ia haapohehia oia i roto i te mauiui e te mau faehau Roma. E au ra e e tano ia parau e ua faaruru Iesu i te mau tamataraa u‘ana a‘e i ta tatou e faaruru. Eaha tei tauturu ia ’na? Te pahono ra te Hebera 12:2 (MN) e: “O tei faaoromai i te [pou haamauiuiraa], aore i haapao i te haama, [no te oaoa] i tuuhia mai i mua i tana aro; e te parahi ra i teie nei i te pae atau i te terono o te Atua ra.” Aita roa ’tu i moe ia Iesu “te oaoa i tuuhia mai i mua i tana aro.”

19 Eaha te oaoa i tuuhia i mua ia Iesu? Ua ite oia e maoti to ’na faaoromai, e turu atoa oia i te faaraaraa o te i‘oa mo‘a o Iehova. E horoa ïa oia i te haapapuraa rahi roa ’‘e e e haavare Satani. Aita ’tu e tiaturiraa o te faaoaoa roa ’‘e ia Iesu! Ua ite atoa oia e e haamaitai rahi Iehova i to ’na haapao maitai—i roto maa taime, e ite oia i te oaoa rahi e farerei faahou i to ’na Metua. Ua haamau Iesu i to ’na feruriraa i nia i taua tiaturiraa oaoa ra i te roaraa o te mau taime ino roa ’‘e. E mea tia ia na  reira atoa tatou. E oaoa tei tuuhia i mua i to tatou atoa aro. Te horoa ra Iehova na tatou taitahi i te fana‘oraa taa ê e turu atoa i te faaraaraa o to ’na i‘oa rahi. E nehenehe tatou e haapapu e e haavare Satani ma te maiti ia Iehova ei Arii no tatou e ma te tapea ia tatou i roto i te here o to tatou Metua noa ’tu te mau tamataraa e faahemaraa ta tatou e nehenehe e faaruru.

20. Eaha te nehenehe e tauturu ia oe ia tapea i te mana‘o faaitoito e te tiaturiraa?

20 Aita noa Iehova e hinaaro ra e haamaitai i ta ’na mau tavini taiva ore—te tiai ru atoa ra oia i te na reira. (Isaia 30:18; a taio i te Malaki 3:10.) Mea au na ’na e horoa na ta ’na mau tavini i ta to ratou aau e hinaaro mau ra. (Salamo 37:4) No reira, a haamau maite i to feruriraa i nia i te tiaturiraa e vai ra i mua ia oe. Eiaha roa ’tu e hema i te mau mana‘o faatoaruaru, hairiiri, pi‘o o te ao a Satani. Ia taa ia oe e te ô riirii ra te varua o teie nei ao i roto i to feruriraa aore ra to aau, a pure u‘ana ia Iehova ia horoa ’tu i “te hau a te Atua, o tei hau ê atu i te ite taata nei.” Na taua hau no ǒ mai i te Atua ra e faaitoito i to aau e to mana‘o.—Philipi 4:6, 7.

21, 22. (a) Eaha te tiaturiraa faahiahia ta te mau melo o te “feia rahi roa” e poihere ra? (b) Eaha te tuhaa o te tiaturiraa Kerisetiano ta oe e haafaufaa roa ra, e eaha ta oe faaotiraa papu?

21 Mea faahiahia mau â te tiaturiraa ta oe e nehenehe e feruriruri!  Mai te peu e e melo oe no te “feia rahi roa,” o te “haere mai mai roto mai i te ati rahi,” a mana‘o i te oraraa ta oe e fatata i te fana‘o. (Apokalupo 7:9, 14) No te mea aita faahou Satani e ta ’na mau demoni, e ite oe i te hoê tamǎrûraa e mea fifi ia taa i teie nei. Inaha, o vai o tatou tei ite a‘enei i te hoê oraraa aita te faaheporaa o te mana pi‘o o Satani? I te mea e aita faahou taua faaheporaa ra, auê ïa te oaoa ia haa i raro a‘e i te aratairaa a Iesu e a to ’na 144 000 arii apiti i te ra‘i no te faariro i te fenua ei paradaiso! Te oaoa roa nei tatou i te neheneheraa e ite i te mau ma‘i e te mau paruparu atoa ia mou, e manava i to tatou feia here o te haere mai i rapaeau i te apoo, e fana‘o hoi i te ora mai ta te Atua i opua na no tatou! A haere noa ’tu ai tatou i te tia-roa-raa, e piri atu â tatou i te tupuraa o te hoê haamaitairaa rahi atu â, te parau fafau i faaitehia i roto i te Roma 8:21—“te tiamâ maitai o te tamarii a te Atua ra.”

22 Te hinaaro ra Iehova e horoa ’tu i te hoê tiamâraa hau a‘e i ta oe e nehenehe e feruri. Ua taaihia te e‘a e tae atu ai i taua tiamâraa ra i te faarooraa. Eita anei ïa e hoona ia tutava roa tatou i teie nei i te faaroo ia Iehova i tera mahana i tera mahana? No reira, a tamau i te patu ia oe i nia i to faaroo mo‘a rahi ra, ia vai maite hoi oe i roto i te here o te Atua e a tau a hiti noa ’tu!

^ par. 12 Te parau ra te mau aivanaa e e noaa riirii mai ia tatou te hoê tumu ite taa ê o to tatou iho tino, te aratairaa e te tiaraa o to tatou mau mero. Ei hi‘oraa, maoti taua tumu ite ra e nehenehe ai oe e popo ma te tapo i te mata. Aita i tia i te hoê vahine ma‘i tei ere i taua tumu ite ra ia tia noa i nia, ia haere, e ia parahi atoa.

No te ite atu â

BUKA E BUKA RAIRAI

A pee i to ratou faaroo

E nafea tatou e faufaahia ’i i te haapiiraa no nia i te mau tane e vahine haapao maitai i roto i te Bibilia?