Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 16

A patoi i te Diabolo e ta ’na mau ravea paari

A patoi i te Diabolo e ta ’na mau ravea paari

“E patoi atu i te diabolo, e na ’na e maue ê atu.”—IAKOBO 4:7.

1, 2. E taime oaoa no vai te mau bapetizoraa?

MAI te peu e e rave rahi matahiti to oe taviniraa ia Iehova, e rave rahi paha ïa taime to oe faarooraa i te mau oreroraa parau bapetizoraa i ta tatou mau tairururaa. Teie râ, noa ’tu ehia taime to oe na reiraraa, mea papu e e putapû noa oe i te mau taime atoa e ite ai oe i te feia e bapetizohia ia tia mai i nia i mua roa. I taua taime ra, e horiri te feia i putuputu mai e e popou ratou ma te aau tae. E tahe atoa paha to oe roimata ia ite oe i te tahi atu â pǔpǔ taata poiherehia ia tia i te pae o Iehova. Auê tatou i te oaoa i taua mau taime ra!

2 E ite paha tatou i te mau bapetizoraa tau taime i te matahiti i to tatou fenua, area te mau melahi ra, e fana‘oraa taa ê ta ratou e mataitai pinepine atu â i te reira. E nehenehe anei oe e feruri i te “oaoa rahi . . . i te ra‘i” ia ite ratou i te mau tausani taata i te ao nei ia faaô i roto i te tuhaa itea o te faanahonahoraa a Iehova i te mau hebedoma atoa? (Luka 15:7, 10) Aita e feaaraa, te oaoa roa ra te mau melahi i te ite i teie maraaraa!—Hagai 2:7.

“TE HAHAERE NEI” TE DIABOLO “MAI TE LIONA UURU RA”

3. No te aha Satani e hahaere ai “mai te liona uuru ra,” e eaha ta ’na e hinaaro ra e rave?

3 Mea taa ê roa râ no te tahi atu mau varua, te mataitai ra hoi ratou i tera mau bapetizoraa ma te riri rahi. Mea hae na Satani e te mau demoni ia ite i te mau tausani taata ia faarue  i teie nei ao pi‘o. Inaha, ua faahua Satani i te parauraa e aita e taata e tavini ia Iehova ma te here e aita hoê a‘e e tapea i to ’na haapao maitai i roto i te tamataraa u‘ana. (A taio i te Ioba 2:4, 5.) I te taime atoa e faaoti ai te hoê taata e pûpû ia ’na ia Iehova, e haapapuraa ïa e ua haavare Satani. Mai te huru ra e e tanohia Satani i te poara tausani taime i te mau hebedoma atoa o te matahiti. No reira oia e “hahaere” ai “mai te liona uuru ra, i te imiraa i te taata e pau ia ’na”! (Petero 1, 5:8) E hinaaro iti rahi to teie “liona” ia pau tatou ia ’na i te pae varua, a fifi ai aore ra a mutu atoa ’i to tatou taairaa e te Atua.—Salamo 7:1, 2; Timoteo 2, 3:12.

I te taime atoa e pûpû ai te hoê taata ia ’na ia Iehova e e bapetizohia ’i oia, e haapapuraa ïa e ua haavare Satani

4, 5. (a) Ua taotia Iehova i te mana o Satani na roto i teihea na ravea faufaa e piti? (b) E nehenehe te hoê Kerisetiano mau e tiaturi i te aha?

4 Noa ’tu e e faaû tatou i te hoê enemi taehae, aita e tumu e riaria ’i tatou. No te aha hoi? No te mea ua taotia Iehova i  te mana o taua “liona uuru ra” na roto e piti ravea faufaa. Eaha ïa na ravea? Na mua roa, ua tohu Iehova e e ora ’tu te “feia rahi roa” o te mau Kerisetiano mau i “te ati rahi” i mua nei. (Apokalupo 7:9, 14) E tupu noa iho â te mau parau tohu a te Atua. No reira, ua ite iho â Satani e eita e noaa ia ’na te nunaa taatoa o te Atua.

5 Te ite-maitai-hia ra te piti o te taotiaraa i roto i te hoê parau mau tumu faahitihia e te hoê taata haapao maitai o te Atua no tahito ra. Ua parau te peropheta Azaria i te arii Asa e: “Tei pihaiiho Iehova ia outou, outou i ati mai ia ’na ra.” (Paraleipomeno 2, 15:2; a taio i te Korinetia 1, 10:13.) Mea rahi te hi‘oraa papaihia e haapapu ra e i tahito ra, aita roa ’tu Satani i manuïa i te haapau i te mau tavini atoa o tei faaea noa i pihai iho i te Atua. (Hebera 11:4-40) I teie mahana, e nehenehe te hoê Kerisetiano o te faaea noa i pihai iho i te Atua e patoi e e upootia atoa i nia i te Diabolo. Inaha, te haapapu maira te Parau a te Atua e: “E patoi atu i te diabolo, e na ’na e maue ê atu.”—Iakobo 4:7.

“TA TATOU E TO NEI,” O “TE MAU VARUA IINO I TE REVA NEI”

6. E nafea Satani e aro ai i te Kerisetiano taitahi?

6 Eita e tia ia Satani ia upootia i roto i te tama‘i taipe, e nehenehe râ oia e haapau ia tatou taitahi ia faaea tatou i te vai ara. Ua ite Satani e e nehenehe oia e haapau ia tatou mai te peu e e haaparuparu oia i to tatou taairaa e o Iehova. E nafea ïa o ’na? E aro o ’na ia tatou ma te u‘ana, ia tatou iho e ma te paari. E hi‘opoa mai tatou i teie mau ravea rahi a Satani.

7. No te aha Satani e aro ai i te nunaa o Iehova ma te u‘ana?

7 Aroraa u‘ana. Ua parau te aposetolo Ioane e: “Te vai noa nei to te ao atoa i raro a‘e i taua varua ino ra.” (Ioane 1, 5:19) E faaararaa to roto i tera mau parau no te mau Kerisetiano mau atoa. I te mea e ua pau ê na te ao paieti ore taatoa o te huitaata nei ia Satani, e nehenehe oia i teie nei e  faatano e e faau‘ana i ta ’na mau aroraa i nia i te feia aitâ i noaa ’tura ia ’na—te nunaa o Iehova. (Mika 4:1; Ioane 15:19; Apokalupo 12:12, 17) E riri rahi to ’na no te mea ua ite o ’na e maa taime poto to ’na e toe nei. No reira oia i faarahi atu â ’i i te faaheporaa. I teie mahana, te faaruru nei tatou i to ’na riri rahi hopea haavî u‘ana e te haamou.

8. Eaha te auraa o te parau a te aposetolo Paulo e te “to” nei tatou i te mau varua iino?

8 Ta tatou iho toraa. Ua faaara te aposetolo Paulo i to ’na mau hoa Kerisetiano e: “Ta tatou e to nei . . . , [o] te mau varua iino i te reva nei.” (Ephesia 6:12) No te aha Paulo i faaohipa ’i i te ta‘o “to”? No te mea te horoa ra te reira i te mana‘o o te hoê taputôraa piri roa. No reira, ma te faaohipa i taua ta‘o ra, ua haapapu Paulo e e aroraa ta tatou iho taitahi i te mau varua iino. Noa ’tu e te faaea ra tatou i te hoê fenua mea puai te tiaturiraa i te mau varua iino aore ra eita, eiaha roa ’tu tatou e haamoe e i to tatou pûpûraa ia tatou ia Iehova, ua haamata tatou i te hoê taputôraa taipe. Mai to ’na pûpûraa ia ’na mai â, to roto te Kerisetiano taitahi i taua aroraa ra. No reira Paulo i ite ai i te faufaaraa ia a‘o i te mau Kerisetiano i Ephesia hau atu i te hoê taime ia mau papu!—Ephesia 6:11, 13, 14.

9. (a) No te aha Satani e te mau demoni e faaohipa ’i i “te mau ravea paari” rau? (b) No te aha Satani e tamata ’i i te haapi‘o i to tatou feruriraa, e e nafea ia patoi i ta ’na mau tutavaraa? (A hi‘o i te tumu parau tarenihia “ A ara i te paari o Satani!”) (c) Teihea ravea paari ta tatou e hi‘opoa i teie nei?

9 Raveraa paari. Te a‘o ra Paulo i te mau Kerisetiano ia patoi i “te mau ravea paari” a Satani. (Ephesia 6:11) A tapao e te faaohipa ra Paulo i te otini. E faaohipa te mau varua iino eiaha hoê noa, e rave rau râ ravea paari e no te tahi tumu papu maitai. I te hoê taime, ua hema te tahi feia tiaturi o tei patoi na i te hoê huru tamataraa i roto i te tahi atu tuhaa. No reira te Diabolo e te mau demoni e hi‘opoa maitai ai i to tatou taitahi haerea no te tapaopao i to tatou vahi paruparu  roa ’‘e. Ia oti, e hauti ratou i nia i to tatou mau paruparu atoa i te pae varua. Auaa râ e e nehenehe tatou e ite e rave rahi ravea a te Diabolo, no te mea te faaite ra te Bibilia i te reira. (Korinetia 2, 2:11) I roto i teie buka, ua hi‘opoa ê na tatou i te mau raveraa mai te ainu o te nounou tao‘a, te mau amuimuiraa iino e te taatiraa morare ore. E hi‘opoa tatou i teie nei i te tahi atu ravea paari a Satani—te peu tahutahu.

TE RAVERAA I TE PEU TAHUTAHU—E OHIPA TAIVA ÏA

10. (a) Eaha te peu tahutahu? (b) Eaha to Iehova mana‘o i te peu tahutahu, e to oe ïa?

10 Ia rave te hoê taata i te peu tahutahu, aore ra peu demoni, e amui roa ’tu ïa oia i te mau varua iino. Te tahi mau huru peu tahutahu, o te peu hi‘ohi‘o ïa, te ohipa tahu‘a, te pifao e te uiuiraa i te feia pohe. Ua ite maitai tatou e mea “faufau” na Iehova te peu tahutahu. (Deuteronomi 18:10-12; Apokalupo 21:8) I te mea e e titauhia ia “riaria” tatou atoa “i te ino,” eita roa ’tu ïa tatou e mana‘o e imi i te faahoa i te mau puai varua iino. (Roma 12:9) E ohipa taiva hairiiri mau â ïa te reira i to tatou Metua i te ra‘i, o Iehova!

11. No te aha Satani e upootia rahi ai ia noaa ia ’na i te turai ia tatou i roto i te peu tahutahu? A horoa i te hoê faaauraa.

11 E no te mea e ohipa taiva hairiiri ia Iehova ia rave i te peu tahutahu, ua faaoti papu Satani e turai i te tahi o tatou i roto i taua peu ra. I te taime atoa e noaa ’i ia ’na i te turai i te hoê Kerisetiano i roto i te peu demoni, e upootia rahi ïa Satani. No te aha? A feruri na i teie faaauraa: Mai te peu e e taparuparuhia te hoê faehau ia faarue e ia taiva i to ’na nuu no te apiti i te nuu enemi, e oaoa ïa te tomana enemi. E faateniteni atoa paha oia i te faehau taiva mai te hoê re, no te faaino i te tomana tahito o taua faehau ra. Oia atoa, ia rave te hoê Kerisetiano i te peu tahutahu, ua faarue ïa o ’na ma te opua e te ite maite ia Iehova e ua tuu roa ’tu ia ’na iho i raro a‘e i te faatereraa a Satani. A feruri na ïa i te oaoa o Satani ia  faateniteni i taua taata taiva ra ei re o te tama‘i! E hinaaro anei te hoê o tatou ia upootia te Diabolo? Eita roa ïa! E ere tatou i te feia taiva.

TUURAA I TE MAU UIRAA NO TE HAAFEAA

12. Eaha te ravea ta Satani e faaohipa ra no te faahape i to tatou mana‘o i te peu tahutahu?

12 A riaria maoro noa ’i tatou i te peu tahutahu, eita Satani e manuïa i te marei ia tatou i te reira. Te taa ra ïa ia ’na e e mea tia ia taui o ’na i to tatou huru feruriraa. E nafea? E imi oia i te mau ravea no te haapeapea i te feruriraa o te mau Kerisetiano a mana‘o atu ai vetahi e e ‘maitai te ino e e ino te maitai.’ (Isaia 5:20) No te reira, e faaohipa pinepine Satani i te hoê ravea ta ’na i tamata maoro—e tuu oia i te mau uiraa no te haafeaa.

13. Mea nafea to Satani faaohiparaa i ta ’na ravea e tuu i te uiraa no te haafeaa?

13 A tapao na mea nafea to Satani faaohiparaa i taua ravea ra i tahito ra. I Edene, ua ui oia ia Eva: “Oia ïa, ua parau mai te Atua e, Eiaha orua e amu i to te mau raau atoa o te ô nei?” I te tau o Ioba, i mua i te mau melahi tei putuputu i nia i te ra‘i, ua tuu Satani i teie uiraa: “E mǎta‘u noa anei Ioba i te Atua?” E i te omuaraa o te taviniraa a Iesu i te fenua nei, ua tamata Satani i te Mesia ma te parau e: “E Tamaiti oe na te Atua ra, a parau i teie nei mau ofai ia riro ei maa.” A hi‘o na—i roto i te tupuraa o Iesu, ua tae roa Satani i te faaooo i te mau parau ta Iehova iho i faahiti fatata e ono hebedoma na mua ’tu: “Tau Tamaiti here teie, ua mauruuru roa vau ia ’na”!—Genese 3:1; Ioba 1:9; Mataio 3:17; 4:3.

14. (a) E nafea Satani e faaohipa ’i i ta ’na raveraa e haafeaa i te mana‘o no nia i te peu tahutahu? (b) Eaha ta tatou e hi‘opoa i teie nei?

14 I teie mahana, te faaohipa ra te Diabolo i te hoê â raveraa no te faatupu i te feaaraa no nia i te ino o te peu tahutahu. Tera noa râ, ua manuïa oia i te haafeaa i te mana‘o o te tahi mau Kerisetiano. Ua haamata ratou i te parau e e ere  mau â te tahi mau huru peu tahutahu i te mea ino. (Korinetia 2, 11:3) E nafea ia tauturu ia ratou ia faaafaro i to ratou mana‘o? E nafea ïa tatou ia ore te ravea paari a Satani ia manuïa i nia ia tatou? No te pahono atu, e hi‘opoa mai tatou e piti tuhaa o te oraraa ta Satani i haaviivii omoe i te mau ohipa tahutahu. O te faaanaanataeraa ïa e te rapaauraa.

E HAUTI OIA I NIA I TO TATOU MAU HIAAI E HINAARO MAU

15. (a) Eaha te mana‘o o e rave rahi i te pae Tooa o te râ no nia i te peu tahutahu? (b) Mea nafea to te tahi mau Kerisetiano peeraahia i to teie nei ao mana‘o i te peu tahutahu?

15 I te pae Tooa o te râ iho â râ o te ao, mea rahi o te hi‘o ra i te ohipa manamana, te peu tahu‘a e te tahi atu mau huru peu tahutahu ei ohipa hauti. Te rahi noa ’tura te mau hoho‘a teata, te mau buka, te mau porotarama teata e te mau hauti roro uira i te faaite mai i te mau peu demoni ei ohipa arearea, maramarama e te ino ore. No te mea e mea au-roa-hia te tahi mau hoho‘a teata e buka ua niuhia te mau aamu i nia i te ohipa manamana, ua faanaho vetahi feia tei maamaa i te reira i te mau taatiraa na ratou. Mea papu e ua manuïa te mau demoni i te faaiti mai i te atâta o te ohipa manamana. Ua pee-rii-hia anei te mau Kerisetiano i teie huru hi‘oraa i te peu tahutahu? Ua hauti te reira i nia i te mana‘o o vetahi. E nafea? Ei hi‘oraa taa maitai, teie ta te hoê Kerisetiano i parau i muri a‘e i te mataitairaa i te hoê hoho‘a teata niuhia i nia i te ohipa manamana, “Ua mataitai au i te hoho‘a, aita râ vau i rave i te peu tahutahu.” No te aha e mana‘o atâta ’i teie?

16. No te aha e mea atâta ’i ia maiti i te faaanaanataeraa tei niuhia i nia i te mau peu manamana?

16 Noa ’tu e te vai ra te taa-ê-raa i rotopu i te raveraa i te peu tahutahu e te mataitairaa i te reira, e ere ïa te auraa e aita e fifi atâta ia mataitai i te mau peu manamana. No te aha hoi? A feruri na: Te faaite ra te Parau a te Atua e eita ta  Satani e ta ’na mau demoni e nehenehe e ite eaha to tatou mau mana‘o. * No reira, mai tei faahitihia na mua ’tu, no te ite eaha to tatou mau mana‘o e to tatou mau paruparu i te pae varua, e hi‘opoa maite ïa te mau varua iino i ta tatou mau ohipa—tae noa ’tu i ta tatou maitiraa i te faaanaanataeraa. Ia faaite te haerea o te hoê Kerisetiano e mea au na ’na te mau hoho‘a teata aore ra buka niuhia i nia i te mau taura, te pifao, te faaururaa demoni, aore ra te tahi atu mau mea demoni mai te reira te huru, te faatae ra ïa oia i te hoê poroi i te mau demoni ra. Oia mau, te faaara ra ïa o ’na ia ratou eaha to ’na paruparu! I reira ïa te mau demoni e faau‘ana ’i i ta ratou aroraa e taua Kerisetiano ra no te hauti i nia i te paruparu ta ’na i faaite atu, ia tahua roa oia ei auraa parau. Inaha, ua rave roa ’tura vetahi pae o tei au i te peu tahutahu na roto i te faaanaanataeraa tei taaihia i te ohipa manamana, i taua peu ra.—A taio i te Galatia 6:7.

A haafaufaa i te turu a Iehova ia ma‘ihia oe

17. Maoti teihea ravea paari e totoa ’i Satani i te feia ma‘i?

17 Te imi ra Satani i te hauti eiaha noa i nia i to tatou hiaai i te faaanaanataeraa, i nia atoa râ i to tatou hinaaro mau i te rapaauraa. E nafea? E nehenehe te hoê Kerisetiano te ino noa ’tura to ’na ea noa ’tu te mau tutavaraa rahi i te imi i te rapaauraa, e toaruaru. (Mareko 5:25, 26) E nehenehe te reira e riro ei taime maitai no Satani e te mau demoni ia totoa ia ’na. E faahema paha te mau demoni ia ’na ia fariu, no te hepohepo hoi, i nia i te mau ravea rapaauraa o te titau ia faaohipa i “te puai manamana,” oia ïa te peu tahutahu. (Isaia 1:13, Traduction du monde nouveau) Ia manuïa taua ravea paari ra a te mau demoni, e nehenehe te reira e haaparuparu i te taairaa o te Kerisetiano ma‘i e te Atua. E nafea?

18. Teihea huru ravea rapaauraa ta te hoê Kerisetiano e patoi, e no te aha?

 18 Ua faaara Iehova i te mau Iseraela o tei faaohipa na i “te puai manamana” e: “Ia hohora mai i to outou rima, e purou vau i tau mata ia outou; e ia pinepine noa ta outou pure, e ore au e faar[oo] atu.” (Isaia 1:15) E hinaaro iho â tatou e ape i te mau mea atoa o te haafifi i ta tatou mau pure e o te faaere rii ia tatou i te turu no ǒ mai ia Iehova ra—e hau roa ’tu â ia ma‘ihia tatou. (Salamo 41:3) No reira, mai te peu e te vai ra te tahi mau tapao faaite e e ohipa tahutahu to roto i te tahi ravea faaiteraa aore ra rapaauraa i te hoê ma‘i, e mea tia ia patoi atu te hoê Kerisetiano mau. * (Mataio 6:13) Mea na reira e papu ai ia ’na i te fana‘o noa i te turu a Iehova.—A hi‘o i te tumu parau tarenihia “ E peu tahutahu iho â anei?

UA RAHI ANA‘E TE AAMU NO NIA I TE MAU DEMONI

19. (a) Ua râmâ te Diabolo e rave rahi taata ia tiaturi i te aha no nia i to ’na mana? (b) Teihea mau aamu e mea maitai ia ape te mau Kerisetiano mau?

19 Te faaiti mai ra e rave rahi taata i te mau fenua i te pae Tooa o te râ i te atâta o te mana o Satani, area i te tahi atu mau fenua ra, te faarahi ra ïa. I reira, ua râmâ te Diabolo e  rave rahi ia tiaturi e ua rahi a‘e to ’na mana i ta ’na e fana‘o mau ra. Te ora ra, te tamaa ra, te ohipa ra e te taoto ra te tahi mau taata i roto i te riaria i te mau varua iino. Mea rahi te aamu no nia i te mau ohipa puai a te mau demoni. E pinepine te reira i te faatiahia ma te navenave; mea au hoi na te taata. E mea maitai anei ia faaatutu tatou atoa i te reira? Eita, e ape te mau tavini a te Atua mau i te reira no e piti tumu rahi.

20. E nafea tatou, ma te opua ore paha, e haaparare ai i te mau mana‘o haavarevare o Satani?

20 A tahi, ma te faaatutu i te mau aamu no nia i te mau ohipa a te mau demoni, te turu ra ïa tatou i te mau faufaa a Satani. E nafea ïa? Te haapapu ra te Parau a te Atua e e tia ia Satani ia rave i te mau ohipa puai, te faaara atoa ra râ e te faaohipa ra oia i “te tapao . . . haavare” e te “haavare.” (Tesalonia 2, 2:9, 10) I te mea o Satani te râmâ rahi, ua ite o ’na e nafea ia haapi‘o i te feruriraa o te feia mea au na ratou te  peu tahutahu e e nafea ia faatiaturi ia ratou i te mau mea e ere i te mea mau. E tiaturi iho â paha ratou e ua ite e ua faaroo ratou i te tahi mau mea, a faatia haere atu ai e mea mau te reira. I muri a‘e, e faarahi roa ta ratou mau aamu no te faatia-noa-raahia te reira. Ia faaatutu te hoê Kerisetiano i tera mau huru aamu, te rave ra ïa o ’na i te hinaaro o te Diabolo—te “metua . . . [o] te haavare.” Te haaparare ra ïa oia i te mau mana‘o haavarevare o Satani.—Ioane 8:44; Timoteo 2, 2:16.

21. E hinaaro tatou e niu i ta tatou mau aparauraa i nia i te aha?

21 A piti, noa ’tu e ua faaû iho â te hoê Kerisetiano i te mau varua iino i mutaa ihora, eita o ’na e faatia noa i te reira i to ’na mau hoa Kerisetiano no te faaanaanatae ia ratou. No te aha? Te a‘ohia maira e: “[E] tiatonu maite to tatou mata ia Iesu, . . . te tumu e te faaoti i to tatou faaroo.” (Hebera 12:2) Oia, e titauhia ia tiatonu tatou i te Mesia, eiaha ia Satani. A tapao na e i te fenua nei, aita Iesu i faaanaanatae i ta ’na mau pǐpǐ i te mau aamu no nia i te mau varua iino, noa ’tu e mea rahi ta ’na e nehenehe e faatia no nia i te mau ravea a Satani. Ua niu râ Iesu i to ’na ara-maite-raa i nia i te poroi o te Basileia. No reira, mai ia Iesu e te mau aposetolo, e hinaaro tatou e niu i ta tatou mau aparauraa i nia i “te [“mau ohipa,” MN] taa ê a te Atua.”—Ohipa 2:11; Luka 8:1; Roma 1:11, 12.

22. E nafea tatou e tamau ai i te turu i te “oaoa rahi . . . i te ra‘i”?

22 E parau mau e te faaohipa ra Satani e rave rau ravea paari, te peu tahutahu atoa, no te tamata i te tâpû i to tatou taairaa e o Iehova. Ma te riaria râ i te mea ino e ma te ati maite i te mea maitai, eita e noaa i te Diabolo i te faaaueue i ta tatou faaotiraa papu e patoi i te mau huru peu tahutahu atoa. (A taio i te Ephesia 4:27.) A feruri na ïa i te “oaoa rahi . . . i te ra‘i” ia tamau tatou i te “patoi atu i te mau ravea paari a te diabolo” e tae noa ’tu i to ’na mouraa!—Luka 15:7; Ephesia 6:11.

^ par. 16 Aita te mau i‘oa o te faataa ra ia Satani (Patoi, Pari haavare, Râmâ, Faahema, Haavare) e horoa ra i te mana‘o e e nehenehe o ’na e ite eaha to roto i to tatou aau e feruriraa. Area o Iehova ra, ua faataahia ïa mai “tei tamata i te aau” e ia Iesu mai “tei hi‘opoa i te mana‘o e te aau.”—Maseli 17:3; Apokalupo 2:23.

^ par. 18 Ei haamaramaramaraa hau, a hi‘o i te tumu parau “Te hoê tamataraa o te oraora-maitai-raa no outou?” i roto i Te Pare Tiairaa o te 15 no Titema 1994, api 19-22 e te tumu parau “Ia au i te Bibilia: Mea faufaa anei ta oe maitiraa i te ravea rapaauraa?” i roto i te Réveillez-vous! o te 8 no Tenuare 2001.