Eaha to roto?

Mau faaho'iraa ê

Tapura tumu parau

Ite no Iehova

Tahiti

“Ia vai maite outou i roto i te here o te Atua”

 PENE 12

“Ei parau maitai . . . e tupu ai te maitai”

“Ei parau maitai . . . e tupu ai te maitai”

“Eiaha ei parau faufau to roto mai i to outou vaha, ei parau maitai râ, e tupu ai te maitai.”—EPHESIA 4:29.

1-3. (a) Eaha te hoê ô ta Iehova i horoa mai, e e nafea te reira e faaohipa-hape-hia ’i? (b) No te vai noa i roto i te here o te Atua, e nafea ia faaohipa i te ô o te parau e tia ’i?

MAI te peu e ua horoa oe i te hoê ô na te hoê taata here, eaha to oe huru ia rave ino oia i te reira ma te opua? E pereoo paha ta oe i horoa na ’na, e ua faaroo oe i muri a‘e e ua faahoro oia ma te atâta, a pepe atu ai te taata. Eita anei oe e inoino?

2 Te ravea e paraparau ma te maramarama, e ô ïa no ǒ mai ia Iehova ra, Tei horoa mai i “te mau mea maitatai i ho[hia] mai, e te mau mea tia roa e maitai roa ’i.” (Iakobo 1:17) Maoti teie ô, o te faataa ê ra i te fetii taata i te mau animara, e nehenehe tatou e faaite eiaha noa i to tatou mau mana‘o, to tatou atoa râ huru aau ia vetahi ê. Mai te hoê râ pereoo uira, e nehenehe te ô o te parau e faaohipa-hape-hia. Eaha paha Iehova i te inoino e te faaohipahia ra te parau ma te feruri ore, a oto e a mauiui atu ai vetahi ê!

3 No te vai noa i roto i te here o te Atua, e titauhia ia faaohipa tatou i te ô o te parau ia au i te opuaraa a Tei horoa mai i te reira. Te faataa maitai ra Iehova i te huru parau ta ’na e au. Te na ô ra ta ’na Parau e: “Eiaha ei parau faufau to roto mai i to outou vaha, ei parau maitai râ, e tupu ai te maitai au ra, e maitai ai te feia e faaroo ra.” (Ephesia 4:29) E hi‘opoa mai tatou no te aha e titauhia ’i ia ara tatou i ta  tatou parau, teihea parau ta tatou e ape, e e nafea ia faahiti i te “parau maitai . . . e tupu ai te maitai.”

NO TE AHA E TITAUHIA ’I IA ARA TATOU I TA TATOU PARAU

4, 5. E nafea te tahi mau maseli Bibilia e faataa ’i i te mana o te mau parau?

4 Te hoê tumu faufaa e ara ’i tatou i ta tatou parau, oia ïa e mana to te mau parau. Te na ô ra te Maseli 15:4 e: “O te arero parau maitai ra, e raau ora ïa; area te arero parau ino ra, e mauiui ïa.” * Mai te pape o te faaoraora i te hoê tumu raau mǎrô, e nehenehe te parau maitai, aore ra hau, e faaitoito i te feia e faaroo i te reira. Area te mau parau pi‘o a te hoê arero ino, e faatoaruaru ïa ia vetahi ê. Oia mau, e mana to ta tatou mau parau e haamamae aore ra e rapaau.—Maseli 18:21.

5 Ma te faataa maitai i te mana o te mau parau, te na ô ra te tahi atu maseli: “Te taata vavi noa ra, e au ïa i te ‘o‘e patiatia ra.” (Maseli 12:18) E nehenehe te mau parau vavi faahiti-ru-hia e haapepe maitai i te aau e e faaino i te mau taairaa. Ua puta ê na anei to aau i te hoê parau e au i te ‘o‘e patiatia? Te vahi maitai, te na ô ra tera noâ maseli e: “Te arero  . . . o te taata paari ra, mai te raau rapaau ma‘i ra ïa.” E nehenehe te mau parau ferurihia a te hoê taata o te faaite ra i te paari o te Atua e rapaau i te hoê aau mauiui e e faaafaro i te mau taairaa. E nehenehe anei oe e haamana‘o i te hoê taime i ite ai oe i te mana rapaau o te mau parau hamani maitai? (A taio i te Maseli 16:24.) Ua ite tatou e e mana to ta tatou mau parau, e hinaaro iho â ïa tatou e faaohipa i te reira no te rapaau ia vetahi ê, eiaha no te haamamae atu.

E faaitoito te parau hau

6. No te aha e aroraa mau ai ia haavî i to tatou arero?

6 Noa ’tu te puai o ta tatou mau tutavaraa, eita e tia ia tatou ia haavî roa i to tatou arero. Teie ïa te piti o te tumu e mea tia ’i ia ara tatou i ta tatou e parau: No te hara e te huru tia ore, e riro iho â tatou i te faaohipa hape i to tatou arero. No roto mai te mau parau i to tatou aau, e ua “ino noâ te mana‘o o to te taata aau.” (Genese 8:21; Luka 6:45) E aroraa mau ïa ia tapea i to tatou arero. (A taio i te Iakobo 3:2-4.) Noa ’tu e eita e tia ia tatou ia haavî ma te tia roa i to tatou arero, e nehenehe tatou e tamata noa i te haamaitai i ta tatou faaohiparaa i te reira. Mai te hoê taata au e titauhia ia tamau i te faaû i te opape, e titauhia ia aro noa tatou i te hinaaro hara e faaohipa hape i to tatou arero.

7, 8. I nia i teihea faito e amo ai tatou i te hopoia o ta tatou mau parau i mua ia Iehova?

7 Te toru o te tumu e ara ’i tatou i ta tatou mau parau, oia ïa na tatou e amo i te hopoia o ta tatou mau parau i mua ia Iehova. E ohipa ta tatou faaohiparaa i to tatou arero eiaha noa i nia i to tatou taairaa e te mau taata-tupu, i nia atoa râ i to tatou tiaraa i mua ia Iehova. Te na ô ra te Iakobo 1:26 e: “Te mana‘o râ te hoê taata i roto ia outou, e e paieti to ’na, e aore i tapea i to ’na vaha, te haavare ra râ i to ’na iho aau, e paieti haavare to ’na.” * Mai ta tatou i ite i to na mua ’tu pene, ua taai-roa-hia ta tatou mau parau i to tatou paieti,  aore ra ta tatou haamoriraa i te Atua. Ia ore ia tapeahia to tatou vaha—o te faahiti pinepine i te mau parau taero e te mauiui—e nehenehe ta tatou mau ohipa Kerisetiano atoa e faufaa ore i te aro o te Atua. Eiaha anei ïa tatou e feruri i te reira?—Iakobo 3:8-10.

8 Te taa ra ia tatou e e tumu papu ta tatou no te ara ia ore e faaohipa hape i te ô o te parau. Hou tatou a hi‘opoa ’i i te mau huru parau maitatai o te faaitoito, e hi‘o mai tatou i te mau parau aita roa ’tu to ratou e parahiraa i roto i te oraraa o te hoê Kerisetiano mau.

TE MAU PARAU O TE VAVAHI

9, 10. (a) Eaha te parau e faahitihia pauroa te mahana i roto i te ao i teie tau? (b) No te aha e titauhia ’i ia haapae tatou i te parau faufau? (A hi‘o atoa i te nota i raro i te api.)

9 Parau faufau. I roto i te ao i teie tau, e matara mai pauroa te mahana te faaino, te parau ino e te tahi atu mau huru parau faufau. Mea rahi o te parau ino no te haapapu i ta ratou mau parau aore ra no te mea aita ratou i ite i te ta‘o e tano ia faahiti. E faahiti pinepine te feia hauti teata i te mau parau hairiiri, niuhia i nia i te taatiraa, no te faaata i te taata. E ere râ te parau faufau i te ohipa hoata. Fatata e 2 000 matahiti a‘enei, ua a‘o te aposetolo Paulo faaurua i te amuiraa no Kolosa ia haapae i “te parau tiaâ.” (Kolosa 3:8) Ua parau Paulo i te amuiraa no Ephesia e to roto atoa “te faaata rii iino” i te mau mea “eiaha roa ia faahitihia i roto” i te mau Kerisetiano mau.—Ephesia 5:3, 4.

10 Mea au ore roa na Iehova te parau faufau. Mea au ore atoa na te feia e here ra ia ’na. Oia mau, e turai to tatou here no Iehova ia tatou ia haapae i te parau faufau. A faahiti ai Paulo i te tapura o “ta te tino e rave,” te vai ra “te mau peu faufau,” to roto atoa te parau faufau. (Galatia 5:19-21) E ohipa hoata ore teie. E nehenehe te hoê taata e tiavaruhia i rapae au i te amuiraa mai te peu e noa ’tu te a‘oraa tamau, ua  mataro oia ma te tatarahapa ore i te faahiti i te mau parau tei taaihia aore ra e turu ra i te mau mea morare ore roa ino, te hairiiri e te pi‘o. *

11, 12. (a) Eaha te hopoi parau, e e nafea te reira e riro ai ei mea faaino? (b) No te aha e titauhia ’i ia ape te feia haamori ia Iehova i te parau pari haavare?

11 Hopoi parau faaino, pari haavare. Te hopoi parau, e parau faufaa ore ïa no nia i te taata e to ratou oraraa. Mea ino anei pauroa te hopoi parau? E ere mai te peu e e faatia tatou i te mau parau apî maitatai aore ra faufaa, ei hi‘oraa o vai tei bapetizohia a‘enei aore ra o vai te hinaaro ra i te tahi parau faaitoito. I anaanatae mau na te mau Kerisetiano o te senekele matamua i te maitai o te tahi e te tahi e ua faaite atu i te mau parau apî e tano no nia i to ratou mau hoa Kerisetiano. (Ephesia 6:21, 22; Kolosa 4:8, 9) Mai te peu râ e e tavirihia te mau tupuraa aore ra e faaitehia te oraraa o te taata, e hopoi parau faaino ïa te reira. Te mea ino roa ’tu â, e nehenehe te pari haavare e tupu mai, mea ino noâ hoi te reira. Te pari haavare, o “te parauraa ïa i te mau pariraa haavare . . . o te faaino e o te totoa i te roo o te tahi atu.” Ei hi‘oraa, ua faaohipa te mau Pharisea i te pari haavare taviri ia faainohia Iesu. (Mataio 9:32-34; 12:22-24) E faatupu pinepine te pari haavare i te mârô.—Maseli 26:20.

12 Aita Iehova e tâu‘a ore ra i te feia o te faaohipa ra i te ô o te parau no te faaino i te roo o vetahi ê aore ra no te faatupu i te amahamaha. Mea riri roa na ’na te feia e faatupu i “te mârô i roto i te mau taeae.” (Maseli 6:16-19) O di·aʹbo·los te ta‘o Heleni tei hurihia ei “pari haavare,” te hoê tiaraa i‘oa  atoa o Satani. O ’na te “diabolo,” te pari haavare ino i te Atua. (Apokalupo 12:9, 10) Mea papu e e hinaaro tatou e ape i te mau parau o te faariro mau â ia tatou ei diabolo. Aita e parahiraa i roto i te amuiraa no te parau pari haavare o te faatupu i ta te tino e rave mai “te vahi a vai,” aore ra mârô, e “te amahamaha.” (Galatia 5:19-21) No reira, hou a faaite haere ai i te tahi mau parau apî no nia i te hoê taata, a ui ia oe iho: ‘E parau mau anei? Mea maitai anei ia faatia haere i te reira? Mea faufaa roa aore ra mea titauhia anei ia haaparare i teie parau?’—A taio i te Tesalonia 1, 4:11.

13, 14. (a) Eaha te faahopearaa o te tuhi i nia i te feia e faaroo i te reira? (b) Eaha te parau faaino, e no te aha te hoê taata parau faaino e haafifi ai ia ’na iho?

13 Tuhi. Mai tei tapaohia na mua ’tu, e mana to te mau parau e haamamae. E parau mau e i te tahi taime, e parau tatou paatoa i te mau mea ta tatou e tatarahapa no to tatou hoi huru tia ore. Te faaara ra râ te Bibilia eaha te mau huru parau aita roa ’tu to ratou e parahiraa i roto i te hoê utuafare Kerisetiano aore ra i roto i te amuiraa. Ua a‘o Paulo i te mau Kerisetiano e: “Ia haapae-roa-hia te mamahu ore, e te iria, e te riri, e te avau e te faaino.” (Ephesia 4:31) Te huri ra te tahi atu mau Bibilia i te ta‘o “faaino” ei “parau ino,” “parau tairoiro,” e “parau faaino.” E nehenehe te tuhi—tae noa ’tu te mau i‘oa pii faufau e te faainoraa tamau e te etaeta—e faaere ia vetahi ê i to ratou tura, a mana‘o atu ai ratou e aita to ratou e faufaa. E pepe ohie noa te aau tiaturi e te mǎrû o te mau tamarii i te mau faahopearaa teimaha o te tuhi.—Kolosa 3:21.

14 Ma te mau ta‘o puai roa, te faahapa ra te Bibilia i te parau faaino—te peu e faahaehaa ia vetahi ê na roto i te mau parau tuhi, aore ra vahavaha. Te haafifi ra te hoê taata tei mataro i tera huru parau ia ’na iho, no te mea e nehenehe te hoê taata parau faaino e tatarahia i te amuiraa ia ore oia e pee i te mau tutavaraa tamau no te tauturu ia ’na ia taui.  Ia ore oia e taui i to ’na haerea, e nehenehe atoa oia e ere i te mau haamaitairaa a te Basileia. (Korinetia 1, 5:11-13; 6:9, 10) Mea maramarama maitai ïa, eita roa ’tu tatou e vai noa i roto i te here o te Atua mai te peu e e haamataro tatou i te faahiti i te mau parau tano ore, haavare, aore ra maitai ore. E vavahi tera huru parau.

“PARAU MAITAI . . . E TUPU AI TE MAITAI”

15. Teihea huru “parau maitai . . . e tupu ai te maitai”?

15 E nafea ia faaohipa i te ô o te parau ia au i te opuaraa a Tei horoa mai i te reira? A haamana‘o e te faaue maira te Parau a te Atua e “ei parau maitai . . . e tupu ai te maitai” ta tatou. (Ephesia 4:29) Te oaoa ra Iehova ia faahiti tatou i te mau parau o te patu, faaitoito e o te haapuai ia vetahi ê. E titauhia ia feruri maite no te na reira. Aita te Bibilia e horoa ra i te hoê anairaa ture taa maitai ta tatou e pee; aita atoa e horoa ra i te hoê tapura huru “parau mau” fariihia. (Tito 2:8) No te faahiti i te mau “parau maitai . . . e tupu ai te maitai,” e tano ia haamana‘o tatou e toru mea rii noa, mea faufaa râ, o te faataa eaha te mau parau o te patu: E parau tano, e parau mau, e e parau hamani maitai. Ma te haamana‘o i te reira, e rave mai tatou i te tahi mau hi‘oraa taa maitai o te mau parau o te patu.—A hi‘o i te tumu parau tarenihia “ E parau faaitoito anei ta ’u?

16, 17. (a) No te aha e mea maitai ai ia haapopou tatou ia vetahi ê? (b) Eaha te mau taime maitatai no te haapopou ia vetahi ê i roto i te amuiraa? i roto i te utuafare?

16 Haapopouraa haavare ore. Ua taa ia Iehova e ia Iesu atoa te faufaaraa ia faahiti i te mau parau haapopou e te mauruuru. (Mataio 3:17; 25:19-23; Ioane 1:47) Ei Kerisetiano, e mea maitai ia haapopou tatou atoa ia vetahi ê ma te haavare ore. No te aha? “E maitai rahi hoi to te parau ia au te parauraa,” ta te Maseli 15:23 ïa e parau ra. A ui na ia oe iho: ‘Eaha to ’u huru ia haapopouhia vau ma te haavare ore? Aita anei te reira e tamahanahana ra i to ’u aau e e faaitoito  ra ia ’u?’ Oia mau, maoti te tahi parau haapopou haavare ore e ite ai oe e te haapao ra te hoê taata ia oe, te haapeapea ra no oe, e mea hoona roa ta oe mau tutavaraa. E patu tera haapapuraa i to oe tiaturi e e turai ia oe ia haa maite atu â a muri a‘e. I te mea e te mauruuru ra oe ia fana‘o oe i te haapopouraa, eiaha anei ïa oe atoa e tutava roa i te horoa i te haapopouraa na vetahi ê?—A taio i te Mataio 7:12.

17 A haamatau ia oe i te imi i te maitai i ǒ vetahi ê e a haapopou atu. I roto i te amuiraa, e faaroo paha oe i te hoê vauvauraa tatara-maitai-hia i te hoê putuputuraa, e tapao paha oe i te hoê taurearea o te tapi nei i te mau fa pae varua, aore ra i te hoê ruhiruhia aita e mairi ra i te mau putuputuraa noa ’tu te mau taotiaraa o te matahiti rahi. E nehenehe te tahi parau haapopouraa haavare ore e haaputapû i to ratou aau e e haapuai ia ratou i te pae varua. I roto i te utuafare, e titauraa ia faaroo te tane e ta ’na vahine i te mau parau haapopouraa e haamauruururaa mahanahana a te tahi e te tahi. (Maseli 31:10, 28) Mea au roa na te tamarii iho â râ e ite e te haapaohia ra e te hinaarohia ra ratou. E hinaaro roa te hoê tamarii i te haapopouraa e te haamauruururaa mai te hoê raau tupu o te hinaaro roa i te hihi mahana e te pape. E te mau metua, a imi i te mau taime maitatai no te haapopou i ta outou mau tamarii no to ratou mau huru maitai e ta ratou mau tutavaraa haamaitai. E nehenehe taua haapopouraa ra e patu i te itoito e te tiaturi i roto i ta outou mau tamarii e e turai ia ratou ia tutava ’tu â i te rave i te mea tia.

18, 19. No te aha e mea maitai ai ia tutava roa tatou i te faaitoito e te tamahanahana i to tatou mau hoa Kerisetiano, e e nafea ïa tatou?

18 Faaitoitoraa e tamahanahanaraa. Te haapeapea roa ra Iehova no “tei haehaa” e “tei tatarahapa.” (Isaia 57:15) Te faaue maira ta ’na Parau ia “haamahanahana [ta]tou ia [ta]tou iho” e ia faaitoito “i te aau taiâ.” (Tesalonia 1, 5:11, 14) E nehenehe tatou e tiaturi e te tapao ra e te mauruuru ra te  Atua i ta tatou mau tutavaraa no te tamahanahana i te mau hoa Kerisetiano ua teimaha roa to ratou aau i te oto.

E mauruuru Iehova ia faahiti tatou i te parau o te patu ia vetahi ê

19 Eaha râ ta oe e nehenehe e parau no te faaitoito i te hoê hoa Kerisetiano toaruaru aore ra aau taiâ? Eiaha e mana‘o e e titauhia ia faaafaro oe i te fifi. I roto e rave rahi tupuraa, e pinepine e tauturu rahi te tahi mau parau rii noa. A haapapu i te taata hepohepo i to oe tapitapi no ’na. A pûpû i te pure ma te reo puai e o ’na; e nehenehe oe e taparuparu ia Iehova ia tauturu ia ’na ia ite e mea here-roa-hia o ’na e vetahi ê e e te Atua. (Iakobo 5:14, 15) A tamahanahana ia ’na e mea hinaarohia e mea faufaa o ’na ei melo o te amuiraa. (Korinetia 1, 12:12-26) A taio i te hoê irava Bibilia faaitoito no te haapapu ia ’na e te haapeapea roa mau ra Iehova no ’na. (Salamo 34:18; Mataio 10:29-31) Maoti te raveraa i te taime e navai no te horoa i te tahi “parau maitai” na tei toaruaru e no te paraparau ma to aau, e tauturuhia iho â oia ia ite e mea herehia e mea faufaa o ’na.—A taio i te Maseli 12:25.

20, 21. Eaha te mau mea e au ai ia faaohipa i te a‘oraa?

20 A‘oraa e au ia faaohipa. Ei taata tia ore, e hinaaro tatou paatoa i te a‘oraa i te tahi taime. Te faaitoito maira te Bibilia e: “E faaroo i te parau, e farii i te a‘o, ia paari oe ia tae i to oe ra hopea.” (Maseli 19:20) E ere o te mau matahiapo ana‘e te nehenehe e parau, aore ra a‘o, ia vetahi ê. E a‘o te  mau metua i te mau tamarii. (Ephesia 6:4) E titauhia paha ia a‘o te mau tuahine feruriraa paari i te mau vahine apî a‘e. (Tito 2:3-5) Na te here no vetahi ê e turai ia tatou ia hinaaro e horoa i te a‘oraa ta te taata e farii ma te taiâ ore. Eaha te tauturu ia tatou ia horoa i tera huru a‘oraa? A hi‘o na e toru tuhaa e au atu â ’i ia faaohipa i te a‘oraa: te huru e te mana‘o turai o te taata a‘o, te niu o te a‘oraa e te huru horoaraa i te reira.

21 E haamata te a‘oraa e au ia faaohipa e te taata a‘o. A ui ia oe iho, ‘Eaha te taime e mea ohie ai no ’u ia farii i te a‘oraa?’ Ia ite oe e te haapeapea ra te taata a‘o no oe, aita o ’na e faahiti ra i to ’na iho inoino e aita to ’na e mana‘o turai tano ore, e mea ohie a‘e ïa ia farii i te a‘oraa. No reira, ia a‘o oe ia vetahi ê, mai tera atoa ïa to oe huru e to oe mana‘o turai, e ere anei? Ua niu-atoa-hia te a‘oraa manuïa i nia i te Parau a te Atua. (Timoteo 2, 3:16) Ia faahiti roa tatou i te reira i roto i te Bibilia aore ra eita, e mea maitai ia niu tatou i te a‘oraa atoa ta tatou e horoa i nia i te mau Papai. No reira te mau matahiapo e ara ’i eiaha e tuu faahepo i to ratou iho mau mana‘o i nia ia vetahi ê; eita atoa ratou e taviri i te mau Papai, ma te horoa i te mana‘o e te turu ra te Bibilia i to ratou iho mana‘o. E au atu â atoa ia faaohipa i te a‘oraa ia horoahia te reira ma te huru e tano. Mea ohie a‘e ia farii i te a‘oraa tei tamitihia i te hamani maitai e ia tapea noa te taata o te fana‘o i te reira i to ’na tura.—Kolosa 4:6.

22. Eaha ta oe faaotiraa papu no nia i te faaohiparaa i te ô o te parau?

22 Mea papu e e ô faufaa roa te parau no ǒ mai i te Atua ra. E mea maitai ia turai to tatou here no Iehova ia tatou ia faaohipa, eiaha ma te hape, i teie ô. E haamana‘o tatou e e mana to ta tatou e parau ia vetahi ê—te mana e patu aore ra e vavahi. No reira, e tutava ana‘e i te faaohipa i teie ô ia au i te opuaraa a Tei horoa mai i te reira—“e tupu ai te maitai.” E haamaitai ïa ta tatou parau i te feia e haaati ra ia tatou e e tauturu te reira ia tatou ia vai noa i roto i te here o te Atua.

^ par. 4 O “tia ore e ino” atoa te auraa o te ta‘o Hebera tei hurihia ei “parau ino” i roto i te Maseli 15:4.

^ par. 7 Ua huri-atoa-hia te ta‘o Heleni no “haavare,” ei “faufaa ore.”—Korinetia 1, 15:17.

^ par. 10 “Te mau peu faufau” i roto i te mau Papai, e parau aano ïa o te faataa ra i te hoê anairaa rahi o te mau hara. Noa ’tu e e ere o te taatoaraa o te mau peu faufau te au ia haavahia, e nehenehe te hoê taata e tiavaruhia i rapae au i te amuiraa mai te peu e e rave tamau oia ma te tatarahapa ore i te peu faufau hairiiri.Korinetia 2, 12:21; Ephesia 4:19; a hi‘o i te “Uiraa a te feia taio” o te Tour de Garde o te 15 no Tiurai 2006.

No te ite atu â

TE PARE TIAIRAA (HAAPIIRAA)

E parau anei oe “oia” e i muri iho “aita”?

Ia tapea te mau Kerisetiano i ta ratou parau e eiaha roa ’tu ratou e parau “oia” e i muri iho “aita.” E mea titau-ana‘e-hia ia faaore i te hoê faaauraa? A haapii mai i te hi‘oraa o te aposetolo Paulo.