Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 13

Te mau oroa ta te Atua e ore roa e au

Te mau oroa ta te Atua e ore roa e au

“Ia itea ia outou te mea au i te Fatu ra.”—EPHESIA 5:10.

1. Teihea huru taata ta Iehova e faatae ia ’na, e no te aha e titauhia ’i ia vai ara noa ratou i te pae varua?

“E HAAMORI” te feia haamori mau “i te Metua . . . , ma te varua e te parau mau: o te huru ïa o te feia haamori ta te Metua e titau nei,” ta Iesu ïa i parau. (Ioane 4:23) Ia titau Iehova i tera mau huru taata—mai ta ’na i titau ia oe—e faatae o ’na ia ratou ia ’na e i ta ’na Tamaiti. (Ioane 6:44) Auê te fana‘o e! E mea tia râ ia “itea” noa i te feia o te hinaaro ra i te parau mau Bibilia “te mea au i te Fatu,” mea ite roa hoi Satani i te haavare.—Ephesia 5:10; Apokalupo 12:9.

2. A faataa eaha te mana‘o o Iehova i te feia o te tamata i te amui i te haapaoraa mau e te haapaoraa hape.

2 A hi‘o i te ohipa i tupu i pihai iho i te mou‘a Sinai i to te mau Iseraela aniraa ia Aarona e hamani i te tahi atua no ratou. Ua farii Aarona e ua hamani i te hoê kafa auro, ma te horoa i te mana‘o e te faahoho‘a ra te reira ia Iehova. “E mahana oroa ananahi no Iehova,” ta ’na ïa i parau. Ua tâu‘a ore anei Iehova i teie anoiraa i te haapaoraa mau e te haapaoraa hape? Aita. Ua haapohe oia e 3 000 taata haamori idolo. (Exodo 32:1-6, 10, 28) Eaha te haapiiraa? Ia hinaaro tatou e vai noa i roto i te here o te Atua, “eiaha” ïa tatou “e rave noa ’tu i te mea viivii,” e paruru râ tatou ma te itoito rahi i te parau mau i te mau huru viivii atoa.—Isaia 52:11; Ezekiela 44:23; Galatia 5:9.

3, 4. No te aha e mea maitai ai ia haapao maite tatou i te mau faaueraa tumu Bibilia ia hi‘opoa tatou i te mau oroa e peu tumu matauhia?

3 Tera noa râ, i muri a‘e i te poheraa o te mau aposetolo, o  tei tapea na i te mau Kerisetiano matamua ia ore ia farii i te ohipa apotata, ua haamata te feia faahua Kerisetiano tei ore i hinaaro i te parau mau i te farii i te mau peu tumu, oroa e mahana “mo‘a” etene, ta ratou i parau e e ohipa Kerisetiano. (Tesalonia 2, 2:7, 10) A hi‘opoa ’i oe i te tahi o teie mau oroa, e tapao oe e te faaite ra te reira eiaha i te varua o te Atua, i to teie nei ao râ. E pinepine, hoê â huru to te mau oroa a teie nei ao: E faaara ïa i te mau hinaaro o te tino, e e turu i te mau tiaturiraa faaroo hape e te peu tahutahu—te tapao o “Babulonia rahi.” * (Apokalupo 18:2-4, 23) A haamana‘o atoa e ua ite roa ’tu Iehova i te mau peu faaroo etene hairiiri no reira mai hoi e rave rahi peu tumu matauhia. Aita e feaaraa e te au ore noa ra oia i taua mau oroa ra i teie tau atoa. Eiaha anei ïa tatou e haafaufaa roa i to ’na mana‘o?—Ioane 2, 6, 7.

4 Ei Kerisetiano mau, ua ite tatou e aita roa ’tu Iehova e au ra i te tahi mau oroa. E titauhia râ ia faaoti papu tatou i roto i to tatou aau eiaha roa ’tu e apiti i te reira. Maoti te hi‘o-faahou-raa no te aha Iehova e ore roa ’i e au i tera mau oroa, e papu atu â ta tatou faaotiraa e ape i te mau mea atoa o te nehenehe e haafifi ia tatou ia vai noa i roto i te here o te Atua.

NOELA—TE I‘OA APÎ O TE HAAMORIRAA I TE MAHANA

5. No te aha tatou e nehenehe ai e tiaturi e aita Iesu i fanauhia i te 25 no Titema?

5 Aita te Bibilia e faahiti ra i te tahi oroa fanauraa o Iesu. Aita hoi tatou i ite i to ’na mahana fanauraa tia. E nehenehe râ tatou e tiaturi e aita o ’na i fanauhia i te 25 no Titema i te tau toetoe i tera vahi o te ao. * No te mea ua papai Luka e i to  Iesu fanauraahia, te “tia” ra te mau tiai mamoe “i roto i te mau aua” a haapao ai i ta ratou mau nǎnǎ. (Luka 2:8-11) Ahani e peu matauhia e ratou ia “tia i roto i te mau aua” i te roaraa o te matahiti, aita ïa e faufaa ia tapao i te reira. Teie râ, no te mea e topa te ûa toetoe e te hiona i Betelehema i te tau toetoe, eita ïa te mau nǎnǎ e vaiihohia i rapaeau e eita te mau tiai mamoe e “tia i roto i te mau aua.” Hau atu â, ua haere Iosepha raua Maria i Betelehema no te mea ua poroi Kaisara Auguso i te hoê taioraa mana i te huiraatira. (Luka 2:1-7) Eita ïa Kaisara e faaue i te hoê nunaa o te inoino ra i te faatereraa Roma ia haere i te oire fanauraa o to ratou mau tupuna i te tau toetoe roa ’‘e.

6, 7. (a) Nohea mai e rave rahi peu tumu o te Noela? (b) Eaha te taa-ê-raa i rotopu i te horoaraa ô i te Noela e te horoaraa ô a te mau Kerisetiano mau?

6 No roto mai te Noela eiaha i te mau Papai, i te mau oroa etene râ i tahito ra, mai te mau Saturnales Roma faatupuhia no Saturne, te atua o te faaapu. Ia au atoa i ta ratou mau numeraraa, i faatupu na te feia haamori i te atua Mithra i te 25 no Titema ei “oroa fanauraa o te mahana vî ore,” ia au i te hoê buka ite rahi. “Ua haamata te Noela i te hoê tau e mea puai roa te haamoriraa i te mahana i Roma,” fatata e toru senekele i muri a‘e i te poheraa o te Mesia.—New Catholic Encyclopedia.

E horoa te mau Kerisetiano mau ma te here

7 I roto i ta ratou mau oroa, e horoa te mau etene i te mau ô na te tahi e te tahi e e tamaa ratou—te rave-noa-hia ra te reira i te Noela. Mai i teie tau atoa râ, aita e rave rahi horoaraa ô i te Noela i tuati i te mana‘o o te Korinetia 2, 9:7, e na ô ra e: “E horoa te taata atoa i ta ’na i opua i roto i to ’na aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” E horoa te mau Kerisetiano mau ma te here, eiaha i te tahi noa taio mahana taa ê, e eita ratou e tiai i te mau ô ei faaho‘iraa. (Luka 14:12-14; a taio i te Ohipa 20:35.) Hau atu â, te mauruuru roa nei ratou i te tiamâ mai i te huehue o te Noela e i te teimaha o te tarahu i te  pae moni ta te taata e rave rahi e rave i taua taime ra o te matahiti.—Mataio 11:28-30; Ioane 8:32.

8. Ua horoa anei te feia hi‘o fetia i te mau ô na Iesu no to ’na oroa fanauraa? A faataa na.

8 E na ô râ paha vetahi e, aita anei te feia hi‘o fetia i horoa i te mau ô na Iesu no to ’na oroa fanauraa? Aita. Ta ratou mau ô, e ravea noa ïa no te faaite i to ratou faatura i te hoê taata faahiahia, e peu matauhia te reira i te mau tau Bibilia. (Te mau arii 1, 10:1, 2, 10, 13; Mataio 2:2, 11) Inaha, aita ratou i haere atu i te po i fanauhia ’i Iesu. I to ratou taeraa ’tu, e ere Iesu i te hoê aiû i roto i te hoê phatene, e rave rahi râ ava‘e to ’na e te noho ra i roto i te hoê fare.

FAATAARAA BIBILIA I TE OROA FANAURAA

9. Eaha tei tupu i na oroa fanauraa i faahitihia i roto i te Bibilia?

9 Noa ’tu e e tupuraa oaoa rahi noa te fanauraa o te hoê  aiû, aita te Bibilia e faahiti ra i te hoê tavini a te Atua tei faatupu i to ’na oroa fanauraa. (Salamo 127:3) Ua moehia anei ia papai i te reira? Aita, e piti hoi oroa fanauraa tei faahitihia—to te hoê Pharao no Aiphiti e to Heroda Anitipa. (A taio i te Genese 40:20-22; Mareko 6:21-29.) Te faatiahia ra râ na oroa e piti ma te au ore—to Heroda Anitipa iho â râ i reira te tâpûraahia te upoo o Ioane Bapetizo.

10, 11. Eaha te mana‘o o te mau Kerisetiano matamua i te mau oroa fanauraa, e no te aha?

10 “I faariro na te mau Kerisetiano matamua,” ia au i te hoê buka ite rahi, “i te faatupuraa i te oroa fanauraa o te tahi taata ei peu tumu etene.” (The World Book Encyclopedia) Ei hi‘oraa, i tiaturi na te mau Heleni i tahito ra e e varua paruru to te taata taitahi o te apiti i to ’na fanauraa e o te tiai ia ’na  i muri a‘e. “E taairaa manamana” to taua varua ra “e te atua no ’na te oroa fanauraa i fanauhia ’i te taata,” ia au i te buka Peu tumu e tutuu o te mau oroa fanauraa (Beretane). Ua taai-roa-hia atoa te mau oroa fanauraa i te peu hi‘o fetia e te tohuraa tapao ehia maororaa.

11 Aita noa te mau tavini a te Atua i tahito ra i patoi i te mau peu matauhia o te oroa fanauraa no te mau tumu tahutahu e te etene o te reira, no ta ratou atoa râ mau faaueraa tumu. No te aha hoi? E tane e e vahine haehaa noa ratou tei ore i hi‘o i to ratou fanauraa ei tupuraa faufaa roa e mea tia ia faatupuhia te oroa. * (Mika 6:8; Luka 9:48) O Iehova râ ta ratou i faahanahana e i haamauruuru no te ô faufaa roa o te ora. *Salamo 8:3, 4; 36:9; Apokalupo 4:11.

12. E nafea e maitai rahi ai to te mahana o to tatou poheraa i te mahana o to tatou fanauraa?

12 Ua paruruhia te feia atoa o te pohe ma te taiva ore i roto i te mehara o te Atua, e mea papu to ratou oraraa no a muri a‘e. (Ioba 14:14, 15) Te na ô ra te Koheleta 7:1 e: “E maitai rahi to te i‘oa maitai i to te mono‘i hau‘a maitai ra; e te mahana e pohe ai ra i te mahana fanauraa.” To tatou “i‘oa,” o te roo maitai ïa i te aro o te Atua tei noaa mai ia tatou maoti ta tatou taviniraa haapao maitai. E tano roa ia tapao e ua taaihia te oroa hoê roa tei faauehia i te mau Kerisetiano ia faatupu, eiaha i te hoê fanauraa, i te hoê poheraa râ—to Iesu, o to ’na “i‘oa” maitai roa hoi te ravea faufaa roa e ora ’i tatou.—Hebera 1:3, 4; Luka 22:17-20.

 PAKATE—HAAMORIRAA I TE FANAURAA FAAHURU-Ê-HIA

13, 14. Nohea mai te mau peu tumu matauhia o te Pakate?

13 Ua parauhia e e oroa o te tia-faahou-raa o te Mesia te Pakate, i te tanoraa râ no roto mai te reira i te haapaoraa hape. Ua taaihia te Pakate ia Eostre, aore ra Ostara, te ruahine Beretane o te aahiata e te tau uaaraa tiare. E eaha ïa te taairaa o te huero moa e te rapiti e te Pakate? “Ua matau-maitai-hia” te huero moa “ei taipe o te ora apî e te tia-faahou-raa,” ia au i te hoê buka ite rahi, e ua faaohipa-maoro-hia te rapiti ei taipe o te fanauraa. (Encyclopædia Britannica) No reira, e oroa mau â te Pakate o te fanauraa tei faahuru-ê-rii-hia ei oroa o te tia-faahou-raa o te Mesia. *

14 E farii anei Iehova ia haamana‘ohia te tia-faahou-raa o ta ’na Tamaiti maoti te hoê oroa hairiiri o te fanauraa? Eita ïa! (Korinetia 2, 6:17, 18) Inaha, aita roa ’tu te mau Papai e faaue ra e aita atoa e faatia ra i te haamana‘oraa i te tia-faahou-raa o Iesu. No reira, e ohipa taiva mau â ia faatupu i te reira ma te i‘oa o te Pakate.

E OROA MO‘A ORE TE HALLOWEEN

15. Nohea mai te Halloween, e eaha te nehenehe e tapao no nia i te taio mahana i maitihia no te faatupu i tera oroa?

15 Matauhia no ta ’na mau vahine tahutahu, ta ’na mau varua nainai e te tahi atu mau faaunaunaraa e tao‘a huru ê, no ǒ mai te Halloween, o te mahana hou te mahana o te mau peata atoa te auraa, i te mau Celtes i tahito ra no Beretane e no Irelane. I te atiraa ava‘e fatata roa i te 1 no Novema, i faatupu na ratou i te oroa Samain, “hopea o te tau veavea” te auraa. I tiaturi na ratou e i te roaraa o te Samain, e matara te opani i rotopu i te taata e te ao varua e e ratere haere  te mau varua maitai e te mau varua ino atoa na te fenua. I mana‘o na ratou e e ho‘i te mau nephe o te feia pohe i ǒ ratou, e e faaineine ïa te mau utuafare i te maa e te inu na to ratou mau ratere tupapau no te tamǎrû ia ratou. No reira, ia haere te mau tamarii i teie tau ma te ahu tupapau aore ra tahutahu na te mau fare e haamǎta‘u i te taata e e hautihia ratou ia ore ratou e horoa i te momona, te tamau ra ïa ratou ma te ite ore i te faatupu i te oroa Samain.

IA VAI VIIVII ORE TO OE FAAIPOIPORAA

16, 17. (a) No te aha e mea maitai ai ia hi‘opoa te mau Kerisetiano o te faaineine ra i to ratou faaipoiporaa i te mau peu tumu faaipoiporaa o te fenua ia au i te mau faaueraa tumu Bibilia? (b) No nia i te mau peu tumu mai te hueraa i te raiti aore ra te tahi atu mea, eaha ta te mau Kerisetiano e haapao maitai?

16 Ua fatata “te reo o te tane e te vahine i faaipoipo-apî-hia [i te] ore roa e faaroo-faahou-hia i roto ia [Babulonia rahi].” (Apokalupo 18:23) No te aha? I roto i te hoê tuhaa, no ta ’na ïa mau peu tahutahu, o te nehenehe e haaviivii i te hoê faaipoiporaa mai te mahana faaipoiporaa ’tu.—Mareko 10:6-9.

17 Ua rau te peu tumu i tera fenua i tera fenua. No roto mai paha te tahi mau peu tumu ino ore ia hi‘ohia i te mau peu Babulonia tei mana‘ohia e e hopoi mai i te manuïa na te feia faaipoipo aore ra na ta raua mau manihini. (Isaia 65:11) Ua taaihia te hoê tutuu mai tera te huru i te hueraa i te raiti aore ra te tahi atu mea. No roto mai paha teie peu i te tiaturiraa e e tamǎrû te maa i te mau varua ino, a ore atu ai ratou e rave ino i te tane e te vahine faaipoipo apî. Hau atu â, e taairaa miterio maoro to te raiti e te fanauraa, te oaoa e te oraraa maoro. Mea maramarama, e ape te feia atoa o te hinaaro ra e vai noa i roto i te here o te Atua i taua mau peu tumu viivii ra.—A taio i te Korinetia 2, 6:14-18.

18. Teihea mau faaueraa tumu Bibilia o te aratai i na taata o te faaineine nei i to raua faaipoiporaa e te mau manihini e tia ’i?

18 E ape atoa te mau tavini a Iehova i te mau peu a teie  nei ao o te faaere i te mau faaipoiporaa e te mau oroa faaipoiporaa i te tura Kerisetiano aore ra o te faaturori i te mana‘o haava o vetahi. Ei hi‘oraa, e haapae ratou i te mau faaoooraa mauiui aore ra faahitihitiraa faufau ia orero ratou e e ape ratou i te mau peu hoata aore ra te mau parau e huru ê ai na hoa faaipoipo apî e vetahi ê. (Maseli 26:18, 19; Luka 6:31; 10:27) E ape atoa ratou i te mau oroa faaipoiporaa rahi unauna o te faaite ra eiaha i te huru au noa, i “te ahaaha [râ] o te oraraa nei.” (Ioane 1, 2:16) Mai te peu e te faaineine nei oe i to oe faaipoiporaa, eiaha roa ’tu e haamoe e te hinaaro ra Iehova ia haamana‘o noa oe i taua mahana taa ê ra ma te oaoa, eiaha ma te tatarahapa. *

PATERAA I TE HAPAINA—E PEU FAAROO ANEI?

19, 20. Eaha ta te hoê buka e parau ra no nia i te tumu o te pateraa i te hapaina, e no te aha teie peu tumu e ore ai e tano no te mau Kerisetiano?

19 E peu matauhia ia pate i te hapaina i te mau faaipoiporaa e te tahi atu mau oroa. Te na ô ra te hoê buka e: “Peneia‘e e toetoea [te pateraa i te hapaina] o te mau tusia inu i tahito ra, i reira e pûpûhia ’i te tahi mea tahe mo‘a na te mau atua . . . ei tauiraa no te hoê euhe, te hoê pure haapotohia ma te mau parau ‘ia roa to oraraa!’ aore ra ‘ia maitai to ea!’”—International Handbook on Alcohol and Culture, tei mahiti i 1995.

20 Parau mau, aita paha e rave rahi taata e mana‘o ra e e peu niu ore aore ra faaroo te pateraa i te hapaina. E nehenehe râ te peu tumu e amo i te hapaina uaina i nia e hi‘ohia mai te hoê aniraa i te “ra‘i”—te hoê puai hau a‘e i to te taata—i te hoê haamaitairaa aita hoi e tuati ra i tei faataahia i roto i te mau Papai.—Ioane 14:6; 16:23. *

 “O OUTOU O TEI HINAARO IA IEHOVA RA, IA RIARIA OUTOU I TE INO”

21. Noa ’tu e aita e tumu faaroo to te reira, eaha te mau oroa matauhia ta te mau Kerisetiano e ape, e no te aha?

21 Ei tapao faaite o te toparaa oioi o te mau ture aveia a teie nei ao i teie tau—ta Babulonia rahi hoi e paturu roa ra aore ra ma te tahi atu mau ravea—te faanaho ra te tahi mau fenua i te mau oroa taravanaraa aore ra te mardi gras i te mau matahiti atoa, i reira e tupu ai te mau oriraa faufau e e faatietie-atoa-hia ’i te huru oraraa tane tane e vahine vahine. E tano anei ia apiti aore ra ia mataitai te feia e here ra ia Iehova i tera mau oroa? Ia na reira te hoê Kerisetiano, e faaite anei ïa oia e te riaria mau ra oia i te ino? (Salamo 1:1, 2; 97:10) Mea maitai a‘e ïa ia pee i te haerea o te papai salamo tei pure e: “E faafariu ê i tau mata ia ore ia hi‘o i te mea faufaa ore”!—Salamo 119:37.

22. I roto i teihea tupuraa e tia ’i i te hoê Kerisetiano ia faaoti ia au i to ’na mana‘o haava e apiti anei i te hoê oroa aore ra eita?

22 I te mau mahana oroa a teie nei ao, e ara te hoê Kerisetiano ia ore to ’na haerea e horoa ia vetahi ê i te mana‘o e te apiti nei oia i te reira. “Te amu ra e te inu ra hoi, e te mau mea atoa ta outou e rave na,” ta Paulo ïa i papai, “e rave ïa ma te haamaitai i te Atua.” (Korinetia 1, 10:31; a hi‘o i te tumu parau tarenihia “ A rave i te mau faaotiraa paari.”) Mai te peu râ e aita iho â e auraa faaroo hape to te hoê peu tumu aore ra oroa, aita e taairaa e te poritita aore ra te here ai‘a, e aita e ofati ra i te mau faaueraa tumu Bibilia, e nehenehe te Kerisetiano taitahi e faaoti no ’na iho e apiti atu anei aore ra eita. E haapao atoa oia i te mau huru aau o vetahi ê ia ore oia e faaturori ia ratou.

A HAAMAITAI I TE ATUA MA TE PARAU E TE OHIPA

23, 24. E nafea tatou e nehenehe ai e horoa i te hoê faaiteraa maitai no nia i te mau ture aveia parau-tia a Iehova?

23 No te taata e rave rahi, e taime maitai na mua roa te mau mahana oroa matauhia ia farerei te fetii e te mau hoa.  No reira, ia mana‘o hape te tahi taata e mea etaeta aore ra mea faarahi to tatou tiaraa Bibilia, e nehenehe tatou e faataa mǎrû e mea au na te mau Ite no Iehova e amuimui maitai e te fetii e te mau hoa. (Maseli 11:25; Koheleta 3:12, 13; Korinetia 2, 9:7) E oaoa tatou i te farerei i tei herehia i te roaraa o te matahiti, no to tatou râ here i te Atua e to tatou hinaaro i ta ’na mau ture aveia parau-tia, eita tatou e hinaaro e haaviivii i taua mau taime oaoa ra i te mau peu tumu o te faainoino ia ’na.—A hi‘o i te tumu parau tarenihia “ E hopoi mai te haamoriraa mau i te oaoa rahi roa ’‘e.”

24 Ua manuïa roa te tahi mau Ite i te faaite i te tahi feia uiui haavare ore i te mau mana‘o o te pene 16 o te buka Eaha ta te Bibilia e haapii mau ra? * A haamana‘o râ i ta tatou fa, o te haaputapûraa ïa i te aau, e ere te haapapuraa e ua tano tatou. No reira, a faatura, a tapea i te mǎrû, e “ei parau mǎrû maitai ana‘e â ta outou, ia rapaauhia i te miti ra.”—Kolosa 4:6.

25, 26. E nafea te mau metua e nehenehe ai e tauturu i ta ratou mau tamarii ia haapuai i to ratou faaroo e to ratou here no Iehova?

25 Ei tavini na Iehova, ua haapii-maitai-hia tatou. Ua ite tatou no te aha tatou e tiaturi ai e e rave ai i te tahi mau mea e e haapae ai i te tahi atu. (Hebera 5:14) No reira e te mau metua, a haapii i ta outou mau tamarii ia feruri i te mau faaueraa tumu Bibilia. E haapuai ïa outou i to ratou faaroo, e tauturu outou ia ratou ia pahono e te mau Papai i te feia o te ui no nia i ta ratou mau tiaturiraa, e e haapapu outou ia ratou e te here ra Iehova ia ratou.—Isaia 48:17, 18; Petero 1, 3:15.

26 Aita noa te feia atoa o te haamori ra i te Atua “ma te varua e te parau mau” e ape ra i te mau oroa aita i roto i te Bibilia, te tutava atoa ra râ i te tapi i te haerea tia i roto i te mau tuhaa atoa o te oraraa. (Ioane 4:23) I teie mahana, mea rahi o te mana‘o ra e aita e faufaa to te haerea tia. Mai ta tatou râ e ite i te pene i muri iho, o te mau e‘a o te Atua te mea maitai roa ’‘e noa.

^ par. 3 A hi‘o i te tumu parau tarenihia “ E mea maitai anei ia apiti au i te oroa?” Ua tapurahia te tahi mau oroa e mahana “mo‘a” taa maitai i roto i te Index des publications Watch Tower, piahia e te mau Ite no Iehova.

^ par. 5 Ia au i te tuatapaparaa tau Bibilia e te tuatapaparaa o te ao, ua fanauhia paha Iesu i te 2 hou to tatou tau i te ava‘e ati Iuda no Etanima, o na ava‘e Tetepa/Atopa ïa i roto i ta tatou nei tarena.—A hi‘o i te Étude perspicace des Écritures, buka 2, api 21, piahia e te mau Ite no Iehova.

^ par. 11 A hi‘o i te tumu parau tarenihia “ Mahana ‘mo‘a’ e haamoriraa ia Satani.”

^ par. 11 I titau na te faufaa o te Ture ia pûpû te hoê vahine, i muri a‘e i te fanauraa i ta ’na aiû, i te hoê tusia no te hara i te Atua. (Levitiko 12:1-8) Ua tauturu teie titauraa e au i te ture, o tei haamana‘o maitai e e tutuu te taata i te hara na ta ratou mau tamarii, i te mau Iseraela ia tapea i te mana‘o faito noa no nia i te fanauraa o te hoê tamarii, a ore atu ai ratou e hinaaro e farii i te mau peu tumu etene o te oroa fanauraa.—Salamo 51:5.

^ par. 13 E ruahine atoa Eostre (aore ra Eastre) o te fanauraa. Ia au i te hoê titionare (The Dictionary of Mythology) e aranabata ta ’na i roto i te ava‘e o te au i te huero moa e, i te tahi mau taime, e upoo aranabata to ’na.

^ par. 18 A hi‘o i na tumu parau e toru no nia i te faaipoiporaa e te mau oroa faaanaanataeraa i roto i Te Pare Tiairaa o te 1 no Novema 2006, api 12-21 e te Tour de Garde o te 15 no Atopa 2006, api 28-31.

^ par. 20 A hi‘o i te Tour de Garde o te 15 no Fepuare 2007, api 30-31.

^ par. 24 Piahia e te mau Ite no Iehova.

No te ite atu â

E tamâ te Arii i ta ’na mau pǐpǐ i te pae varua

Eaha te tuatiraa i rotopu i te Noela e te satauro?