Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 15

A oaoa no ta oe ohipa puai

A oaoa no ta oe ohipa puai

“Ua rave oia i te maitai [aore ra ua oaoa oia] no ta ’na ra ohipa.”—KOHELETA 3:13.

1-3. (a) Eaha te mana‘o o te taata e rave rahi no nia i ta ratou ohipa? (b) Te faaitoito ra te Bibilia i teihea huru mana‘o no nia i te ohipa, e eaha te mau uiraa ta tatou e hi‘opoa i roto i teie pene?

NO TE taata e rave rahi i roto i te ao i teie tau, e ere te ohipa i te mea au maitai. E rave ratou i te hoê ohipa aita ratou e au roa ra e rave rahi hora i te maoro, e e taiâ ratou i te haere i te ohipa i te mau mahana atoa. Ma taua huru feruriraa ra, e mea fifi no ratou ia anaanatae roa i ta ratou ohipa, e mea fifi atu â ïa ia ite i te mauruuru.

2 Te faaitoito ra te Bibilia i te hoê mana‘o tano no nia i te ohipa puai. Ia au i te Bibilia, e ô te ohipa e te mau hotu o te reira. Ua papai Solomona e: “Ua amu ana‘e te taata i te maa e ua inu i te pape, e ua rave oia i te maitai [aore ra ua oaoa oia] no ta ’na ra ohipa, e mea ho-mai-hia mai ïa e te Atua.” (Koheleta 3:13) Te hinaaro ra Iehova, o te here ra ia tatou e o te haapao noa ra i to tatou maitai rahi, ia ite tatou i te mauruuru i roto i ta tatou ohipa e ia oaoa tatou i te hotu o ta tatou ohipa. No te vai noa i roto i to ’na here, e titauhia ia ora tatou ia au i to ’na mana‘o e ta ’na mau faaueraa tumu no nia i te ohipa.—A taio i te Koheleta 2:24; 5:18.

3 I roto i teie pene, e hi‘opoa tatou e maha uiraa: E nafea ia ite i te oaoa no ta tatou ohipa puai? Teihea huru ohipa e ere no te mau Kerisetiano mau? E nafea ia tapea i te vai-faito-raa i rotopu i te ohipa e te mau mea i te pae varua? E eaha te ohipa faufaa roa ’‘e ta tatou e nehenehe e rave? Na mua râ, e hi‘opoa tatou i te hi‘oraa o na rave ohipa rahi roa ’‘e o te ao taatoa—te Atua ra o Iehova e Iesu Mesia.

 TE RAVE OHIPA HAU Ê E TE RAVE OHIPA ARAVIHI

4, 5. E nafea te Bibilia e faaite ai e e rave ohipa maitai o Iehova?

4 O Iehova te Rave ohipa hau ê. Te na ô ra te Genese 1:1 e: “Hamani ihora te Atua i te ra‘i e te fenua i te matamua ra.” I te otiraa ta te Atua ohipa poieteraa i te fenua, ua parau oia e “mea maitai roa” te mau faahopearaa. (Genese 1:31) Te auraa ïa e ua mauruuru roa oia no ta ’na ohipa atoa no nia i te fenua. Ua ite mau â Iehova, “te Atua no ’na te ao,” i te oaoa rahi i te riroraa ei rave ohipa maitai.—Timoteo 1, 1:11.

5 Eita roa ’tu to tatou Atua hahaa e faaea i te rave i te ohipa. Maoro i muri a‘e i te otiraa te poieteraa materia o te fenua, ua parau Iesu e: “Te ohipa noa nei â tau Metua.” (Ioane 5:17) I aha na te Metua? Mai to ’na nohoraa i te ra‘i mai, i haa noa na oia i te aratairaa e te haapaoraa i te huitaata. Ua faahotu mai oia i te “taata apî,” te mau Kerisetiano faatavaihia i te varua o te faatere i te pae hopea e o Iesu i nia i te ra‘i. (Korinetia 2, 5:17) Ua haa oia i nia i te tupuraa o ta ’na opuaraa no te taata—ia fana‘o te feia e here ra ia ’na i te ora mure ore i roto i te hoê ao apî. (Roma 6:23) Eita e ore e ua mauruuru roa Iehova no te mau faahopearaa o teie ohipa. E mirioni tei anaanatae i te poroi o te Basileia, tei faataehia e te Atua ia ’na ra e tei faatano i to ratou oraraa no te vai noa i roto i to ’na here.—Ioane 6:44.

6, 7. Eaha te haapapu ra e mea maoro to Iesu rave-puai-raa i te ohipa?

6 Mea rave puai atoa Iesu i te ohipa e mea maoro i teie nei. Hou oia a riro ai ei taata, ua tavini oia ei rave ohipa aravihi na te Atua i roto i te poieteraa i “to te ra‘i, e to te fenua nei” mau mea atoa. (Maseli 8:22-31; Kolosa 1:15-17) I te fenua nei, ua tamau Iesu i te rave puai i te ohipa. I to ’na apîraa, ua haapii oia i te toroa hamani fare, a matauhia ’i oia mai “te tamuta.” * (Mareko 6:3) Mea rohirohi roa tera toroa  o te titau i te aravihi e rave rau—i te hoê tau iho â râ aita e fare tâpûraa raau, aita e fare hooraa taihaa e aita e mauhaa uira. E nehenehe anei oe e feruri ia Iesu ia haere e tii i ta ’na mau tâpû raau—ma te tâpû paha i te mau tumu raau e ma te huti atu i ta ’na vahi raveraa ohipa? E nehenehe anei oe e feruri ia ’na ia hamani i te fare—ma te faaineine e te tamau i te mau pou tapo‘i fare, ma te hamani i te mau opani, e te tahi mau taihaa atoa? Eita e ore e ua ite roa Iesu i te mauruuru no te rave-maitai-raa i te hoê ohipa puai.

7 E rave ohipa hahaa faahiahia Iesu i roto i ta ’na taviniraa. E toru matahiti e te afa i te maoro, ua haa rahi oia i roto i teie ohipa faufaa roa. No to ’na hinaaro e farerei e rave rahi roa taata, ua faaohipa taatoa oia i to ’na mau mahana, ma te tia i nia i te poipoi roa e ma te haa e tae noa ’tu i te rui. (Luka 21:37, 38; Ioane 3:2) Ua haere oia “na roto i te mau oire e te mau oire rii atoa, i te poro haere[ra]a i te parau maitai ra o te basileia o te Atua.” (Luka 8:1) Ua hanere kilometera i te atea to Iesu haere-avae-raa na te mau e‘a repo puehu e faaite i te parau apî maitai i te taata.

8, 9. Mea nafea to Iesu iteraa i te oaoa no ta ’na ohipa puai?

8 Ua ite anei Iesu i te oaoa no ta ’na ohipa puai i roto i te taviniraa? E! Ua ueue oia i te mau huero o te parau mau o te Basileia, e ua vaiiho atu i te mau aua ua paari te maa no te ootiraa. No te mea ua puaihia e ua itoitohia Iesu i te raveraa i te ohipa a te Atua, ua ineine oia i te haapae i te maa no te faaoti roa i te reira. (Ioane 4:31-38) A mana‘o na i te mauruuru ta ’na i ite i te hopea o ta ’na taviniraa i te fenua, ua tia hoi ia ’na ia parau i to ’na Metua e: “Ua haamaitai au ia oe i te ao nei; ua oti ia ’u te ohipa ta oe i ho mai na ’u e rave ra.”—Ioane 17:4.

9 Papu maitai, o Iehova e o Iesu te hi‘oraa faahiahia roa ’‘e o tei ite i te oaoa no ta raua ohipa puai. No to tatou here ia Iehova, e tutava tatou i te “pee . . . i te Atua.” (Ephesia 5:1) No to tatou here ia Iesu, e turaihia tatou ia “pee” maite “i to  ’na taahiraa avae.” (Petero 1, 2:21) I teie nei, e hi‘o mai tatou e nafea tatou atoa e ite ai i te oaoa no ta tatou ohipa puai.

E NAFEA IA ITE I TE OAOA NO TA TATOU OHIPA PUAI

E nehenehe te faaohiparaa i te mau faaueraa tumu Bibilia e tauturu ia oe ia ite i te oaoa no ta oe ohipa puai

10, 11. Eaha te tauturu ia tatou ia atuatu i te hoê mana‘o faaitoito no nia i ta tatou ohipa?

10 E parahiraa to te ohipa i roto i te oraraa o te mau Kerisetiano mau. E hinaaro tatou e ite i te oaoa e te tahi faito mauruuru i roto i ta tatou ohipa, e nehenehe râ te reira e riro ei mea fifi roa mai te peu e aita tatou e au ra i ta tatou ohipa. E nafea e tia ’i ia ite i te oaoa no ta tatou ohipa i roto i tera mau tupuraa?

11 Ma te atuatu i te mana‘o faaitoito. Eita ta tatou e nehenehe noa e taui i to tatou mau tupuraa, e nehenehe râ tatou e taui i to tatou huru feruriraa. Ia feruriruri tatou i te mana‘o o te Atua, e nehenehe tatou e atuatu i te mana‘o faaitoito no nia i te ohipa. Ei hi‘oraa, mai te peu e e upoo utuafare oe, a feruri e maoti ta oe ohipa noa ’tu te au ore ia hi‘ohia, e mâha ’i te mau hinaaro materia o to oe utuafare. E ere hoi te haapaoraa i to oe utuafare here i te mea faufaa ore i te aro o te Atua. Ia au i ta ’na Parau, te taata e ore e hamani maitai i to ’na utuafare, “e rahi atu ïa to ’na ino i to te taata mau ore ra,” aore ra faaroo ore. (Timoteo 1, 5:8) Ia farii oe e e ravea ta oe ohipa e raea ’i te hoê fa—te neheneheraa oe e rave i te hoê hopoia ta te Atua i horoa ’tu—e ite ïa oe i roto i ta oe ohipa i te tahi faito mauruuru e te anaanatae, ta to oe mau hoa ohipa paha e ere nei.

12. E nafea tatou e maitai ai i te raveraa i ta tatou ohipa ma te haapao maitai e te haerea tia?

12 Ma te haapao maitai e te haerea tia. E nehenehe te ohipa-puai-raa e te haapiiraa e nafea ia rave maitai i ta tatou ohipa e hopoi mai i te mau maitai. E pinepine te mau rave ohipa aravihi e te haapao maitai, i te au-rahi-hia e to ratou  mau paoti. (Maseli 12:24; 22:29) Ei Kerisetiano mau, e mea tia ia faaite atoa tatou i te haerea tia i roto i ta tatou ohipa—eiaha e eiâ i te moni, te taihaa, aore ra te taime i to tatou paoti. (Ephesia 4:28) Mai ta tatou i ite i to na mua ’tu pene, e maitai te noaa mai i te haerea tia. E tiaturihia te hoê rave ohipa tei matauhia no to ’na haerea tia. E noa ’tu e e tapao to tatou paoti e e rave ohipa puai tatou aore ra eita, e nehenehe tatou e ite i te mauruuru no ǒ mai i te hoê “aau,” aore ra mana‘o haava, “tia” e te iteraa e te faaoaoa nei tatou i te Atua ta tatou e here ra.—Hebera 13:18; Kolosa 3:22-24.

13. Eaha paha te mau faahopearaa o to tatou hi‘oraa maitai i te ohipa?

 13 Ma te ite maite e e nehenehe to tatou haerea e haamaitai i te Atua. Ia faaite tatou i te haerea Kerisetiano maitai roa i ta tatou vahi raveraa ohipa, mea papu e e tapao vetahi ê i te reira. E eaha te faahopearaa? E “nehenehe [ïa] te parau a te Atua,” “to tatou Ora” ia tatou. (Tito 2:9, 10) Oia, na roto i to tatou haerea maitai roa e nehenehe ai vetahi ê e ite i te nehenehe o ta tatou huru haamoriraa, a riro ai te reira ei mea au roa ’tu â no ratou. A feruri na eaha to oe huru ia anaanatae te hoê hoa ohipa i te parau mau no to oe hi‘oraa maitai i te ohipa! Te mea faufaa roa ’‘e, a feruri na: Eaha hoi te mea maitai a‘e i te iteraa e te faahanahana ra to tatou haerea maitai roa ia Iehova e te faaoaoa ra i to ’na aau?—A taio i te Maseli 27:11; Petero 1, 2:12.

TE HAROAROARAA IA MAITI TATOU I TE OHIPA

14-16. Ia rave tatou i te faaotiraa no nia i te ohipa, eaha na uiraa faufaa e mea tia ia pahono tatou?

14 Aita te Bibilia e tatara hu‘ahu‘a ra eaha te huru ohipa e fariihia e te ore e fariihia. E ere ïa te auraa e e nehenehe tatou e farii i te mau huru ohipa atoa. E nehenehe te mau Papai e tauturu ia tatou ia maiti i te hoê ohipa tia e te hoona ta te Atua e au e e ape i te ohipa ta ’na e ore e au. (Maseli 2:6) Ia rave tatou i te faaotiraa no nia i te ohipa, te vai ra e piti uiraa faufaa e mea tia ia pahono tatou.

15 Te raveraa i teie ohipa taa ê, e ohipa anei ïa o te faahapahia ra e te Bibilia? Te faahapa maitai ra te Parau a te Atua i te eiâ, te haavare e te hamaniraa i te idolo. (Exodo 20:4; Ohipa 15:29; Ephesia 4:28; Apokalupo 21:8) E patoi tatou i te mau ohipa atoa o te turai ia tatou ia rave i tera mau mea. No to tatou here ia Iehova, eita roa ’tu tatou e farii i te hoê ohipa o te turai ia tatou ia rave i te mau peu o te ofati i te mau faaueraa a te Atua.—A taio i te Ioane 1, 5:3.

 16 Ia rave tatou i teie ohipa, te apiti ra aore ra te turu mau ra anei tatou i te hoê peu ino? A rave na i te hoê hi‘oraa. E ere te ohipa fariiraa taata i te mea ino. E nafea râ ia pûpûhia na te hoê Kerisetiano tera huru ohipa i te hoê fare ma‘i haamaruaraa tamarii? Parau mau, eita ta ’na tuhaa ohipa e titau ia ’na ia apiti roa ’tu i te mau haamaruaraa tamarii. Teie râ, eita anei to ’na ohipa-tamau-raa i reira e turu i te haaraa a te hoê fare ma‘i o te haamarua i te tamarii—te  hoê peu tuati ore i te Parau a te Atua? (Exodo 21:22-24) O tatou e here ra ia Iehova, aita tatou e hinaaro ra ia taai-piri-roa-hia tatou i teie mau peu aita i roto i te Bibilia.

17. (a) Eaha ta tatou e feruri maitai ia rave tatou i te faaotiraa no nia i te ohipa? (A hi‘o i te tumu parau tarenihia “ No ’u anei tera ohipa?”) (b) E nafea to tatou mana‘o haava e tauturu ai ia tatou ia rave i te mau faaotiraa ta te Atua e au?

17 Mea rahi te uiraa no nia i te ohipa o te nehenehe e pahonohia ma te hi‘opoa maitai i te mau pahonoraa o na uiraa faufaa e piti i na paratarafa 15 e 16. Hau atu â, te vai ra te tahi atu mau mea e mea tia ia feruri maitai tatou ia rave tatou i te faaotiraa no nia i te ohipa. * Eita ta tatou e nehenehe e tiai ia haamau te tavini haapao maitai i te mau faatureraa  no nia i te mau tupuraa atoa e nehenehe e fa mai. I ǒ nei ïa e hinaarohia ’i ia faahotu tatou i te haroaroaraa. Mai ta tatou i ite i te pene 2, e titauhia ia haapii tatou i to tatou mana‘o haava ma te hi‘opoa e nafea ia faaohipa i te Parau a te Atua i roto i to tatou oraraa o te mau mahana atoa. Ma to tatou “puai haroaroaraa” haamatarohia “na roto i te faaohiparaa,” e nehenehe to tatou mana‘o haava e tauturu ia tatou ia rave i te mau faaotiraa ta te Atua e au e ia vai noa i roto i to ’na here.—Hebera 5:14, Traduction du monde nouveau.

IA FAITO NOA TO TATOU MANA‘O NO NIA I TE OHIPA

18. No te aha e ere ai i te mea ohie ia vai faito noa i te pae varua?

18 E ere i te mea ohie ia vai faito noa i te pae varua i teie “anotau hopea” e te mau taime ati rahi faaruru atâ. (Timoteo 2, 3:1) E mea fifi roa ia noaa mai e ia tapea noa i te hoê ohipa. Ei Kerisetiano mau, ua ite tatou i te faufaaraa ia rave puai i te ohipa no te aupuru i to tatou utuafare. Ia ore râ tatou e haapao maitai, e nehenehe te faaheporaa i te vahi raveraa ohipa aore ra te nounou tao‘a pee haere noa o teie nei ao e haafifi i ta tatou mau ohipa pae varua. (Timoteo 1, 6:9, 10) E hi‘o mai tatou e nafea ia tapea i to tatou vai-faito-raa, ma te hi‘opoa i “te mau mea i hau i te maitai.”—Philipi 1:10.

19. No te aha e au ai ia Iehova to tatou tiaturi taatoa, e eaha ta tera tiaturi e tauturu ia tatou ia ape?

19 A tiaturi roa ia Iehova. (A taio i te Maseli 3:5, 6.) E au ia ’na taua tiaturi ra, e ere anei? Inaha, te tiai ra o ’na ia tatou. (Petero 1, 5:7) Ua ite a‘e o ’na i to tatou mau hinaaro ia tatou nei, e aita roa ’tu to ’na rima i poto. (Salamo 37:25) E mea maitai ïa ia faaroo tatou ia haamana‘o mai ta ’na Parau e: “Ei parahiraa nounou tao‘a ore to outou, ia mauruuru i ta outou i noaa ra; o te Atua iho hoi tei parau mai e, E ore roa vau e taiva ia oe, e ore roa vau e faarue ia oe, e ore, e ore roa ’tu.” (Hebera 13:5) Mea rahi te tavini taime taatoa o te nehenehe e haapapu e e tia i te Atua ia horoa mai i te  mau mea hinaaro-mau-hia o te oraraa. Ia tiaturi roa tatou e te tiai maira iho â Iehova ia tatou, e ape ïa tatou i te haapeapea hua no te aupururaa i to tatou utuafare. (Mataio 6:25-32) Eita tatou e tuu i te hiti i te mau ohipa pae varua, mai te pororaa i te parau apî maitai e te haereraa i te mau putuputuraa,  no ta tatou noa ’‘e ohipa.—Mataio 24:14; Hebera 10:24, 25.

20. Eaha te auraa e tapea i te mata o te tiatonu i te tapao hoê, e e nafea oe e na reira noa ’i?

20 Ia tiatonu to mata i te tapao hoê. (A taio i te Mataio 6:22, 23.) Ia maitai to tatou mata, te auraa ïa ia ore ia ohipa rahi to tatou oraraa. E tiatonu te mata o te hoê Kerisetiano i te hoê noa tapao—te raveraa i te hinaaro o te Atua. Mai te peu e ua faatano-maitai-hia to tatou mata, eita tatou e onoono i te titau i te hoê ohipa aufau-maitai-hia e te hoê huru oraraa faahiahia. Eita atoa tatou e topa i roto i te imiraa hopea ore i te mau mea materia maitai roa ’‘e e te apî roa ’‘e ta te feia faatianiani i tamata i te haapapu mai e e hinaaro tatou i te reira no te oaoa. E nafea ia tapea i te mata o te tiatonu i te tapao hoê? A ape i te faateimaha ia oe i te tarahu faufaa ore. Eiaha e faaapǐapǐ i to oe oraraa i te mau tao‘a o te haapau rahi roa i te taime e te ara-maite-raa. A pee i te a‘oraa Bibilia ia mauruuru i te “maa . . . e te ahu.” (Timoteo 1, 6:8) A tutava i te faaohie roa i to oe oraraa.

21. No te aha e titauhia ’i ia haamau tatou i te mau fa matamua, e eaha ta tatou e rave na mua i roto i to tatou oraraa?

21 A haamau i te mau fa pae varua, e a tapi i te reira. I te mea e aita rea mea ta tatou e nehenehe e rave i roto i te oraraa, e titauhia ïa ia haamau tatou i te mau fa matamua. Aita ana‘e, e nehenehe te mau mea iti a‘e i te faufaa e haapau i te taime faufaa roa, a tuuhia ’tu ai te mau mea faufaa roa ’‘e i te hiti. Eaha ta tatou fa matamua i roto i to tatou oraraa e tia ’i? Mea rahi to te ao o te haafaufaa na mua i te haapiiraa teitei no te fana‘o i te hoê toroa aufau-maitai-hia i roto i teie nei ao. Ua faaue râ Iesu i ta ’na mau pǐpǐ ia “mata na . . . i te imi i te basileia.” (Mataio 6:33) Oia, ei Kerisetiano mau, e tuu tatou i te Basileia o te Atua i te parahiraa matamua i roto i to tatou oraraa. E mea tia ia faaite to tatou huru oraraa—ta tatou mau maitiraa, ta tatou mau fa e ta tatou mau ohipa—e o te mau faufaa a te Basileia e te hinaaro o te Atua te  mea faufaa a‘e no tatou, eiaha râ te mau tapitapi materia e te mau ohipa a teie nei ao.

E OHIPA PUAI ANA‘E I ROTO I TE TAVINIRAA

E nehenehe tatou e faaite i to tatou here no Iehova ma te faariro i te pororaa ei fa matamua i roto i to tatou oraraa

22, 23. (a) Eaha te ohipa faufaa roa a te mau Kerisetiano mau, e e nafea tatou e faaite ai e mea faufaa te reira no tatou? (A hi‘o i te tumu parau tarenihia “ Ua horoa mai ta ’u faaotiraa i te oaoa e te mauruuru.”) (b) Eaha ta oe faaotiraa papu no nia i te ohipa?

22 I te mea e te ora roa nei tatou i te tau hopea, te tiatonu noa ra tatou i te ohipa faufaa roa a te mau Kerisetiano mau—e poro e e faariro i te taata ei pǐpǐ. (Mataio 24:14; 28:19, 20) Mai to tatou Hi‘oraa ra o Iesu, te hinaaro ra tatou e haa roa i roto i teie ohipa faaora. E nafea tatou e faaite ai e mea faufaa teie ohipa no tatou? Te apiti ra te rahiraa o te nunaa o te Atua i roto i te mau amuiraa ma te aau atoa i te pororaa ei feia poro. Ua faanaho vetahi ia ratou no te tavini ei pionie aore ra mitionare. Mea rahi te metua tei faaitoito i ta ratou mau tamarii ia tapi i te taviniraa taime taatoa ei toroa no ratou, ua taa hoi ia ratou te faufaaraa o te mau fa pae varua. Te ite ra anei te feia poro itoito rahi i te Basileia i te oaoa no ta ratou ohipa puai i roto i te taviniraa? Oia mau! O te taviniraa ia Iehova ma te aau atoa te ravea papu no te fana‘o i te hoê oraraa oaoa, te mauruuru e te haamaitai-rahi-roa-hia.—A taio i te Maseli 10:22.

23 E titauhia ia rave e rave rahi o tatou i te ohipa ehia hora i te maoro no te aupuru i to tatou utuafare i te pae materia. A haamana‘o e te hinaaro ra Iehova ia ite tatou i te oaoa no ta tatou ohipa puai. Ma te faatuati i to tatou huru feruriraa e ta tatou mau ohipa i to ’na mana‘o e ta ’na mau faaueraa tumu, e nehenehe tatou e ite i te mauruuru i roto i ta tatou ohipa. Ia faaoti papu râ ïa tatou eiaha roa ’tu e vaiiho i ta tatou ohipa ia faaatea ia tatou i ta tatou ohipa faufaa roa—e faaite i te parau apî maitai o te Basileia o te Atua. Ma te rave na mua i teie ohipa i roto i to tatou oraraa, e faaite ïa tatou i to tatou here no Iehova e e vai noa ïa tatou i roto i to ’na here.

^ par. 6 Te ta‘o Heleni tei hurihia ei “tamuta,” e “ta‘o aano [ïa] no te hoê rave ohipa aravihi i nia i te raau, e hamani anei i te fare aore ra te taihaa fare aore ra te tahi atu mau mea raau atoa.”

^ par. 17 Ei faahohonuraa ’tu â i te mau mea e feruri no nia i te ohipa, a hi‘o i Te Pare Tiairaa o te 15 no Eperera 1999, api 28-30, e te Tour de Garde o te 15 no Atopa 1982, api 26.