Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 6

E nafea ia maiti i te faaanaanataeraa maitai?

E nafea ia maiti i te faaanaanataeraa maitai?

“E te mau mea atoa ta outou e rave na, e rave ïa ma te haamaitai i te Atua.”—KORINETIA 1, 10:31.

1, 2. Eaha te maitiraa e titauhia ia rave tatou no nia i te faaanaanataeraa?

A FERURI na e te haamata ra oe i te amu i te hoê maa hotu monamona, e ite râ oe e ua pê te hoê vahi. Eaha ta oe e rave? E nehenehe oe e amu pauroa i te maa hotu, te vahi ino atoa; e nehenehe oe e faarue i te maa hotu taatoa, te vahi ino atoa; aore ra e nehenehe oe e tâpû i te vahi ino o te maa hotu, e amu atu ai i te vahi maitai. Eaha ta oe e maiti?

2 I roto i te hoê auraa, e au te faaanaanataeraa i taua maa hotu ra. I te tahi taime, e hinaaro oe e faafaaea rii, ua ite râ oe e mai te maa hotu pê, mea ino e rave rahi faaanaanataeraa e vai nei i teie mahana i te pae morare. No reira, eaha ta oe e rave? E farii paha vetahi i te mea ino e i te faaanaanataeraa atoa ta teie nei ao e pûpû ra. E ape paha te tahi atu i te faaanaanataeraa atoa no te ape i te mau mea atâta atoa. Area te tahi atu, e ape maite paha ïa i te faaanaanataeraa atâta, i te tahi râ taime e apiti ratou i te faaanaanataeraa huru maitai. Eaha ta oe e maiti no te vai maite i roto i te here o te Atua?

3. Eaha ta tatou e hi‘opoa i teie nei?

3 E rave te rahiraa o tatou i te maitiraa toru. Ua ite tatou i te faufaaraa ia faafaaea rii, e hinaaro noa râ tatou i te faaanaanataeraa maitai i te pae morare. No reira, e titauhia ia hi‘opoa tatou e nafea ia faataa eaha te mea maitai e eaha te  mea ino. Na mua râ, e hi‘opoa tatou eaha te faahopearaa o ta tatou maitiraa i te faaanaanataeraa i nia i ta tatou haamoriraa ia Iehova.

‘E RAVE I TE MAU MEA ATOA MA TE HAAMAITAI I TE ATUA’

4. E nafea ta tatou pûpûraa ia ohipa i nia i ta tatou maitiraa i te faaanaanataeraa e tia ’i?

4 Tau taime a‘enei, ua parau te hoê Ite ruhiruhia tei bapetizohia i 1946 e: “E imi au i te ravea e tae noa ’i au i te mau oreroraa parau bapetizoraa atoa e e faaroo maite ai mai te huru ra e no ’u te bapetizoraa.” No te aha? Ua faataa oia e, “O te haamana‘o-maitai-raa i ta ’u pûpûraa te hoê ravea faufaa e vai taiva ore noa ’i au.” Eita e ore e tera atoa to oe mana‘o. Ia haamana‘o oe e ua euhe oe ia Iehova i te faaohipa i to oe oraraa taatoa no te tavini ia ’na, e turaihia ïa oe ia faaoromai. (A taio i te Koheleta 5:4.) Inaha, e ohipa te feruriruriraa i ta oe pûpûraa i nia i ta oe huru hi‘oraa eiaha noa i te taviniraa Kerisetiano, oia atoa râ i te tahi atu mau tuhaa atoa o te oraraa—tae noa ’tu te faaanaanataeraa. Ua haapapu te aposetolo Paulo i taua parau mau ra i to ’na papairaa i te mau Kerisetiano i to ’na ra tau: “Te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua.”—Korinetia 1, 10:31.

5. E nafea te Levitiko 22:18-20 e tauturu mai ai ia ite i te auraa faaararaa i roto i te Roma 12:1?

 5 Ua taaihia te mau mea atoa ta oe e rave i roto i te oraraa i ta oe haamoriraa ia Iehova. I roto i ta ’na rata i to Roma, ua faaohipa Paulo i te hoê parau puai no te faataa maitai i teie parau mau i to ’na mau hoa Kerisetiano. Ua a‘o atu oia e: “Ia pûpû atu outou i to outou mau tino ei tusia ora, e te mo‘a, e te au hoi i te Atua ra, o te haamori au ïa ia outou.” (Roma 12:1) To oe tino, to oe atoa ïa feruriraa, aau e puai. Te faaohipa ra oe i teie mau mea atoa i roto i te haamoriraa i te Atua. (Mareko 12:30) Te faahiti ra Paulo i tera haamoriraa ma te nephe atoa mai te hoê tusia. E auraa faaararaa to roto i taua parau ra. I raro a‘e i te ture a Mose, eita te hoê tusia ino e fariihia e te Atua. (Levitiko 22:18-20) Oia atoa, mai te peu e ua viivii te hoê tusia pae varua a te hoê Kerisetiano, eita ïa e fariihia e te Atua. E nafea hoi te reira e tupu ai?

6, 7. E nafea te hoê Kerisetiano e nehenehe ai e haaviivii i to ’na tino, e eaha te mau faahopearaa e nehenehe e tupu mai?

6 Ua a‘o Paulo i te mau Kerisetiano i Roma e: “Eiaha . . . e horoahia to outou tino ei mauhaa na te ino [aore ra hara].” Ua parau atoa Paulo ia ratou “ia tinai . . . i ta te tino ra.” (Roma 6:12-14; 8:13) Na mua ’tu i roto i ta ’na rata, i horoa na oia i te tahi mau hi‘oraa o “ta te tino.” No nia i te huitaata hara, te taio ra tatou: “Ua î to ratou vaha i te tuhi.” “E oioi to ratou avae i te haamanii i te toto.” “Aore roa e mǎta‘u i te Atua i mua i to ratou mata.” (Roma 3:13-18) E faaino te hoê Kerisetiano i to ’na tino mai te peu e e faaohipa oia i to ’na “tino” no tera mau peu hara. Ei hi‘oraa, mai te peu e e hi‘o te hoê Kerisetiano i teie mahana ma te opua i te mau mea hairiiri mai te hoho‘a faufau aore ra e mataitai o ’na i te haavîraa u‘ana aroha ore, te ‘horoa’ nei ïa o ’na i to ’na mata ‘ei mauhaa na te hara,’ a viivii atu ai to ’na tino taatoa. E riro te haamoriraa atoa ta ’na e pûpû ei tusia e ere  i te mea mo‘a faahou e ta te Atua e ore e farii. (Deuteronomi 15:21; Petero 1, 1:14-16; Petero 2, 3:11) Auê ïa faahopearaa ino mau no te maitiraa i te faaanaanataeraa tano ore!

7 Te taa ra ia tatou e e faahopearaa rahi to te maitiraa a te hoê Kerisetiano i te faaanaanataeraa. No reira, e hinaaro iho â ïa tatou e maiti i te faaanaanataeraa o te faanehenehe, eiaha o te haaviivii, i ta tatou tusia na te Atua. I teie nei, e hi‘opoa tatou e nafea ia faataa eaha te mea maitai e eaha te mea ino.

“IA RIARIA I TE INO”

8, 9. (a) E pinepine, e nehenehe te faaanaanataeraa e vahihia i roto i teihea na huru e piti? (b) Teihea huru faaanaanataeraa ta tatou e patoi, e no te aha?

8 E pinepine, e nehenehe te faaanaanataeraa e vahihia i roto e piti huru. Te faaanaanataeraa ta te mau Kerisetiano e ape roa e te faaanaanataeraa fariihia aore ra eita i te hi‘oraa a te mau Kerisetiano. E hi‘opoa ana‘e na mua i te huru matamua—te faaanaanataeraa ta te mau Kerisetiano e ape.

9 Mai tei tapaohia i te pene 1, e faaiteite te tahi mau huru faaanaanataeraa i te mau ohipa tei faahapa-maitai-hia i roto i te Bibilia. A mana‘o na ei hi‘oraa i te mau afata poroi Web, oia atoa te mau hoho‘a teata, te mau porotarama afata teata e te upaupa e ohipa aroha ore, demoni, aore ra faufau to roto aore ra o te faaitoito ra i te mau peu morare ore e te hairiiri. I te mea e te faaiteite ra tera mau huru faaanaanataeraa haapaoraa ore i te mau ohipa o te ofati ra i te mau faaueraa tumu aore ra ture Bibilia ei mea fariihia, e mea maitai ïa ia maue ê te mau Kerisetiano mau i te reira. (Ohipa 15:28, 29; Korinetia 1, 6:9, 10; Apokalupo 21:8) Ma te patoi i tera mau faaanaanataeraa tano ore, te haapapu ra ïa oe ia Iehova e te “riaria” ra iho â oe “i te ino” e te “haapae” tamau ra oe “i te ino.” No reira, e “faaroo haavare ore” to oe.—Roma 12:9; Salamo 34:14; Timoteo 1, 1:5.

10. Eaha te mana‘o atâta no nia i te faaanaanataeraa, e no te aha?

 10 Te mana‘o ra râ paha vetahi e aita e ino ia mataitai i te faaanaanataeraa o te faaiteite maitai ra i te haerea faufau. Te na ô ra ratou, ‘E nehenehe ta ’u e mataitai i te reira i roto i te mau hoho‘a teata aore ra te afata teata, eita roa ’tu râ vau e rave i tera mau mea.’ E mana‘o haavarevare tera e te atâta. (A taio i te Ieremia 17:9.) Mai te peu e e faaanaanataeraa no tatou ia mataitai i ta Iehova e faahapa ra, te “riaria” mau ra anei ïa tatou “i te ino”? Ia tamau noa tatou i te mataitai, taio, aore ra faaroo i te haerea ino, eita tatou e huru ê faahou. (Salamo 119:70; Timoteo 1, 4:1, 2) E nehenehe te reira e ohipa i nia i ta tatou e rave aore ra to tatou mana‘o i te haerea hara o vetahi ê.

11. Mea nafea i tano ai te Galatia 6:7 i roto i te faaanaanataeraa?

11 I tupu na hoi te reira. Ua rave te tahi mau Kerisetiano i te mau ohipa morare ore no te mea ua hema ratou i te faaanaanataeraa ta ratou i matau i te mataitai. Ua ite atura ratou ma te peapea e o “ta te taata e ueue ra, o ta ’na â ïa e ooti mai.” (Galatia 6:7) E nehenehe hoi taua faahopearaa peapea ra e apehia. Mai te peu e e ueue maitai oe i te mea viivii ore i roto i to oe feruriraa, e ooti ïa oe ma te oaoa i te mea maitai i roto i to oe oraraa.—A hi‘o i te tumu parau tarenihia “ Teihea faaanaanataeraa e mea maitai ia maiti au?

FAAOTIRAA A TE TAATA IHO NIUHIA I NIA I TE MAU FAAUERAA TUMU BIBILIA

12. Eaha te taairaa o te Galatia 6:5 e te faaanaanataeraa, e na te aha e aratai ia tatou no nia i ta tatou iho mau faaotiraa e rave?

12 E hi‘opoa ana‘e i teie nei i te piti o te huru faaanaanataeraa—oia hoi te mau ohipa aita e faahapahia ra e aita atoa e fariihia ra ma te taa maitai i roto i te Parau a te Atua. Ia maiti oia i tera huru faaanaanataeraa, e titauhia ia faaoti te Kerisetiano taitahi no ’na iho i te mea maitai i ta ’na  hi‘oraa. (A taio i te Galatia 6:5.) I mua râ i teie maitiraa, te vai ra te aratairaa. E faaueraa tumu, aore ra pue parau mau faufaa roa, to roto i te Bibilia, o te tauturu mai ia ite i te mana‘o o Iehova. Ma te haapao maite i taua mau faaueraa tumu ra, e tia ia tatou ia haroaroa “i to te Fatu ra hinaaro” i roto i te mau mea atoa, oia atoa ta tatou maitiraa i te faaanaanataeraa.—Ephesia 5:17.

13. Eaha te turai ia tatou ia ape i te faaanaanataeraa o te nehenehe e haapeapea ia Iehova?

 13 Papu maitai, e ere hoê â faito haroaroaraa morare ta te taatoaraa o te mau Kerisetiano i faatupu. (Philipi 1:9) Hau atu â, ua ite te mau Kerisetiano e no nia i te faaanaanataeraa, ua rau ta te taata e au e e ore e au. No reira, eiaha ïa e tiai ia rave te mau Kerisetiano atoa i te hoê â mau faaotiraa. Teie râ, e rahi atu â tatou i te vaiiho i te mau faaueraa tumu a te Atua ia ohipa i nia i to tatou feruriraa e aau, e rahi atu â tatou i te ape i te mau huru faaanaanataeraa atoa o te nehenehe e haapeapea ia Iehova.—Salamo 119:11, 129; Petero 1, 2:16.

14. (a) Ia maiti tatou i te faaanaanataeraa, e feruri tatou i te aha? (b) E nafea ia tuu noa i te mau mea pae varua i te parahiraa matamua i roto i te oraraa?

14 Ia maiti oe i te faaanaanataeraa, a feruri i te tahi atu mea faufaa: to oe taime. E faaite te huru o ta oe faaanaanataeraa eaha te mea fariihia no oe, e faaite atoa râ te rahiraa taime ta oe e horoa no te reira eaha te mea faufaa no oe. Parau mau, o te mau mea pae varua te mea faufaa roa ’‘e no te mau Kerisetiano. (A taio i te Mataio 6:33.) Eaha ïa ta oe e nehenehe e rave ia papu ia oe e tei te parahiraa matamua noa i roto i to oe oraraa te mau mea pae varua? Ua parau te aposetolo Paulo e: “E ara ia tia to outou haerea, eiaha mai ta te ite ore ra, mai ta te feia ite râ, ma te faaherehere maite i te taime.” (Ephesia 5:15, 16) Oia mau, e tauturu te taotia-maitai-raa i te rahiraa taime ta oe e faataa no te faaanaanataeraa ia oe ia fana‘o i te taime hinaarohia e vai ra no “te mau mea i hau i te maitai”—te mau ohipa o te haamaitai i to oe ea pae varua.—Philipi 1:10.

15. No te aha e haerea paari ai ia haapao maitai roa ’tu â tatou ia maiti tatou i te faaanaanataeraa?

15 E haerea paari atoa ia haapao maitai roa ’tu â tatou ia maiti tatou i te faaanaanataeraa. Eaha ïa te auraa? A feruri â na i te hi‘oraa o te maa hotu. No te ape i te amu hape i te vahi pê, eita oe e tâpû noa i te vahi ino, na te hiti atoa  râ. Oia atoa no nia i te maitiraa i te faaanaanataeraa. E ape te hoê Kerisetiano paari eiaha noa i te faaanaanataeraa o te ofati roa ra i te mau faaueraa tumu Bibilia, oia atoa râ i te mau huru faaanaanataeraa papu ore aore ra e au ra e e tuhaa atâta i te pae varua to roto. (Maseli 4:25-27) E tauturu te pee-maite-raa i te Parau a te Atua ia oe ia ape i te reira.

“TE MAU MEA VIIVII ORE”

Ia maiti tatou i te faaanaanataeraa, e paruru te faaohiparaa i te mau faaueraa tumu a te Atua ia tatou i te ino pae varua

16. (a) E nafea tatou e faaite ai e te haapao ra tatou i te mana‘o o Iehova no nia i te mau mea morare? (b) E nafea te faaohiparaa i te mau faaueraa tumu Bibilia e riro ai ei huru oraraa no oe?

16 Ia maiti ratou i te faaanaanataeraa, e haapao na mua roa te mau Kerisetiano mau i te mana‘o o Iehova. Te faaite ra te Bibilia i te mau huru aau o Iehova e ta ’na mau ture aveia. Ei hi‘oraa, te faahiti ra te arii Solomona i te tahi mau mea ta Iehova e riri roa, mai “te arero haavare, e te rima i manii ai te toto hara ore ra; o te aau i opua i te parau ino ra; e te avae e horo oioi e rave i te ino.” (Maseli 6:16-19) E nafea te mana‘o o Iehova ia ohipa i nia i to oe iho e tia ’i? “O outou o tei hinaaro ia Iehova ra,” te a‘oraa ïa a te papai salamo, “ia riaria outou i te ino.” (Salamo 97:10) E mea tia ia faaite ta oe maitiraa i te faaanaanataeraa e mea riaria iho â na oe ta Iehova e riri roa ra. (Galatia 5:19-21) A haamana‘o atoa e na roto i ta oe e rave o oe ana‘e, eiaha râ i mua i te taata, e itehia ’i eaha to oe huru mau. (Salamo 11:4; 16:8) No reira, ia hinaaro iho â oe e faaite i roto i te mau tuhaa  atoa o to oe oraraa i te mau huru aau o Iehova no nia i te mau mea morare, e rave noa ïa oe i te mau maitiraa e tuati i te mau faaueraa tumu Bibilia. E riro te na reiraraa ei huru oraraa no oe.—Korinetia 2, 3:18.

17. Hou a maiti ai i te faaanaanataeraa, eaha na uiraa e mea maitai ia ui tatou ia tatou iho?

17 Eaha ’tu â ta oe e nehenehe e rave no te ite papu e e ohipa oe ia au i te huru feruriraa o Iehova ia maiti oe i te faaanaanataeraa? A feruri i teie uiraa, ‘Eaha te faahopearaa i nia ia ’u e to ’u taairaa e te Atua?’ Ei hi‘oraa, hou a faaoti ai i te mataitai anei i te hoê hoho‘a teata, a ui ia oe iho, ‘Eaha te faahopearaa o tera hoho‘a teata i nia i to ’u mana‘o haava?’ E hi‘opoa ana‘e eaha te mau faaueraa tumu e tano no te reira.

18, 19. (a) E nafea te faaueraa tumu o te Philipi 4:8 e tauturu ai ia tatou ia faaoti e mea maitai anei ta tatou faaanaanataeraa? (b) Eaha te tahi atu â faaueraa tumu e tauturu ia oe ia maiti i te faaanaanataeraa maitai? (A hi‘o i te nota i raro i te api.)

18 Te vai ra te hoê faaueraa tumu faufaa i roto i te Philipi 4:8, o te na ô ra e: “Te mau mea haavare ore ra, te mau mea au maitai ra, te mau mea tia ra, te mau mea viivii ore ra, te mau mea popouhia ra, te mau mea roo maitatai ra; te vai na te tahi maitai e te tahi mea haamaitai ra, e haamana‘o i taua mau mea ra.” Parau mau, te faahiti ra Paulo, eiaha i te faaanaanataeraa, i te mau mana‘o râ o te aau ia niuhia i nia i te mau mea ta te Atua e au e tia ’i. (Salamo 19:14) E tano atoa râ te mau parau a Paulo ei faaueraa tumu no te faaanaanataeraa. E nafea?

19 A ui ia oe iho, ‘E faaî anei ta ’u maitiraa i te hoho‘a teata, te hauti video, te upaupa, aore ra te tahi atu huru faaanaanataeraa i to ’u feruriraa i “te mau mea viivii ore”?’ Ei hi‘oraa, i muri a‘e oe e mataitai ai i te hoê hoho‘a teata, eaha te mau mea e vai noa i roto i to oe feruriraa? Mai te peu e e hoho‘a au maitai, viivii ore e te haumǎrû, ua ite ïa oe e mea maitai ta oe faaanaanataeraa. Mai te peu râ e e  mana‘o oe i te mau mea viivii no te hoho‘a teata ta oe i mataitai, e faaanaanataeraa tano ore ïa ta oe, e te ino atoa. (Mataio 12:33; Mareko 7:20-23) No te aha? Na roto hoi i te mana‘oraa i te mau mea viivii i te pae morare, e fifi to oe hau o roto mai, e pao to oe mana‘o haava haapiihia i te Bibilia e e ino to oe taairaa e te Atua. (Ephesia 5:5; Timoteo 1, 1:5, 19) I te mea e e faahopearaa ino to tera faaanaanataeraa i nia ia oe iho, a faaoti papu ïa i te ape atu. * (Roma 12:2) A pee i te papai salamo tei pure ia Iehova: “E faafariu ê i tau mata ia ore ia hi‘o i te mea faufaa ore.”—Salamo 119:37.

A IMI I TE MAITAI O VETAHI Ê

20, 21. Eaha te taairaa o te Korinetia 1, 10:23, 24 e te maitiraa i te faaanaanataeraa maitai?

20 Ua faahiti Paulo i te hoê faaueraa tumu Bibilia faufaa e mea tia ia haapao tatou ia rave tatou i te mau faaotiraa no nia i ta tatou iho mau ohipa. Teie ta ’na i parau: “E mea tia ana‘e ïa ia ’u, eita râ te mau mea atoa e faarahi i te maitai. Eiaha roa ei taata e imi i to ’na ana‘e iho maitai, e imi râ te taata atoa i te maitai o vetahi ê atoa.” (Korinetia 1, 10:23, 24) Eaha ïa te taairaa o tera faaueraa tumu e te maitiraa i te faaanaanataeraa maitai? E titauhia ia ui oe ia oe iho, ‘Eaha te faahopearaa o te faaanaanataeraa ta ’u e maiti i nia ia vetahi ê?’

21 E faatia paha to oe mana‘o haava ia oe ia apiti i te tahi huru faaanaanataeraa “tia,” aore ra fariihia, i ta oe hi‘oraa. Mai te peu râ e e ite oe e e huru ê te tahi atu mau Kerisetiano e mana‘o haava taotia ’tu â to ratou, e faaoti paha oe i te ape i te reira. No te aha? No te mea eita oe e hinaaro e “hara . . . i te mau taeae”—aore ra e “hara” atoa “i te Mesia,” mai ta Paulo i parau—a fifi roa ’tu â ’i to oe mau hoa Kerisetiano i te tapea i to ratou haapao maitai i te Atua. E haafaufaa hoi  oe i te a‘oraa: “Eiaha outou ei turoriraa.” (Korinetia 1, 8:12; 10:32) Te pee ra te mau Kerisetiano mau i teie tau i te a‘oraa tano e te hamani maitai a Paulo ma te ape i te faaanaanataeraa “tia” paha, o te ore râ e “faarahi i te maitai.”—Roma 14:1; 15:1.

22. No te aha te mau Kerisetiano e farii ai e mea taa ê te mana‘o no nia i ta te taata iho mau ohipa?

22 Te vai ra râ te tahi atu tuhaa o te imiraa i te maitai o vetahi ê. Eiaha te hoê Kerisetiano e mana‘o haava taotia ’tu â to ’na, e onoono e ia pee te taatoaraa o te amuiraa Kerisetiano i to ’na mana‘o ǒaǒa no nia i te faaanaanataeraa e tano. Mai te peu e e na reira o ’na, e au ïa o ’na i te hoê taata faahoro pereoo i nia i te purumu rahi, o te onoono e ia tere te tahi atu feia faahoro atoa i nia i te hoê â purumu ma te hoê â vitiviti ta ’na e au a‘e. E ere ïa i te mea tano. Ma te here Kerisetiano, e titauhia ia faatura te hoê taata e mea taotia ’tu â to ’na mana‘o haava, i to ’na mau hoa Kerisetiano mea taa ê rii to ratou mana‘o i te faaanaanataeraa i to ’na iho, to roto râ i te mau otia o te mau faaueraa tumu Kerisetiano. Ia na reira oia, e itehia ïa to ’na “mǎrû e te taata atoa.”—Philipi 4:5; Koheleta 7:16.

23. E nafea e papu ai ia oe e e faaanaanataeraa maitai ta oe e maiti?

23 Ei haapotoraa, e nafea e papu ai ia oe e e faaanaanataeraa maitai ta oe e maiti? A patoi i te mau huru faaanaanataeraa atoa o te faaiteite maitai roa ra i te mau ohipa morare ore e te haapaoraa ore, tei faahapa-maitai-hia i roto i te Parau a te Atua. A pee i te mau faaueraa tumu Bibilia e tano no te mau huru faaanaanataeraa aita i faahitihia i roto i te Bibilia ma te taa maitai. A ape i te faaanaanataeraa o te faaino i to oe mana‘o haava, e ia ineine oe i te haapae i te mau huru faaanaanataeraa e huru ê ai vetahi, te mau hoa Kerisetiano iho â râ. Ia faahanahana ta oe faaotiraa papu i te na reira i te Atua e ia vai maite oe e to oe utuafare i roto i to ’na here.

^ par. 19 Te vai ra te tahi atu â mau faaueraa tumu e tano no te faaanaanataeraa i roto i te Maseli 3:31; 13:20; Ephesia 5:3, 4; e te Kolosa 3:5, 8, 20.

No te ite atu â

Mai te aha to tatou huru e tia ’i?

Aita Satani e hinaaro ra ia fana‘o tatou i ta te Atua farii maitai. E nafea ia maitai noa te taairaa e Iehova?

E ara i te mau opuaraa a te aau

E tamata te aau i te tahi taime i te imi i te otoheraa no te hoê haerea tano ore. Eaha te tauturu ia tatou ia ite eaha mau to roto i to tatou aau?