Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 8

Mea here na te Atua te feia viivii ore

Mea here na te Atua te feia viivii ore

“I te feia viivii ore ra, e viivii ore atoa ta oe.”—SALAMO 18:26.

1-3. (a) No te aha te hoê metua vahine e hi‘o maitai ai e mea faaeta maitai e mea mâ ta ’na tamaiti? (b) No te aha Iehova e hinaaro ai ia viivii ore to ’na feia haamori, e na te aha e turai ia tatou ia hinaaro e vai viivii ore noa?

TE FAAINEINE ra te hoê metua vahine i ta ’na tamaroa iti no te haere i te tahi vahi. E hi‘o maitai o ’na e ua hopu o ’na i te pape e mea faaeta maitai o ’na e mea mâ to ’na ahu. Ua ite o ’na e mea faufaa roa te vai-mâ-raa no to ’na ea. Ua ite atoa o ’na e e faahopearaa to te faaahuraa o ta ’na tamaroa i nia i to ’na na metua.

2 Te hinaaro ra Iehova, to tatou Metua i te ra‘i, ia viivii ore ta ’na mau tavini. Te na ô ra ta ’na Parau e: “I te feia viivii ore ra, e  viivii ore atoa ta oe.” * (Salamo 18:26) Mea here na Iehova ia tatou; ua ite o ’na e mea maitai roa no tatou ia vai viivii ore noa. Te tiai atoa ra o ’na e ia haamaitaihia o ’na maoti to tatou haerea ei Ite no ’na. Oia mau, e faahanahanahia Iehova e to ’na i‘oa mo‘a, eita râ e faainohia, maoti to tatou faaahuraa mâ e to tatou haerea maitai roa.—Ezekiela 36:22; a taio i te Petero 1, 2:12.

3 Te iteraa e mea here na te Atua te taata viivii ore, e turai ïa ia tatou ia vai viivii ore noa. E hinaaro tatou ia faahanahana to tatou huru oraraa ia ’na no to tatou here ia ’na. E hinaaro atoa tatou e vai noa i roto i to ’na here. E hi‘opoa ana‘e ïa no te aha e mea tia ’i ia vai viivii ore noa tatou, eaha te auraa ia viivii ore, e e nafea ia vai viivii ore noa. E tauturu mai tera hi‘opoaraa ia ite e te vai ra anei te tahi mau tuhaa e mea tia ia haamaitai tatou.

NO TE AHA E TITAUHIA ’I IA VAI VIIVII ORE NOA TATOU?

4, 5. (a) Eaha te tumu matamua roa e mea tia ’i ia vai viivii ore noa tatou? (b) E nafea to Iehova viivii ore e ite-maitai-hia ’i i roto i ta ’na mau mea itea i poiete?

4 Te aratai ra Iehova ia tatou na roto i te hi‘oraa. No reira ta ’na Parau e faaitoito ai ia tatou ia “pee . . . i te Atua.” (Ephesia 5:1) Teie te tumu matamua roa e mea tia ’i ia vai viivii ore noa tatou: Mea viivii ore Iehova, te Atua ta tatou e haamori ra, e mea mo‘a i roto i te mau tuhaa atoa.—A taio i te Levitiko 11:44, 45.

5 Te ite-maitai-hia ra to Iehova viivii ore, mai to ’na huru maitai e e‘a e rave rahi roa, i roto i ta ’na mau mea itea i poiete. (Roma 1:20) Ua opuahia te fenua no te riro ei nohoraa mâ no te taata. Ua haamau Iehova i te mau ohuraa natura o te tamâ i to tatou reva e ta tatou pape. E taui te tahi mau manumanu ino i te pehu ei tao‘a ino ore. Ua faaohipa te tahi mau aivanaa vetahi o teie mau mea ora poia hu‘a roa no te tamâ i te mau taheraa mori arahu e te tahi atu haaviiviiraa i tupu no te miimii e te  nounou o te taata. Papu maitai, mea faufaa te viivii ore no tei “hamani i te fenua.” (Ieremia 10:12) Oia atoa ïa no tatou e tia ’i.

6, 7. Mea nafea te ture a Mose i te haapapuraa e mea titauhia ia viivii ore te feia e haamori ra ia Iehova?

6 Te tahi atu tumu ia vai viivii ore noa tatou e tia ’i, oia ïa te titau ra Iehova, to tatou Faatere e Arii, i te reira i to ’na feia haamori. I raro a‘e i te Ture ta Iehova i horoa ia Iseraela, ua taai-roa-hia te viivii ore i te haamoriraa. Ua faataa te Ture e i te Mahana taraehara, i titauhia na ia hopu te tahu‘a rahi i te pape eiaha hoê noa taime, e piti râ. (Levitiko 16:4, 23, 24) E titauraa ia horoi te mau tahu‘a e haa ra i to ratou rima e te avae i te pape hou a pûpû ai i te mau tusia ia Iehova. (Exodo 30:17-21; Paraleipomeno 2, 4:6) Ua faataa te Ture fatata e 70 tumu o te viivii i te pae tino e i te pae oroa. Ia viivii te hoê Iseraela, eita e tia ia ’na ia apiti i te haamoriraa—aita ana‘e, o te pohe te utua i roto i te tahi mau tupuraa. (Levitiko 15:31) Te taata atoa e patoi i te pee i te faanahoraa titauhia o te tamâraa, tae noa ’tu i te hopuraa i te pape e te tamâraa i to ’na ahu, “e tâpû-ê-hia ïa . . . i te amuiraa.”—Numera 19:17-20.

7 Noa ’tu e aita tatou i raro a‘e i te ture a Mose, te faaite maira te reira i te mana‘o o te Atua. Ua haapapu maitai te Ture e mea titauhia ia viivii ore te feia e haamori ra i te Atua. Aita Iehova i taui. (Malaki 3:6) E farii o ’na i ta tatou haamoriraa mai te peu e e haamoriraa “mâ e te viivii ore.” (Iakobo 1:27, Traduction du monde nouveau) No reira, e mea tia ia ite tatou eaha ta ’na e tiai ra ia tatou i roto i teie tuhaa.

TE AURAA IA VIIVII ORE I TE ARO O TE ATUA

8. Te tiai ra Iehova ia vai viivii ore noa tatou i roto i teihea mau tuhaa?

8 I roto i te Bibilia, aita te mana‘o o te viivii ore i taai-noa-hia i te vai-mâ-raa i te pae tino. Ua taaihia te viivii ore i te aro o te Atua i te mau tuhaa atoa o to tatou oraraa. Te tiai ra Iehova ia vai viivii ore noa tatou i roto e maha tuhaa faufaa—i te pae varua, i te pae morare, i te pae feruriraa, e i te pae tino. E hi‘opoa ana‘e i te auraa o te reira.

9, 10. Eaha te auraa e vai viivii ore noa i te pae varua, e eaha ta te mau Kerisetiano mau e ape?

 9 Viivii ore i te pae varua. Ma te haapoto noa, eiaha e anoi i te haamoriraa mau e te haamoriraa hape te auraa e vai viivii ore noa i te pae varua. I to te mau Iseraela faarueraa ia Babulonia no te ho‘i i Ierusalema, ua titauhia ia pee ratou i teie a‘oraa faaurua: “A haere outou i rapae; eiaha e rave noa ’tu i te mea viivii ra; . . . ia mâ outou!” (Isaia 52:11) Te ho‘i ra te mau Iseraela i ǒ ratou na mua roa no te haamau faahou i te haamoriraa a Iehova. E haamoriraa viivii ore ïa—tei ore i viivii i te mau haapiiraa, peu e tutuu atoa a te haapaoraa Babulonia o te faaino ra i te Atua.

10 I teie mahana, e mea tia ia ara tatou ei Kerisetiano mau ia ore ia viivii i te haamoriraa hape. (A taio i te Korinetia 1, 10:21.) E mea faufaa roa ia ara i roto i teie tuhaa, no te mea tei te mau vahi atoa te mana o te haapaoraa hape. I te fenua e rave rahi, e rave rau tutuu, ohipa, e oroa tei taaihia i te mau haapiiraa faaroo hape, mai te mana‘o e e ora noa te hoê mea e vai ra i roto ia tatou ia pohe tatou. (Koheleta 9:5, 6, 10) E ape te mau Kerisetiano mau i te mau tutuu e tiaturiraa faaroo hape to roto. * Eita tatou e vaiiho i te mau faaheporaa a vetahi ê ia turai ia tatou ia ofati i te mau ture aveia Bibilia o te haamoriraa viivii ore.—Ohipa 5:29.

11. Eaha te titauhia no te vai viivii ore noa i te pae morare, e no te aha e mea faufaa roa ’i ia vai viivii ore noa tatou i roto i teie tuhaa?

11 Viivii ore i te pae morare. No te vai viivii ore noa i te pae morare, e titauhia ia ape i te mau peu taotoraa tia ore atoa. (A taio i te Ephesia 5:5.) E mea faufaa roa ia vai viivii ore noa tatou i te pae morare. Mai ta tatou e ite i te pene i muri iho o teie buka, e titauhia ia “maue ê atu i te faaturi” aore ra i te mau peu taotoraa tia ore no te vai noa i roto i te here o te Atua. “E ore” te feia faaturi tatarahapa ore “e parahi i te basileia o te Atua.” (Korinetia 1, 6:9, 10, 18) I te aro o te Atua, tei rotopu taua mau taata ra i te feia “faufau.” Ia ore ratou e vai viivii ore noa i te pae  morare, “e tufaa ta ratou . . . oia te piti o te pohe.”—Apokalupo 21:8.

12, 13. Eaha te taairaa i rotopu i te mana‘o e te ohipa, e e nafea tatou e vai viivii ore noa ’i i te pae feruriraa?

12 Viivii ore i te pae feruriraa. E faatupu te mana‘o i te ohipa. Ia vaiiho tatou i te mau mana‘o tano ore ia a‘a i roto i to tatou feruriraa e aau, e rave iho â tatou i te mau ohipa viivii ia tae i te hoê mahana. (Mataio 5:28; 15:18-20) Mai te peu râ e e faaî tatou i to tatou feruriraa i te mau mana‘o mâ e te viivii ore, e turaihia ïa tatou ia tapea maite i te hoê haerea viivii ore. (A taio i te Philipi 4:8.) E nafea to tatou feruriraa e vai viivii ore noa ’i? Na mua, e ape tatou i te mau huru faaanaanataeraa atoa e nehenehe e haaviivii i to tatou feruriraa. * E faaî atoa tatou i to tatou feruriraa i te mau mana‘o viivii ore ma te haapii tamau i te Parau a te Atua.—Salamo 19:8, 9.

13 No te vai noa i roto i te here o te Atua, e mea faufaa roa ia vai viivii ore noa tatou i te pae varua, i te pae morare, e i te pae feruriraa. E faahohonuhia ’tu â teie mau tuhaa o te viivii ore i te tahi atu mau pene o teie buka. E hi‘opoa tatou i teie nei i te maha o te tuhaa—te viivii ore i te pae tino.

E NAFEA TATOU E VAI VIIVII ORE NOA ’I I TE PAE TINO?

14. No te aha e ere ai i te ohipa na tatou ana‘e te viivii ore i te pae tino?

14 Ua taaihia te viivii ore i te pae tino i te vai-mâ-noa-raa to tatou tino e ta tatou mau tao‘a. E ohipa na tatou ana‘e anei taua viivii ore ra eiaha vetahi ê e faaô mai? E ere mai tera no te feia haamori o Iehova. Mai tei tapao-ê-na-hia, te haafaufaa ra Iehova i to tatou viivii ore i te pae tino, e ere noa no to tatou maitai, no te mea atoa râ e faahopearaa to te reira i nia ia ’na. A mana‘o na i te faahoho‘araa i te omuaraa. Ia ite oe i te hoê tamarii e mea repo noa o ’na aore ra e ahu haapaoraa ore noa to ’na, e uiui iho â ïa oe no nia i to ’na na metua, e ere anei? Eita tatou  e hinaaro e ia faainohia to tatou Metua i te ra‘i aore ra ia patoihia te poroi ta tatou e poro ra, no to tatou noa ’‘e faaahuraa aore ra huru oraraa. Te na ô ra te Parau a te Atua e: “Aore roa i tuu i te turoriraa i te taata atoa, ia ore ia faainohia te toroa [aore ra taviniraa] nei: te faaite hua nei râ matou ia matou iho e e rave ohipa na te Atua i te mau mea atoa nei.” (Korinetia 2, 6:3, 4) E nafea ïa ia vai viivii ore noa i te pae tino?

15, 16. Eaha te peu maitai o te vai-mâ-raa, e mai te aha te huru o to tatou ahu?

15 To tatou vai-mâ-raa e faaahuraa. Noa ’tu e mea ê te ta‘ere e te huru oraraa i tera e i tera fenua, e ite pinepine tatou i te pu‘a e te pape e tano no te hopu tamau i te pape e ia papu ia tatou e mea mâ tatou e ta tatou mau tamarii. Ei peu maitai o te vai-mâ-raa, e horoi tatou i to tatou rima i te pu‘a e te pape hou a amu ai aore ra a tapea ’i i te maa, i muri a‘e i te faaohiparaa i te haumitiraa, e i muri a‘e i te horoiraa aore ra te tauiraa i te hoê pêpe.  E nehenehe te horoiraa i te rima i te pu‘a e te pape e arai i te ma‘i e e faaora mau â i te taata. E nehenehe te reira e arai i te parareraa o te mau tirotiro e te mau bateria iino, a ape atu ai te taata i te mau ma‘i hî. I te mau fenua aita e taheraa pape ino to te mau fare, e nehenehe paha te pape ino e faaruehia i roto i te hoê apoo e tapo‘ihia, mai tei ravehia na i Iseraela i tahito ra.—Deuteronomi 23:12, 13.

16 E mea tia atoa ia pu‘a tamau i to tatou ahu, ia mâ e ia au maitai te reira. Aita e titauhia ra ia hoo mai te hoê Kerisetiano i te ahu moni aore ra i te faito ahu apî roa, e ahu faaeta maitai râ, te mâ, e te ieie ore. (A taio i te Timoteo 1, 2:9, 10.) Noa ’tu eaha te vahi to reira tatou, e hinaaro tatou ia “nehenehe te parau a te Atua a to tatou Ora” i to tatou faaahuraa.—Tito 2:10.

17. No te aha e mea maitai ai ia mâ e ia nehenehe to tatou fare e ta tatou mau tao‘a?

17 To tatou fare e ta tatou mau tao‘a. E ere paha to tatou i te fare unauna aore ra moni rahi, ei fare mâ râ e te nehenehe ia au i te mau tupuraa. Oia atoa, mai te peu e e faahoro tatou i te pereoo no te haere i te mau putuputuraa e i roto i te taviniraa, e nehenehe tatou e tutava roa i te tamâ au noa i te pereoo, i rapae au e i roto. Eiaha tatou e haamoe e e horoa te hoê fare mâ e te mau tao‘a mâ i te hoê faaiteraa no nia i te Atua ta tatou e haamori ra. Inaha, te haapii ra tatou i te taata e e Atua viivii ore Iehova, e e haamou oia i te feia e faaino ra i te fenua, e ua fatata to ’na Basileia i te faariro i to tatou nohoraa te fenua ei paradaiso. (Apokalupo 11:18; Luka 23:43) Papu maitai, e hinaaro tatou e ia faaite te hoho‘a o to tatou fare e o ta tatou mau tao‘a ia vetahi ê e te atuatu nei tatou i teie nei i te mau peu mâ e tano i roto i te ao apî i mua nei.

Ua taaihia te viivii ore i te pae tino i te vai-mâ-noa-raa to tatou tino e ta tatou mau tao‘a

18. E nafea tatou e faaite ai i te faatura no ta tatou Piha a te Basileia?

18 Ta tatou vahi haamoriraa. E turai to tatou here no Iehova ia tatou ia faaite i te faatura no ta tatou Piha a te Basileia, te hoê pu o te haamoriraa mau i to tatou tuhaa fenua. Ia haere mai te mau melo apî i te piha, e hinaaro tatou ia au maitai ratou i ta tatou vahi haamoriraa. E mea hinaarohia ia tamâ e ia atuatu tamau i te piha ia vai nehenehe noa te reira. E faaite tatou i te faatura  no ta tatou Piha a te Basileia ma te rave i tei maraa ia tatou no te atuatu i te reira. E fana‘oraa taa ê ta tatou e horoa noa i to tatou taime no te tauturu i te tamâ e i te “rave e ia etaeta faahou” ta tatou vahi haamoriraa. (Paraleipomeno 2, 34:10) Tera atoa te mau faaueraa tumu ia putuputu tatou i te hoê Piha tairururaa aore ra te tahi atu fare tairururaa.

E TAMÂ HUA TATOU IA TATOU IHO I TE MAU MEA E PEU MATAUHIA VIIVII

19. Ia vai viivii ore noa tatou i te pae tino, e titauhia ia ape tatou i te aha, e e nafea te Bibilia e tauturu ai ia tatou i roto i teie tuhaa?

19 Ia vai viivii ore noa tatou i te pae tino, e titauhia ia ape tatou i te mau mea e peu matauhia viivii, mai te puhipuhiraa i te avaava, te inu-hua-raa i te ava, e te raveraa i te mau raau e ere na te taote i horoa, o te faaino râ i te feruriraa aore ra o te faatupu i te mahâ ore. Aita iho â te Bibilia e horoa ra i te i‘oa taa maitai o te mau mea e peu matauhia viivii e te faufau atoa tei parare i teie mahana, te horoa ra râ te Bibilia i te mau faaueraa tumu o te tauturu ia tatou ia haroaroa eaha mau â te mana‘o o Iehova. No te mea e ua ite tatou i te mana‘o o Iehova i te reira, e turai ïa to tatou here no ’na ia rave i te haerea o te faatae mai i ta ’na farii maitai. E hi‘opoa mai tatou e pae faaueraa tumu Bibilia.

20, 21. Te hinaaro ra Iehova ia tiamâ tatou i teihea mau peu, e eaha te tumu rahi ia na reira tatou e tia ’i?

20 “E au mau here e, tei ia tatou taua mau maitai i parauhia maira, e tamâ hua tatou ia tatou iho i te mau viivii atoa o te tino e te varua, ma te faatupu hua i te maitai i te mǎta‘uraa ’tu i te Atua.” (Korinetia 2, 7:1) Te hinaaro ra Iehova ia tiamâ tatou i te mau peu o te haaviivii i to tatou tino e o te faaino i to tatou varua, aore ra huru feruriraa rahi. E mea tia ïa ia ape tatou i te mau huru o te faatupu i te mahâ ore tei matauhia e mea atâta no te tino e te feruriraa.

21 Te horoa ra te Bibilia i te hoê tumu rahi e “tamâ hua [’i] tatou ia tatou iho i te mau viivii atoa.” A tapao na, e haamata te Korinetia 2, 7:1 mai teie: “Tei ia tatou taua mau maitai i parauhia maira.” Eaha tei parauhia, aore ra fafauhia? Ia au i to na  mua ’tu mau irava, te fafau ra Iehova e: “Na ’u e farii atu ia outou, e ei metua vau no outou.” (Korinetia 2, 6:17, 18) A feruri noa na: Te fafau ra Iehova i te paruru ia oe e i te here ia oe mai te hoê metua tane e here ra i ta ’na tamaiti aore ra tamahine. Teie râ, e faatupu Iehova i teie mau parau fafau mai te peu noa e e ape oe i te mau viivii o “te tino e te varua.” Auê te maamaa e ia vaiiho i te mau mea aore ra peu faufau atoa ia faaere ia oe i te hoê taairaa piri e te faufaa roa e o Iehova!

22-25. Eaha te mau faaueraa tumu Bibilia e nehenehe e tauturu ia tatou ia ape i te mau mea e peu matauhia viivii?

22 “Hinaaro oe i to Atua ia Iehova ma to aau atoa, e ma to varua [aore ra taata] atoa, e ma to mana‘o atoa.” (Mataio 22:37) Ua maiti Iesu i teie faaueraa ei faaueraa hau i te rahi. (Mataio 22:38) E au ia here tatou ia Iehova. No te here ia ’na ma to tatou aau, nephe e feruriraa atoa, e mea tia ia ape tatou i te mau peu o te nehenehe e haapoto i to tatou oraraa aore ra e faaiti mai i to tatou puai feruriraa ta te Atua i horoa mai.

23 “[O Iehova] tei horoa mai i te ora, e te aho, e te mau mea atoa.” (Ohipa 17:24, 25) E ô te ora no ǒ mai i te Atua ra. Te here ra tatou i Tei horoa mai i te reira, e hinaaro ïa tatou e faatura i taua ô ra. E ape tatou i te mau mea aore ra peu matauhia atoa o te faaino i to tatou ea, ua ite hoi tatou e aita roa ’tu tera mau peu e faatura ra i te ô o te ora.—Salamo 36:9.

24 “E aroha ’tu oe i to taata-tupu, mai to aroha ia oe iho na.” (Mataio 22:39) E faaino pinepine te mau mea e peu matauhia viivii eiaha noa i te taata e rave ra i te reira, i te feia atoa e haaati ra ia ’na. Ei hi‘oraa, e nehenehe te au auahi o te avaava e faaino i te feia puhipuhi ore i te avaava. Te hoê taata o te haamauiui i te feia e haaati ra ia ’na, te ofati ra ïa i te faaueraa a te Atua e aroha i to tatou taata-tupu. Aita atoa te reira e tu ra e ta ’na parau e te here ra o ’na i te Atua.—Ioane 1, 4:20, 21.

25 “E faaite atu ia ratou, e e auraro maite i te hui arii e te feia mana, e faaroo i te feia haava ra.” (Tito 3:1) I te fenua e rave rahi, e ofatiraa i te ture ia fatu aore ra ia rave i te mau raau taero. Ei Kerisetiano mau, eiaha roa tatou e fatu aore ra e rave i te mau raau taero opanihia e te ture.—Roma 13:1.

26. (a) No te vai noa i roto i te here o te Atua, e titauhia ia aha tatou? (b) No te aha o te vai-viivii-ore-noa-raa i te aro o te Atua te huru oraraa maitai roa ’‘e?

 26 No te vai noa i roto i te here o te Atua, e titauhia ia vai viivii ore noa tatou, eiaha noa i roto hoê aore ra e piti tuhaa, i roto râ i te mau tuhaa atoa. E ere paha i te mea ohie ia haapae e ia maue ê i te mau mea e peu matauhia viivii, e nehenehe râ. * Teie hoi te huru oraraa maitai roa ’‘e, no te mea te haapii noa ra Iehova ia tatou no to tatou maitai. (A taio i te Isaia 48:17.) Te mea faufaa roa ’‘e, e nehenehe tatou e oaoa i te iteraa e ma te vai viivii ore noa, te haamaitai nei tatou i te Atua ta tatou e here ra, a vai noa ’tu ai i roto i to ’na here.

^ par. 2 I te tahi taime, te faataa ra te ta‘o i roto i te reo tumu tei hurihia ei “viivii ore” i te vai-mâ-raa i te pae tino. E pinepine râ te reira i te faataa i te viivii ore i te pae morare aore ra i te pae varua.

^ par. 26 A hi‘o i na tumu parau tarenihia “ Te tutava ra anei au i te rave i te mea tia?,” e “ E tia . . . te mau mea atoa nei i te Atua,” i nia nei.

^ par. 67 Ua tauihia te i‘oa.

No te ite atu â

Tamâraa i te pae morare ia au i te mo‘araa o te Atua

Mai 1914 mai, e auraa taa ê mau to te mau piha tiairaa e te mau uputa o te hiero ta Ezekiela i ite orama, no te mau tavini a te Atua.