Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 14

Ei haerea tia to tatou i te mau mea atoa

Ei haerea tia to tatou i te mau mea atoa

“I te opuaraa e ei haapao maitai [aore ra haerea tia] ta matou i te mau mea atoa.”—HEBERA 13:18.

1, 2. No te aha Iehova e oaoa ’i ia ite o ’na i ta tatou mau tutavaraa ia faaite i te haerea tia? A horoa i te hoê hi‘oraa.

E FAARUE te hoê mama e ta ’na tamaroa iti i te hoê fare toa. E faaea taue te tamaroa i te haere, ma te mata araara. Te tapea ra oia i te hoê tao‘a hauti iti ta ’na i rave mai i roto i te fare toa. Ua moe ia ’na i te faaho‘i atu aore ra i te ani i to ’na mama e hoo mai i te reira. E pii o ’na i to ’na mama ma te hepohepo. E tamǎrû te mama ia ’na e e ho‘i raua i te fare toa ia faaho‘i oia i te tao‘a hauti e ia tatarahapa ’tu. A na reira ’i oia, e oaoa e e mauruuru roa te aau o te mama. No te aha?

2 Aita rea mea e faaoaoa i te mau metua maori râ te iteraa i ta ratou mau tamarii ia haapii i te faufaaraa o te haerea tia. Oia atoa no to tatou Metua i te ra‘i, “te Atua parau mau.” (Salamo 31:5) A mataitai ai o ’na ia tatou ia paari mai i te pae varua, e oaoa o ’na ia ite ia tatou ia tutava i te faaite i te haerea tia. No to tatou hinaaro e faaoaoa ia ’na e e vai noa i roto i to ’na here, te parau ra ïa tatou mai te aposetolo Paulo: “I te opuaraa e ei haapao maitai [aore ra haerea tia] t[o] [t]atou i te mau mea atoa.” (Hebera 13:18) E hi‘opoa mai tatou e maha tuhaa rahi o te oraraa e mea fifi roa i te tahi taime ia faaite i te haerea tia. I muri iho, e hi‘o mai tatou i te tahi o te mau haamaitairaa e noaa mai.

HAEREA TIA I NIA IA TATOU IHO

3-5. (a) E nafea te Parau a te Atua e faaara mai ai no nia i te mau fifi atâta o te haavareraa ia tatou iho? (b) Eaha te tauturu ia tatou ia faaite i te haerea tia i nia ia tatou iho?

3 To tatou fifi matamua, o te haapiiraa ïa i te faaite i te haerea  tia i nia ia tatou iho. E mea ohie roa no tatou te taata tia ore ia hema i te haavareraa ia tatou iho. Ei hi‘oraa, ua parau Iesu i te mau Kerisetiano no Laodikea e te haavare ra ratou ia ratou iho i te mana‘oraa e e tao‘a rahi ta ratou, area i te pae varua mea “faufaa ore [ratou], e te matapo, e te veve”—te hoê ïa tupuraa ino roa. (Apokalupo 3:17) Ua faariro to ratou haavareraa ia ratou iho i to ratou tupuraa ei mea atâta ’tu â.

4 E haamana‘o atoa tatou i te faaararaa a te pǐpǐ Iakobo: “Te mana‘o râ te hoê taata i roto ia outou, e e paieti to ’na, e aore i tapea i to ’na vaha, te haavare ra râ i to ’na iho aau, e paieti haavare to ’na.” (Iakobo 1:26) Ia mana‘o tatou e e nehenehe tatou e faaohipa i to tatou vaha ma te tano ore e e haamori ai ia Iehova ma te fariihia mai, te haavare noa ra ïa tatou i to tatou aau. E paieti haavare ïa to tatou, aore ra mea faufaa ore ta tatou haamoriraa ia Iehova, e mâu‘a roa ïa. Eaha te nehenehe e tapea ia tatou ia ore ia pee i tera haerea ino?

5 I roto noa i terâ mau irava, te faaau ra Iakobo i te parau mau o te Parau a te Atua i te hoê hi‘o. Te a‘o maira o ’na ia hi‘o i roto i te ture tia roa a te Atua e ia rave i te mau faatanoraa ia au i te reira. (A taio i te Iakobo 1:23-25.) E nehenehe te Bibilia e tauturu ia tatou ia faaite i te haerea tia i nia ia tatou iho e ia ite eaha ta tatou e haamaitai e tia ’i. (Oto o Ieremia 3:40; Hagai 1:5) E nehenehe atoa tatou e pure ia Iehova e e ani ia ’na ia hi‘opoa ia tatou, ia tauturu ia tatou ia ite e ia faaafaro i te mau paruparu ino atoa. (Salamo 139:23, 24) E paruparu haavarevare te haerea tia ore, e e titauhia ia hi‘o tatou i te reira ia au i te hi‘oraa a to tatou Metua i te ra‘i. Te na ô ra te Maseli 3:32: “E mea faufau . . . na Iehova te feia mârô ra, tei te feia parau-tia ra ta ’na parau moe [aore ra auhoaraa piri].” E nehenehe Iehova e tauturu ia tatou ia faahotu i te huru aau mai to ’na e ia hi‘o ia tatou iho mai ia ’na e hi‘o ra ia tatou. A haamana‘o i ta Paulo i parau: “I te opuaraa e ei haapao maitai [aore ra haerea tia] ta matou i te mau mea atoa.” Eita e tia ia tatou ia riro ei taata tia roa i teie nei, teie râ te hinaaro mau ra e te tutava maite ra tatou i te faaite i te haerea tia.

 HAEREA TIA I ROTO I TE UTUAFARE

E tauturu mai te haerea tia ia ape i te mau peu e turaihia paha tatou ia huna

6. No te aha e titauhia ’i ia faaite te feia faaipoipo i te haerea tia i nia i te tahi e te tahi, e eaha ïa te mau fifi atâta ta ratou e ape?

6 E mea maitai ia riro te haerea tia ei huru maitai rahi i roto i te hoê utuafare Kerisetiano. No reira, e titauhia ia aparau te tane e ta ’na vahine ma te haavare ore te tahi i te tahi. I rotopu i na hoa faaipoipo Kerisetiano, aita e parahiraa to te mau peu viivii e te mauiui mai te arapaeraa i te tahi taata e ere i to ’na apiti, te atuaturaa i te mau taairaa huna na roto i te Internet, aore ra te faaohiparaa i te mau huru peu faufau atoa. Ua rave te tahi mau Kerisetiano faaipoipo i tera haerea ino, ma te huna i te reira i to ratou apiti hapa ore. E haerea tia ore te reira. A tapao na i te mau parau a te arii haapao maitai ra o Davida: “Aore au i parahi i roto i te mau taata haapao ore i te parau, aore hoi i amui i roto i te feia haavare.” (Salamo 26:4) Mai te peu e mea faaipoipo oe, eiaha roa ’tu e rave i te hoê haerea o te turai ia oe ia huna i to oe huru mau i to oe apiti!

7, 8. Eaha te mau hi‘oraa Bibilia e nehenehe e haapii i te mau tamarii i te faufaa o te haerea tia?

7 No te haapii i ta ratou mau tamarii i te faufaa o te haerea tia, e mea maitai ia faaohipa te mau metua i te mau hi‘oraa Bibilia. No nia i te haerea tia ore, te vai ra te aamu o Akana, tei eiâ e tei tamata i te huna i te reira; to Gehazi, tei haavare no to ’na hinaaro i te moni; e to Iuda, tei eiâ e tei haavare roa ino no te totoa  ia Iesu.—Iosua 6:17-19; 7:11-25; Te mau arii 2, 5:14-16, 20-27; Mataio 26:14, 15; Ioane 12:6.

8 No nia i te haerea tia, te vai ra te aamu o Iakoba, tei faaue i ta ’na mau tamaiti ia faaho‘i i te moni ta ratou i ite i roto i ta ratou mau pute, no te mea e taata tei tuu hape atu i reira i to ’na mana‘o; to Iepheta e ta ’na tamahine, o tei haapao i te euhe a Iepheta noa ’tu te haapaeraa rahi no raua; e to Iesu, o tei faaite roa ia ’na iho i mua i te hoê nahoa taata haavî u‘ana no te faatupu i te parau tohu e no te paruru i to ’na mau hoa. (Genese 43:12; Te mau tavana 11:30-40; Ioane 18:3-11) Maoti teie maa hi‘oraa, e ite te mau metua i te mau haamaramaramaraa faufaa i roto i te Parau a te Atua, o te nehenehe e tauturu ia ratou ia haapii i ta ratou mau tamarii ia au e ia haafaufaa i te haerea tia.

9. Ia ape te mau metua i te aha ia hinaaro ratou e horoa i te hoê hi‘oraa haerea tia na ta ratou mau tamarii, e no te aha e mea faufaa ’i tera hi‘oraa?

9 E hopoia faufaa ta tera haapiiraa e tuu ra i nia i te mau metua. Ua ui te aposetolo Paulo: “O oe hoi o tei haapii ia vetahi ê ra, aita oe i haapii ia oe iho? O oe hoi o tei a‘o hua e, eiaha e eiâ, te eiâ na hoi oe?” (Roma 2:21) E haafifi te tahi mau metua i te feruriraa o ta ratou mau tamarii ma te haapii i te haerea tia, area ratou iho ra, aita ïa e haa ra mai te reira. E faatia paha ratou i te eiâ haihai e i te mau parau haavarevare ma te na ô e “Ua ite iho â te paoti e te raverave ra te mau rave ohipa” aore ra “E haavare haihai noa tera. Aita hoi e ino.” I te tanoraa, aita e otoheraa no te eiâ, noa ’tu eaha te faufaa o te mea i eiâhia, e aita e otoheraa no te haavare, noa ’tu eaha te parau aore ra te rahi o te haavare. * (A taio i te Luka 16:10.) E taa oioi roa i te mau tamarii te huru haavarevare, o te nehenehe e haafifi roa ia ratou. (Ephesia 6:4) Ia haapii râ ratou i te haerea tia maoti te hi‘oraa o to ratou mau metua,  eita e ore e ia paari mai ratou, e faahanahana ratou ia Iehova i roto i teie nei ao haerea tia ore.—Maseli 22:6.

HAEREA TIA I ROTO I TE AMUIRAA

10. No nia i te aparauraa haavare ore i rotopu i te mau hoa Kerisetiano, eaha te mau faaararaa e mea tia ia haamana‘o tatou?

10 Ia amuimui tatou e te mau hoa Kerisetiano, mea rahi te taime maitai no te faatupu i te haerea tia. Mai ta tatou i ite i te pene 12, e mea tia ia ara tatou i ta tatou huru faaohiparaa i te ô o te parau, i rotopu iho â râ i to tatou mau taeae e tuahine Kerisetiano. E nehenehe te aparauraa o te mau mahana atoa e riro ohie roa ei hopoi parau faaino, ei pari haavare atoa! Ia faatia haere tatou i te hoê aamu papu ore, te faaatutu ra ïa paha tatou i te hoê haavare, e mea maitai a‘e ïa ia tapea tatou i to tatou vaha. (Maseli 10:19) I te tahi a‘e pae, noa ’tu e e parau mau te mea ta tatou i ite, aita e faufaa ia faatia ’tu. Ei hi‘oraa, e ere paha i te ohipa na tatou tera parau, aore ra e ere i te mea maitai ia faatia i te reira. (Tesalonia 1, 4:11) E faatia vetahi pae i te ite ore i te peu ma te parau e e haerea tia te reira, teie râ ei parau mǎrû e te hamani maitai noa ta tatou.—A taio i te Kolosa 4:6.

11, 12. (a) E nafea vetahi o tei rave i te hara rahi e faarahi ai i to ratou fifi? (b) Eaha te tahi mau haavare ta Satani e paturu ra no nia i te mau hara rahi, e e nafea ia aro i te reira? (c) E nafea ia faaite i te haerea tia i nia i te faanahonahoraa a Iehova?

11 E mea faufaa iho â râ ia faaite tatou i te haerea tia i nia i  te mau aratai i roto i te amuiraa. E faarahi te tahi mau taata tei rave i te hara rahi i te fifi ma te tamata i te huna i ta ratou hara e ma te haavare i te mau matahiapo. E haamata atoa ratou i te ora e piti huru oraraa, ma te faahua tavini ia Iehova a rave noa ’i i te hara rahi. Inaha, e faariro taua haerea ra i to ratou oraraa taatoa ei haavare. (Salamo 12:2) E faaite vetahi ê i te mau matahiapo i te tahi noa tuhaa o te parau mau a huna ’i i te mau tupuraa faufaa. (Ohipa 5:1-11) Te tumu pinepine o tera haerea tia ore, o te tiaturiraa ïa i te mau haavare ta Satani e paturu ra.—A hi‘o i te tumu parau tarenihia “ Ta Satani mau haavare no nia i te mau hara rahi.”

12 E mea faufaa atoa ia faaite tatou i te haerea tia i nia i te faanahonahoraa a Iehova ia pahono tatou i te mau uiraa ma te papai atu. Ei hi‘oraa, ia faaî tatou i ta tatou tapura taviniraa, e ara tatou i te tapao i te mau numera tia. Ia faaî atoa tatou i te tahi parau aniraa no te tahi fana‘oraa taa ê i roto i te taviniraa, eiaha roa tatou e haavare i nia i to tatou ea aore ra te tahi atu mau tuhaa o to tatou oraraa.—A taio i te Maseli 6:16-19.

13. E nafea ia tapea i te haerea tia mai te peu e e taairaa ohipa to tatou e te hoê hoa Kerisetiano?

13 E faaite atoa tatou i te haerea tia i nia i to tatou mau hoa Kerisetiano i roto i te ohipa tapihooraa. I te tahi taime, e amui te tahi mau taeae e tuahine no te tahi ohipa tapihooraa. E mea maitai ia ara ratou i te faataa ê i te reira i te haamoriraa ta ratou e rave amui ra i te Piha a te Basileia aore ra i roto i te taviniraa. E taairaa ohipa paha i rotopu i te hoê paoti e te hoê rave ohipa. Ia faaohipa tatou i te mau taeae aore ra tuahine, e haapao maitai tatou i te faaite i te haerea tia i nia ia ratou, ma te aufau ia ratou i te taime tia, i te moni ohipa tei faaauhia, e te mau apî faanahohia aore ra titauhia e te ture. (Timoteo 1, 5:18; Iakobo 5:1-4) E ia rave tatou i te ohipa na te hoê taeae aore ra tuahine, e horoa tatou i te taatoaraa o te ohipa e aufauhia ’i tatou. (Tesalonia 2, 3:10) Eita tatou  e tiai i te tahi fana‘oraa taa ê no te mea e taeae tatou, mai te huru ra e e titauhia ia horoa mai to tatou paoti i te mahana faaearaa ohipa, te apî, aore ra te tahi atu mau maitai eita hoi e horoahia na te tahi atu mau rave ohipa.—Ephesia 6:5-8.

14. Ia amui te tahi mau Kerisetiano no te hoê ohipa tapihooraa atâta rii, eaha ta ratou e haapao maite, e no te aha?

14 E te hoê ohipa tapihooraa amui atâta rii ïa, peneia‘e e faaohiparaa moni aore ra e tarahu? Te horoa ra te Bibilia i te hoê faaueraa tumu faufaa e te au ia faaohipa: A papai pauroa! Ei hi‘oraa, i to Ieremia hooraa mai i te hoê tâpû fenua, e parau hooraa ta ’na e piti hoho‘a, tei papaihia i mua i te mau ite e tei faaherehere-maitai-hia no te hi‘o atu a muri a‘e. (Ieremia 32:9-12; a hi‘o atoa i te Genese 23:16-20.) Ia haa tatou e te mau hoa Kerisetiano, e ere i te tiaturi ore te tahi i te tahi ia papai i te mau mea atoa i nia i te hoê api parau tei faaineine-maitai-hia e tei tarimahia i mua i te mau ite. E arai râ te reira i te mau taa-ore-raa, te inoino e te peapea o te faaamahamaha. E mea maitai ia haamana‘o te mau Kerisetiano o te haa amui e aita roa ’tu e faufaa to te hoê ohipa tapihooraa atâta o te haafifi i te auhoêraa e te hau o te amuiraa. *Korinetia 1, 6:1-8.

HAEREA TIA I ROTO I TEIE NEI AO

15. Eaha to Iehova mana‘o i te mau peu tapihooraa tia ore, e e nafea ïa te mau Kerisetiano i mua i teie mau peu matauhia?

15 E ere i roto noa i te amuiraa e faaite ai te hoê Kerisetiano i te haerea tia. Ua parau Paulo e: “I te opuaraa e ei haapao maitai [aore ra haerea tia] t[o] [t]atou i te mau mea atoa.” (Hebera 13:18) Te anaanatae roa nei to tatou Atua poiete i te haerea tia i roto i te ohipa tapihooraa. I roto noa i te Maseli, e rave rahi taime te haafaufaaraahia te faito tia. (Maseli 11:1; 20:10, 23) I tahito ra, e peu matauhia ia faaohipa i te mau faito e te mau tapao i roto i te tapihooraa no te faito i te mau  mea i hoohia mai e te moni faaohipahia no te hoo mai i te reira. I faaohipa na te feia hoo tao‘a haerea tia ore e piti haapueraa tapao e te hoê faito tia ore no te haavare e no te eiâ i ta ratou mau hoani. * Mea riri roa na Iehova tera mau peu! No te vai noa i roto i to ’na here, e ape roa tatou i te mau peu tapihooraa tia ore atoa.

16, 17. Eaha te mau huru haerea tia ore matauhia i roto i te ao i teie tau, e ua faaoti papu te mau Kerisetiano mau eiaha e aha?

16 No te mea na Satani e faatere ra i teie nei ao, aita tatou e maere ra i te ite i te haerea tia ore e haaati ra ia tatou. I te mau mahana atoa, e nehenehe tatou e faahemahia ia haa ma te haerea tia ore. Ia papai te tahi mau taata i ta ratou parau aniraa no te fana‘o i te ohipa, ua matau ratou i te haavare e i te faarahi i te parau i nia i to ratou ihotaata e aravihi. Ia faaî te tahi mau taata i te mau api parau no te faaea i te hoê fenua, no nia i te tute, te parururaa, e te tahi atu mau mea mai te reira te huru, e pinepine ratou i te horoa i te mau pahonoraa hape ia noaa mai ta ratou e hinaaro. Mea rahi te piahi e punu i te mau hi‘opoaraa, aore ra ia papai ratou i te mau vauvauraa e parau faataa no te haapiiraa, e rave noa mai ratou i ta ratou i ite i nia i te Internet, a haavare atu ai e na ratou iho i faaineine i te reira. E ia haa te taata e te mau taata toroa pi‘o, e pinepine ratou i te peta ia noaa mai ta ratou e hinaaro. Aita tatou e maere ra i te ite i te reira i roto i te hoê ao mea rahi roa te taata “miimii, . . . nounou moni, . . . e te au ore i te taata maitatai.”—Timoteo 2, 3:1-5.

17 Ua faaoti papu te mau Kerisetiano mau eiaha e rave i te hoê a‘e o tera mau peu. Te mea o te faariro i te haerea tia ei mea fifi i te tahi taime, oia ïa e au ra e te manuïa ra te feia o te rave ra i tera mau ohipa tia ore e te fana‘o atoa ra i te tahi mau maitai i roto i te ao i teie tau. (Salamo 73:1-8) I te hoê â  taime, te fifi ra paha te mau Kerisetiano i te pae moni no to ratou hinaaro e tapea i te haerea tia “i te mau mea atoa.” E hoona anei te mau haapaeraa atoa i ravehia? Oia mau! No te aha hoi? Eaha te mau haamaitairaa o te haerea tia?

TE MAU HAAMAITAIRAA O TE HAEREA TIA

18. No te aha e faufaa rahi ai to te roo taata haerea tia?

18 I roto i te oraraa, aita rea mea e mea faufaa a‘e i te hoê roo taata tiaturihia e te haerea tia. (A hi‘o i te tumu parau tarenihia “ E haerea tia noa anei to ’u?”) E a feruri na—o te taata atoa te nehenehe e patu i tera huru roo! Aita te reira i taaihia i to oe aravihi, ta oe faufaa, to oe haviti, to oe tiaraa totiare, aore ra te tahi atu mea aita to oe e mana i nia iho. Teie râ, mea rahi aita ta ratou taua tao‘a rahi ra o te hoê roo maitai. E huru maitai varavara. (Mika 7:2) E tâhitohito paha vetahi ia oe no to oe haerea tia, area te tahi atu ra, e haafaufaa ïa i te reira e ei faahopearaa e tiaturi e e faatura ratou ia oe. Mea rahi te Ite no Iehova tei faufaa-atoa-hia i to ratou haerea tia i te pae moni. Ua tapea ratou i ta ratou ohipa a tihatihia ’i te mau rave ohipa haerea tia ore, aore ra ua ravehia ratou no te hoê ohipa mea hinaaro-roa-hia te rave ohipa haerea tia.

19. Eaha te faahopearaa o te haerea tia i nia i to tatou mana‘o haava e to tatou taairaa e o Iehova?

19 Ia tupu te reira i nia ia oe aore ra eita, e ite oe e e hopoi atoa mai te haerea tia i te mau haamaitairaa rahi atu â. E fana‘o oe i te haamaitairaa o te hoê mana‘o haava viivii ore. Ua papai Paulo e: “Ua ite mau . . . matou e te tia nei to matou aau [aore ra mana‘o haava].” (Hebera 13:18) Hau atu â, eita roa ’tu to tatou Metua î i te here i te ra‘i e haamoe i te tapao i to oe roo, e mea here na ’na te feia haerea tia. (A taio i te Salamo 15:1, 2; Maseli 22:1.) Oia, e tauturu te haerea tia ia oe ia vai noa i roto i te here o te Atua, e tera te utua maitai roa ’‘e ta tatou e titau ra. E hi‘opoa mai tatou i muri iho i te hoê tumu parau tapiri: To Iehova mana‘o i te ohipa.

^ par. 9 Mai te peu e, i roto i te amuiraa, ua matau te hoê taata i te haavare rahi roa ino—ma te opua maitai e totoa ia vetahi ê—e nehenehe te mau matahiapo e haamau i te hoê tomite a‘o faaroo.

^ par. 14 E nafea ïa ia fifi noa ’tu te tahi ohipa tapihooraa, a hi‘o i te tuhaa hau “Te faaafaroraa i te mau peapea i te pae moni.”

^ par. 15 I faaohipa na ratou hoê haapueraa tapao no te hoo mai e te tahi atu no te hoo atu, a apî ai ratou i roto i na tupuraa e piti. E nehenehe ratou e faaohipa atoa i te hoê faito mea roa ’‘e aore ra mea teiaha a‘e te hoê pae i te tahi atu no te eiâ i te hoani i nia i te tapihooraa atoa.

No te ite atu â

Ia haavare to tamarii

Eaha te rave ia haavare to tamarii? I roto i teie tumu parau, te hi‘opoahia ra te tahi a‘oraa Bibilia e tauturu atu ia haapii i to tamarii i te faufaaraa ia faaite i te parau mau.