Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 11

“Ia haamaitaihia te faaipoipo”

“Ia haamaitaihia te faaipoipo”

“Ia oaoa oe i te vahine o te apîraa ra.”—MASELI 5:18.

1, 2. Eaha te uiraa ta tatou e hi‘opoa, e no te aha?

MEA faaipoipo anei oe? Mai te peu e e, mea oaoa anei to oe faaipoiporaa, aore ra te fifi rahi ra? Ua atea riirii anei oe e to oe apiti? Te faaoromai ra anei oe i to oe oraraa faaipoipo e aita oe e oaoa ra? Mai te peu e e, te peapea ra paha oe e ua toetoe te taairaa mahanahana o te faaipoiporaa ta oe i fana‘o na. Ei Kerisetiano, e hinaaro iho â oe ia faahanahana to oe faaipoiporaa ia Iehova, te Atua ta oe e here ra. No reira, te peapea ra e te mauiui ra paha oe no to oe nei tupuraa. Noa ’tu râ, eiaha na e faaoti e aita e ravea.

2 I teie mahana, te vai ra te mau Kerisetiano faaipoipo maitai roa o tei ora amui noa na aita hoi e taairaa piri roa to te tahi e te tahi. Ua ite râ ratou i te hoê ravea no te haapaari i to ratou taairaa. E nehenehe oe atoa e ite i te oaoa rahi atu â i roto i to oe faaipoiporaa. E nafea?

A HAAFATATA NOA ’TU Â I TE ATUA E I TO OE APITI

3, 4. No te aha na hoa faaipoipo e haafatata ’tu â ’i te tahi i te tahi ia tutava raua i te haafatata ’tu â i te Atua? A horoa na i te hoê faahoho‘araa.

3 E haafatata ’tu â oe i to oe apiti ia tutava orua i te haafatata ’tu â i te Atua. No te aha? A rave na i te hoê faahoho‘araa: A mana‘o na i te hoê mou‘a aano i raro e te ǒaǒa i nia. Te tia ra te hoê tane i raro i te mou‘a i te pae apatoerau e te hoê vahine i te tahi atu pae, i raro i te pae apatoa. E haamata raua e piti i te paiuma. A tia noa ’i raua i raro i te mou‘a, mea atea roa te tahi i te tahi. A paiuma noa ’tu ai râ raua i  nia roa, e iti roa mai te atearaa i rotopu ia raua. Te ite ra anei oe i te haapiiraa tamǎrû i roto i teie faahoho‘araa?

4 E nehenehe te tutavaraa ta oe e rave ra no te tavini hope ia Iehova e faaauhia i te tutavaraa ta oe e rave no te paiuma i nia i te hoê mou‘a. I te mea e te here ra oe ia Iehova, ua haamata ê na ïa oe i te tutava rahi i te paiuma, ei auraa parau. Mai te peu râ e ua atea riirii oe e to oe apiti, te paiuma ra paha ïa orua na te hoê pae te tahi e na te tahi atu pae te tahi o taua mou‘a ra. Eaha râ te tupu ia tamau orua i te paiuma? Parau mau, e atearaa rahi paha to rotopu ia orua i te omuaraa. Teie râ, a tutava ’tu â ’i oe i te haafatata ’tu â i te Atua—ma te paiuma i nia ’tu â—e haafatata ’tu â oe i to oe apiti. Oia mau, o te haafatataraa ’tu â i te Atua te ravea  faufaa roa no te haafatata ’tu â i to oe apiti. E nafea râ oe e na reira mau ai?

Ia faaohipahia, e mana to te ite i te Bibilia e haapaari i to oe faaipoiporaa

5. (a) Eaha te hoê ravea no te haafatata ’tu â ia Iehova e i to oe apiti? (b) Eaha to Iehova mana‘o i te faaipoiporaa?

5 Te hoê ravea faufaa no te paiuma, ei auraa parau, o te peeraa ïa oe e to oe apiti i te mau a‘oraa no nia i te faaipoiporaa i roto i te Parau a te Atua. (Salamo 25:4; Isaia 48:17, 18) A hi‘o na ïa i te hoê mana‘o taa maitai o te a‘oraa a te aposetolo Paulo. Ua parau oia e: “Ia haamaitaihia te faaipoipo i te taata atoa ra.” (Hebera 13:4) Eaha ïa te auraa? Te horoa ra te ta‘o “haamaitaihia” i te mana‘o o te hoê mea haafaufaahia e te poiherehia. Tera mau â to Iehova mana‘o i te faaipoiporaa—te haafaufaa ra oia i te reira mai te hoê mea poiherehia.

TO OE MANA‘O TURAI—TE HERE MAU NO IEHOVA

6. Eaha ta te mau irava tapiri o te a‘oraa a Paulo no nia i te faaipoiporaa e faaite ra, e no te aha e mea faufaa ’i ia haamana‘o i te reira?

6 Parau mau, ei tavini a te Atua, ua ite ê na oe e to oe apiti e mea poiherehia te faaipoiporaa, mea mo‘a atoa. Na Iehova iho i haamau i tera faanahoraa. (A taio i te Mataio 19:4-6.) Mai te peu râ e te fifi nei to oe faaipoiporaa, eita paha e navai te iteraa e mea haamaitaihia te faaipoiporaa no te turai ia oe e to oe apiti ia here e ia faatura te tahi i te tahi. Eaha ïa te turai ia oe ia na reira? A tapao maitai na mea nafea to Paulo faahitiraa i te parau o te faaiteraa i te haamaitairaa, aore ra tura. Aita o ’na i parau e “mea haamaitaihia te faaipoipo”; ua parau râ o ’na, “ia haamaitaihia te faaipoipo.” Aita Paulo e horoa noa ra i te hoê mana‘o; te horoa ra o ’na i te hoê a‘oraa. * E tauturu te haamana‘o-noa-raa i taua taa-ê-raa ra ia oe ia hinaaro atu â e haafaufaa faahou i to oe apiti. No te aha hoi?

7. (a) Eaha te mau faaueraa Bibilia ta tatou e haapao ra, e no te aha? (b) Eaha te mau faahopearaa maitatai o te faarooraa?

 7 A feruri na maa taime eaha to oe mana‘o i te tahi atu mau faaueraa Bibilia, mai te ohipa faauehia e faariro i te taata ei pǐpǐ aore ra te faaueraa e putuputu no te haamoriraa. (Mataio 28:19; Hebera 10:24, 25) Parau mau, e mea fifi paha i te tahi taime ia haapao i tera na faaueraa. Eita paha te feia ta oe e poro atu e farii ia oe, aore ra ua rohirohi roa paha oe no ta oe ohipa e mea fifi roa no oe ia haere i te mau putuputuraa Kerisetiano. Noa ’tu râ, te tamau ra oe i te poro i te poroi o te Basileia e te tamau ra oe i te haere i te mau putuputuraa Kerisetiano. Aita e taata e tia ia tapea ia oe—eita atoa e tia ia Satani! No te aha e ore ai? No te mea te turai ra to oe here haavare ore no Iehova ia oe ia faaroo i ta ’na mau faaueraa. (Ioane 1, 5:3) E eaha te mau faahopearaa maitatai? E horoa ’tu te apitiraa i te ohipa pororaa e te haereraa i te mau putuputuraa i te hau o te feruriraa e te oaoa mau no te mea ua ite oe e te rave nei oe i te hinaaro o te Atua. E maoti taua mau huru aau ra, e itoito-faahou-hia oe. (Nehemia 8:10) Eaha te haapiiraa i ǒ nei?

8, 9. (a) Eaha te nehenehe e turai ia oe ia faaroo i te a‘oraa e haamaitai i te faaipoiporaa, e no te aha? (b) Eaha na mana‘o e piti ta tatou e hi‘opoa i teie nei?

8 Mai to oe here hohonu no te Atua e turai ra ia oe ia faaroo i na faaueraa e poro e e putuputu noa ’tu te mau haafifiraa, e nehenehe to oe here no Iehova e turai ia oe ia faaroo i te a‘oraa Bibilia “ia haamaitaihia [to oe] faaipoipo,” noa ’tu e e au ra e mea fifi. (Hebera 13:4; Salamo 18:29; Koheleta 5:4) Hau atu â, a haamaitai rahi ai Iehova i ta oe mau tutavaraa no te apiti i te pororaa e no te haere i te mau putuputuraa, e tapao e e haamaitai atoa oia i ta oe mau tutavaraa no te haamaitai i to oe faaipoiporaa.—Tesalonia 1, 1:3; Hebera 6:10.

9 Eaha ïa ta oe e rave ia haamaitaihia to oe faaipoiporaa?  E titauhia ia ape oe i te haerea atoa o te faaino i to oe faaipoiporaa. E mea tia atoa ia rave oe i te tahi mau ohipa o te haapaari i te taairaa o to oe faaipoiporaa.

A APE I TE PARAU E TE HAEREA ATOA O TE FAAINO I TE FAAIPOIPORAA

10, 11. (a) Teihea haerea o te faaino i te faaipoiporaa? (b) Eaha te uiraa e mea maitai ia hi‘opoa oe e to oe apiti?

10 Ua parau te hoê vahine faaipoipo Kerisetiano tau taime a‘enei e: “E pure au ia Iehova ia horoa mai i te puai no te faaoromai.” E faaoromai i te aha? Ua faataa oia e: “E tuhi ta ’u tane ia ’u. Eita paha e itehia te pepe i nia ia ’u, ua pepe maitai râ to ’u aau i ta ’na mau parau mauiui tamau, mai teie ‘E vahine teimaha oe!’ e ‘Mea faufaa ore oe!’” Te faahiti ra teie vahine faaipoipo i te hoê fifi rahi—te parau tuhi i roto i te faaipoiporaa.

11 Auê te peapea e ia tuhi te feia faaipoipo i roto i te mau utuafare Kerisetiano te tahi i te tahi, a pepe atu ai te aau o te ore e ora ohie! Papu maitai, e ere te hoê faaipoiporaa e parau mauiui to roto i te mea tura. Eaha te huru o to oe faaipoiporaa i roto i teie tuhaa? E ite oe ia ui haehaa oe i to oe apiti, “Eaha ta ta ’u mau parau e faatupu i nia ia oe?” Ia mana‘o to oe apiti e e pinepine roa ta oe mau parau i te haapepe i to ’na aau, e titauhia ïa ia farii oe i te taui ia maitai mai te tupuraa.—Galatia 5:15; a taio i te Ephesia 4:31.

12. E nafea te haamoriraa a te hoê taata e nehenehe ai e faufaa ore i te aro o te Atua?

12 A haamana‘o maitai e e ohipa ta oe huru faaohiparaa i to oe vaha i roto i to oe faaipoiporaa i nia i to oe taairaa e o Iehova. Te na ô ra te Bibilia e: “Te mana‘o râ te hoê taata i roto ia outou, e e paieti to ’na, e aore i tapea i to ’na vaha, te haavare ra râ i to ’na iho aau, e paieti haavare to ’na.” (Iakobo 1:26) Eita e nehenehe e faataa ê i ta oe parau e to oe paieti, aore ra ta oe haamoriraa i te Atua. Aita te Bibilia e  turu ra i te mana‘o e e ere te mau mea atoa e tupu i te fare i te mea faufaa a parau noa ’i tatou e tavini i te Atua. Eiaha na e vare. E ohipa hoata ore teie. (A taio i te Petero 1, 3:7.) E aravihi paha to oe e te itoito rahi, mai te peu râ e e haapepe oe ma te hinaaro mau i to oe apiti i te mau parau mauiui, te faaino ra ïa oe i to oe faaipoiporaa e e nehenehe te Atua e hi‘o i ta oe haamoriraa ei mea faufaa ore.

13. E nafea te hoê hoa faaipoipo e nehenehe ai e haamauiui i te aau o to ’na apiti?

13 E mea tia atoa ia ara te feia faaipoipo eiaha e haamauiui i te aau na roto i te mau ravea tanai ore. A rave na e piti hi‘oraa: E niuniu pinepine te hoê metua vahine taa noa i te hoê tane faaipoipo Kerisetiano o te amuiraa no te ani i te a‘oraa, e e paraparau maoro raua; e poro maoro te hoê tane Kerisetiano taa noa i te mau hebedoma atoa e te hoê tuahine Kerisetiano faaipoipo. E mana‘o maitai paha to na taata faaipoipo o teie na hi‘oraa; teie râ, eaha te faahopearaa o to raua haerea i nia i to raua apiti? Teie ta te hoê vahine faaipoipo tei faaruru na i tera tupuraa i parau: “Ua mauiui au i te iteraa i ta ’u tane ia horoa i te taime e te ara-maite-raa rahi roa no te tahi atu tuahine i roto i te amuiraa. Ua mana‘o vau e e ere au i te mea faufaa.”

14. (a) Eaha te hopoia i roto i te faaipoiporaa e haapapuhia ra i roto i te Genese 2:24? (b) Eaha ta tatou e ui ia tatou iho e tia ’i?

14 E mauiui iho â teie apiti e te tahi atu o te faaruru ra i tera atoa tupuraa i roto i te faaipoiporaa. Aita to ratou apiti e tâu‘a ra i te faaueraa tumu a te Atua no te faaipoiporaa: “E faarue . . . te taata i tana metua tane e tana metua vahine, a ati atu ai i ta ’na vahine.” (Genese 2:24) Parau mau, e faatura noa te feia o te faaipoipo i to ratou mau metua; teie râ, ua faanaho te Atua e o to ratou apiti ta ratou e haapao na mua. Oia atoa, mea here roa na te mau Kerisetiano to ratou mau taeae e tuahine; o to ratou râ apiti ta ratou hopoia matamua. No reira, ia horoa rahi roa ino te mau Kerisetiano  faaipoipo i to ratou taime aore ra ia faahoa roa ’tu ratou i te tahi atu mau Kerisetiano, te feia melo ê iho â râ, te haafifi ra ïa ratou i to ratou faaipoiporaa. E tumu anei te reira e tupu ai te umeumeraa i roto i to oe faaipoiporaa? A ui ia oe iho, ‘Te horoa mau ra anei au no to ’u apiti i te taime, te ara-maite-raa e te here e au iho â ia ’na?’

15. Ia au i te Mataio 5:28, no te aha e mea maitai ai ia ape te mau Kerisetiano faaipoipo i te haapao ma te tano ore i te hoê taata melo ê?

 15 Hau atu â, te tuu ra te mau Kerisetiano faaipoipo o te haapao ma te tano ore i te feia melo ê e ere i to ratou apiti, ia ratou i roto i te hoê tupuraa atâta. E mea peapea ia parau, ua faatupu te mau Kerisetiano faaipoipo i te mau huru aau here no te feia ta ratou i matau roa ino. (Mataio 5:28) Ei faahopearaa, ua aratai atu tera taairaa i te pae aau i te hoê haerea o te faaino atu â i te faaipoiporaa. A hi‘o na eaha ta te aposetolo Paulo i parau no nia i te reira.

‘IA VIIVII ORE TE ROI’

16. Eaha te faaueraa ta Paulo e horoa ra no nia i te faaipoiporaa?

16 I muri iti a‘e i to Paulo horoaraa i te a‘oraa “ia haamaitaihia te faaipoipo,” ua horoa atoa oia i teie faaararaa: “Ia . . . viivii ore hoi te roi; e haava hoi te Atua i te poreneia [aore ra te feia e rave ra i te mau peu taotoraa tia ore] e te faaturi ra.” (Hebera 13:4) Ua faaohipa Paulo i te ta‘o “roi” no te faahiti i te mau taatiraa. Mea “viivii ore,” aore ra mea mâ, tera mau taatiraa i te pae morare, ia ravehia te reira i roto noa i te faaipoiporaa. No reira te mau Kerisetiano e pee ai i teie mau parau faaurua: “Ia oaoa oe i te vahine o te apîraa ra.”—Maseli 5:18.

17. (a) No te aha eiaha ’i te mau Kerisetiano e pee i to te ao mana‘o i te faaturi? (b) E nafea ia pee i te hi‘oraa ta Ioba i vaiiho mai?

17 Te feia o te taoto i te hoê taata e ere i to ratou apiti, aita roa ’tu ïa e faatura ra i te mau ture morare a te Atua. Parau mau, mea rahi i teie mahana o te hi‘o ra i te faaturi ei haerea fariihia. Eiaha râ to te tahi atu mau taata mana‘o i te faaturi ia ohipa i nia i te huru hi‘oraa a te mau Kerisetiano i te reira. Ua taa ia ratou e i te pae hopea, e ere na te taata, na te Atua râ e haava i te feia e rave ra i te mau peu taotoraa tia ore e te faaturi. (Hebera 10:31; 12:29) No reira te mau Kerisetiano mau e pee maite ai i te mana‘o o Iehova no nia i teie parau. (A taio i te Roma 12:9.) A haamana‘o i ta te  patereareha Ioba i parau: “Ua faaau vau i te faufaa i o ’u nei pue mata.” (Ioba 31:1) Oia, no te ape i te hoê noa ’‘e taahiraa o te aratai atu i te faaturi ra, te haavî ra te mau Kerisetiano mau i to ratou mata ia ore roa ’tu ratou e hi‘o faahinaaro i te hoê taata melo ê e ere i to ratou apiti.—A hi‘o i te tuhaa hau, “To te Bibilia mana‘o i te faataaraa e te faataa-ê-raa.”

18. (a) I te aro o Iehova, eaha te ino o te faaturi? (b) Eaha te tuearaa i rotopu i te faaturi e te haamori idolo?

18 I te aro o Iehova, eaha te ino o te faaturi? Te tauturu maira te ture a Mose ia taa i te huru aau o Iehova i te reira. I Iseraela, to roto te faaturi e te haamori idolo i te mau hapa o te pohe te utua. (Levitiko 20:2, 10) Te ite ra anei oe i te tuearaa i roto i na mea e piti? Ua ofati te hoê Iseraela o te haamori i te hoê idolo i ta ’na faufaa i faaau ia Iehova. Oia atoa, ua ofati te hoê Iseraela o te faaturi i ta ’na faufaa i faaau i to ’na apiti. Ua haavare raua e piti atoa. (Exodo 19:5, 6; Deuteronomi 5:9; a taio i te Malaki 2:14.) No reira raua e piti atoa e faahapahia ’i i mua ia Iehova, te Atua haapao maitai e te tiaturihia.—Salamo 33:4.

19. Eaha te nehenehe e haapaari i te faaotiraa a te hoê taata e patoi i te faaturi, e no te aha?

19 Parau mau, aita te mau Kerisetiano i raro a‘e i te ture a Mose. Teie râ, e nehenehe te haamana‘oraa e e hara rahi te faaturi i Iseraela i tahito ra e haapaari i te mau Kerisetiano i roto i ta ratou faaotiraa eiaha e rave i taua hara ra. No te aha? A feruri na i teie faaauraa: E tomo anei oe i roto i te hoê fare pure, e tuu i to turi i raro, e e pure i mua i te hoê hoho‘a? ‘Eita roa ’tu!’ e parau oe. E hema râ anei oe ia pûpûhia ’tu te hoê tino moni rahi? ‘Eita ïa!’ e pahono oe. Inaha, mea au ore roa na te hoê Kerisetiano mau te mana‘o noa e haavare ia Iehova ma te haamori i te hoê idolo. Oia atoa, e mea maitai ia au ore roa te mau Kerisetiano i te mana‘o e haavare i to ratou Atua ra o Iehova, e to ratou apiti atoa ma te faaturi—noa ’tu eaha te mea i turai ia hara.  (Salamo 51:1, 4; Kolosa 3:5) Eiaha roa ’tu tatou e hinaaro e rave i te hoê mea o te faaoaoa ia Satani, o te faaino roa râ ia Iehova e i te faanahoraa mo‘a o te faaipoiporaa.

E NAFEA IA HAAPAARI I TO OE FAAIPOIPORAA

20. Eaha tei tupu i roto i te tahi mau faaipoiporaa? A horoa i te hoê faahoho‘araa.

20 Hau atu i te ape i te haerea atoa o te faaino i te faaipoiporaa, eaha te mau taahiraa ta oe e nehenehe e rave no te faaoraora i to oe faatura no to oe apiti? Ei pahonoraa, a hi‘o na i te faaipoiporaa mai te hoê fare. E a hi‘o i te mau parau maitatai, te mau ohipa ferurihia e te tahi atu mau faaiteraa i te faatura a na hoa faaipoipo te tahi i te tahi mai te mau tao‘a faaunauna o te faanehenehe atu â i te hoê fare. Mai te peu e mea piri orua te tahi i te tahi, e au ïa to orua faaipoiporaa i te hoê fare tei faaunaunahia o te horoa mai i te û e te mahanahana. Mai te peu e e iti mai to orua here, e moe riirii ïa taua mau faaunaunaraa ra, a riro atu ai to orua faaipoiporaa ei mea pohepohe mai te hoê fare aita e faaunaunaraa. I te mea e te hinaaro ra oe e faaroo i te faaueraa a te Atua “ia haamaitaihia te faaipoipo,” e turaihia ïa oe ia haamaitai i te tupuraa. Inaha, e hoona ia tataî, aore ra faaapî, i te tahi mea poiherehia e te haamaitaihia. E nafea ïa oe? Te na ô ra te Parau a te Atua e: “E patuhia te fare i te paari e oti atu: e e papu hoi taua fare ra i te ite. E î hoi te mau piha atoa ra i te ite, i te mau tao‘a maitatai i hinaarohia ra.” (Maseli 24:3, 4) A feruri e nafea ia faaohipa i teie mau parau i nia i te faaipoiporaa.

21. E nafea tatou e haapaari riirii ai i to tatou faaipoiporaa? (A hi‘o atoa i te tumu parau tarenihia “ E nafea ia haamaitai i to ’u faaipoiporaa?”)

21 I rotopu i te mau tao‘a hinaarohia i roto i te hoê utuafare oaoa, te vai ra te mau huru maitatai mai te here mau, te mǎta‘u i te Atua e te faaroo papu. (Maseli 15:16, 17; Petero 1, 1:7) E faatupu te reira i te hoê faaipoiporaa puai. Ua  tapao anei râ oe mea nafea te îraa te mau piha o te maseli i nia nei i te mau tao‘a hinaarohia? “I te ite.” Oia, ia faaohipahia, e mana to te ite i te Bibilia e taui i te huru feruriraa o te taata e e turai ia ratou ia faaoraora i to ratou here no te tahi e te tahi. (Roma 12:2; Philipi 1:9) No reira, i te taime atoa e rave ai oe e to oe apiti i te taime no te paraparau e no te hi‘opoa hau noa i te hoê irava Bibilia, mai te irava mahana, aore ra te hoê tumu parau Bibilia o Te Pare Tiairaa aore ra o te A ara mai na! no nia i te faaipoiporaa, mai te huru ra ïa e te hi‘opoa ra orua i te hoê faaunaunaraa o te faanehenehe i to orua fare. Ia turai te here no Iehova ia orua ia faaohipa i roto i to orua faaipoiporaa i te a‘oraa ta orua i hi‘opoa mai nei, te tuu ra ïa orua ei auraa parau i taua faaunaunaraa ra i roto i te mau piha o to orua fare. Ei faahopearaa, e nehenehe te tahi mau û e mahanahana ta orua i fana‘o na i roto i to orua faaipoiporaa e ho‘i mai.

22. E ite tatou i te mauruuru o te aha ia faaitoito tatou i te rave i ta tatou tuhaa i roto i te haapaariraa i to tatou faaipoiporaa?

22 Parau mau, e titauhia paha te taime e te tutavaraa rahi no te faaho‘i riirii mai i tera mau faaunaunaraa. Ia faaitoito râ oe i te rave i ta oe tuhaa, e ite ïa oe i te mauruuru hohonu o te iteraa e te faaroo ra oe i te faaueraa Bibilia: “[A] faatur[a] ’tu [outou na mua] te tahi i te tahi.” (Roma 12:10; Salamo 147:11) Hau roa ’tu â, e vai noa oe i roto i te here o te Atua maoti ta oe mau tutavaraa tuutuu ore e haamaitai i to oe faaipoiporaa.

^ par. 6 Ia au i te mau irava tapiri, e tuhaa te a‘oraa a Paulo no nia i te faaipoiporaa o te hoê anairaa a‘oraa.—Hebera 13:1-5.