Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 7

Te haafaufaa ra anei oe i te ora mai te Atua?

Te haafaufaa ra anei oe i te ora mai te Atua?

“Tei ia oe . . . te tumu o te ora.”—SALAMO 36:9.

1, 2. Eaha te ô no ǒ mai i te Atua ra mea faufaa roa i teie tau, e no te aha hoi?

UA HOROA mai to tatou Metua i te ra‘i i te hoê mea faufaa roa—te ô o te ora ei taata maramarama o te nehenehe e pee i to ’na mau huru maitatai. (Genese 1:27) Maoti taua ô faufaa roa ra, e nehenehe tatou e haaferuri i nia i te mau faaueraa tumu Bibilia. Ma te faaohipa i te reira, e nehenehe tatou e haere i mua ei taata paari i te pae varua, o te here ia Iehova e tei “haamataro[hia] . . . [te] puai haroaroaraa i te faataa ê i te maitai e te ino.”—Hebera 5:14, Traduction du monde nouveau.

2 Mea faufaa iho â râ te neheneheraa e haaferuri i nia i te mau faaueraa tumu Bibilia i teie tau, no te mea e mea fifi roa te ao nei aita ïa e ture e tano no te mau huru tupuraa atoa e nehenehe e fa mai i roto i te oraraa. Te faataa maitai ra te ihi rapaauraa i teie mana‘o, no nia iho â râ i te mau raau e ravea o te faaohipa i te toto. E tuhaa faufaa teie no te feia atoa e hinaaro e faaroo ia Iehova. Mai te peu râ e ua taa ia tatou te mau faaueraa tumu Bibilia faufaa, e tia ia tatou ia rave i te mau faaotiraa paari o te haapao i to tatou mana‘o haava e o te tapea ia tatou i roto i te here o te Atua. (Maseli 2:6-11) E hi‘opoa tatou i te tahi o teie mau faaueraa tumu.

MEA MO‘A TE ORA E TE TOTO

3, 4. Inafea to te mau Papai faahiti-matamua-raa i te mo‘araa o te toto, e ua niuhia te reira i nia i teihea mau faaueraa tumu?

3 Ua faaite matamua Iehova i te taairaa piri roa i rotopu i te ora e te toto, e to raua mo‘araa, i muri iti a‘e i to Kaina taparahi-pohe-raa  ia Abela. “Te pii maira te reo ra o te toto o to taeae mai te repo maira ia ’u,” ta te Atua ïa i parau ia Kaina. (Genese 4:10) I ta Iehova hi‘oraa, te faahoho‘a ra te toto o Abela i to ’na ora, o tei haapoto-taue-hia. No reira e nehenehe ai e parau e te pii ra te toto o Abela i te Atua ia tahoo mai.—Hebera 12:24.

4 I muri a‘e i te diluvi i te tau o Noa, ua faatia te Atua i te mau taata ia amu i te i‘o animara, eiaha râ te toto. Teie ta te Atua i parau: “O te i‘o . . . ma te ora atoa i roto ra, oia te toto, eiaha outou e amu i te reira. Eita roa hoi au e ore i te titau i te hoo i to outou na toto i ora ’i outou.” (Genese 9:4, 5) No te taatoaraa o te huaai o Noa e tae mai i to tatou tau teie faaueraa. Te haapapu faahou ra te reira i te auraa o ta te Atua mau parau ia Kaina—oia hoi te faahoho‘ahia ra te ora o te taata e o te mau mea ora atoa i poietehia e te toto. Te haapapu atoa ra tera faaueraa mana e e titau Iehova, te Tumu o te ora, i te hopoia i te mau taata atoa o te ore e faatura i te ora e te toto.—Salamo 36:9.

5, 6. Mea nafea te ture a Mose i te faaiteraa e mea mo‘a e mea faufaa roa atoa te toto? (A hi‘o atoa i te tumu parau tarenihia “ A faatura i te ora o te mau animara.”)

5 E ite-atoa-hia teie na parau mau faufaa roa e piti i roto i te ture a Mose. Te na ô ra te Levitiko 17:10, 11 e: “To te feia atoa e . . . amu i te toto ra, e tano maite tau mata i te reira taata i tei amu i te toto ra, e tâpû ê atu vau ia ’na i to ’na ra nunaa: tei te toto hoi te maa ora e ora ’i te mau mea atoa ra, i haapao ai au i te reira e o ta outou ïa e hopoi i nia i te fata ei taraehara na outou iho, o te toto hoi tei riro ei taraehara no te taata.” *—A hi‘o i te tumu parau tarenihia “ Te mana taraehara o te toto.”

6 Ia ore te toto o te hoê animara i tupaihia e faaohipahia i nia i te fata, e faatahehia te reira i raro i te repo. Ei auraa taipe,  te ho‘i ra ïa te ora i to ’na Fatu matamua. (Deuteronomi 12:16; Ezekiela 18:4) A tapao râ e aita te mau Iseraela i faaohipa i te mau ravea etaeta roa no te faatahe pauroa i te toto i roto i te i‘o o te animara. Mai te peu e ua tupai-maitai-hia te animara e ua faatahe-maitai-hia to ’na toto, e nehenehe te hoê Iseraela e amu i te reira ma te hoê mana‘o haava maitai, no te mea e faaiteraa te reira i te faatura i Tei horoa mai i te ora.

7. Mea nafea to Davida faaiteraa i te faatura i te mo‘araa o te toto?

 7 Ua taa ia Davida, te hoê “taata e au i [to te Atua] aau,” te mau faaueraa tumu e turu ra i te ture a te Atua no nia i te toto. (Ohipa 13:22) I te hoê taime a poihâ roa ’i oia, ua tomo noa ’tu e toru o to ’na mau taata i roto i te puhapa enemi, ua huti ihora i te pape i te apoo pape e ua hopoi atura ia ’na. Ua aha Davida? “Ia na reira hoi au nei: e ere anei i te toto teie o te mau taata o tei faaû noa i to ratou pohe i te tiiraa i teie nei pape?” ta ’na ïa i ui. Inaha, no Davida, o te toto o to ’na mau taata te pape. No reira, noa ’tu to ’na poihâ, “ua ninii ihora [oia] ei tusia inu na Iehova.”—Samuela 2, 23:15-17.

8, 9. Ua taui anei te mana‘o o te Atua no nia i te ora e te toto i te haamauraahia te amuiraa Kerisetiano? A faataa na.

8 Fatata e 2 400 matahiti i muri a‘e i te faaueraa mana ia Noa ra e e fatata 1 500 matahiti i muri a‘e i te faaauraahia te faufaa o te Ture, ua faauru Iehova i te tino aratai o te amuiraa Kerisetiano matamua ia papai e: “E mea maitai i te [v]arua [m]aitai e ia matou atoa nei hoi, eiaha roa ei teimaha ê i tuuhia ’tu i nia iho ia outou maori râ o teie nei mau mea tia. Eiaha outou e amu i te maa i afaihia i te idolo ra, e te toto, e te mea uumi-noa-hia ra, e eiaha hoi e faaturi.”—Ohipa 15:28, 29.

9 Ua taa maitai i te tino aratai matamua e mea mo‘a te toto e te faaohiparaa i te reira ma te tano ore, hoê â ïa inoraa e te haamoriraa i te idolo aore ra te faaturi. Te farii ra te mau Kerisetiano mau i teie mahana i taua tiaraa ra. Hau atu â, no te mea te mana‘o ra ratou na nia i te mau faaueraa tumu Bibilia, e nehenehe ta ratou e faaoaoa ia Iehova ia rave ratou i te mau faaotiraa no nia i te faaohiparaa i te toto.

TE FAAOHIPARAA I TE TOTO I TE PAE RAPAAURAA

E nafea vau e faataa ’i i te hoê taote i ta ’u faaotiraa no nia i te faaohiparaa i te mau tuhaa rii o te toto?

10, 11. (a) Eaha te mana‘o o te mau Ite no Iehova i te pâmuraa i te toto taatoa e te mau tuhaa rahi o te toto? (b) I roto i teihea mau tuhaa no nia i te toto e taa ê ai te mana‘o o te mau Kerisetiano?

10 Te farii ra te mau Ite no Iehova e te auraa “eiaha . . . te toto,” oia ïa eiaha e farii i te mau pâmuraa toto e eiaha e horoa aore ra e faaherehere i to ratou iho toto no te pâmuraa. Ma te  faatura i te ture a te Atua, eita atoa ratou e farii i na tuhaa rahi e maha o te toto: te mau toropuru ura, te mau toropuru tea, te mau tao‘a tahi haaputua toto e te pape toto.

11 I teie mahana, na roto i te tahi atu â mau ravea, e pinepine teie mau tuhaa rahi i te vahihia ei tuhaa rii o te faaohipahia na roto e rave rau raveraa. E nehenehe anei te hoê Kerisetiano e farii i tera mau tuhaa rii? E “toto” anei te reira no ’na? Na te taata taitahi e faaoti no ’na iho. Oia atoa no te mau ravea rapaauraa mai te tamâraa, te faatarapaperaa e te rave-faahou-raa mai i to ’na iho toto i tahe, mai te peu e aita i faahereherehia.—A hi‘o i te tuhaa hau, “Te mau tuhaa rii o te toto e te mau ravea tâpûraa.”

12. E nafea tatou ia hi‘o e ia haapao i te mau mea tei taaihia i te mana‘o haava e tia ’i?

12 Mea faufaa ore anei no Iehova te mau mea e na te taata taitahi e faaoti? Eita, te anaanatae roa ra oia i to tatou mau mana‘o  e mana‘o turai. (A taio i te Maseli 17:3; 24:12.) No reira, i muri a‘e i te aniraa ia Iehova i te aratairaa e te raveraa i te maimiraa no nia i te hoê ravea rapaauraa aore ra te hoê raau, e mea maitai ia pee tatou i to tatou mana‘o haava haapiihia i te Bibilia. (Roma 14:2, 22, 23) Parau mau, eiaha vetahi ê e faahepo ia tatou ia pee i to ratou mana‘o haava, e eiaha atoa tatou e ui, “Eaha ta oe e rave ahani to roto oe i to ’u huru tupuraa?” I roto i taua mau tuhaa ra, ta te Kerisetiano taitahi “hopoia ei nia ïa ia ’na iho e ati noa ’‘e.” *Galatia 6:5; Roma 14:12; a hi‘o i te tumu parau tarenihia “ Te hi‘o ra anei au i te toto ei mea mo‘a?

TE FAAITE RA TE MAU TURE A IEHOVA I TO ’NA HERE METUA TANE

13. Eaha ta te mau ture e faaueraa tumu a Iehova e faaite ra no nia ia ’na? A faataa na.

13 Te faaite ra te mau ture e faaueraa tumu i roto i te Bibilia ia Iehova mai te hoê Iriti ture paari e te hoê Metua î i te here o te haapeapea roa ra no te maitai o ta ’na mau tamarii. (Salamo 19:7-11) Noa ’tu e aita te faaueraa “eiaha . . . te toto” i horoahia ei faatureraa no nia i te ea, e paruru te reira ia tatou i te mau fifi tei taaihia i te mau pâmuraa toto. (Ohipa 15:20) Inaha, mea rahi o te tuhaa rapaauraa o te hi‘o ra i te tâpûraa aita e pâmuraa toto ei ravea rapaauraa “numera hoê” i teie tau. No te mau Kerisetiano mau, te haapapu noa ra teie mau haereraa i mua i te paari e te here metua tane faito ore o Iehova.—A taio i te Isaia 55:9; Ioane 14:21, 23.

14, 15. (a) Te itehia ra te here o te Atua no to ’na nunaa i roto i teihea mau ture? (b) E nafea oe e faaohipa ’i i te mau faaueraa tumu e turu ra i teie mau faatureraa paruru?

14 I roto e rave rahi o ta ’na mau ture, te itehia ra te haapeapea o te Atua no te maitai o to ’na nunaa i Iseraela i tahito ra. Ei hi‘oraa, ua titau oia ia hamanihia te hoê paruru e ati a‘e te tafare o te mau fare o te mau Iseraela ia ore ia tupu te ati, i te  mea e mea rahi te ohipa e ravehia i reira. (Deuteronomi 22:8; Samuela 1, 9:25, 26; Nehemia 8:16; Ohipa 10:9) Ua poroi atoa te Atua ia tapea-noa-hia te mau puaatoro atâta. (Exodo 21:28, 29) Te oreraa e tâu‘a i tera mau titauraa, e faaiteraa ïa i te faatura ore roa i te maitai o vetahi ê e e hara toto te nehenehe e tupu mai.

15 E nafea oe e faaohipa ’i i te mau faaueraa tumu e turu ra i teie mau ture? No te aha e ore ai e mana‘o i to oe pereoo, ta oe huru faahororaa, ta oe mau animara, to oe fare, ta oe vahi raveraa ohipa e ta oe maitiraa i te faaanaanataeraa? I te tahi mau fenua, o te mau ati te tumu rahi o te pohe i rotopu i te feia apî, no te mea e faaû pinepine ratou i te mau fifi atâta faufaa ore. Area te feia apî o te hinaaro ra e vai noa i roto i te here o te Atua, te haafaufaa ra ïa i te ora e aita e imi ra i te rearea i roto i te mau ohipa atâta. Aita ratou e mana‘o ra ma te paari ore e eita te feia apî e fifi. Te ora nei râ ratou i to ratou apîraa ma te ape i te mau mea e mauiui ai ratou.—Koheleta 11:9, 10.

16. Eaha te mau faaueraa tumu Bibilia e tano no te haamaruaraa tamarii? (A hi‘o atoa i te nota i raro i te api.)

16 Te ora atoa o te aiû i roto â i te opu, mea faufaa roa ïa no te Atua. I Iseraela i tahito ra, ia pepe te hoê vahine hapû i te tahi taata, a pohe atu ai oia aore ra ta ’na aiû, e taparahi taata ïa te taata rave hara i te aro o te Atua, e o te “pohe [ta ’na] utua.” * (A taio i te Exodo 21:22, 23.) A feruri na ïa i te huru aau o Iehova a ite ai oia ehia rahiraa aiû i roto â i te opu tei haamaruahia ma te opua i te mau matahiti atoa, e tei haapohehia no te miimii o te taata e no te morare ore.

17. E nafea oe e tamahanahana ’i i te hoê taata o tei haamarua na i ta ’na aiû hou oia a ite ai i te mau ture aveia a te Atua?

17 E te hoê vahine ïa o tei haamarua i ta ’na aiû hou oia a ite  ai i te parau mau Bibilia? Eita anei o ’na e arohahia e te Atua? Oia! E nehenehe mau â te hoê taata tei tatarahapa mau e tiaturi i te faaoreraa hara a Iehova maoti te toto haamaniihia o Iesu. (Salamo 103:8-14; Ephesia 1:7) Inaha, ua parau te Mesia  iho e: “Aore au i haere mai e parau i te feia parau-tia, i te feia hara râ ia tatarahapa.”—Luka 5:32.

A APE I TE MAU MANA‘O AU ORE!

18. E nafea te Bibilia e faaite ai i te tumu rahi o te haamaniiraa toto e rave rahi?

18 Hau atu â i te ore e haapepe ia vetahi ê, te hinaaro maira Iehova ia tinai tatou i roto i to tatou aau i te tumu iho o te haamaniiraa toto e rave rahi—te riri. “O tei riri i tana taeae ra, e taparahi taata ïa,” ta te aposetolo Ioane ïa i papai. (Ioane 1, 3:15) Eita tera huru taata e au ore noa i to ’na taeae, e hinaaro atoa râ o ’na ia pohe oia. E nehenehe to ’na au ore e fa mai na roto i te pariraa ino aore ra te mau faahaparaa hape i te hoê ohipa o te faatae mai i te haavaraa a Iehova. (Levitiko 19:16; Deuteronomi 19:18-21; Mataio 5:22) E mea faufaa mau â ïa ia rohi tatou i te tinai i te mau mana‘o ino atoa e vai ra paha i roto i to tatou aau!—Iakobo 1:14, 15; 4:1-3.

19. Eaha te mana‘o o te hoê taata e arataihia ra e te mau faaueraa tumu Bibilia i te mau irava mai te Salamo 11:5 e te Philipi 4:8, 9?

19 E ape atoa te feia o te haafaufaa ra i te ora mai ia Iehova e o te hinaaro ra e vai maite i roto i to ’na here, i te mau huru haavîraa u‘ana atoa. Te na ô ra te Salamo 11:5 e: “Area . . . te rave [“i te haavîraa u‘ana,” MN], [e] riri roa [to Iehova] aau ia ’na.” E ere teie irava no nia noa i te huru o te Atua; e faaueraa tumu aratai râ no te oraraa. E turai te reira i te feia e here ra i te Atua ia ape i te mau huru faaanaanataeraa atoa o te turai i te taata ia au i te haavîraa u‘ana. E turai atoa te parau ra e e “Atua hau” o Iehova i ta ’na mau tavini ia faaî i to ratou feruriraa e aau i te mau mea popouhia, maitai e te haamaitai, o te faatupu i te hau.—A taio i te Philipi 4:8, 9.

A FAAATEA Ê MAI I TE MAU FAANAHONAHORAA TAPARAHI TAATA

20-22. Eaha te tiaraa o te mau Kerisetiano i mua i teie nei ao, e no te aha?

20 I te aro o te Atua, e taparahi taata te ao taatoa a Satani. Ua taparahi pohe ta ’na mau faanahoraa poritita, faahoho‘ahia i  roto i te mau Papai mai te mau puaa taehae, ehia mirioni taata, e e rave rahi atoa tavini a Iehova. (Daniela 8:3, 4, 20-22; Apokalupo 13:1, 2, 7, 8) Ma te turu maite i teie mau hau puai e au i te puaa, ua rohi te tapihooraa e te ihi i te hamani i te tahi o te mau mauhaa tama‘i riaria roa ’‘e e nehenehe e feruri, a apî rahi roa ’tu ai ratou. Oia mau, “te vai noa nei to te ao atoa i raro a‘e i taua varua ino ra”!—Ioane 1, 5:19.

21 No te mea “e ere” te mau pǐpǐ a Iesu “i to teie nei ao” e aita iho â ratou e amui ra i te mau ohipa poritita e te mau tama‘i a teie nei ao, te ape nei ratou i te hara toto ei melo taitahi e ei pǔpǔ. * (Ioane 15:19; 17:16) E mai te Mesia, eita ratou e haavî u‘ana ’tu ia hamani-ino-hia ratou e vetahi ê. E faaite râ ratou i te here no to ratou mau enemi, ma te pure atoa no ratou.—Mataio 5:44; Roma 12:17-21.

22 Hau roa ’tu â, te ape nei te mau Kerisetiano mau i te apiti ia “Babulonia rahi,” te hau emepera o te ao atoa o te haapaoraa hape e tei haamanii rahi roa ’‘e i te toto. “Tei roto ia ’na,”  ia au i te Parau a te Atua, “te toto o te mau peropheta e to te feia mo‘a i te iteraahia, e to te feia atoa i taparahihia i teie nei ao.” No reira tatou i faaarahia ’i: “A haere ê mai na outou i rapae, e au mau taata e.”—Apokalupo 17:6; 18:2, 4, 24.

23. Eaha te auraa e haere ê mai i rapae ia Babulonia rahi?

23 Te faarueraa ia Babulonia rahi, e ere noa ïa i te tâpûraa i to ’na i‘oa i roto i te tapura melo. Oia atoa râ te riariaraa i te mau peu iino ta te haapaoraa hape e farii ra aore ra e turu roa ra—mai te morare ore, te faaôraa i roto i te poritita e te tapiraa nounou i te tao‘a rahi. (A taio i te Salamo 97:10; Apokalupo 18:7, 9, 11-17) E pinepine, ua manii te toto no teie mau ohipa!

24, 25. (a) Maoti te aha e aroha ’i te Atua i te hoê taata taparahi taata e tatarahapa ra? (b) Te haamana‘o mai ra te reira i teihea faanahoraa i te tau Bibilia?

24 Hou tatou a farii ai i te haamoriraa mau, i turu na tatou i roto i te tahi tuhaa i te faanahoraa a Satani, a roohia ’tu ai tatou i te tahi faito hara toto. Teie râ, ua taui tatou i to tatou haerea, ua faahotu i te faaroo i te tusia taraehara o te Mesia, ua pûpû i to tatou ora i te Atua e ua fana‘o tatou i te aroha hamani maitai o te Atua e ta ’na parururaa pae varua. (Ohipa 3:19) Te haamana‘o mai ra taua parururaa ra i te mau oire haapuraa i te tau Bibilia.—Numera 35:11-15; Deuteronomi 21:1-9.

25 Eaha te tereraa o tera faanahoraa? Ia haapohe hape noa ’tu te hoê Iseraela i te tahi taata, e titauhia ia horo oia i te hoê o te mau oire haapuraa. Ua oti ana‘e i te mau haava aravihi i te rave i te faaotiraa, e mea tia ia faaea te taparahi taata opua ore i roto i te oire haapuraa e tae noa ’tu i te poheraa o te tahu‘a rahi. I reira noa oia e nehenehe ai e ora i te tahi atu vahi. Tera te hi‘oraa faahiahia mau o te aroha hamani maitai o te Atua e te faufaa rahi o te ora o te taata no ’na! Hoê â tera mau oire haapuraa i tahito ra e te faanahoraa a te Atua niuhia i nia i te tusia taraehara o te Mesia, o te paruru ia tatou i te pohe no te ofati-hape-noa-raa ’tu i te faaueraa a te  Atua no nia i te mo‘araa o te ora e o te toto. Te haafaufaa ra anei oe i tera faanahoraa? E nafea oe e faaite ai e tera iho â? Te hoê ravea, o te titau-manihini-raa ïa ia vetahi ê ia farii i te faanahoraa ta te Atua i rave no te paruru ia tatou, no te mea iho â râ te fatata oioi maira te “ati rahi.”—Mataio 24:21; Korinetia 2, 6:1, 2.

A HAAFAUFAA I TE ORA MA TE PORO I TE POROI O TE BASILEIA

26-28. E nafea to tatou huru tupuraa e tuea ’i e to te peropheta Ezekiela, e e nafea tatou e vai maite ai i roto i te here o te Atua?

26 Te haamana‘o maira te huru tupuraa o te nunaa o te Atua i to tatou tau i to te peropheta Ezekiela i tahito ra, ta Iehova i faatoroa ei tiai pae varua no te utuafare o Iseraela. “E faaroo mai oe i te parau i to ’u nei vaha, a na ô nei atu ai i te a‘o ia ratou,” ta te Atua ïa i parau. Ahani aita Ezekiela i haapao i ta ’na ohipa faauehia, o ’na iho te tumu i manii ai te toto o te feia i pohe i te faautuaraahia Ierusalema. (Ezekiela 33:7-9) Teie râ, ua faaroo Ezekiela e aita oia i roohia i te hara toto.

27 I teie mahana, te tiai nei tatou i te hopea o te ao taatoa a Satani. No reira te mau Ite no Iehova e hi‘o ai i te poro-haere-raa i “te mahana tahooraa” a te Atua e i te poroi o te Basileia ei titauraa e ei fana‘oraa taa ê atoa. (Isaia 61:2; Mataio 24:14) Te apiti hope ra anei oe i teie ohipa faufaa roa? Ua haapao maite te aposetolo Paulo i ta ’na ohipa pororaa faauehia. Ua tia ’tura ia ’na ia parau e: “Aore roa o ’u viivii i te toto o te taata atoa nei. Aore roa a‘enei hoi au i huna, ua faaite hua ’tu hoi au ia outou i te hinaaro atoa o te Atua.” (Ohipa 20:26, 27) Auê ïa hi‘oraa maitai roa no tatou ia pee!

28 Parau mau, ia vai maite noa tatou i roto i te mahanahana o te here metua tane o Iehova, eita ïa e navai ia hi‘o tatou i te ora e te toto mai ia Iehova. E mea tia atoa ia vai viivii ore, aore ra mo‘a, tatou i to ’na aro, mai ta tatou e ite i te pene i muri iho.

^ par. 5 No nia i te parau a te Atua, “tei te toto hoi te maa ora e ora ’i te mau mea atoa ra,” te tapao ra te hoê vea e: “Noa ’tu to ’na auraa taipe, e parau mau te reira i roto i te auraa mau: e mea faufaa roa te huru toropuru taitahi no te ora.”—Scientific American.

^ par. 12 A hi‘o i te Réveillez-vous! no Atete 2006, api 3-12, piahia e te mau Ite no Iehova.

^ par. 16 Te parau ra te tahi mau taata papai titionare Bibilia e ia au i te mau ta‘o o te papai Hebera, “e au ra e eita ta tatou e nehenehe e faatano i tera mau parau i nia i te hoê ati o te vahine noa tei fifi.” A tapao atoa e aita roa ’tu te Bibilia e faahiti ra i te faito matahiti o te feto ei tuhaa faufaa i roto i te haavaraa a Iehova.

^ par. 70 A hi‘o i te tuhaa hau, “Te mau tuhaa rii o te toto e te mau ravea tâpûraa,” no te mau haamaramaramaraa tatara-maitai-hia.