Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 3

A here i te feia ta te Atua e here ra

A here i te feia ta te Atua e here ra

“O tei amui atoa to ’na haerea i to te feia paari ra, e paari atoa ïa.”—MASELI 13:20.

1-3. (a) Te faahiti ra te Bibilia i teihea parau mau eita e tia ia ape? (b) E nafea e tia ’i ia tatou ia maiti i te mau hoa o te turai ia tatou ia rave i te maitai?

EI AURAA parau, e au te taata i te rimu; e apo mai ratou i te mau mea atoa e haaati ra ia ratou. Mea ohie roa ia farii—ma te opua ore atoa—i te mau peu, ture aveia e huru taata o te feia ta tatou e amuimui roa.

2 Te faahiti ra te Bibilia i te hoê parau mau eita e tia ia ape: “O tei amui atoa to ’na haerea i to te feia paari ra, e paari atoa ïa; o tei amui râ i te feia maamaa ra, e pohe ïa.” (Maseli 13:20) Aita teie maseli e faahiti ra i te tahi noa farereiraa. Te horoa ra te mau parau “amui atoa to ’na haerea” i te mana‘o o te farereiraa tamau. * No nia i teie irava, te na ô ra te hoê papai Bibilia e: “E titau te amuiraa to ’na haerea i to te hoê taata i te here e te taairaa.” Aita anei oe e mana‘o atoa ra e e pee haere noa tatou i te feia ta tatou e here ra? Oia mau, no te mea e mea piri roa tatou i te pae aau i te feia ta tatou e here ra, e nehenehe ratou e ohipa puai i nia ia tatou—no te maitai aore ra no te ino.

3 No te vai noa i roto i te here o te Atua, mea faufaa roa ia imi tatou i te mau hoa o te turai ia tatou ia rave i te maitai. E nafea ïa? Ma te here noa ïa i te feia ta te Atua e here ra,  ma te faahoa i to ’na mau hoa. A feruri na. O vai ïa hoa maitai a‘e ta tatou e nehenehe e maiti maori râ te feia e huru maitatai to ratou ta Iehova e tiai ra ia faahotu to ’na mau hoa? No reira, e hi‘opoa ana‘e i te huru taata herehia e te Atua. Ia taa maitai ia tatou te mana‘o o Iehova, ua ineine maitai a‘e ïa tatou i te maiti i te mau hoa maitatai.

TE FEIA TA TE ATUA E HERE RA

4. No te aha e tiaraa ’i to Iehova e maiti maitai i to ’na mau hoa, e no te aha Iehova i parau ai ia Aberahama “tau hoa”?

4 E maiti maitai Iehova i to ’na mau hoa. Aita anei to ’na e tiaraa e na reira? Oia ïa, o ’na hoi te Fatu e Arii o te ao taatoa, e e fana‘oraa rahi roa ia faahoa ia ’na. O vai ïa ta ’na e maiti ei hoa no ’na? E haafatata Iehova i te feia e tiaturi ra ia ’na e e tuu ra i to ratou faaroo taatoa ia ’na. A rave na i te hi‘oraa o te patereareha Aberahama, te hoê taata tei matauhia no to ’na faaroo iti rahi. Aita ’tu e tamataraa rahi a‘e i te faaroo no te hoê metua tane taata maori râ ia anihia ia ’na ia pûpû i ta ’na tamaiti ei tusia. * Ua “pûpû” râ Aberahama “ia Isaaka,” no to ’na faaroo taatoa e “e ti[a] i te Atua ia faatia faahou mai ia ’na mai te pohe” mai. (Hebera 11:17-19) No to Aberahama faaiteraa i tera huru faaroo e auraro, ua parau Iehova ia ’na ma te here “tau hoa.”—Isaia 41:8; Iakobo 2:21-23.

5. Eaha to Iehova mana‘o i te feia e faaroo ra ia ’na ma te taiva ore?

5 Mea faufaa roa no Iehova te faarooraa taiva ore. Te here ra oia i te feia i ineine i te tuu i te aroha, aore ra taiva ore, ia ’na i nia ’‘e i te tahi atu mau mea atoa. (A taio i te Samuela 2, 22:26.) Mai ta tatou i ite i te pene 1 o teie buka, mea au roa na Iehova te feia e maiti ra i te faaroo ia ’na ma  te here. “Tei te feia parau-tia ra ta ’na parau moe [aore ra to ’na auhoaraa piri roa],” ia au i te Maseli 3:32. E fana‘o te feia o te haapao maite ra i te mau titauraa a te Atua i te hoê titau-manihini-raa au maitai a Iehova: E nehenehe ratou e tiahapa i to ’na “sekene”—e farii-popou-hia no te haamori ia ’na e no te pure ia ’na i te mau taime atoa.—Salamo 15:1-5.

6. E nafea tatou e faaite ai e te here ra tatou ia Iesu, e eaha te huru aau o Iehova no te feia e here ra i ta ’na Tamaiti?

6 Te here ra Iehova i te feia e here ra ia Iesu, ta ’na Tamaiti fanau tahi. Ua parau Iesu e: “Ia hinaaro mai te taata ia ’u ra, e haapao ïa i ta ’u parau; e e here mai hoi tau Metua ia ’na; e e haere atu hoi mâua ia ’na ra e parahi mau atu i ǒ na ra.” (Ioane 14:23) E nafea ia faaite i to tatou here no Iesu? Ma te haapao iho â ïa i ta ’na mau faaueraa, oia atoa te ohipa faauehia e poro i te parau apî maitai e e faariro i te taata ei pǐpǐ. (Mataio 28:19, 20; Ioane 14:15, 21) E faaite atoa tatou i to tatou here no Iesu ia “pee” maite tatou “i to ’na taahiraa avae,” na roto i te pee-maite-raa i to ’na hi‘oraa i roto i te parau e te ohipa ei taata tia ore. (Petero 1, 2:21) Te putapû ra te aau o Iehova i te mau tutavaraa a te feia, te turai ra to ratou here no ta ’na Tamaiti ia ratou ia pee i te haerea o te Mesia.

7. No te aha e haerea paari ai ia faahoa i te mau hoa o Iehova?

7 Te faaroo, te taiva ore, te auraro e te here no Iesu e te hinaaro i ta ’na mau ture aveia—o te tahi noa ïa huru maitatai teie ta Iehova e tiai ra ia faahotu to ’Na mau hoa. E mea maitai ia ui tatou ia tatou iho: ‘Te itehia ra anei tera mau huru maitatai e ture aveia i nia i to ’u mau hoa rahi? Ua faariro anei au i to Iehova mau hoa ei hoa no ’u?’ E haerea paari ia na reira. E nehenehe te feia o te atuatu ra i te mau huru maitatai o te Atua e o te poro ra i te parau apî maitai o te Basileia ma te itoito rahi, e ohipa maitai i nia ia tatou, ma te turai ia tatou ia tapea i ta tatou faaotiraa papu  e faaoaoa i te Atua.—A hi‘o i te tumu parau tarenihia “ O vai te hoa maitai?

TA TE HOÊ HI‘ORAA BIBILIA E HAAPII MAIRA

8. Eaha ta oe e faahiahia ra no nia i te taairaa i rotopu (a) ia Naomi e ia Ruta? (b) i na Hebera apî e toru? (c) ia Paulo e ia Timoteo?

8 I roto i te mau Papai, mea rahi te hi‘oraa o te feia tei maitai no to ratou maitiraa i te mau hoa maitatai. E nehenehe oe e taio i te taairaa i rotopu ia Naomi e ta ’na hunoa vahine o Ruta, i rotopu i na Hebera apî e toru o ratou noa i Babulonia, e i rotopu ia Paulo e ia Timoteo. (Ruta 1:16; Daniela 3:17, 18; Korinetia 1, 4:17; Philipi 2:20-22) E hi‘opoa râ tatou i te tahi atu hi‘oraa faahiahia roa: te auhoaraa i rotopu ia Davida e ia Ionatana.

9, 10. Eaha te niu o te auhoaraa i rotopu ia Davida e ia Ionatana?

9 Te parau ra te Bibilia e i muri a‘e i to Davida haapoheraa ia Golia, ua “ati roa a‘era te aau o Ionatana i te aau o Davida, [here] atura Ionatana ia Davida mai to ’na atoa ra [here] ia ’na ihora.” (Samuela 1, 18:1; Traduction du monde nouveau) I reira ïa te haamataraa te hoê auhoaraa mutu ore noa ’tu te taa-ê-raa rahi o te faito matahiti, e tae noa ’tu i te poheraa o Ionatana i te tahua aroraa. * (Samuela 2, 1:26) Eaha te niu o te taairaa puai i rotopu i teie nau hoa?

10 Ua taai-apipiti-hia Davida raua Ionatana e to raua here i te Atua e to raua hinaaro puai e tapea i to raua taiva ore ia ’na. E taairaa pae varua to teie nau tane. Ua faaite raua taitahi i te mau huru maitatai a here atu ai te tahi i te tahi. Eita e ore e ua maere Ionatana i te mǎta‘u ore e te itoito rahi o te taurearea ra o tei paruru ma te riaria ore i te i‘oa o  Iehova. Mea papu e ua faatura Davida i te taata paari ra o tei turu ma te taiva ore i te mau faanahoraa a Iehova e o tei tuu ma te miimii ore i te mau faufaa a Davida na mua ’‘e i ta ’na iho. A hi‘o na i te ohipa i tupu a toaruaru roa ’i Davida, o te tapuni haere noa ra na te medebara no te maue ê i te riri rahi o te arii ino ra o Saula, te metua tane o Ionatana. I roto i te hoê faaiteraa faahiahia i te taiva ore, ua tia  a‘era Ionatana e “haere atura ia Davida ra . . . e ua haamahanahana ’tura ia ’na ia tiaturi oia i te Atua.” (Samuela 1, 23:16) A feruri na i te huru aau o Davida i te haereraa ’tu to ’na hoa here e tamahanahana e e faaitoito ia ’na! *

11. Eaha ta te hi‘oraa o Ionatana raua Davida e haapii ra ia oe no nia i te auhoaraa?

11 Eaha ta te hi‘oraa o Ionatana raua Davida e haapii maira? Na mua roa, te ite ra tatou e te mea faufaa roa ’‘e, oia ïa hoê â faufaa pae varua ta te mau hoa. Ia haafatata tatou  i te feia hoê â ta tatou mau tiaturiraa, ta tatou mau faufaa morare e to tatou hinaaro e tapea i te taiva ore i te Atua, e nehenehe tatou e tufa te tahi i te tahi i te mau mana‘o, huru aau e tupuraa o te faaitoito e o te haapaari ia tatou. (A taio i te Roma 1:11, 12.) E ite tatou i tera mau huru hoa maitai i te pae varua i rotopu i te feia haamori ia Iehova. Te auraa anei râ ïa e e hoa maitai te feia atoa e haere maira i te mau putuputuraa i te Piha a te Basileia? Eita ïa.

E NAFEA IA MAITI I TO TATOU MAU HOA RAHI

12, 13. (a) No te aha e titauhia ’i ia maiti maitai tatou i te mau hoa i rotopu atoa i te mau Kerisetiano? (b) Eaha te fifi i roto i te mau amuiraa i te senekele matamua, a horoa ’tu ai Paulo i teihea mau faaararaa etaeta?

12 I roto atoa i te amuiraa, e titauhia ia maiti tatou i te mau hoa o te patu ia tatou i te pae varua. E maere anei tatou i te reira? Eiaha. Mea haere maine paha te tahi mau Kerisetiano i roto i te amuiraa i te titau i te paariraa pae varua, mai te tahi mau maa hotu o te hoê tumu raau o te ore e paari oioi. No reira, i roto i te mau amuiraa atoa, e ite tatou i te mau Kerisetiano e ere hoê â faito tupuraa pae varua to ratou. (Hebera 5:12–6:3) Parau mau, e faaite tatou i te faaoromai e te here i te feia tae apî mai aore ra paruparu a‘e, no te mea e hinaaro tatou e tauturu ia ratou ia paari i te pae varua.—Roma 14:1; 15:1.

13 I te tahi taime, e fa mai paha te hoê tupuraa i roto i te amuiraa o te titau ia tatou ia ara i ta tatou mau amuimuiraa. E pee paha te tahi mau melo i te hoê haerea tano ore. E atuatu paha te tahi atu i te hoê huru feruriraa amuamu aore ra inoino. Tera atoa tei tupu i roto i te mau amuiraa i te senekele matamua. Noa ’tu e mea haapao maitai te rahiraa o te mau melo, e haerea tano ore to vetahi. Aita vetahi i roto i te amuiraa i Korinetia i turu i te tahi mau haapiiraa Kerisetiano, no reira te aposetolo Paulo i faaara ’i i te  amuiraa e: “Eiaha e vare, e ino te parau maitai i te amuiraa iino ra.” (Korinetia 1, 15:12, 33) Ua faaara Paulo ia Timoteo e i rotopu atoa i te mau hoa Kerisetiano, te vai ra vetahi o te ore e haa ma te afaro. Ua parauhia ia Timoteo e ape i tera mau huru taata, eiaha e faariro ia ratou ei hoa rahi no ’na.—A taio i te Timoteo 2, 2:20-22.

14. E nafea ia faaohipa i te faaueraa tumu o te mau faaararaa a Paulo no nia i te mau amuimuiraa?

14 E nafea ia faaohipa i te faaueraa tumu o te mau faaararaa a Paulo? Ma te ape i te amuimui roa i te taata atoa—i rapaeau e i roto i te amuiraa—o te nehenehe e faaino ia tatou. (Tesalonia 2, 3:6, 7, 14) E titauhia ia paruru tatou i to tatou taairaa e o Iehova. A haamana‘o e mai te hoê rimu, e apo mai tatou i te mau haerea e ture aveia a to tatou mau hoa rahi. Eita e tia ia tatou ia tutau i te hoê rimu i roto i te vinega a tiai atu ai ia î i te pape, eita atoa ïa e tia ia tatou ia amuimui i te feia e mana ino to ratou a tiai atu ai i te apo mai i te mea maitai.—Korinetia 1, 5:6.

E ite oe i te mau hoa maitatai i rotopu i te feia haamori ia Iehova

15. E nafea oe e ite ai i te mau hoa maitai i te pae varua i roto i te amuiraa?

15 Auaa e mea rahi roa te ravea e ite ai tatou i te mau hoa maitatai i rotopu i te feia haamori ia Iehova. (Salamo 133:1) E nafea oe e ite ai i te mau hoa maitai i te pae varua i roto i te amuiraa? A atuatu ai oe i te mau huru maitatai e te mau e‘a o Iehova, mea papu e e piri atu te feia hoê â to outou huru feruriraa ia oe. I te hoê â taime, e titauhia paha ia rave oe i te tahi mau taahiraa e au ia faaohipa no te imi i te mau hoa apî. (A hi‘o i te tumu parau tarenihia “ Ta mâua i rave no te faahoa i te mau taata maitatai.”) A imi i te feia e faaite ra i te mau huru maitatai ta oe e hinaaro e faaite atoa. A pee i te a‘oraa Bibilia ia “mahora,” ma te faahoa i te mau Kerisetiano aita e hi‘oraa i to ratou iri, nunaa, aore ra ta‘ere. (Korinetia 2, 6:13; a taio i te Petero 1, 2:17.) Eiaha e amuimui noa i te feia hoê â faito matahiti to  outou. A haamana‘o e mea paari a‘e Ionatana ia Davida. E nehenehe e rave rahi taata paari a‘e e haamaitai i te auhoaraa maoti to ratou aravihi e paari.

IA TUPU TE FIFI

16, 17. Ia haamauiui mai te hoê hoa Kerisetiano, no te aha eiaha ’i tatou e faarue i te amuiraa?

16 I te mea e ua rau te huru e te tupuraa o te taata i roto i te amuiraa, e nehenehe te mau fifi e tupu i te tahi taime. E parau aore ra e rave paha te hoê hoa Kerisetiano i te tahi mea o te haamauiui i to tatou aau. (Maseli 12:18) I te tahi taime, e rahi roa te mau fifi no te mau huru taata taa ê, te mau taa-ore-raa, aore ra te mau mana‘o taa ê. E turori anei ïa tatou, a faarue atu ai i te amuiraa? Eita, mai te peu e te here mau ra tatou ia Iehova e i te feia ta ’na e here ra.

17 Ei Atua poiete e ei Tumu o to tatou ora, e au ia here e  ia haamori tatou ia Iehova ana‘e ra. (Apokalupo 4:11) Hau atu â, e au ia turu maite tatou i te amuiraa ta ’na e oaoa ra i te faaohipa. (Hebera 13:17) No reira, ia haamauiui aore ra ia faainoino mai te hoê hoa Kerisetiano, eita tatou e faarue i te amuiraa no te faaite i to tatou mauruuru ore. Eaha hoi tatou e na reira ’i? E ere o Iehova tei faainoino ia tatou. No to tatou here ia Iehova, e ore roa ’tu tatou e faarue ia ’na e i to ’na nunaa!—A taio i te Salamo 119:165.

18. (a) Eaha ta tatou e nehenehe e rave no te paturu i te hau i roto i te amuiraa? (b) Ia faaoti tatou e faaore i te hapa mai te peu e te vai ra te tumu papu, eaha te maitai e noaa mai?

18 E turai te here no te feia haamori ia Iehova ia tatou ia paturu i te hau i roto i te amuiraa. Aita Iehova e tiai ra i te tia-roa-raa o te feia ta ’na e here ra, eiaha atoa ïa tatou. Maoti te here, e tapo‘i tatou i te mau hapa rii, ma te haamana‘o e e taata tia ore ana‘e tatou e e hape tatou. (Maseli 17:9; Petero 1, 4:8) E tauturu te here ia tatou ia “faaore [noa] te tahi i ta te tahi hapa.” (Kolosa 3:13) E ere i te mea ohie noa ia faaohipa i teie a‘oraa. Mai te peu e e vaiiho tatou i te mau huru aau faatoaruaru ia faatere ia tatou, e riro paha tatou i te tapea i te inoino a mana‘o atu ai e te faautua nei to tatou riri i te taata hapa. I te tanoraa râ, mea ino te reira no tatou. Ia faaoti tatou e faaore i te hapa mai te peu e te vai ra te tumu papu, e maitai rahi ïa te noaa mai. (Luka 17:3, 4) E ite tatou i te hau o te feruriraa e o te aau, e hau noa te amuiraa e, te mea faufaa roa, e paruruhia to tatou taairaa e o Iehova.—Mataio 6:14, 15; Roma 14:19.

IA FAAEA TATOU I TE AMUIMUI

19. Eaha te mau tupuraa e nehenehe e fa mai a titauhia ’tu ai ia faaea tatou i te amuimui i te hoê taata?

19 I te tahi taime, e anihia ia tatou ia faaea i te amuimui i te hoê taata e melo oia no te amuiraa na mua ’‘e. E tupu te reira ia tiavaruhia te hoê taata o tei ofati ma te tatarahapa ore i te ture a te Atua aore ra ia faarue te hoê melo i te  faaroo ma te haapii atu i te mau tiaturiraa hape aore ra ma te iriti ia ’na i te amuiraa. Te faaara maitai maira te Parau a te Atua e “eiaha . . . e amui atu” i tera mau taata. * (A taio i te Korinetia 1, 5:11-13; Ioane 2, 9-11) E nehenehe e riro ei fifi mau ia ape i te hoê taata e hoa paha tatou na mua ’‘e aore ra e fetii no tatou. E rave anei tatou i te hoê tiaraa aueue ore, a faaite atu ai e te tuu ra tatou i te taiva ore ia Iehova e i ta ’na mau ture parau-tia i nia ’‘e i te tahi atu mau mea atoa? A haamana‘o e mea faufaa roa no Iehova te taiva ore e te faarooraa.

20, 21. (a) No te aha e faanahoraa î i te here te tiavaruraa? (b) No te aha e mea faufaa roa ’i ia maiti maitai tatou i to tatou mau hoa?

20 E faanahoraa î i te here mau te tiavaruraa no ǒ mai ia Iehova ra. E nafea ïa? E faaite te tiavaruraa i te hoê taata hara tatarahapa ore i te hinaaro no te i‘oa mo‘a o Iehova e no te auraa o te reira. (Petero 1, 1:15, 16) E paruru te tiavaruraa i te amuiraa. E paruruhia te mau melo haapao maitai i te mana ino o te feia hara opua mau, a nehenehe atu ai ratou e rave noa i ta ratou haamoriraa ma te ite e e haapuraa papu te amuiraa i roto i teie nei ao ino. (Korinetia 1, 5:7; Hebera 12:15, 16) Te a‘o etaeta, e tapao o te here ïa no te taata rave hara. Tera paha te hinaarohia ia ho‘i mai to ’na huru mau e ia rave oia i te mau taahiraa e titauhia no te ho‘i ia Iehova ra.—Hebera 12:11.

21 Te tupuraa mau, e nehenehe to tatou mau hoa rahi e ohipa roa i nia ia tatou. E mea faufaa roa ïa ia maiti maitai tatou i to tatou mau hoa. Ma te faahoa i te mau hoa o Iehova, ma te here i te feia ta te Atua e here ra, e haaatihia ïa tatou e te mau hoa maitai roa ’‘e e vai ra. Maoti ta tatou e apo mai ia ratou, e nehenehe tatou e tapea i ta tatou faaotiraa papu e faaoaoa ia Iehova.

^ par. 2 Ua huri-atoa-hia te ta‘o Hebera no “amui i” ei “faariro ei taua” e ei “faataua ’tu.”—Te mau tavana 14:20; Maseli 22:24.

^ par. 4 Ma te ani i te reira ia Aberahama, te faaite ra Iehova i te tusia ta ’na iho e rave ia pûpû oia i ta ’na Tamaiti fanau tahi. (Ioane 3:16) I roto i te tupuraa o Aberahama, ua ohipa mai Iehova e ua horoa ’tu i te hoê mamoe oni ei mono ia Isaaka.—Genese 22:1, 2, 9-13.

^ par. 9 E “tamaiti apî” Davida i to ’na haapoheraa ia Golia e e 30 matahiti to ’na i to Ionatana poheraa. (Samuela 1, 17:33; 31:2; Samuela 2, 5:4) E au ra ïa e e 30 matahiti hau to Ionatana, tei pohe i te 60raa o to ’na matahiti, i to Davida.

^ par. 10 Ia au i te Samuela 1, 23:17, ua parau Ionatana e pae ohipa no te faaitoito ia Davida: (1) Ua faaue oia ia Davida eiaha e mǎta‘u. (2) Ua haapapu oia ia Davida e e ore te mau tutavaraa a Saula e manuïa. (3) Ua haamana‘o oia ia Davida e e riro oia ei arii, mai ta te Atua i fafau na. (4) Ua tǎpǔ oia i to ’na taiva ore ia Davida. (5) Ua parau oia ia Davida e ua ite atoa Saula i to Ionatana taiva ore ia Davida.

^ par. 19 Ei haamaramaramaraa hau no nia i to tatou huru i nia i te feia tiavaruhia aore ra tei iriti ia ratou, a hi‘o i te tuhaa hau “To tatou huru i nia i te hoê taata tiavaruhia.”

No te ite atu â

E faarue te nunaa o Iehova i te ino

E nafea te parau ‘faarue i te ino’ i taaihia ’i i te mau tupuraa i te tau o Mose? Eaha te haapii mai i teie mau tupuraa?