Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 4

No te aha e faatura ’i i te mana faatere?

No te aha e faatura ’i i te mana faatere?

“E faaturatura ’tu i te taata atoa.”—PETERO 1, 2:17.

1, 2. (a) No te aha e mea fifi ai no tatou ia faatura i te mana faatere? (b) Eaha te mau uiraa ta tatou e hi‘opoa?

UA MATAITAI ê na anei oe i te huru o te hoê tamarii iti ia faauehia o ’na ia rave i te tahi mea aita o ’na e hinaaro roa ra? E ite maitai paha oe i te tahi au ore i nia i te hoho‘a mata o taua tamaroa iti ra. Ua faaroo to ’na tari‘a i te reo o to ’na na metua e ua ite o ’na e e mea tia ia faatura o ’na i to raua mana faatere. I ǒ nei râ, aita iho â o ’na e hinaaro ra e faaroo. Te faataa ra to ’na au ore i te hoê tupuraa mau ta tatou paatoa e farerei i te tahi taime.

2 E ere noa i te mea ohie no tatou ia faatura i te mana faatere. Mea fifi anei no oe i te tahi taime ia faatura i te feia e maa mana faatere to ratou i nia ia oe? Mai te peu e e, e ere ïa no oe ana‘e. Te ora ra tatou i te hoê tau e au ra e ua iti roa ino te faatura i te mana faatere. Ia au râ i te Bibilia, e titauhia ia faatura tatou i te feia e mana faatere to ratou i nia ia tatou. (Maseli 24:21) Oia mau, e mea faufaa roa te reira no te vai noa i roto i te here o te Atua. E hiti mai iho â ïa te tahi mau uiraa. No te aha e mea fifi roa ’i no tatou ia faatura i te mana faatere? No te aha Iehova e ani mai ai i te reira ia tatou, e eaha te tauturu ia tatou ia faaroo? E, e nafea tatou e faaite ai i te faatura i te mana faatere?

TE TUMU E MEA FIFI ROA ’I

3, 4. Mea nafea te hara e te tia-ore-raa i te haamataraa, e no te aha to tatou tiaraa taata hara e haafifi ai ia tatou ia faatura i te mana faatere?

3 E hi‘o poto mai tatou e piti tumu e mea fifi roa ’i no tatou  ia faatura i te feia e mana faatere to ratou. A tahi, e taata tia ore tatou; a piti, e taata tia ore atoa te feia e mana faatere to ratou i nia ia tatou. Mea maoro a‘enei te haamataraa te hara e te tia-ore-raa o te taata, i te ô i Edene a orure ai Adamu raua Eva i te mana faatere o te Atua. Ua haamata ïa te hara e te orureraa hau. I teie tau atoa, te vai ra te hinaaro i roto ia tatou e orure hau.—Genese 2:15-17; 3:1-7; Salamo 51:5; Roma 5:12.

4 No to tatou tiaraa taata hara, e tupu ohie noa te teoteo e te ahaaha i roto i te rahiraa o tatou, area te haehaa ra, e huru maitai varavara ïa e mea tia ia faahotu e ia atuatu tatou. I muri a‘e atoa tau matahiti taviniraa haapao maitai i te Atua, e nehenehe tatou e riro i te mârô e te teoteo. A rave na i te hi‘oraa o Kora, o tei tia maite i pihai iho i te nunaa o Iehova i roto e rave rahi ati. Ua nounou râ oia i te mana faatere rahi atu â e ua faatupu oia ma te haama ore i te hoê orureraa hau i nia ia Mose, te taata haehaa roa ’‘e e ora ra i taua tau ra. (Numera 12:3; 16:1-3) A mana‘o atoa i te arii Uzia, o tei turaihia e te teoteo ia tomo i roto i te hiero o Iehova e ia rave i te hoê ohipa mo‘a faataahia na te mau tahu‘a. (Paraleipomeno 2, 26:16-21) Ua faautuahia teie nau tane no ta raua orureraa hau. E haamana‘oraa faufaa râ to raua hi‘oraa ino no tatou paatoa. E titauhia ia patoi tatou i te teoteo o te haafifi ia tatou ia faatura i te mana faatere.

5. Mea nafea te tahi mau taata tia ore i te faaohiparaa i to ratou mana faatere ma te tano ore?

5 O te feia tia ore e mana faatere to ratou atoa te tumu i iti ai te taata i te faatura i te mana faatere. E mea ino roa, mea haamauiui, aore ra mea haavî e rave rahi. Oia iho â, te faaite ra te tuatapaparaa o te taata i te hoê faaohiparaa tamau tano ore i te mana. (A taio i te Koheleta 8:9.) A hi‘o na ia Saula, e tane maitai oia e te haehaa i to Iehova maitiraa ia ’na ei arii. Ua riro râ oia i te teoteo e te pohehae; ua hamani ino atura oia i te taata haapao maitai ra o Davida. (Samuela 1, 9:20, 21; 10:20-22; 18:7-11) O Davida i muri a‘e tei riro ei hoê o te mau arii maitai roa ’‘e ta Iseraela i fana‘o a‘enei, ua faaohipa râ oia i to  ’na mana faatere ma te tano ore i to ’na eiâraa i te vahine a Uria ati Heta e tonoraa i taua tane hapa ore ra i mua maitai i te aroraa ia pohe oia. (Samuela 2, 11:1-17) Oia iho â, e haafifi roa te tia-ore-raa i te taata ia faaohipa maitai i te mana. E ia ore te feia e mana faatere to ratou e faatura ia Iehova, mea ino roa ’tu ïa. I muri iho i te faataaraa mea nafea to te tahi mau pâpa Katolika faatupuraa i te hamani-ino-raa rahi, ua papai te hoê tia hau Beretane e: “E nehenehe te taata e ino i te mana e e ino roa te taata i te mana otia ore.” Ma te haamana‘o i te reira, e hi‘opoa tatou i te uiraa: No te aha e faatura ’i i te mana faatere?

NO TE AHA E FAATURA ’I I TE MANA FAATERE?

6, 7. (a) E turai to tatou here no Iehova ia tatou ia aha, e no te aha? (b) Ua taaihia te auraro i te aha, e e nafea tatou e faaite ai i te reira?

6 No ǒ mai te mau tumu maitai roa ’‘e e faatura ’i i te mana faatere i te here—to tatou here no Iehova, no to tatou taata-tupu e no tatou iho atoa. No te mea e mea here iho â na tatou ia Iehova, e hinaaro tatou e faaoaoa i to ’na aau. (A taio i te Maseli 27:11; Mareko 12:29, 30.) Ua ite tatou e ua mârôhia to ’na mana arii, to ’na tiaraa e faatere i te ao taatoa, i nia i te fenua mai te tupuraa te orureraa hau i Edene e te turu ra te rahiraa o te huitaata ia Satani e te patoi ra i te faatereraa a Iehova. Te oaoa nei tatou i te tia i te pae o Iehova no te turu i to ’na mana arii. Ia taio tatou i te mau parau hanahana o te Apokalupo 4:11, e putapû to tatou aau. Te taa maitai ra ia tatou e o Iehova te Faatere tia mau o te ao taatoa! Te turu ra tatou i te mana arii o Iehova, ma te farii i ta ’na faatereraa i roto i to tatou oraraa i te mau mahana atoa.

7 E titau tera faatura i te faarooraa e te tahi atu mea. E faaroo iho â tatou ia Iehova no to tatou here ia ’na. I te tahi râ taime, e mea fifi roa no tatou ia faaroo. I reira ïa e titauhia ’i ia haapii tatou, mai te tamaroa iti i faahitihia i te omuaraa, i te auraro. E haamana‘o tatou e ua auraro Iesu i te hinaaro o to ’na Metua noa ’tu e e au ra e mea fifi roa ia na reira. “Ia tupu  râ to oe hinaaro eiaha to ’u,” ta ’na ïa i parau i to ’na Metua tane.—Luka 22:42.

8. (a) Ua taai-pinepine-hia te auraroraa i te mana faatere o Iehova i teie mahana i te aha, e na te aha e faaite ra i te huru aau o Iehova i roto i teie tuhaa? (b) Eaha te nehenehe e tauturu ia tatou ia faaroo i te a‘oraa e ia farii i te a‘o? (A hi‘o i te tumu parau tarenihia “ E faaroo i te parau, e farii i te a‘o.”)

8 Parau mau, aita iho â Iehova e paraparau maira ia tatou taitahi i teie tau; te faaohipa ra o ’na i ta ’na Parau e to ’na mau tia taata i nia i te fenua. No reira i te rahiraa o te taime, e faaite tatou i te auraro i te mana faatere o Iehova ma te faatura i taua mau taata ra ta ’na i tuu, aore ra i vaiiho â, i nia i te mau tiaraa mana i nia ia tatou. Ia patoi noa ’tu tatou i taua mau taata ra—ma te ore e farii ei hi‘oraa i ta ratou mau a‘oraa e a‘o Bibilia—e faainoino ïa tatou i to tatou Atua. I to te mau Iseraela ohumuraa e patoiraa ia Mose, o Iehova ïa ta ratou i na reira roa ’tu i ta Iehova hi‘oraa.—Numera 14:26, 27.

9. No te aha to tatou here no to tatou taata-tupu e turai ai ia tatou ia faatura i te mana faatere? A horoa i te hoê hi‘oraa.

9 E faatura atoa tatou i te mana faatere no to tatou here i to tatou taata-tupu. E nafea ïa? A feruri na e e faehau oe i roto i te hoê nuu. Tei te haa-amui-raa, te faarooraa e te faaturaraa te faehau taitahi i te mau tia faatere e upootia ’i, e e ora atoa ’i te nuu. Mai te peu e e faaino oe i taua faanahonahoraa ra ma te orure hau, e nehenehe te taatoaraa o to oe mau hoa faehau e fifi. Parau mau, te vavahi rahi nei te mau nuu taata i te ao i teie mahana. Area ta Iehova mau nuu ra, e maitai noa ïa ta ratou e rave. E hanere taime to te Bibilia faahitiraa i te Atua mai ia ‘Iehova sabaota.’ (Samuela 1, 1:3) O ’na te Raatira rahi o te hoê nuu rahi o te mau varua puai. I te tahi taime, e faaau Iehova i ta ’na mau tavini i te fenua i te hoê pǔpǔ, aore ra nuu. (Salamo 68:11; Ezekiela 37:1-10) Ia patoi noa ’tu tatou i te mau taata ta Iehova i horoa ’tu i te mana faatere i nia ia tatou, eita anei ïa tatou e tuu i to tatou mau hoa faehau pae varua i roto i te ati? Ia patoi te hoê Kerisetiano i te mau matahiapo faatoroahia, e nehenehe vetahi ê i roto i te amuiraa e fifi  atoa. (Korinetia 1, 12:14, 25, 26) Ia orure hau te hoê tamarii, o te utuafare taatoa te nehenehe e fifi. No reira, e faaite tatou i to tatou here no to tatou taata-tupu ma te faahotu i te hoê huru feruriraa faatura e te haa amui.

10, 11. E nafea te hinaaro tia ia maitai tatou e turai ai ia tatou ia auraro i te mana faatere?

10 E faatura atoa tatou i te mana faatere no to tatou iho maitai. Ia ani mai Iehova ia faatura i te mana faatere, e faahiti pinepine oia i te mau maitai ta tatou e fana‘o ia na reira tatou. Ei hi‘oraa, te faaue ra oia i te mau tamarii ia faaroo i to ratou mau metua ia roa e ia maitai to ratou oraraa. (Deuteronomi 5:16; Ephesia 6:2, 3) Te faaue ra o ’na ia tatou ia faatura i te mau matahiapo o te amuiraa, aita ana‘e e fifi ïa tatou i te pae varua. (Hebera 13:7, 17) E te faaue ra o ’na ia tatou ia faaroo i te feia mana toroa no to tatou iho parururaa.—Roma 13:4.

11 Eita anei oe e farii e e tauturu mai te iteraa no te aha Iehova e hinaaro ai ia faaroo tatou, ia faatura i te mana faatere?  E hi‘opoa ïa tatou e nafea ia faaite i te faatura i te mana faatere i roto e toru tuhaa faufaa roa o te oraraa.

FAATURA I ROTO I TE UTUAFARE

12. Eaha te hopoia ta Iehova i horoa na te tane e metua tane i roto i te utuafare, e e nafea te hoê tane e amo ai i taua hopoia ra?

12 Na Iehova iho i haamau i te utuafare. Ei Atua nahonaho noa, ua faanaho oia i te utuafare ia haa maitai oia. (Korinetia 1, 14:33) Ua horoa oia i te mana faatere i te tane e metua tane no te haa ei upoo o te utuafare. E faaite te tane i te faatura no to ’na Upoo, te Mesia ra o Iesu, ma te pee i ta Iesu huru faaohiparaa i te tiaraa upoo i nia i te amuiraa. (Ephesia 5:23) No reira, eiaha te tane e haapae i ta ’na hopoia, ia amo râ oia i te reira ma te itoito; eiaha atoa oia e haavî aore ra e faaetaeta, ia î râ oia i te here, ia faito noa e ia hamani maitai. E haamana‘o oia e ua taotiahia to ’na mana faatere—eita roa ’tu te reira e na nia ’‘e i to Iehova mana faatere.

E pee te hoê metua tane Kerisetiano i ta te Mesia huru amoraa i te tiaraa upoo

13. E nafea te hoê vahine e metua vahine e amo ai i ta ’na hopoia utuafare ma te auhia e Iehova?

13 E titauhia ia haa te hoê vahine e metua vahine ei tauturu no ta ’na tane. Ua horoa-atoa-hia na ’na te tahi mana faatere i roto i te utuafare, te faahiti ra hoi te Bibilia i “te faaitoito [aore ra faaueraa] a to metua vahine ra.” (Maseli 1:8) Parau mau, ua iti a‘e to ’na mana faatere i to ta ’na tane. E faaite te hoê vahine Kerisetiano i te faatura i te mana faatere  o ta ’na tane ma te tauturu ia ’na ia amo i ta ’na hopoia ei upoo utuafare. Eita o ’na e faahaehaa ia ’na, e faateretere ia ’na, aore ra e haru i to ’na tiaraa. E turu râ e e haa amui oia. Ia ore o ’na e au i ta ’na mau faaotiraa, e nehenehe o ’na e faaite i to ’na mau mana‘o ma te faatura, e auraro noa râ oia. Mai te peu e e ere ta ’na tane i te Kerisetiano, e farerei paha oia i te mau tupuraa fifi, e nehenehe râ to ’na haerea auraro e turai i ta ’na tane ia imi ia Iehova.—A taio i te Petero 1, 3:1.

14. E nafea te mau tamarii e faaoaoa ’i i to ratou mau metua e ia Iehova?

14 E faaoaoa te mau tamarii i te aau o Iehova ia faaroo ratou i to ratou metua tane e metua vahine. E faatura e e faaoaoa atoa ratou i to ratou mau metua. (Maseli 10:1) I roto i te mau utuafare hoê ana‘e metua, e pee te mau tamarii i tera noa faaueraa tumu e faaroo, ma te ite maite e e hinaaro rahi atoa to ratou metua i ta ratou turu e haa-amui-raa. I roto i te mau utuafare e amo te mau melo atoa i te mau hopoia ta te  Atua i faataa na ratou, e tupu te hau e te oaoa rahi. E faahanahana te reira i te Tumu o te mau utuafare atoa, te Atua ra o Iehova.—Ephesia 3:14, 15.

FAATURA I ROTO I TE AMUIRAA

15. (a) I roto i te amuiraa, e nafea tatou e faaite ai e te faatura ra tatou i te mana faatere o Iehova? (b) Eaha te mau faaueraa tumu e tauturu ia tatou ia faaroo i to tatou mau aratai? (A hi‘o i te tumu parau tarenihia “ E faaroo i to outou mau aratai.”)

15 Ua faatoroa Iehova i ta ’na Tamaiti ei Faatere i nia i te amuiraa Kerisetiano. (Kolosa 1:13) Area o Iesu, ua poroi oia i ta ’na “tavini haapao maitai e te paari” ia haapao i te mau hinaaro pae varua o te nunaa o te Atua i nia i te fenua. (Mataio 24:45-47) O te Tino aratai a te mau Ite no Iehova te tavini ra ei “tavini haapao maitai e te paari.” Mai i roto i te mau amuiraa Kerisetiano i te senekele matamua, te fana‘o nei te mau matahiapo i te mau faaueraa e a‘oraa no ǒ roa mai i te Tino aratai ra aore ra na roto i to ’na mau tia, mai te mau tiaau ratere. Ia faatura tatou taitahi i te mana faatere o te mau matahiapo Kerisetiano, te faaroo nei ïa tatou ia Iehova.—A taio i te Tesalonia 1, 5:12; Hebera 13:17.

16. I roto i teihea auraa e na te varua mo‘a e faatoroa i te mau matahiapo?

16 E ere te mau matahiapo e te mau tavini tauturu i te mau taata tia roa. E paruparu to ratou, to tatou atoa hoi. Tera râ, e ô taata te mau matahiapo tei horoahia mai no te tauturu i te amuiraa ia vai puai noa i te pae varua. (Ephesia 4:8) Na te varua mo‘a e faatoroa i te mau matahiapo. (Ohipa 20:28) E nafea ïa? Oia hoi e mea tia ia faaî na mua tera mau taeae i te mau titauraa tei papaihia i roto i ta te Atua Parau faaurua e te varua. (Timoteo 1, 3:1-7, 12; Tito 1:5-9) Hau atu â, e pure maite te mau matahiapo o te hi‘opoa i te mau aravihi o te hoê taeae, no te ani i te aratairaa a te varua mo‘a o Iehova.

17. Ia haa ratou i roto i te amuiraa, no te aha te mau tuahine Kerisetiano e tapo‘i ai i to ratou upoo i te tahi taime?

17 I te tahi taime i roto i te amuiraa, aita e matahiapo e tavini  tauturu e vata no te rave i te hoê ohipa na ratou iho â e haapao, mai te faatereraa i te hoê putuputuraa no te pororaa. I roto i taua mau tupuraa ra, e nehenehe te tahi atu mau taeae bapetizohia e haapao i te reira. Aita ana‘e e taeae, e nehenehe te mau tuahine Kerisetiano aravihi e haapao atu. Teie râ, ia rave te hoê tuahine i te hoê hopoia a te hoê taeae bapetizohia, e tapo‘i o ’na i to ’na upoo. * (Korinetia 1, 11:3-10) Aita teie titauraa e faahaehaa ra i te mau vahine. E ravea râ te reira no te faaite i te faatura i te tiaraa upoo ta Iehova i faanaho, i roto i te utuafare e i roto i te amuiraa.

FAATURA I TE FEIA MANA TOROA

18, 19. (a) E nafea oe e faataa ’i i te mau faaueraa tumu o te Roma 13:1-7? (b) E nafea tatou e faaite ai i te faatura no te mau mana faatere a te ao?

18 Te pee maite ra te mau Kerisetiano mau i te mau faaueraa tumu o te Roma 13:1-7. (A taio.) A taio ai oe i tera mau irava, e ite oe e o te mau faatereraa a te ao “te feia mana toroa” i faahitihia. A vaiiho noa ’i Iehova i teie mau faatereraa a te taata ia vai noa mai, e rave ratou i te tahi mau ohipa faufaa, mai te tapearaa i nia i te tahi faito i te nahonaho e te horoaraa mai i te tahi mau tauturu hinaaro-mau-hia. E faaite tatou i to tatou faatura no teie mau mana faatere ma te pee i te mau ture. E haapao maite tatou i te aufau i te mau tute atoa, i te faaî maitai i te mau api parau aore ra papie atoa ta te faatereraa e nehenehe e ani mai, e i te pee i te mau ture atoa tei taaihia ia tatou, i to tatou utuafare, ta tatou ohipa aore ra ta tatou mau tao‘a. Tera râ, eita tatou e auraro i te mau mana faatere a te ao ia faaue mai ratou ia faaroo ore i te Atua. E pahono râ tatou mai te mau aposetolo i mutaa ihora e: “O te Atua ta matou e faaroo e tia ’i eiaha te taata.”—Ohipa 5:28, 29; a hi‘o i te tumu parau tarenihia “ To vai mana faatere ta ’u e faatura?

 19 E faaite atoa tatou i te faatura no te mau mana faatere a te ao maoti to tatou huru. I te tahi taime, e farerei roa paha tatou i te tahi mau tia mana faatere. Ua farerei te aposetolo Paulo i te feia faatere mai te arii Heroda Ageripa e te tavana Phesito. E paruparu ino mau to teie nau tane, ua paraparau râ Paulo ia raua ma te faatura. (Ohipa 26:2, 25) E pee tatou i te hi‘oraa o Paulo, noa ’tu e te tia mana ta tatou e paraparau atu, e taata faatere puai ïa aore ra e mutoi. I te haapiiraa, e tutava te mau Kerisetiano apî i te faatura atoa i ta ratou mau orometua haapii e i te mau tia mana e rave ohipa a te fare haapiiraa. Parau mau, eita tatou e faatura noa i te feia o te farii i ta tatou mau tiaturiraa; e faaite atoa râ tatou i te faatura ia farerei tatou i te feia o te patoi i te mau Ite no Iehova. Inaha, e mea maitai ia ite te rahiraa o te feia e ere i te Kerisetiano e mea faatura tatou.—A taio i te Roma 12:17, 18; Petero 1, 3:15.

20, 21. Eaha te tahi mau maitai e noaa mai i te faaiteraa i te faatura tia i te mana faatere?

20 Eiaha tatou e pipiri no nia i te faaiteraa i te faatura. Ua papai te aposetolo Petero e: “E faaturatura ’tu i te taata atoa.” (Petero 1, 2:17) Ia ite te taata e te hi‘o ra tatou ia ratou ma te faatura mau, e nehenehe ratou e maere roa. A haamana‘o, mea varavara roa teie huru maitai i teie mahana. No reira, e ravea te faaiteraa i te reira no te pee i te faaueraa a Iesu: “To outou maramarama, ia anaana ïa i mua i te aro o te taata nei, ia hi‘o ratou i ta outou parau maitai, e ia haamaitai i to outou Metua i te ao ra.”—Mataio 5:16.

21 I roto i teie nei ao poiri, te faataehia ra te feia aau maitai i te maramarama pae varua. No reira, e nehenehe te faaiteraa tatou i te faatura i roto i te utuafare, i roto i te amuiraa e i roto i te mau tupuraa a te ao e faatae mai i te tahi pae e e turai ia ratou ia haere e o tatou na roto i te maramarama. Auê ïa tiaturiraa faahiahia e! Noa ’tu râ e eita te reira e tupu, te vai ra te hoê tiaturiraa papu. Te au ra te Atua ra o Iehova ia faatura tatou i te taata e e tauturu atoa te reira ia tatou ia vai noa i roto i to ’na here. Eaha ïa te utua maitai rahi a‘e i teie?

^ par. 17 E hi‘opoa te tuhaa hau “E tapo‘i i te upoo—Afea e no te aha?” i te tahi mau ravea au noa no te faaohipa i teie faaueraa tumu.

No te ite atu â

A auraro i ta Iehova mau tiai mamoe

Ua faatoroahia te mau tiaau e te varua mo‘a no te tiai i te amuiraa a te Atua. No te aha ia faaroo ai te mamoe ia ratou?